Pastor Thangkhuma (1881 – 1962) chanchin – Rev. Lalnghinglova

[A chunga mite hi ni 11.8.2019 Puitling lam Sunday school zirlaia Pastor 1915-a nemngheh lo langte, mi ṭhenkhatin an chanchin hriat kan duh thu zawhna lo awm avangin angaihnawm lai, Zoram Nghahchhan (Rev. Lalnghinglova) aṭanga rawn lâk chhyah a ni e. K. Zalawma.]

Pastor Thangkhuma (1881-1962) :
Kum 1881 khan Hmunṭha khuah a piang a, 1904-ah kum 23 a nihin Kristianah a inpe a; 1906-ah Saphluian a baptis a, 1908-ah tirhkoh hna a zir a. Zorama Pathian thu zir hmasa ber a ni. Tirhkoh hna a zir chhung 1908-1909 hian Aizawl chhehvel khuaah te riak chhuakin Pathian thu a hril nasa hle ṭhin. Tirhkoh hna 1910-1914 chhung a thawk a, Pastor-ah 1915 khan nemngheh a ni. Tuirial achin Champhai lamliana ṭhen phawk, Burma ram chin, Zoram hmar lam zawng zawng hi a bial vek a; ani hian Ngopa te pawh hi a bial tel a. Tirhkoh Chalkhuma pawh helai bialah hian a thawk bawk. Ani hi a awm rei ta lo. Pu Hluia chauh ni lovin, Pu Mena pawhin Ngopa hi a han tlawh ve bawk. An sawi dan chuan Pu Mema (Rev. E.L. Mendus) hi pianthar harhna lai vel hian chhandandam nih inhriat thu an lo zawt a, Pu Mena chuan, “Well, ‘Chhandam ka ni tawh,’ an ti ngai lo, ‘Chhandamna thuah thlamuanna nghet tak ka nei ta,’ an ti zawk ngai,” a ti.

A bial zau tak kha Liangkhaia, Pastor a lo nih ve tak chinah khân Tuivawl lui chin thlang lam, Tuirial nena inkar zawng kha a rawn bial sem tâk avangin Pastor Thangkhuma chuan Tuivawl lui chin chhak lam chauh a bial ta a ni.

Kum 38 Pastor hna a thawh hnuin 1947-ah a pension ta. A hun Aug. 11,1962-ah hmang zovin, ropuinaa hruaiin a awm ta. He hun thleng hian Pathian leh Kohhranho tan rinawm takin rawng a bawl.

A mizia :
Mi rinawm, taima, huaisen, mi ṭawng tam lo, nungchang mawi tak a ni. Rev. Thangkhuma hian, “Pathian hi kan rin aia ropui daih hi a lo ni a, kan rin aia rinawm tak a lo ni,” a ti a ni. A hmel han en hian mi huaisen, mi rinawm a ni tih a hriat mai a, chuti ni mah se, a nĕlawm em em si a ni.

Zoramah Chanchin Ṭha a luh tirh lai chuan dodalna a nasa em em a, Pastorte puh hmingchhiatna pawh a awm nual mai.

Chanchin Ṭha chakzia leh ropuizia tihlan nan leh kan Pastorte dawhtheihzia tihlan nan han sawi tel ta ila:
Pastor Thangkhuma nula ngaia puhna :
He tih lai hian Pastor Thangkhuma hi Ngopa biala a awm lai a ni a. Kum 1917 Presbytery khan Ngopa bialah awmin Tidim ramri leh Ṭiau thlang, Kingaka leh Saiṭhuama Tuisen achin Tuimarul thlenga bial tura an rel March thla, Aizawla an inkhawmpui ṭuma an rel a ni. (Threl No. 10-na.)

Nulain a puh dan : Ṭing hmun a thlawh laia mutpuiin a insawi a, “Chu lo pawh a thingphurhna, chumi mual, khami mualah vawi thum mi mutpui a, kan chhâwl phahte pawh a la awm vek ang,” tiin a puh a ni. Chu thu chu lal rorêlnaah an sawi ta a, Pastor chu an han zawt a, ani chuan, “Hmuh chu ka hmu alawm, Silai puin bâwng zawngin ka kal a, a sawi angin engmah kan ti lo ve,” a han ti duai a. Chumi mualah, chu tin, kha tin…kan chhâwl phahte pawh…a tihte pawh kha lal upaten an va enfiah vek a, chhâwl phahte awm awm zelin an sawi. Pastor chuan, “Ka ngai lou-u-u,” a ti duai a. Chhâwl lo phah zelte pawh an awm a ni mai thei.

