Pathian thu hmanga kan ram leh hnamin siam that a mamawhte – K. Zalawma

PATHIAN THU HMANGA KAN RAM LEH HNAMIN SIAM ṬHAT A MAMAWHTE

K. Zalawma

1. Ram rorelnaah:
“Nimahsela, rorelna dik chu lui angin luang sela, felna chu luipui kang ngai lo angin luang rawh se.” Amosa 5:24.
Ram hrang hrang ro inrèl dân hi a in ang vek lo va, India ramah chuan Dân siam Pawl-in an dân siam kha hman theiha Act, rules and regulations an siam hunah sorkar hnathawk leh roreltu ten an kengkawh ta ṭhin a ni. Israelte kha Lal rorelna hnuaia inkaihruai an ni a, sakhawlamah chuan lal an inrawlh vak lo va, lalten Pathian duh zawnga ro an rèl loh leh mipuiin Pathian thu an pen san chuan Pathianin zawlnei hmangin kawng dik a hrilh ṭhin a. Lal laka tlaktlum duh zawlnei der pawh an awm ve zel bawk.

Kan ram hi Kristian ram kan nih angin kan dân siamtu (Legislature party) te, rorêltute leh sorkar hnathawkte pawhin Israelte hnena Pathian thu lo thleng ṭhin kha vawiin thleng hian kan pawisak ve zel tur niah Kohhran chuan a ngai ani. Rorêltuten rorêlna dik an kalpui theih nan Kohhran pawhin kawng dik a hrilh ve ngam tur a ni ang.

Zawlnei Amosa hun laia rorêltute chuan rorêlna dik leh fel an kalpui loh avangin felna leh rorelna dik chu lui anga luang tur a nih thu zawlneiin a au chhuahpui a ni.

Ka ramah pawh chu rorelna dik leh fel chu Pathian thu hmanga kalpui a nih loh chuan ram leh hnamin a tuar hun a la thleng ngei ang. Miin thil sual titute police hnenah an hrilh a, dan angin police-in an man a, an chungthu chu magistrate lamin court-ah a lo rêl a. Court hi a fimkhurin thil tisual lo hrem an nih loh nan case nei chu thuhretu an awm loh chuan thiam loh a chantir thiang lo a ni deuh ber a. Thil tisualtu tam tak hi court rorelna chuan a chhuah zalen fo ṭhin.
Hei hi rorel dan dik chu ani ngei a, rorelna dik leh fel erawh chu a ni vek lo theiin a lang.

Department hotute hian ram tâna sorkar hna an kenkawhna chi hrang hrangah hian, dik leh fel tih tling pha lo a tam hle awm e. Mi tam tak political party-a an telna chhan chu eizawnna chikhat ang deuha an ngaih vang a ni fo.

.Chuvangin rorel lai party memberte chu an mawm deuh ngei ngei ṭhin. Heti hi a nih avangin sorkar hnaa intervew-naah pawh a thiam leh tling zâwk aia party worker chhungte duhsak zawkna te, department hotute aia party hruaitute thu a lal zawk châng pawh a awm ṭhin.

Pathian thu angin kan ram rorelna hi dik tak leh fel takin, luipui angin i luantir ve tawh ang u.

2. Eizawnnaah:
“Tihnuam tak leh thuawih taka in awm chuan, in rama thil ṭhate hi in ei ang; nimahsela, in duh loh va, in hel chuan, khandaihin a ei zo vang che u,” Isaia 1:19,20.
Kan ram eizawnna hi tun hma chuan thlawhhma lak hi a ni ber a, tunah chuan chu chu a ve lek a ni ta. Sawi sei ngai lovin chhûng tin kan inchâwmna apiang hi kan eizawnna chu a ni mai. Sorkar hna aṭangin sumdawnna chi hrang hrang, workshop leh industry te, lirthei lam te, kut themthiamna chi hrang hrang leh ram hnathawh tein ei kan zawng ta a. Sum peipun lamah pawh ṭan kan la ta hle.

Heng zawng zawngah hian dik tak leh rinawm tak, taima taka ei kan zawn a ṭul a, inhlawhfa pawhin kan hlawh phû tawkin kan thawk tûr ani.

