Pathian chatuan thil tum – Laltanpuia Ngente

PATHIAN CHATUAN THIL TUM

Lalṭanpuia Ngente

Pathian thu kan chhiar lai te, ringtu nun kawng kan zawhna turahte hian Bible bu pumpuia Pathian thu zawng zawng thil tum khaikhawmna, ‘Pathian thu laimu’ hi hriat fiah hmasak tuma ngun taka ngaihtuahna sen ṭhin a pawimawh em em a. Mahse, Pathian thu zirtu, thuhriltu leh rawngbawltute zingah pawh Pathian thu an hriat dan leh an tuipui zawng azirin Bible bu pum pui tum laimu an hriatthiam dan erawh a in naupan hleih zung fo dawn a ni.

‘Pathian chatuan thil tum’ hi Bible pumpui laimu a ni a, chu a chatuan thil tum chu ‘A chatuan lawmna fa siam’ a ni. Tichuan, a chatuan thil tum tihlawhtling tur chuan ‘A Chatuan remruat’ a awm leh a, Bible thu tin hian a chatuan thil tum tih hlawhtlinna tura a chatuan remruat chu a hawi vek bawk a ni tih hi hriat hmasak a pawimawh hle.

A hmasain he Pathian thu chang tawite aṭang hian eng chenin nge Pathian thu kan pawm tih i han inenfiah hmasa lawk teh ang.

Rom 11:36 “Amah aṭang leh, amah avang leh amah atan thil zawng zawng a lo awm a ni si a; ama hnenah chuan chatuanin ropuina chu awm rawh se, Amen.” tih thu hi.

He lai Pathian thu hi i thinlung zawng zawngin i Amen thei em le. Engkim mai hi Pathian aṭanga chhuak vek a ni a, ama tan vek a ni a, amahah a hmawr bawk a ni vek bawk ang tih hi.

Lal Isua thihna leh thawhlehna te kha ‘nang leh keia tan bil chauh’ emaw i lo ti palh a nge, a hmasa berah chuan Pathian tan a ni a, a pahnihnaah mihringte chu kan awm ve chauh. Van ram i kai a nih chuan i tan khawngaih thilthlawnpek ropui tak a ni ang a, a hmasa berah chuan Pathian siam i ni ang bawkin Pathian tana chhandam i ni; a chatuan ro luah pui turin. Hengte hi hrethiam tur khawpin Pathian thu i tuipui peih em le.

Lei leh van siam te, mihring siam te, Setana te, suala tlukna te, tlanna te, rinna te, chhandamna te, hremhmun te, vanram te, ropuina te, lalna te, heng zawng zawng hi Pathian aṭanga chhuak vek a ni a, Pathian vanga lo awm vek a ni bawk a, Pathian tan vek a ni bawk tih hi i ngaihtuah ngai em. Thil zawng zawng tih hian huam phak loh pakhat mah a nei hauh lo. Chutah chuan keini tan Chatuan remruat neiin malsawmna leh anchhia a phum mai a lo ni.

A hmasain ‘Pathian chatuan thil tum’ tih leh ‘Pathian chatuan rem ruat’ tih hi ngaih pawlh lo ila. A pahnih hian inkawp leh in laichin tlat, mahse thil hrang daih ni si an ni. Chatuan chu kan hria; bul ṭan ni nei lo tawp ni pawh nei lo. Chu chatuanah chuan Pathianin thil tum (Project) pawimawh tak pakhat a nei a, chu chu “A chatuan lawmna fa siam” a ni a, hei hi ‘Pathian chatuan thil tum’ chu a ni. Tin, Pathian chuan chu a thil tum chu a tih hlawhtlin theihna turin kawng fel tak chatuan hawlh tlang raih mai ruahman lawk sa a nei bawk a, chu chu ‘Pathian chatuan rem ruat’ chu a ni.

Aw le, tunah hian “Pathian chatuan thil tum” chu sawi ka han tum ve a ni a, amaherawh chu Pathian thil rel dante hi a hre tlem ber ka ni lawi si ang. Kan Pathian hi mihring finna aṭanga hriat fiah zawh rual a ni lo va, a thilsiamte hnenah a duh angin a inpuang ṭhin a, a duh chin a hriattir a, a duh chin a thup bawk a, Pathian a nih avangin tuma hnial theih a ni lo.

# Leia vaivuta mihring a siam hma leh, Vantirhkoh ten thil an tih sual hma daih tawhah khan, van hmunah te khian Pathian chu ropui takin a inkulh rup tawh a. A awmzia chu, Pathian chu “Alpha leh Omega, Hmasa ber leh hnuhnung ber, a bul leh a tawp” a ni a, mihring ngaihtuahnain a chhui theih hmasa ber ai pawha hma zawkah khan Pathian chu a ropui hle tawh tihna a nih chu. A ai a ropui reng reng an awm lo va, a tluk pui pawh an awm phak hek lo.

