Pastor Saiaithanga chanchin – Rev. Lalnghinglova

Durtlang Bial a âwp ṭhin a, a bialte chuan ‘Kan Pastor’ an ti ngai lo; ‘Kan Bishop’ an ti ṭhin. Mihlim tawngtawrâw, Pastor-te pulpit aṭang pawha sawisel ṭhin mite an awm a ni ngei ang. Chûng mite thusawi leh thiltih dan chu he ti hian a sawi țhin: “Kan inpuiah an lo lut a, kan silai ngeiin kan sûtpui behchhanin min han kâp ṭhin a ni a, a buaithlak teh e,” a ti ṭhen sûng mai.

Vawikhat pawh Bawrhsapin, “I bial chhungah pawnpuitê tah thute hi i lo sawi uar ve em?” a han ti a. Pastor Saiaithanga chuan, “Uar hlei nem,” a ti a. Bawrhsap chuan, “Engati nge i sawi uar ve loh?” a han ti leh a (Khatih lai khan Bawrhsapte kha an lal em em a, miin an hlauh tehlul nen. Ani hi chuan thu dik nia a hriat chu Bawrsap kiangah pawh a sawi ngam zel a ni). Ani chuan, “Ngaituah hek lo i,” a tihsan mai. A chawchhum ve te hian bet tlat khawpin a chhum kâng rum mai ṭhin, lehkha a chhiarsan ta ṭhin a. Vawikhat Durtlang Biak Ina a thusawi chuan a sawi huai ṭhin bawk a, “Keini ang Pastor, nghathu takngial pawh regular-a ei thei lote hi,” a ti kul kul mai an ti. Synod laia a thusawiah pawh, “In Pastorte hi duh ang ang ni lo, hmuh ang ang min la a; kan han tar deuh va, min hmusit leh si a nih hi,” te a ti ngam zel.

A bial chhung mihlim khawfang thusawite hi an thusawi a sawi leh dan chu, “Thlum ser ser, ei dawna ei theih si loh,” a tihsak mai. A chang chuan, “A hep hep kan uar a, puitlin lam kan pan duh si lo,” te a ti bawk a.

Kum khat chhung chauh Dawrpui bial a awp a, Synod-in bial infan chhawk a rawt vang a ni a. Sakawrtuichhuna a zuk kalin, ‘Ka Sakawrtuichhun Kohhran’ tihte a zuk sawi tel a, a rawn haw hnuah, “Saiaithanga kohhran kan ni lo, Pathian kohhran kan ni,” tia an vui thu an sawi a lo hria a. A zuk kal leh chuan, ‘Ka Sakawrtuichhun Kohhran’ ka tih kha in lo ngaithiam lo a ni awm a, in chhiat in thata mawhphur ngam, ‘ka kohhran’ tingam nge Pastor-a in duh, ‘ka kohhran’ ti ngam lo che u?” a zuk tih meuh chuan, a tih dan zia an han hriat chuan an ngaisang ta em em a ni, an ti.

Dawrpui Kohhrana mi thenkhatin, Hetiang dân duh Pastor te chu…” an lo tih hi a hre leh a. A thusawiah, “‘Dân duh Pastor’ te min lo ti a ni awm a, nangni tak hi a nia dân duh ka tih che u ni. Tling lo chung chunga dân puitlinga innei lah in tam,” a tih khum ta hlawm a, an ngam lo hle an ti.

“Vaiin ‘bâk’ an tih leh keinin ‘bâk’ kan tih a inang lo ang bawk hian, Pathian Thlarau kan tih a inang lo hi kan buaina a ni,” a ti thin a. Mihlimho hi a sawisel nasa viau nain, a biala mihlimho chuan, “Kan Pastor thusawi hi a dik chu a dik maw le,” an ti thin a ni.

Pastor zia tur hetiang hian a sawi thin, “Pastor chu intihotu thiam tak, intilal si lo, huaisen tak, duhtui tak, thutaka ding ngam, thimrim duh hauh si lo, mihlim leh hlim lo inang renga enkawl thiam, hmai hnih nei lo, bialte hruaina tur chiang taka hria, Bible zirtirna tlangpui anga kohhran hruai mi an ni tur a ni,’ a ti thin.

Pastor fuihna a sawi thinte chu : Pastor nih tur ṭha pui pui, kan nih phak si loh, mi timualpho zawk mah mah turte kan sawi lo vang a, kan tih tur kan sawi zawk ang:
– In talent in tipung tur a ni.
– Pathian ngaiha thaa inentir tur.
– Thutak thu fel taka hmang thiam nih tum tur.
– In ui fing atan in Upate hi hmang thiam rawh u.
– Awmze neia bial fan tur, tihte a sawi thin.

