Pastor Phawka chanchin (1882 – 1952) – Rev. Lalnghinglova

[A chunga mite hi ni 11.8.2019 Puitling lam Sunday school zirlaia Pastor 1915-a nemngheh lo langte, mi ṭhenkhatin an chanchin hriat kan duh thu zawhna lo awm avangin angaihnawm lai, Zoram Nghahchhan (Rev. Lalnghingliova) aṭanga rawn lak chhuah a ni e.  – K.Zalawma.]

1. PASTOR PHÁWKA 1882-1952:
(A hming lam dânah buai deuh theih a ni. Mi rinawm tak sawi ka hriatdan chuan, “Thing ‘bâwk’ tih a bâwk lai ri ang hian ‘phâwk hi lam tur an tiin ka hria,” a ti. K.Zl)

Pháwka (1882-1952): Khawrihnîmah 1882-ah a piang a, 1904 velah Kristianah a in pe. Kum 1905-ah tirhkohah lak a ni a, Aijal Presbytery, 1914-ah Pastor atan an thlang a; Aijal Presbytery 1915-ah thurel no. 16-nain “Pastor : Pastor thutlûkna. Tun a china heng mite pali hian kan Sapte angin mi an baptis-in an inneihtirin Sakramente an pe thei ang – Phawka, Vanchhunga, Hauchhunga, Thangkhuma,” a ti.

Tirhkoh hna:
A thawh hmain Tirhkoh Dokhuma leh Phaisamate kha an zuitir phawt a, tirhkoh hna a thawh hnu chuan, Tirhkoh Dokhama nen zoram chhak leh thlanga țhenin an bial. An rawngbawl chhung hian a changin lalten khua ata an hnawt chhuak a, daipawna riah chângte an nei ṭhin. Kum 1909-10 velah Tirhkoh Thangkhuma farnu naupang zawk Dawntuaithangi a nei a. Tuna Serhmun leh Kawrtethawveng inkar Bunghmunah an awm ta a ni.

A bial chin:
Tlawng lui thlang lam zawng zawng, Silchar leh Lunglei bial inkar hi a bial a, Bunghmun aṭangin Kawrthahah an pem a, chuta ṭangin Reiêkah an insawn leh a ni. Kum 1919 velah TirhkohThangzaian Hmunpuia awmin a pui a, Hmeichhe Tirhkoh Rovi pawhin a pui.

Rawngbawl dan tlangpui :
A nupui hi mi fel tak a ni a, Sande Sikulah ziak leh chhiarte an zir ṭhin a. A nupui hian nau paw chunga bial fannaa a zui châng a awm ṭhin. Reiêk aṭanga thlang lam a fanin Dapkhanah vantirhkoh a zai ṭum kha a ni a. Thla thum tehmeuhchu a thang ngei tih chu Upa Suakchhûnga, Kulikawn khan a sawi.

Upa Suakchhûnga te hi Dapkhanah an la awm lai a ni a Bûnghmuna a awm lai hian Kristian chu in 3 vêl chauh an la awm. Bunghmun khua hi Rêng rama an pêm darh dawn avanga Kawrthaha insawn an nia sawi a ni. Reiêka an lo chhoh pawhin Kristian chu in 6 vel lek an la ni. Reiêk lal Lalluaia chuan, “Kristian vengah awm rawh u,” a lo ti a, an awm ta a. Biak In pawh an la nei lo va, Pu Saihnuna Sikulah an inkhawm ṭhin (Saihnuna tih hi ‘sai’ leh ‘hnun’ hi lam rik san lam inzâwla lam tur. Hniam leh sang bik awm lovin). (Sáihnúna tih turanih hmel e,K.Zl.)

A mizia:
Mi taima, zîng taka tho va, khawnvar chhia ṭawngṭaia lehkhachhiar mi a ni. Invawng fai peih, ṭanpui ngaite ṭanpui a, dam lote kan peih, naupangte pawh invawn fai dan zirtir peih tak a ni a, Inrinni te hian inbual fai turin a fuih ṭhin. Zai lamah pawh aw ring ṭha tak, mipui zingah pawh lang thama zai mi, mi hruai thei tak a ni. Rual el tak, a ṭul apiang thawk peih, ṭanpui ngaite ṭanpuia, damlote kan peih tak, naupangte kaihruai pei tak a nih avangin a inah naupangte an chêng dur dur ṭhin.