Tichuan Pathian chu engkim chunga thuneitu a ni a, thil zawng zawng chu a ta a ni vek a. Englai pawha a rawng bawl sak tur Vantirhkoh chhiar sen rual loh a nei bawk a. Nimahsela chung zawng zawng chungah chuan a lawm a kim thei lo va, a nun ruak hnawh khata, a chatuan hlim leh lawmna thlen thei tur, A chatuan lawmna fa neih a duh tlat a.

A chatuan lawmna fa a zawnna leh a buatsaihna kawnga Pa remruat dan hi a makin a ropui takzet a, he a chatuan lawmna fa buatsaih hi a ni “Pathian chatuan thil tum” tia kan sawi chu. Chu a chatuan lawmna fa a buatsaihna tura a remruat dan fel tak chu ‘Pathian chatuan rem ruat’ a ni bawk a. A duhtuiin a duh uluk em em a, a kawngte chu a felin Pathian tak a nih zia hei hian nasa takin a lan tir chiang em em a ni.

Ani chu hun leh hmunin a thunun ve loh, hun chunga lêng a nih avangin, van boruak zau taka ni leh thla leh arsi zawng zawng te, leilung leh a chhunga thil awm zawng zawngte a taka an lo lan chhuah hma daih khan Amahah chuan engkim siama awm tawhin a thleng famkim vek tawh a. (Thuhriltu 3:15 Thil awm mêkte hi lo awm tawh sa kha a ni a: thil lo awm tûrte chu lo awm tawh sa bawk kha a ni; Pathian chuan a bo tawhte kha a rawn la kir leh zel a ni.)

Leia vaivuta mihring a siam hma leh, Edenah tlukna a thlen hma leh, Mihring fapa kross lerah a taka khaikana a awm hma daih khan Pa thinlungah chuan Krista chu talha awm tawhin, chung zawng zawng chu a thleng famkim vek tawh.

1 Petera 1:20 ani chu leilung pian hmain ruat lawkin a awm ngei mai; nimahsela, hun hnuhnungahte hian nangmahni avangin inlarin a awm a;

Thu Puan 13:8 Tichuan, leia awm zawng zawng, leilung pian tirha talh tawh Beramno Nunna Bua hming ziak loh apiang chuan, Pathian chibai bukin an buk ang.

“Ngai teh, ka lo kal thuai dawn e; mi tin an thiltih ang zela pek turin ka lawmman ka hnenah a awm” tih te, “A hmaah chuan hnam tin an inkhawm ang a: beram vengtuin kel zing ata a beramte a hlir angin anniho chu a hlir ang” tih zawng zawngte pawh hi thil siamte tan chuan kan hmabak ni rih mahse Pa ah chuan eng kim thawh zawh vek tawh ang a ni bawk a.

Tichuan Pa Pathianah chuan thil bul ber aṭanga a tawp ber, leilung pian hma aṭanga chatuan thlengin engkim awm tawh leh thleng tawh, amahah chuan thleng zo dim diam tawh ang vek a ni; ani chu hunin a thunun ve loh avangin. Heng zawng zawng hi Ama hun ruat ang leh a rel lawk ang zelin a takin a lo lang chhuak a, hun lo la awm turah pawh a la lang zel dawn bawk a ni. A chianna atan heng chang te hi han tar lang ila. (1 Petera 1:20 ani chu leilung pian hmain ruat lawkin a awm ngei mai, nimahsela hun hnuhnungahte hian nangmahni avangin inlarin a awm a.) (Hebrai 4:3 ……. leilung pian tirh ata hnate chu thawh zawh a ni tawh na a…)

Aw le, Setana pawh hi suala tlu turin a siam em ni.? Sualah a tlu dawn tih a hre lâwk lo em ni.? Sualah a tlu dawn tih hre lâwk chungin a siam em ni.?

Pathian chuan a duh phawt chuan thil engkim, a bul ber aṭanga thil lo la awm tur zawng zawng a hre lâwk vek thei a, chutih rualin engkim chunga thuneitu a nih avangin a duh duh a hre lawk duh lo thei bawk. Tin, keini mihringte anga hriatna thunun thei lo a ni ve lo va, chuvangin Pathian pathianna hi mihring nihna aṭanga teh chi a ni lo va, a thuneihna leh thiltihtheihna huam chin nei lo aṭanga chhûta ngaihtuah a ngai a ni.

