Pathian leh Kohhran tana rinawm – Sermon

-Upa K. Zalawma

Keiniho hi Krista rawngbâwltuah leh Pathian thurûk enkawltuah miin min ngai rawh se. Hetah hian enkawltu chu mi rinawm nih a ngai bawk a ni.

1 Korinth 4:1‭-‬2.

RINAWMNA:
Rinawmna tih chuan mawhphurhna hlen chhuak, tihtur ti zo tih te, thurûk zĕp thei leh sawi tur ṭul huai taka sawi ngam te a huam ang.

1. Pathian tâna rinawm:
Thuthlung Hluiah Pathian tâna rinawm tak tak zingah heng mite hi lo la chhuak ta ila:
1) Nova:
Nova chu a hunlaia mite sualnain Pathian a tilungawi lo va, tuilĕt hmanga hrem a tum a, Nova leh a chhungte leh rannung chithlah turte chuanna tur lawng tù turin Pathianin Nova chu thu a pe a; thuawih takin kum za lai lawng a tù a ni. Pathian thu pĕk awiha zawm hi rinawmna a ni.

2) Abrahama: Abrahama chu Ur khua leh Haran khuaa a awm laiin Pathianin ram a tiam lama kal turin a ko va. A kalna tur a nawm leh nawm loh lam ngaihtuah lovin a kal mai a. A upat hnuah Lalpa Vantirhkohin, kum khat hnuah Fapa a hrin tur thu a hrilh a, a awih mai a; Pathian thu ringhlel lova awih mai hi rinawm nih a ni.

3) Mosia:
Mosia chuan a tlânchhiat san hnu Aigupta ramah Lalpan Amite hruai chhuak turin a tir kir leh a. A tân hlauhawm hle mah se thuawih taka Pathian thu a zawm avangin, Pathian chhungte zinga rinawm nih a hlawh a ni.

4) Daniela leh a ṭhiante:
Daniela leh a ṭhian pathumte kha mi ramah salah an tâng a. Ring lo mite zingah pawh ei leh in leh ruih theih thil lakah an insum tlat a, hnam dang Pathian lakah an inthiar fihlim a, sakeibaknei pûk chhûngah leh rawhtuina meipui chhûngah pawh Pathian an rin tlat avangin chhanhim an ni a; chu chu Pathian laka an rinawmna lantirtu a ni.

5) Josefa:
Josefa chu bawih nimah se, a pu Potiphara lakah a rinawm a, tisa châkna sual a do tlat a, Aigupta ram lalber dawttu a ni ta hial a, chu chu thih pawh hlau lova Pathian tâna rinawm a nihna pâr chhuak chu a ni.

Thuthlung Hlui hunah chuan Kohhran kan tih ang hi Pathian mite, pungkhawmho tiin an sawi ṭhin.

2. KOHHRAN TÂNA RINAWM:
Lal Isua thih hnuah chuan ringtute kha Kohhran an ti. Lal Isuan, “He lungpuiah hian ka Kohhran ka rem chho vang a…” a tih ang khan Amah lungpuiah chuan Kohhran ho a lo inrem chho ta zel a ni. Sual ata min ko chhuak/ko hrangtu Pathian ringtute chu Kohhranho tih an ni ta zel a ni.

Kohhran tâna rinawmte:
1) Lal Isua:
Lal Isua chu a Kohhrante tan a tawp thlenga thawkin, tuarin a thi a, chu chu a pa thu a awihna leh, a Pa leh a Kohhran tâna a rinawmna chu a ni.

2) Tirhkohte:
Lal Isua thupĕk ti hlawhtling turin Tirhkohte chuan an thih ni thlengin Kohhran din turin thu an hril a, chu chu Kohhran tâna an rinawmna chu a ni.

3) Kohhran pate:
Thuthlungthar hun lai vela Kohhran hruaitu, Tirhkohte chhangdâwltute kha khawvel ropuina leh nawmsakna kalsana Krista leh A Kohhran tâna rinawm leh thawk tute an ni.

Tlangkawmna:
Pathian leh Kohhran tâna rinawmte chuan anmahni hamṭhatna leh dinhmun benbel aiin a kotu Pathian leh Kohhran hna an thawk a, a hunah Pathian bia leh chawimawiin a Biak bûkah an inkhawm a; mi dangin Pathian an hmuh ve theih nan an inphahniam a, sawi leh puan ngai an puang a, thawh ngai an thawk a, ngawih a hunah an ngawi tlat a, pĕk ṭul an pe a, thih hial pawh an ngam ṭhin. Chung mite chu Pathian leh Kohhran tána rinawm chu an ni.

Keini hi Pathian leh a Kohhran tân kan rinawm ve dawn em le?

Rinawm leh fel taka awmin,
Ni tin rawng i bawl tlat ang;
A ropuina chang ve turin,
Dam chhûng hian i bei zĕl ang.

Leave a Reply

Your email address will not be published. Required fields are marked *

error: Content is protected !!