Pathian thuin Mizoram leh hnam a tih danglam dan – K. Zalawma

PATHIAN THUIN KAN RAM LEH HNAM NUN A TIHDANGLAM DAN

K. Zalawma

Aw, i thuruatte chu zâwm tûrin ka awm dânte hi tihnghehin awm teh sela aw! Sam 119:5.
Ka hming chhâlin dâwt thu in hnênah an sawi a ni e; keima tirh an ni lo ve,” tih hi Lalpa thuchhuak a ni. Israel ramah chuan thil âtthlâk tak an tiha, an ṭhenawm nupuite an uirea, ka hming chhâlin ka thupêk lohva dâwt thu an sawi avângin; kei a hretu leh a hriatpuitu ka ni e,” tih hi Lalpa thuchhuak a ni. Jeremia 29:9‭, ‬23.
Sual dovin thisen chhuak khawpin in la ṭang lo va, Hebrai 12:4.

Pathian thu kan rama a lo luh hmaa Pi Pu-te khawvel thlir dan (Mizo Sakhua):
Pi pute chuan khawvel hi hmun hnihah an ṭhen phawk a. Ṭhenkhatna chu Thlarau khawvel vuah ila, ṭhen hnihna chu Hring khawvel vuah ila.
Hring khawvelah hian Mihring, rannung chi tirêng nunna neiho hi kan chêng a, ‘thlâ’ kan nei ṭheuh bawk. Lung te, lei te leh tlâng te hi kan chênna a ni a, heng hi chuan ‘thlâ’ an nei ve lo.

Hring khawvel hi Thlarau khawvel mite siam a ni a, ran kan vulh ang hian Hring khawvela chêngte hi min siam a, min enkawl a. Thlarau khawvel mite hi vanah te, lei hnuaiah te, tlâng, pûk leh sihah te an chêng a. Anni chuan min hmu thei vek a, keini erawh chuan kan hmu ve thei lo. Thadoho sawi dan chuan mihring tui inah ‘chollaivom’ an phul a, kan hmu ve thei ta lo a ni an ti.

Thlarau khawvela chêng ṭhenkhat chuan kan ṭhat min duhsak a, min vêng a, hlauhawm lakah min hum a, chungho chu Thlarau ṭha vuah ila. Aṭhen erawh chuan kan thil neih te an awt a, pâwngpaw inchhuhsak ngawt theih a ni si lo a, an pawi kan khawih min châng ràn a, kan khawih palh vaih chuan min sawisa ta ṭhin a ni.

Ṭhian rual pâwl khat an ramvâk a, an hâwn chuan an ṭhian pakhat chu a dam lo a. Băwlpu an ko a, ani chuan mar a han dek a, “huai ṭhutna chuamah i ṭhu a nih hi, âr a ngên a ni” a ti a; âr chuan an thawi a. Huai chu a lungawi a, damlo pawh chu a lo dam leh ta a.

Thlarau ṭha kan tihte chu heng hi an sawi dan chu a ni:
1) Pathian
2)Khua
3) Sa
4) Khaltu.
Vân lama chêng Pu Vana tih te, Vanhrika tih te, Khuanu, Khuapa tia an sawi te a ni a. Tlâng lal, Lasi leh Pheichham te pawh hi a ṭha zinga telh awm a ni.

Thlarau chimawm an sawite chu :
1) Huai, (Huai hi an awmna hming an keng mai a, Rama awm chu Ramhuai, Siha awm chu Sihhuai etc
2) Phung
3) Chawm
4) Khawhring, Khawmu
5) Tulum
6)Maimi
7) Tau
8) Chhawihfa
9) Thlahrang
10) Hmuithla
11) Dengsur.
(Pi Pu-te chuan heng hi an bia a, chu chu sakhaw bia an ti.)

Bia: Tlangvalin nula a ‘bia’ kan tih chuan nupuiah, kumkhuaa awm dunpuiah a sâwm kan tihna a ni a, thu sawi hoa kan inbia tih ang mai mai a ni lo. Pathian an bia tih chuan an hnênah Pathian awm reng turin an sâwm tihna a ni. Sakhua an bia kan ti a, chhungril lam sawina a ni, an biaka an thil tih kha ‘hmang’ tiin an sawi bawk, Sakhua an hmang, Kel khăl an hmang tih chu an biaka an biak ṭuma an thil tih sawina a ni. (Rev. Zairema, Pi Pute biak hi – p1,3,4.)