Chuvangin, Setana hi sualah a tlu dawn tih hre lawk chungin a siam em ni.? tih te, mihringte hi sualah an tlu dawn tih hre lawkin a siam em ni tih te hi chu Pathian thuneihna leh thiltihtheihna tawp chin nei lo aṭangin ngaihtuah ila, a duh chuan a hre lawk thei a, a duh chuan a hre lawk lo thei bawk tih hi hre hmasa chunga chhût a ngai a ni.

# Chuvangin, helaiah hian ruat lawk chung chang sawi fiah ngai tlem a awm a, han kal peng lawk ila. Ruat lawk chung changah hian kan hriat tur pawimawh em em a awm. Mi ṭhenkhatin chhandamna chang tur leh chang lo tur te, mimal tin pian hun leh thih hun, an dam chen tur te thlengin a rel lawk vek angin an ngai ṭhin a, hei erawh hi chu Pathian rel lawk dan a ni lo. (He lai chung chang hi ‘Pathian chatuan rem ruat’ tih chhunga khung tur chi a ni a.)

Pathian chuan khawvel kalphung pangngai tur ruahman sa a nei a, mihringte kalphung tur te, chhandamna leh hremna kalphung tur te, chu mai bakah van lam te thleng khian kalphung a siam lawk vek a. Chutah chuan hunbi te, natna te, vanduaina te, kawng ṭha leh ṭha lo te, nuihna leh ṭahna te, malsawmna leh anchhia te, thil dang tam tak te a dah lawk vek a. Mihringte chu chi tam tak thlaha leilung luah khat tur te, leilung kalphung a ruahman sa zuia nung tur te, ama tehna aṭang chhûta ‘a duh apiang’ a tih anga chhandamna kawng a buatsaih sa chu duh leh duh lo awm thei tur tein min ruat lawk a, kan tana kawng ṭha leh ṭha lo min kawhhmuh a, ngaihtuah theihna thinlung min pe bawk a, zawm leh zawm loh chu kan zalennaah a dah thung a.

Mimal tin chung thua Pathian rel lawk dan pawh heti hian i han sawi teh ang. Entir nan, Thufingte 23:21 ah chuan, “Zu rui mite leh sa heh mite chu an lo rethei dawn si a.” tih kan hmu a. Mi pakhat ‘Liana’ aṭangin entirna han sawi teh ang. Liana chu Pathian chuan a duh phawt chuan he leia a lo pian ve dawn leh dawn te, a lo pian hun leh thih hun tur te, a retheih dawn leh dawn loh te, a pianthar dawn leh dawn loh te thlengin a hre lawkin a rel lawk sak vek thei a, mahse, hetiang hi ama thuneihna tuma sawi buai theih loh hmanga a hriat lawk duh loh leh a rel lawk duh loh thil a ni a, thil engkim nihphung tur a ruat lawk hnuaiah zalenna zau tak a hawng zawk a ni. Tichuan, Liana chu rethei tura ruat lawk a ni bik lo va, hausa tura ruat lawk lah a ni hek lo, zu rui mi leh sa heh mi a nih chuan a hmabak chu retheih a ni mai.

Tin, Ephesi 6:2-3 ah chuan, “I nu leh i pa chawimawi rawh,” (chu chu thupek tiam nei hmasa ber a ni.) “Chutichuan, i tan a ṭha ang a, leiah hian i dam rei bawk ang.” tih kan hmu bawk a. Nu leh pa thu awih chu dam reina a ni a, a lehlamah awih loh chu dam rei lohna a ni leh mai.

)

Heng bakah pawh hian mihringin kan hriatthiam phak loh vanduaina tia kan sawi te pawh a awm kan ti bawk ṭhin a. Amaherawh chu, vanduaina kan tih tam tak hi chu Pathian thil rel lawkte mihringin kan chhut thiam loh vang leh kan chhut peih loh vang a ni ve fo bawk a, tam tak hi chu pumpelh theih a nihna chen a awm.

Entir nan, nu pakhat chuan an chenna kawr kam boruak hrisel lo tak avangin Pneumonia veiin a fa sen chu a thih san hlauh mai a. Pathianin mihringa finna, remhriatna leh mawhphurhna a dah hmangin chutiang hmun hrisel lo chu chen nan hmang lo sela a natna chu a vei lo mai tur a ni a. Tichuan, nu thihna chu nausen tan chuan vanduaina a nih rualin chu thihna erawh chu pumpelh theih a nihna lai a awm ve bawk a ni. He entirna atana thihna kan sawi ang te hi a thih dan tur leh thih hun tura Pathian ruat lawk ni lovin, heng angte hi keimahnia kan tawng buak leh kan sut kuak tura a dah te a ni a, chu chu kan kalphung tura a ruat lawk dan hnuaia zalenna leh mawhphurhna min pek dan a ni.