Assembly, Mawkhar, Shillong-a an hman tumin thu a sawi a, Khasi-ho chu, “You are not growing in ministry,” a tih khum kul kul mai a. A tukah chuan naupanghovin khawlaiah, “You are not growing in ministry,” tiin Pastor Saiaithanga tih dan chu an zir sup sup mai. “Pastor chher kawngah te, enkawl kawngah te, neih belh kawngah te in thang mawlh lo,” a tihna a ni.

Pastor Saiaithanga hi January 1897-ah a paing a, Pathian thu 1917-1918-ah Aizawlah a zir; thiam theih vanga Cherra-a 1919-1921 chhung zir leh, 20.7.1924-a nemngheh, January 24, 1980-a ropuinaa hruai tak kha a ni. Assembly/Synod Moderator-ah vawi 6 lai thlan a ni a, mi pakhat, Mederator chelh tam ber a la ni. Pastor rinawm, zahawm, mi nghet, Pastor hnaa inpe hlawm tawp, thil dang ngaihtuah map lo, Pathian thu (Bible) leh Kohhran chanchin thiam, Durtlang bial vawng chunga tirhkoh zirho zirtirtua ṭang reng, zirtir dan thiam, hrilhfiah thiam, kohhran kaihruai thiam, mi huaisen, a ṭul ang sawi ngam, zirtirna dik lo laka kohhran hum thiam, mihlimho sawisèl hmang tak si, an ngaihnêp theih hauh si loh, intilal si lova intihotu thiam, kohhran hruaina lam tur chiang taka a hriat lama huai taka hruai ngam, thinrim duh lo, miten an ngaihsan loh theih loh, Roman Catholic hotute pawhin, “In Bishop hi a pui hi maw le!” an tih, a bialte pawhin, ‘Kan Pastor’ ti lova, ‘Kan Bishop’ an tih a ni. A bialte ‘Ka Kohhran’ ti ngam khawpa bial mawh phur ngam a ni. Mi rilrua tawngkam fing leh tangkai tak tak thun ṭ euh thei khawpa thil hria leh thiam a ni. Pastor ropui leh hnathawk ṭha a ni. Hrilhfiahna leh lehkhabu ṭha tak tak tam tak a ziak a, kohhranin a chhawr em em a ni.

Engnge an sawi?
1. Pastor Saiaithanga hian Kohhran enkawl a thiam em em a. A bial chhunga Kohhrante a tlawh peih viau ṭhin a. Amaherawhchu, a duh dan leh a kaihhruainaa nghet tawha a hriat hi chuan a tlawh zui lutuk ngai lo. Heti a nih avang hian Sairum tangvalho pawhin fiamthuin hla an phuah el a, chang khat han tarlang ta ila :-

“Pastor Saiaithang, i bial fang rawh,
I beram vente an him tawh hlei lawng e,
A seh lai kan hmu e, Tlangnuamah,” tiin.


Mahse, hei hi Pastor Saia’n a bial Sairum khua a tlawh khât hrim hrim vang a ni lova. A ngaihdan leh duh danah Upate leh Kohhrahhote an nghet tawha hriain zirtirna dik lo lêng vêl leh thil dang pawhin a khawih buai thei tawh lova a rin avanga thil danga a ṭulsan vang a ni.

Kohhran enkawl a thiam a, mize hrang hrang milin rawngbawl hnà a thawk thin zawk a ni. Upate chhan a thiam em em bawk thin, “Kohhran Upate hi an duh rêng vânga thlang kan ni lo va, kan duh avanga thlang kan ni. Kan hmusitin kan sawisel tur a ni lo. A sawiseltu chuan Kohhran a hmusit a ni. Kohhran hmusittu chuan Isua a hmusit a ni,” a ti thin. — R. Lalsawmliana.

2. Rev. Saiaithanga Kohhran pawm dan hian Mizoram pumpui hi a fan a, mihlimte pawhin an dem hial a, mahse Kohhran a ngaihpawimawh vang a ni.” — Re. Dr. Zairema.

3. Mi malah chuan kum 1950 hnu lama kan ram Kohhran rawngbawltu (Pastor/Upa) chhuakte tana Kohhran rawngbawlna kawng sialtu ropui ber dinhmun hauhsak tu ila kan tisual lutuk lovin ka ring. —Rev. Lalsawma.

4. Rev, Saiaithanga danglamna tak Pakhat chu Kohhran inrelbawlna leh Thlarau kawngah mi narante hmuh phak loh a hmu phak thin kha a ni. Hemi kawngah hian Zawlnei nih pawh a phu hial ang. — Upa C. Sangzuala

5. Pastor Saiaithanga chu a Pastor hliah hliah a, Kohhran dang leh Zuruite pawh hian an hmu Pastor em em vek a ni. Kohhran ṭawng nan Bible ṭawng hi a hmang ṭhin. — Upa Rokunga, Zemabawk.

Leave a Reply

Your email address will not be published. Required fields are marked *

error: Content is protected !!