Pathian thuin ‘tihnuam tak leh thuawih tak’ a tih chu Pathian duh ang taka rinawm tak leh dik taka eizawnna hna thawh hi a ni. Chutianga kan awm chuan kan ram hausakna hi kan haichhuah belh zel dawn a, kan mamawh mi rama mi chawk luhna tur pawh kan neih belh zel bawk ang. Chuti lova rinawmna leh dikna aia hlemhlêtna leh kut tling lova sum hmuhna leh sorkar phal loh smugling lam tih kan hreh loh chuan, sum lamah hausa mah ila, khandaihin min ei zo tho dawn a ni. Ruih hloa sumdawng leh tihching kan tam tak avang hian kum 50 tling lo vin kan ṭha laite an thi ta zawih zawih mai.

Ram rorêltu aṭangin, sorkar hnathawk leh kuthnathawktu thlengin Lalpan “hawh teh u, i ngaihtuah tlâng teh ang u,” tiin min siam ṭhat duhin min au a nih hi.

3. Kohhran inpumkhatnaah:
“Ka Pa Thianghlim, nangin kei mi pekteho hi i hmingin hum rawh. Pumkhat an nih theih nan, keimahni ang bawk hian.” Johana 17:11b.
Pathianin Kristain sual lakah min ko hrang a, pumkhata awm tura kohhran kan nih laiin Setana chuan tihdarh leh tihhran hi a tum ngar ngar thung. Kan inrem lohna tam tak hi chu mahni ṭha leh dik zawka kan inhriat vang te, kan tlawm theih loh avangte a fo ṭhin. Pathian thu ziktluak tak hriat tum aia uar bik lai neihte hian inpumkhatna a dal thei. Kan rin dan leh hriat dan in ang lo avanga lawi ho thei lo pawh kan ni bawk ang.

Kan rin Pathian erawh chu a thuhmun a, hmun khatah lawi za thei lo pawh ni ila, intai lo ila, kan rawngbawlna ṭheuh hi in pawmpui ila, inṭanpui tawn thiam ila, pâwl ang talin thawkho thei ila, chhiatni ṭhatni-a pawl tin kan in thurual ang hian Kohhrante hi inngeih tlang ila a va nuam dawn em! Lal Isuan pumkhat ni turin min ṭawngṭaisak reng si a.
4. Chhungkua leh khawtlang nunah :
“Lei chi in ni e….. khawvel êng in ni e,” Mat. 5:13,14.
Tun laiin chhungkua in rem lo leh khawsa ho thei lo kan tam ta. Ruih hlo leh thatchhiat avanga chhungkuaa hlim lohna thlen ṭhalai tam tak kan awm.

Khawtlangah pawh ṭhalai hnathawk peih lo, ruih hlo ngawl vei leh huan lo ram lama mi thawh sa lâk ching kan tam ta.
Heng hi kan nih tur anga kan nih loh vang a ni. Misual kan tih te siam ṭha tur chuan mi ṭhate in phahhnuai hmasak a ngai fo ṭhin.

Chi hian thildang tân tuina leh ṭhatna a thlen dawn chuan a mah a tui ral ṭhi. Chutiang chuan mahni ṭheuh hi mi dang tâna tuiral hmasa tur kan ni.
Khawvel èntu tûr kan nih hi i hre reng ang u.

5. Chanchin Ṭha puan darhah :
“Khawvel zawng zawngah kal ula, Chanchin Ṭha hi hril rawh u,” Mk. 16:15.
“I rawngbawl duh lo hnam leh ram chu a boral dawn si a,” Isaia 60:12.
Chanchin Ṭha hril hi Kohhranho hna pui a nih avangin tú Kohhran pawhin kan tih tur a ni a, ring lo mi ringtua siam te, mi hnungtawlh hruaikir leh te, ringtu chawm puitlinte hi englai pawha Kohhran hna a ni. Mi Kohhran member chhuhsak zâwnga ṭan lak hi inpumkhatna tichhetu a nih theih avangin, ring lo mite ringtua siam lama ṭan lak hi Chanchin Ṭha kan hrilna tur pawimawh tak a ni e.

About the author

Leave a Reply

Your email address will not be published. Required fields are marked *

error: Content is protected !!