Chhandamna chung changa Pathian rel lawk dan pawh hetiang hi a ni, a tawi zawngin, “….. Amah chu tupawh a ring apiang an boral loh va, chatuana nunna an neih zawk nan” tih a ni a, ringlo te tan erawh chuan chatuan thihna a ni leh mai. (Thupuan 22:17 Thlarau leh mo chuan, “Lo kal rawh,” an ti a. A hria apiangin “Lo kal rawh,” ti rawh se. Tuihal apiang lo kal rawh se; a duh apiangin nunna tui hi athlawnin la rawh se.) Chatuan nunna châka tuihal ten nunna tui chu an duh phawt chuan a thlawna an lak theih turin a dah mai a ni.

Heng zawng zawng piahah hian kawng engkimah ‘Kawng tluangpui’ a ruahman sa zawh ve lo, exeptional case pawh tlem azawng chu awm thei turin a ruahman tel vek bawk tih hi kan hre bawk dawn nia. Entirnan: Ringtute tan kohhran te, baptisma te, Lalpa zanriah sacrament te a siam a, ringtu kan nih chuan hengte hi kan telna tur, kan tih ngei atana ṭul leh pawimawh te an ni a. Mahse, kraws lera chhandamna changtu kha chuan baptisma a chang hman lo va, khawi kohhranah mah a hming a ziak hman lo. Hetiang hian kawng tluangpui zawh ve thei lo, a hrula kal hi eng thilah pawh tlem azawng chu a awm thei vek bawk a ni. Amaherawhchu, zalenna min pek hmanga thil engkimah a ṭha leh ṭha lo, a duh zawng leh duh loh zawng kawng tluangpui a siam sa chhunga a ṭha zawk zawh duh lo hi chu a case a dang daih thung a ni.

Setana thuneihna leh Thlarau Thianghlim hnathawh dan pawh hetiangin han sawi ila. Pathian hian a chatuan remruat chhungah Setana hi atir aṭangin a chet theih chin tur ramri a kham sak tlat a, Pathian phal chin bakin Setana hi a che thei lo.

Mahse, Setana zalenna neih hi a zau hle tho va, thlarau a nih ve tho avangin Thlarau Thianghlim ang bawkin mihringah kawng hrang hrangin thu a sawiin a inhriattir ve thei a, mahse amahah ṭhatna lam kawng a awm ve lo va, a thianghlim ve lo va, Thlarau Thianghlim nen an kawng zawh pawh a inang hek lo. Kawng tam takah thiltihtheihna nasa tak a nei ve a, Pathian a tluk thuak a, Mikaela meuh pawhin a hau ngam lo a nih kha.

)

Bawhchhiatni aṭang khan mihring leh Pathian inzawmna kha a lo chah tak avang leh, mihringin Setana thu a zawm chiah aṭang khan automatic-in mihring chu Setana ta, Setana bawih a lo ni ta a. Mahse, Pathian chuan mihring a hmangaihna chu a la pangngai reng a, a la humhalh reng bawk a. Setana aia chak leh thiltithei zawk Pathian chuan mihring chu Setanan a nawm amâka a sawisak leh chatuan atan tihluihnaa a lem zawh a phal chuang lo va, mihring chunga setana chet theih chin tur chu ramri a la kham sak tlat tho va.

Chuvangin Setana chuan atira bumna hmanga thihnaa a hnuh luh tawh bak kha chu alama mihring a inhawn ang zel chauhin mihringah hna a thawk chhun zawm thei chauh tawh a, mihring inhawn dan ang zelin Pathian fa nihna la nei lo te kawchhungah te thlengin a lut thei bawk a. Hetiang pawh ti thei chuan thil dang tam tak pawh a ti thei tih a chiang a, Pathian rorelna hnuaia zalenna a neih hi a zau hle a ni.

Mahse, mihring te hi Pathian thu kan dawnsawn theihna tur lak aṭanga min sal beta a thu chauh awih kumkhua turin min pawng lak thei lo thung, Pathian ramri kham sak piah lam a nih avangin. A lama mihring a inhawn chin zel baka a chet theih loh avangin mihring chu a thlemin a thlem ṭhin a, atana inhawngte chu a luhchilh mai ṭhin a ni.

A lehlamah Pathian pawhin mihring hi a pawng lak ngai lo bawk. A duh phawt chuan a Pathianna hmangin a thu chauh awiha zawm turin min control bet tlat thei a, mahse chu chu a chatuan remruat dan a ni lo. Chuvangin Thlarau Thianghlim hmangin kan hnenah thu sawiin a sawmin min sawm zawk ṭhin a, alama mihring a inhawn ang zelin mihringah hna a thawkin thil a ti mai ṭhin a ni. A sawmna bengkhawn duh lova ring tikhawng lui tlatte chu van ramah hnuh luh luih hram a tum lem lo. Hei hi Pathian hnathawh dan dik tak a ni.