Ramhuai man a ṭawngṭai dam:
Bunghmun khua aṭanga Reieka a lo chhoh hnuah nu pakhat, Zairemi an tih hi, “Ramhuaiin a man e, lo chho rawh,” tiin Pastor Pháwka chu an zu ko va. A han chho ta a. Zairemi chuan a kut a hum ruh a, a meng phawk a, “Ka duh lo, ka duh lo,” tiin a inthing khûr deuh nawk nawk a. Pastor chuan Bible-a Isuan ramhuai a hnawh chhuah thute kha chhiarin a lu chunga kut nghatin a han ṭawngṭaisak ta a. Zairemi inthing nawr nawr chu a reh ta deuh va. Pastorin Bible chhiara a han ṭawngṭai chuan, “Ihi! Ka harh ta,” a ti a, a lo harh ta a. “Ramhuaihovin min man a, theipui hel thak deuh hi min barh luih an tum a, ‘Ka duh lo, ka duh lo,’ ka ti a. Khatia i han ṭawngṭai tâkah khan an hawi zek zek a, a ṭhen pakâr lamah an tlan bo va, a ṭhen âwngah an pût thla a, an tlan bo zo veka ni,” a ti.

Thla thum thangin a zin:
Tuna Phailêng leh Dâmpui inkar, kâwnzam laia Dapkhan khua a awm laiin, harhna an chang ve a. Chutih laia a zuk zin chu Lallen leh Chhippui Kohhrante chilin an tlawh chhen bawk a, a zin rei ṭum ber a ni, thla thum lai a thang a. Chumi ṭum chuan mi eng emaw zatin an zui bawk a. An hlim em em a, zai-khawm pawh an tui hle a ni. Hetih chhung hian Dapkhan hlimpui laia angel zai ni pawh hian a awm lai a ni. Upa Suakchhunga sawi dan phei chuan ‘thla ruk’ a ti. “Dapkhan chu hmunpuia hmangin Bial khaw dang a va tlawh a, Dapkhanah a lo lut leh ṭhin,” a ti.

Doctor Fraser-a hova a zin :
Dr. Fraser-a hova an zin ṭum hian tui a vâng hle a ni ang, an tuihal lutuk chu thlâm ram an va hmu a. Tuium, a chanvea tui lo la awm chu – engtia rei nge a nih tawh ang a, engtika mi nge ni tawh ang tih pawh an ngaihtuah hman tawh lo a ni teh chêk ang a, an in ta bawrh bawrh mai a.

Chumi ṭuma an zin ho chu, Pastor Pháwka sawi dan chuan, Doctor Fraser-a chu a chau thei em em mai a, chawlh a rawt a, an han chawl a, “‘Mala vakvaiin ka lo haw,’ tih kha i sa ang u,” a ti a, an han sa leh rih ṭhin a. Hetih lai hun hi 1913-1920 inkar vel a ni ang. (A hun hi Document danga a lan danin 1913-ah chuan Dr. Fraser-a mizoramah a awm tawh loh avangin, 1913 hma lam a nih hmel zawk e. KZl)

Heng hun lai hian ngawdur pui puite a la tam a. Ngawdur tih chu – thing lian pui pui sang pui pui hlir awmna, tu mahin lova an neih ngai loh, ramsa – sai, sakei, savawm, sanghal leh ramsialte hial pawh an chên dur dur lai a nih chu. Khua pawh a la khât hle a, mi pawh an la tlêm êm êm a, chuvangin khua leh khaw inkar kawngte hi a la chhe em em a, Pastor bial fangte hian luidung an zawh mai mai chângte pawh a awma, kawng awm chhunte pawh a hnim em em mai.

Pastor Pháwka hi Pathian Thlarauva harhna ngaisang mi a ni a, mi huaisen, taima leh rinawm ani.

An thusawi tlangpui chu – “Isua hi Chhandamtu a ni. Chanchin Ṭha hi ring rawh u, in rin chuan vanah in awm ang a, in rin loh chuan hremhmunah in awn awm ang. Hremhmun chu meidil a ni, kumkhuain meiin a kâng ang che u. Isua ring apiang chu vanramah kum khuain nuam takin an awm ang,” an ti ṭhin.

 

Leave a Reply

Your email address will not be published. Required fields are marked *

error: Content is protected !!