Chumi hnua Inkhawmpuia Pastor a kal ve te chu nula khan, “Nula ngai reng si a zak lo ve,” a tih thute an hre ta zel a, chu chauh ni lovin, Zosâpte beng a lo thleng ta hial mai a. Zosâpten Pastor Thangkhuma chu, “À, i thu hi tifel thuai teh, a buaithlak e,” an tihsak tak avangin Bawrhsap hnên an thlêng ta a.

Tichuan leh! Bawrhsap chuan Pastor Thangkhuma chu a office-ah a han ko lut a. Bawrhsap chuan, “Engati nge Pastor si, nula te i ngaih ni, Pastor zawng zawngah i hur ber; lung inah ka khung ang che,” tiin a sawiṭhaih a. Chair ṭhutthleng te chu a namthlu ṭhuai a, dawhkante a tiangin a han vaw ri ṭhuai a. Pastor Thangkhuma mi ṭha, ṭawng tlem, mi huaisen chu zâm map hek lo. “Ka pu, ka ngai lou-u-u,” a tih duai bâk chu sawi tur hre hek lo, Bawrhsap chuan,- a chhuahtir ta a.

Nula kha a han ko lût ve ta a, Bawrhsâp chuan, “Engati nge Pastor-te ka ngai, i tih mai? Dâwta Pastor-te puh ngai em ni? Engati nge mi fairelbêl namthlûk i tum? Nula zawng zawngah i hûr ber a ni ang. Thu dik chu puang thuai mai rawh. Chutilo chu lung inah ka khung ang che,” tiin nula chu a han hrâwk vel a. Sapṭhutthlengte a han namthlu ṭhuai a, dawhkante a han vaw ri dup ṭhin a. Chutah nula chu a zâm ta a, “Ka u Hrangkimaten ti rawh an ti a, ka ti mai alawm,” a ti ta a, Pastor chuan thiam a chang ta a ni.

Note :
“Ka u'” tih hi khâng lai mi vantlang chung, lal te, Pastor te, Bawrhsâp te, Zosâp te ang kha koh nan an hmang a, pianpui unau tihna a ni chuang lo.

Bawrhsapin Pastor Thangkhuma thiam a chantir hnua Assembly, Lushai Cachar Assembly, Jan. 14-17, 1926, Durtlanga neih tuma an thurel No. 13-ah vchuan hetiang hian a chungthu an rel: “Pastor Thangkhuma hi a sual kan ring lo, a lo buai tak avangin hetiangin a awmna sawn ila kan ti. Pastor Thangkhuma hi kum khat chhung chu Thialrêtkâwnah a awm ang a, Rêngte tlângdung leh Nisapui tlângdung a bial ang. Tin, kum khat chinah a thu hi (a awmna) ngaihtuah leh tur a ni,” tiin an rel.

A kum leh March 1927, Aizawla Assembly, an thurel No. 16-ah chuan, “Pastor Thangkhuma hi a bialten an ui avangin, Presbytery-in a bial ngaia kir leh tura an lo rawt ang chu kan remtihpui a, a awmna erawh chu Hnahlan khuaa sawn sela kan ti,” tiin an rel.

Assembly Jan. 13-15, 1928. Aizawlah bawk thurel No. 5-ah Pastor-ho awmna tur an rel chu – Pastor Thangkhuma, Vaidaiah, Chuaukunga, Sihfaah,
Thangzaia, Hlimenah,
Lianhlira, Baktawngah tih a ni. Assembly Jan. 13-14, 1933, Mission Vengah. Thurel No. 10-ah, “Pastor Thangkhuma leh Pastor Hauchhunga te hi an dil angin pension kan phalsak,” tih an rel leh a. Pastor Thangkhuma kha a pension leh a thih ni thlengin Pathian leh Kohhranho rawngbawl hnaah rinawm takin a thawk tluan chhuak zak a. A pension hnuah pawh Hmarchhak Prtesbytery-in pa chan changa an neih a ni.

Pastor Thangkhuma Ketli
Pic credit: Pathara Sailo

He Ketli hi Pastor Thangkhuma 1914 a an nemnheh kha Zosap pakhatin a present. He Ketli hi litre 4 vel dawng, thira siam kg 6 vel zeta rit 3mm vela chhah a ni. Ti hian a fapa-in Synod lamah a donate a ni.

Leave a Reply

Your email address will not be published. Required fields are marked *

error: Content is protected !!