Hemi pahnih inkarah hian mihringte hi kan awm a ni. Pathian chuan mihring hi thil siam dangte ai a ropuiin min siam a. Mihringah chuan thlarau te, hriatna te, finna te, zalenna te tam tak a dah bik a ni.

A chatuan remruat anga Eden-ah tlukna a thlen hnu khan mihring chu Setana bawih a lo ni ta a, a hriat theihnate chuan Setana khawvel bak a pel thei tawh lo va, hrilhtu awm lo chuan Pathian hriat theihna a nei tawh lo va. Chuvangin, Pathian chu Thlarau Thianghlim leh hmanraw hrang hrang hmangin mihringah a inpuangin a inhriattir ṭhin a. A sawmna bengkhawna lawm taka a khawngaih chhandamna Chanchin Ṭha a hriattir lo pawm duh mihring chu an nun a luhchilh a, rinna tak tak nei turin anmahmiah hna a thawh sak chhunzawm nghal ṭhin a ni. Tichuan, a thu dawngsawnga hrethiam zel thei turin a pui a, amah thlanga, amah ringa, amah pawma, amaha innghat tlat zel thei turin a puiin a zirtir zui nghal bawk ṭhin.

Tichuan heti hian khai khawm ila. Mihringah chuan lalna inchuhna thu inkalh pahnih lo thleng a awm a, chu thu pahnih inkara awm mihring chuan a duh lam hawi thei turin zalenna a nei a. A lehlam lehlam aṭangin tihluihna leh pawng lakna a awm lo ve ve a, sawmna leh thlemnain mihringah hna an thawk a, mihring inhawn dan ang zelin mihring chhungah hna thawkin thuneihna an chang zui thei ve ve a ni. (Thlarau Thianghlim hnathawh dan leh ring thei tura min puih dan te, chhandamna changtua min siam dan te, Pathianin min zawn chhuah hmasak dan te erawh chu ziak dangah ka tar lang a, hetah hi chuan hei aia thui hi chu kan sawi hman rih lovang.)

Tin, Pathian chuan mitin a hmangaihna a inchen vek a, duhsak bik leh duhsak loh bik a nei lo, hei hi Bible ah pawh chiang takin kan hmu a ni. Ṭhenkhat chhandam tur, thenkhat chhandam loh tura a siam chuan Dikna Pathian a ni thei lovang. Hetiangin duhsak bik a neih loh zia kan hmu:

(Tirhkohte 10:34-35 Tin, Petera chuan a sawi a: “Pathianin mi duhsak bik a nei lo tih dik takin ka hria e; nimahsela hnam tin zingah tupawh amah ṭiha fel taka ti apiang a lawmzawng mi an ni ṭhin.)

(Rom 2:11 Pathianin mi duhsak bik a nei si lo va.)

(Ephesi 6:9 Tin, nangni hotute u, chutiang bawkin, anmahni leh nangmahni Hotu chu vanah a awm tih leh, ani chuan mi duhsak bik a nei lo tih hriain, vau lovin an chungah ti ve rawh u.)

Tin, Pathian chu mitin hnenah a inhriattir vek a, mihringin chhuanlam tur kan nei lo. Rom 1:20 “A thil hmuh theih loh (a chatuan thiltihtheihna leh a Pathianzia chu) khawvel siam tirh ata fiah taka hmuhin a awm a, thil siamah chuan a lang a ni; chuvang chuan chhuanlam tur an nei lo” tih ziak ang hian. Tin, Tirhkohte 14:16-17 ah pawh “Chu Pathian chuan hman laiin hnam tin mahni kawng ṭheuh zawh a phal ṭhin a, nimahsela amah hriattirna awm lovin a insiam lo, chutin thil a ti ṭha ṭhin a, van ata ruahte leh kum ṭhat kumte a pe che u a, in rilru ei tur leh lawmnain a tikhah ṭhin che u kha.”

@ Aw le, kan thupui ah khan let leh tawh ila. A chatuan thil tum leh a remruat dan te chu kan hriat fiah theih nan hengte hi han ngaihtuah chhunzawm leh teh ang.

1. Engvangin nge Pathian chuan suala tlua chhandamna hna thawh sak leh ngai tur mihring a siam.? Keini tel lo pawh hian a rawng bawl sak tur vantirhkoh chhiar sel loh a neih tehlul vei nen.

2. Engvangin nge Eden ah khan tlukna leh thihna a dah?

3. Engvangin nge Engkimtitheia chuan a pathianna leh a thiltihtheihna hmangin Diabola kha, duh taka a siam mihringte thlema bum thei hauh lo tura a phuar mai loh.?