Sakhuanaah:
Kan Pi Pute sakhaw biak chu tam tak a ni tih kan hre ta a, tlawn lungawi ngai te pawh an ni. An biak dan pawh inthawi te, Hual te, Ài te, Làm te a ni. Pathian thuin kan ram a lo luh chinah chuan kan sakhua a lo dang lam a, a biak dan pawh a lo dang lam a, tlawn lungawi lam aiin Lal Isuan min tlannaah Pathian a lungawina thuin Pathian min biaktir ta zawk a. Hmanlaia hlauh ngah tak ṭhin kha vawiinah chuan thlamuanna thu kan tlangaupui ta zawk a, thiltiha sakhua tihlawm tum ṭhin khan, kan biak Pathian thil min tihsak avangin lawmna thar kan chhar ta zawk a ni.

2. Lehkha zirnaah: Tun hma chuan zawlbuk hi an zirna in lian ber a ni a, mahni inchhûngah nu leh pa aṭangin engkim an zir ṭhin a, savun leh kha an neih ve ber kha Thlanrawkpa Khuangchawi ṭum khan uiin a eisak daih avangin lehkha an thiam ve ta lo. Kristian kan nih hma khan Bengali ṭawng zirna Mizoramah a awm tawh nia sawi a ni a. Chanchin Ṭha lo thleng lo sela chuan Bengali ṭawng hlirin lehkha kan ziak ngei ang. Kan Missionary-ten keimahni ṭawng ngeiin A AW B min siam sak a, Mission School ṭha tak min din sak a, Sikulah sakhuana an lalut tel a, kan nun a siam ṭha hle.
Vawiinah chuan zirna sang University thlengin kan ramah a awm ta. Mizo Medium aiah English Medium te kan ngaisang zawk ta hial mai. Mission School angin Sorkar Schoolah chuan sakhuana an kalpui tel ve si lo va, Sorkar school an fail ṭan a, Private school-ah kan fa naupang tê tê aṭangin kan kaltir a, mizo ṭawng aiin sapṭawng thiamtir kan tum nasa zawk ta bawk a; kan lehkha zirna lo danglam zel hi enchian deuh chu a ngai mai thei e.

3. Eizawnnaah: Pathian thuin kan ram leh hnamah thu a neih hma chuan kan eizawnna ber chu thlawhhma nei a, tûk tina ram hnà thawh a ni ṭhin.Tunah chuan Pathianthuin min tichangkăng a, ram hnathawka ei zawng tak tak chu mi tlem tê an ni tawh zawk awm e. Sawrkar hna te, sumdawnna chi hrang hrang leh Contract hna te thawkin ei kan zawng ta a ni.

4. Chenna in leh lovah:
Pathian thuin kan ram a rawn thlen hma chuan kan chenna in chu thing leh maua rel, a chung di leh thiltheka chih a ni mai. Chanchin Tha avangin kan in leh loin hma a sâwn zel a, Concrete building tha pui puiah kan chêng a, kan in leh a vêl pawh a faiin ran zun leh êk pawhin min chiahpiah ta lo.

5. Silh leh fenah:
Tun hma chuan kan inthuamna chu thlawhhmaa la kan thar kha puanah siamin harsa takin thuamhnaw kan siam chhuak a, a rawng tihdanglam nan pawh hnim chikhat ‘ṭing’ tuiin kan dum mai thin. Tunah chuan India siam mai ni lo, Foreign puan ṭha tak tak nen kan inthuam ta. Mizo pa leh Sap pa incheina leh silhfen leh mut bu pawh a dang chuang tawh lo a nih hi.

Heng hmasawnna kan neih zawng zawng hi Mizote tân chuan Pathian thu vang liau liau a ni e. Pathianthu chu nei lo ila chuan Kùrta leh lungi kaiha sàri sin duai duai tur kan ni ang. Kan ram leh hnam min chawikângtu Pathian thuhi kan awih zel loh va, khawvel ropuina leh nawm chenna te, Pathian awm rin lohna te hian min hneh zawk vaih chuan, khawvel lamah sâng hlein inhre mah ila, hnuhthlakin kan la awm ngei ang le.

About the author

Leave a Reply

Your email address will not be published. Required fields are marked *

error: Content is protected !!