Pastor Hauchhunga chanchin – Rev. Lalnghinglova

[A chunga mite hi ni 11.8.2019 Puitling lam Sunday school zirlaia Pastor 1915-a nemngheh lo langte, mi ṭhenkhatin an chanchin hriat kan duh thu zawhna lo awm avangin a ngaihnawm lai, Zoram Nghahchhan (Rev. Lalnghinglova) aṭanga rawn lâk chhuah a ni e. K. Zalawma]

Pastor Hauchhunga :
A pianthar dan – Muallungthua an awm laiin Aijala harhna an va chhim a, Pu Thangthura khan a duhsak em em a. Harhna an chang hlawm a, an lam suau suau tawh si a, ani lah chu a la danglam thei chuang si lo va; Pu Thangthura chuan a duhsak si a, a buaipui em em mai a. A nakinah chuan, Hauchhunga chu a tap ta rawih rawih mai a, a danglam ve ta chu a lo ni reng mai a. An khua Muallungthu lama a haw phei pawh chuan kawng an kal rei lam pawh chu hre chang lo khawpin lawmnain a khat a lo ni reng mai.

Mi chak a tling: Sap châwma lehkha an zir laiin (tirhkoh hna an zir lai a ni ta ve ang), Mission Veng mual khatah chuan sakeiin bawng a seh a, a àwn rawng rawng mai a. A thianpa Vanchhunga, mi chak tak bawk nen chuan an tlan ta a, bawng chu an zàwn haw sak a. A sa ṭhenkhat chu sakei thah nan tûr an phul a, an chah ta bawk a. A tûk lamah chuan an sa chah kha sakeiin a ei leh ei loh an zuk en leh chuan, sakei sum 6 zet mai chu a lo thi reng mai a. Anni thian dun chuan an zuk phâwk hmasa leh ta a, an pahniha kâwr tê aṭanga tlâng zâwla an rawn zawn chhuak chu tlangvalho lo pungkhawm chuan mak an ti tawp thei lo a ni ber mai. “A tu nge chak zawk che u,” tia an zawh leh an chhang ṭha duh si lo va, “Ani a hmasak chuan kan kal sâwt deuh,” an inti ve ve si a. Tlangvalho chuan an han zâwn ve ta a, rit an ti êm êm mai a. Hauchhunga leh Vanchhunga te ṭhian dun chak turzia chu an hre phak lo a ni ber awm e.

Inbuan chak hmingthang a ni bawk:
Hauchhunga hi inbuan chak hmingthang a ni a, a ṭhianpa Vanchhunga pawh inbuan chak a ni ve tho. Hauchhunga chuan, “Ani chu a chak zawk alawm. Kei chu inbuan ka thiam a, thiam thilin hneh châng ka nei mai a ni; ani chu kei ai chuan a chak zâwk,” a ti tlat.

Inbuanah thuhril hun a hlawh: Tirhkoh a nih hnu hian mite inbuana chova chapo lo turin Pathian hnenah a ṭawngṭai thin. Pathianthu hrila an zinnaah zawlbukah inbuanah an lo cho ṭhin. Pathian thu hril theih nan inbuan phawt a ngai ṭhin a, chutiangah chauh chuan inbuan chu a duh a ni. Inbuan zawhah Pathian thu a hrilh thin.

Hmân deuh khân Thingsulthliah Upa Thanghleian, tun hmaa Pastor Hauchhunga bial fang inbuana an cho thu a sawi a (Hetih hun hi Sailama an awm lai a ni). Pastor Hauchhunga hi Sialsûkah reng a awm a, inbuana an cho dan chu hetiangin a sawi: “Pastor Hauchhunga chu zawlbukah hian a lo lut ve a, a pa lian bawk a, inbuan chak a nih te pawh kan hre vek a, ‘Inbuan phawt ila, inbuan zawhah Pathian thu min hrilh dawn nia,’ kan ti a. Kan han inbuan chu kan hneh lo hle mai a, kan hneh lo tih pawh kan hre ṭheuh va. Chutih lai na nâ nâ chuan lal upa zinga ka pa a la tel ve lai a la ni bawk a, tlangvalho chu ka thu thu a ni mai si a. Kan inbuan zawh chuan, ‘Tlangvalho zawng zawng chu chhuah vek tur,’ ka tih avangin kan chhuahsan ta vek a; Pastor Hauchhunga chu zawlbuk meilumah chuan amah chauhvin a awm ta a, a khawhar ngei mai,” a ti.

Miin an duhsakzia: Pastor Hauchhunga hian Kohhranhovin kawng tinrenga an duhsakzia a sawi thin a. An duhsakzia entir nana a sawi pakhat chu – Aizawla an kal hian, Pastor lo kal huna lumah tiin Vai thingpuife hi an han hawn ngei a, chu chu kan kal huna lum atan an khek ta ngar ngar a. Kan va kal ṭum chuan min duhsak em avangin Vai thingpui kha min intir an han tum ngei a. Bai bêl kha an han nuai deuh thuak thuak a, tui an han chhuang a, Vai thingpuife kha an han thlâk a. An silfai tâwk loh avangin a la eng deuh zuak tho mai a, in a har angreng hle thin a ni,” a ti.