4. Engvangin nge Pathian Engkimtitheia chuan a pathianna leh a thil tihtheihna hmangin a mihring siam chu thlemnaa tlu lo tur leh a thu chauh awih tura a thunun tlat mai loh? A ti thei lo em ni.? Thei tehlul mai, thei lo se Pathian rin tlak a ni nang. Tih loh chhan a nei a ni mai.

5. Engvangin nge chuti teh hrepa kan Pathian chu a inhambuai a, chhandamna te min buatsaih sak leh si.? Chhandam buai leh vel ngai lo tur khan engvangin nge a anpuia a siam tawh mihring kha tlukna lakah a hum tlat mai loh.?

Zawhna atthlak in ti maithei e, mahse hei hi Pathian thu laimu, Pathianim a chatuan thil tum tihlawhtling tura a chatuan remruat chhunga a pawimawh lai tak te an ni a. (I ngaihtuah buai peih lo a nih pawhin i demawm lo va, amaherawhchu, thlaraua puitlinna tak tak duhtu tan chuan thatchhiat san chi a ni lo vang.) Heng zawng zawng hi ‘A chatuan lawmna fa’ tur a zawnna kawngah hian mathei lova thleng ngei ngei tura a ruat lawkte an ni a, Pathian ropui zia hmuh duh tak tak tan chuan thatchhiat san chi a ni lo.

Tichuan, khing zawhna zawng zawng te khi a chhanna tawite pakhat a awm a, chu chu hei hi a ni. “Pathian chuan a rawng bawl sak tur vantirhkoh chhiar sen rual loh nei mah se a lawm a la kim lo va, a chatuan lawmna tifamkimtu tur, a chatuan lawmna fa tur a zawng a ni,” tih hi. Hei hi a chhanna hnial rual loh a ni.

A nih loh leh a chatuan lawmna fa a zawnna kawngah chuan ei loh tur thupek kha pek kher a ngai em ni.? Ngai e le, thupek a awm loh chuan thuawih leh awih loh a hriat theih nang. Pathian chuan thlaraua awm tawh sa leh thiltihtheihna nasa zawka a thuam tawh sa vantirhkohte, thil an tih suala simna chance awm thei tawh lo turte ang ni lovin, vantirhkohte aia chak lo zawk thi thei taksa pua a siam mihringte chu, tisa taksa an put chhungin an zawh tawk tur thupek a pe a, chuta ṭang chuan a thupek awihtute tan chuan Chatuan nunna a ruahman sa a, awih lote pawh Chatuan thihna’ a ruahman sa bawk a ni.

A nih loh leh suala tlukna leh chatuan thihna te hi siam a ngai kher em ni.? Ngai tehreng mai, chatuan thihna a kan tluk luh zet loh chuan chatuan nun hlut zia leh Pathian chauh hi chatuan nunna neitu a nih zia kan hre thei dawn lo asin. Lei leh van hian hei hi hria se a duh tlat a ni. Rom 11:32 ah chuan Paulan heti hian a sawi a. “Pathianin a khawngaih vek theih nan mi zawng zawng awih lohnaah a khung ta vek si a.” tiin.

*A nih leh mihringte chu sualah tluin chatuan thihnaah an tlu lut dawn tih a hre lawk em.? Hre lawk tehreng e, zalenna leh theihna a pek hmang chuan Setana an hneh zo dawn lo tih a hre lawk vek alawm. Mahse, hei hi a thlen a phalin rem a ti a ni, mi zawng zawng chungah khawngaihna a lantir theih nan. Hei hi a ruahman lawk sa a ni a, chuvang chu alawm mihring a siam hma hauhin a Fapa Isua Krista chu amah ‘Pa’ thinlungah chuan talha a lo awm lawk daih tawhna chhan chu.

Pathian chatuan lawmna fa dinhmun hi a hlu em em a, chuvangin a changtute chuan a hlutna hi an hre ngei tur a ni. A hlutna hre lo leh ngai hlu lo hnena pek hi Pa rem ruat dan a ni tlat lo.

A nih leh chatuan nun kan neih leh theih nan Pathian thisen a luan kher a ngai em ni.? Ngai tehreng mai, Pathian thisen chauh hi chatuan nunna a niin, a thisena min tlanna hi a khawngaihna a ni a, chuvangin a thisena min tlan loh chuan chatuan nun kan nei thei lovin a khawngaihna leh min hmangaih zia pawh kan hrethiam thei dawn lo a ni. Min hmangaih tih hi kan hriat ngei a duh tlat bawk a ni.

Chutiang taka duhtui leh uluk chuan a ni A chatuan ro luahtu tur te chu a buatsaih ni. Hetianga a ruahmanna fel tak hnuaiah hi chuan Vanah helna a chhuak tawh tawp lovang. (Thuhriltu 3:14 Pathianin a tih apiang chu a awm hlen ang tih ka hria: engmah belh theih a ni lo vang a, lak ṭhen theih pawh a ni hek lo vang; mihringin amah an ṭih theih nan Pathianin chutiang chuan a ti a ni.)

