Pathian ram lo thlen hun tur – Rev. VL Nithanga

Lal Isuan, “Pathian ram chu hmuh theihin a lo thleng lo ve, ‘Eng teh u, heta hi’ emaw, ‘Saw ta saw’ emaw an ti hek lo vang. Ngai teh u, Pathian ram chu in zîngah (entos) a awm a ni” a ti a (Lk.17:20,21).

Juda-hote khan Pathian ram an beisei a, Mesia Lalram lo thleng tur chu an thlir a, a lo thlen hunah chuan Mesia chuan hnam dangte hneh sakin Juda-hote chu a chhanchhuak ang a, an mahni rapbet țhintu hnam dangte chu rapbet lêt ve tawh turah inngaiin, chu ram lo thleng tur chu no takin an nghâk a, an ram chu nasa taka danglam chhuak turin an beisei a ni. Chutiang rilru pu chung chuan Pharisai-te khan Isua chu Pathian ram lo thlen hun tur an zârwt a. Lal Isuan, “Pathian ram chu hmuh theihin a lo thleng lo ve, ‘En teh u, heta hi’ emaw ‘Saw ta saw’ emaw an ti hek lo vang” a ti a. Helaiah hian Juda-hote hian an ramah an awm dan ang angin Pathian ram chu nghak thleng ngawt turah an inngai a. Pathian hun ruat a lo thlen hunah Pathian ram chu lo thleng phut tur leh, rawn pialral uarh mai turah an ngai ni ngei tur a ni. An ram chu tihchaka awm thut turin an ngai a ni ber mai. Mahse, Isuan chutianga an duh emaw duh lo emaw, an awm dan ang anga, hai rual loh va lo thleng phut tur a nih loh zia a sawi a ni. “Heta hi, emaw, Sawta saw, emaw an ti lo vang. Pathian ram chu in zîngah (entos) a awm a ni,” a ti a ni.

“Pathian ram chu in zîngah (entos) a awm” a tih hian, in zingah tih tak, greek țawnga entos hi William Barclay-a sawi dan chuan awmzia pahnih a nei a.

Pakhatnaah chuan, in chhûngah (within you) tihna a ni a. Chumi a nih chuan Pathian ram chu, a leilung lam leh a ramri huam chhûng lam ni lovin, mihring thinlung chhûngah zâwk a lo thleng tihna a ni. Pathian ram chu kan kawchhûngah, kan thinlung chhûngah a lo thleng a, min luh khung a, chu chuan kan nun pumpui a rawn fan chhuak a, kan pawn lam landân thlengin min rawn tidanglam ta a ni. Chutiang mi chuan politics pawh khêl se, a thinlung chhûng ațanga a pawn lam landân thlenga Pathian ram thu chuan a fan chhuah vek tawh avangin, Pathian thu ang zelin politics a khêl lo thei lo ang a, ram hruaitu pawh lo ni se, Pathian thu ang zelin ram a hruai lo thei lo ang. Chutiang ram hruaitu nun chuan ram mipui nunzia a siam țha zel ang a, kan nun chhûngril țheuhva Pathian ram lo thleng chuan kan taksa leh kan pawn lam landân thlengin min fan chhuak zel ang a, Pathian ram chu kan ramah pawh hian a lo lang fiah zel tawh ang. Tichuan, a mi chengte Pathian ram nunzia avâng chuan a ram pumpuiah pawh Pathian ram chu a lo thleng ang a, kan ram chu tihdamin a awm leh ang.

Pahnihnaah chuan, Greek țawng ‘Entos’ tih chu, ‘in zîngah (among you)’ tihna a ni bawk. Lal Isua, Lal leh chhandamtua pawma, piangthar tawhte thinlung chhûngah chuan Isua chu a chên tlat tawh avângin, chutiang mite awmkhâwmna hmun leh ram apiangah chuan kan hnênah, kan zîngah amah (Lal Isua) chu a awm zel a. Mizoram mipuite pawh hi kan pianthar tak taka, kan thinlung chhûngah Isua Lalram din a nih tak tak hunah chuan, amah ringtute zingah hian Isua chu a awm ang a. Ram hmel a lo danglam tawh ang a. Chutih hunah chuan kan ram politics pawh hi, Pathian mite tih turah kan ngai zâwk tawh ang a, Pathian mi ni tak tak lote tih ve turah kan ngai tawh lo zâwk ang. Tichuan, kan ramah hian Pathian ram chu a lo lang fiah tak tak tawh ang.

Leave a Reply

Your email address will not be published. Required fields are marked *

error: Content is protected !!