Miin an thlâkhlelhzia : Pastor pangnga chauh khan Zoram pumpui an han vil kha a ni a, Kristian hmasate khan an Pastor neihchhunte kha an ngai ngawih ngawih a ni ber mai. An va zin chhun te hian inkhawm banah rei tak tak an menpui a, an titi an ngaithla a; Pathian thu an hriatthiam lohte an zawt bawk a. Chunglai hun chuan zawh tur pawh an hre lo zawk mah. Pastorte thu kha an ngaihthla peihin an pawm nghet em em mai a, an thu kha an awih em em mai. Chutianga rei tak tak an menpui thin avang chuan mut pawh an mu mang thin lo a ni. A tukah khaw dangah an kal leh zel bawk. Chunglai hun leh a hnu deuh thleng khan bial a zauh em avangin innei turte hian an bial fang
kha an um ngar ngar chang pawh a awm.

Khawtlang thila rawngbawlna: Pastor Hauchhunga talent dawn mak tak mai, ṭangkai tak si chu a nauchhar thiamna hi a ni. Hmanlai chuan damdawi lam thiam hi an tlem em em mai si a, Pathian pek liau liaua nauchhar a lo thiam hlauh mai hi mipui vantlang tana tangkai tak mai a ni. Hemi lamah hian mipuiin an chhawr em em mai a, damdawi lamah pawh first aid bu te a nei a. Hnâr thi, khabe bal, ruh tliak, pum nâ angahte hian an ko nasa hle mai. Heng hi Pathian rawngbawlnaa ngaiin châk takin a thawk zel thin a ni.

Khawsak dânah mi entawnah a insiam: A tawi zawngin sawi ila. Huan siamah te, huanthlai chi tinrêngah mi tihhmuh tum takin huan tha tak a nei hram hram zêl a. Diarkhaia an awm lai leh Sialsuka an insawn hnuah pawh chutiang chuan mi tihhmuh a tum ngar ngar a. Siaksuka an awm hian thlanmual neih a rawt chhuak leh a, khawtlangin an remtihpui a. Khanglai khan sawrkar hnathawkte kha an lal tehlul nen, mahni in kianga inphum mai mai chin lai kha a la i bawk si a. Chutia thlanmual neih a han rawt hnua an phûm hmasak ber pawh sawrkar hnathawk, Overseer babu, Upa Khianga fa ngei a ni! Khâng laia Overseer babu kha chu lai tak mai an ni a; ani pawh, khawtlâng ṭhatna duh avangin vantlâng thu awih hmasa berah a ṭang ta a nih chu.

Pastor Hauchhunga thusawi thenkhat : Jakoban, “Thu ngaithlatute mai ni lovin, zawmtute lo ni zawk rawhu; chuti lo chu mahni inbum in lo ni dah ang e,”(Jak. 1:22) tih hi a sawi ṭhin pakhat chu a ni. “Miṭhenkhatin Zosapte thusawi an ngaihthlâk dan chu an tih dan zir an duh vâng mai mai a ni. Zosap tih dan zir thiam mi te, Zosap tih dan Mizo ngaiha mak deuh te, an ṭawng dik tâwk lo nuihza siam nana hman atan, tia ngaithla mai mai an ni a. Jokoban, ‘Thu ngaithlatu mai ni lova, zawmtu chu a thiltihah malsawmin a awm ang,’ a tih kha. Thu zawmtu nih a tul a ni,” a ti thin.

Harhna chan laia fimkhur tulzia : Hmanlaiin harhna an chang nasa hle a, amah ngei pawhin 1906-ah daih khân Aizawl atangin a chang tawh a; harhna chan laia fimkhur ṭulzia he tian a sawi : “Isua pawh khan Thlarau Thianghlima a khah lai tak khan Setana thlemna a tawk a nih kha. Tunlaia keini, harhna changtute pawh hian hlimna kan um lutuk chuan a ṭha lovang. Zanlai tairek thleng thlengin emaw tlaivar var emawa lenkhawm te, zaikhawm te hi a ṭha lo, Setana a tel tawh ṭhin a ni. Mipa pangti leh hmeichhe pangti a inang lo va, fimkhur a tul em em a ni.” a ti.

Harhna tak tak chan a tulzia :
Fapa tlan bo thu a sawiin, hlim lâmna mai kan chang ang a, harhtharna tak tak kan chang lovang tih a hlauhawm. Fapa tlan bo tehkhin thu-ah Bible-in a sawi pawimawh tak mai chu – “A inhriat chhuah veleh,” tih hi a ni. A lo harh chhuak ta a ni. Tunah kan hlim hle a ni thei, harh chhuah tak tak a ṭul a ni. Harhna chang tak tak chuan a sualzia a inhria a, a tih tur dik tak chu Isua hnena kal a ni,” a ti thin.

Leave a Reply

Your email address will not be published. Required fields are marked *

error: Content is protected !!