# Hei hi han sawi kai lawk teh ang. ‘A chatuan lawmna fa’ a zawnna kawnga hmun pawimawh lai ber luahtu chu a hmangaihna hi a ni a. A hmangaihna kan hriat fiah loh chuan a chatuan rem ruat hi kan hre fiah tak tak thei lovang. Tichuan, Hmangaihna chu a thuk zawh poh leh a thikthu chhiatna pawh a nasa ṭhin a, heng zawng zawng hi Pa hmangaihnaah hian a lang a ni. A hmangaihna ngainepa, a thisen thianghlim chu thil naran a ruattute chuan thih hnihna, Pa ruat lawk chu an hmabak a ni mai, a chatuan lawmna fa dinhmun an luah phak lovang.

(Johana 1:11 “Amah a mite hnenah a lo kal a, amaha miten an lo lawm si lo.”)

Kan Lalpa chu a ta te, a property te, duh taka a siam, a hmangaih leh a thlakhlelh em em, hlim taka chatuan hun hman pui a duhte, a chatuan lawmna fa ni tura a duh em emte hnenah a lo kal a, mahse keini’n kan lo lawm si lo.

Heti hian entirna sawi ang aw. Ka nupui, ka hmangaih, ka duh ngawih ngawih, ka ta bil chauh nia ka ngaih chuan min rinawm loh sanin kei aia duh leh hmangaih dang a lo nei ta a, ka hmangaihna chu a lo ngainep ta a. Nang pawh, i pasal, i innghahna neih chhun, i ta bil chauh nia i ngaih leh i inpumpekna, i khing phel ang hiala i en khan a ngaihsak ta hauh lo mai che a, nang aia duh leh ngaihsak zawk dang a nei ta tlat mai… a na vawng vawng hle a ni lawm ni.., i hriat tirh phei chuan i thinlung a keh sawm a ni lawm ni. Mihring tawrhah hian hei aia na hi a awm dawn chuang em ni.?

Kan Lalpa erawh chuan a hmangaih ten nupui uire ang mai leh pasal rinawm lo ang maia kan uire san chung pawhin min hmangaihna a dai chuang lo va, a hmangaihna chuan min hnuchhawn thei chuang lo va, a umin min umzui ruak ruak a. (Pathian anga awma Pathian tluka awm chu thil thlakhlelh hleih theihah a ruat lo va.) Kan uirena bawlhhlawh zawng zawng tleng fai turin a thisen hial min la hlan ta cheu a nih hi. Chuti chung pawh chuan keini zinga mi tam tak te chuan chuti khawpa hmangaihna nasa chu kan la haider a, a thisen meuh pawh engmah loah ngaiin thil naranah kan la ruat sak a. Hmangaihtu thinlung chu engtiang takin na ang maw aw.!

Mihring tawrhnain a tehkhin zawh phak rual loh khawpa na hi kan Lalpa hian engvangin nge a tawrh a lo ngaih tak mai. Nang leh kei vang a ni lo vem ni.? Ni tehlul mai, nang leh kei min hmangaih em vanga heng zawng zawng hi tuar a ni asin. A chatuan lawmna fa ni turin nang leh kei hi min duh em a ni.

Pathian Engkimtitheia chu engati nge chutiang taka hmangaihna nasa leh tawrhna nasaah chuan a inbarhluh tak mai le, min hmangaihna hi a makin a va han thûk em.! Mihring mihrinna hian a chhui chhuak zo lo ve.

Aw le, a hmangaihna thute kan sawi mek lai hian langsar taka tar lan ngai a awm bawk a, chu chu hei hi a ni. (Thupuan 21:6-8 Tin, ka hnenah, “A lo thleng ta. Kei Alpha leh Omega, a Bul leh a Tawp ka ni. Tuihal apiang hnenah chuan Nunna Tuikhur ami athlawnin ka pe ang. Hnehtu apiang chuan chung chu an luah ang a, kei an Pathian ka ni ang a, anni chu ka fate an ni ang. Amaherawhchu, mi dawih te, ring lo te, tenawm te, tualthat te, inngaih ching te, dawithiam te, milem bia te, dawthei zawng zawngte chantur chu mei leh kâta kang dilah chuan a awm ang; chu chu thih hnihna chu a ni”) tih thu hi.

Marka 10:14-15, “Naupang tete ka hnenah han kaltir ula, hnar suh u; Pathian ram chu hetiang mite ta a ni si a, tih tak meuhvin ka hrilh a che u, tupawh Pathian ram chu naupang tein a lawm anga lawm lo apiang a chhungah an lut tawp lo vang,” tih thu te pawh hi.

Chhan let loh hmangaihna hi zawng tawrh thiam a har a ni e ti rawh u maw.! Hmangaihnaa khat kan Pathian meuh pawhin, duh taka a siam, a anpui ngeia a din, a chatuan lawmna fa ni tura a duh em em tam tak te chu, hmangaih em em chungin a chatuan thinurna meipui lamah a thlir liam a la ngai ngei dawn a nih hi. A chatuan lawmna fa a zawnna kawngah hei hi a thlen ngei a ṭul tlat si a ni.

A fiah lehzual nan mihringah i han tehkhin dawn teh ang aw.

Nu leh paten kan fate chu ṭha tur leh kan thu awiha sual khawih lo turin kan duh a, thu ṭha kan hriat engkim kan hrilh ṭhin a. Mahse an va chhuak a, ruih hlo chi hrang hrang leh sual tinreng an va khawih fo mai a, kan zilhnate chu engah mah an ngai si lo. He dinhmunah hian Nu leh Pa thinlung chu a rum ṭhin a ni lawm ni.?

Tichuan, nu leh pa kan nihna leh kan thu neihna hmangin kan fa chu sual khawih thei hauh lo turin kan phuar bet tlat thei a, pawn chhuak miah lo turin kan khung bet tlat thei bawk a. Mahse chutianga kan tih chuan kan thinlung a dam angem.? Dam hauh lovang tirawh u. Phuar beh avanga sual khawih lo ringawt chungah chuan kan lawm a kim hauh lo vang. Kan fate zalen taka an awm a, khawi hmunah pawh kal theia an awm a, sual thlemna tam tak karah pawh kan duh dan hriaa kan thu an awihnaah chiah hian kan ngaih a ngam a, kan lawm a kim ṭhin a ni lawm ni.?

Chutiang chiahin Pa Pathian chuan a pathianna hmangin min phuar bet thei reng a, mahse, a Pathianna hmanga a a phuar beh te chungah lawmna a neih theih dawn loh avangin min phuar bet lo va, zalenna min pein khawvel sualna leh thlemna karah pawh atana rinawm tlat turin min duh zawk a. 2 Chronicles 16:9-a kan hmuh ang hian, chutianga a thinlung damna leh hlimna siam saktu tur chu a duh leh a zawn chu a ni. (A lama rilru dik tak pûtute chunga a chakzia tilang tûrin khawvel zawng zawngah LALPA mit chu a leng ruai ruai ṭhin a ni.) Hei hi a zawn ni lo sela, mihring siam te, tlukna te, tlanna te, heng zawng zawng hi a thawh buai a ngai hauh lovang.

Tihian kan chiang ta a ni lawm ni. Pathian chatuan thil tum pawimawh ber chu, a chatuan lawmna fate nena chatuan hun hman a nih chu.

Rom 11:36 “Amah aṭang leh, amah avang leh amah atan thil zawng zawng a lo awm a ni si a; ama hnenah chuan chatuanin ropuina chu awm rawh se. Amen.” He thu hi kan nun chhungril ber aṭangin a pumhlumin kan ‘Amen’ ve thei tawh em le. A chatuan lawmna fa ni ve thei turin Lalpa lam i hawi ang u.

(Isaia – 45:22 Kawlkila mi zawng zawngte u, ka lam lo hawi ula, chhandamin awm rawh u: kei hi Pathian ka ni si a, a dang rêng rêng an awm lo.)


“Ka lam lo hawi ula,”

(Thupuan 3:20-22 Ngai teh, kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang. A hnehtu apiang ka lalṭhutphahah ka hnenah ka ṭhuttir ang, kei pawhin ka hneh a, ka Pa hnenah a lalṭhutphaha ka ṭhu ang khan. Thlarauvin kohhranho pawlte hnena thu a sawi hi beng nei chuan hre rawh se.)

(Deuteronomy – 30:19 “In hmaah nunna leh thihna, malsawmna leh ânchhia ka dah tih tunah hian in chungchang thua hretu atan lei leh van ka ko a ni; chutichuan nunna chu thlang rawh u, in nun theih nan, nangni leh inthlahte nen.)

A chatuan lawmna fa ni tura min ko tu Pathian Chungnungbera chu fakin awm rawh se, Amen.

(He ka thu ziah hi a fiah lehzual theih nan, Bawhchhiatna tih leh, Kan tih tel lo chhandamna tih leh, Chhandamna Nghet tih thupui hmanga ziaktein chhunzawm chhoh a ni a, chhiar vek turin duhsakna ka hlan a che u.)

Leave a Reply

Your email address will not be published. Required fields are marked *

error: Content is protected !!