Pasaltha Zampuimanga thlan dapchhuah dan – RK Lalhluna

PASALTHA ZAMPUIMANGA THLAN DAPCHHUAH DAN

R.K. Lalhluna

1 March 2017(Wed)

Ni khat chu, kan ina ka ṭhut veng veng laiin, Chawngtui  South unaute an rawn kal a. “Kan khaw luah nawn Silver Jubilee, April 4, 1996-ah khian lawm kan tum a, min rawn hmanpui thei ang em?,” an rawn ti a. Chutia min sawm a zarah chuan, “Mi pakhatin, Chawngtui vanglaia an Chapchar kut an chai rei luat avanga an pamṭula an darh tak thu leh chu an darhsan tak khua chu, “Vaphai bula Chawngtui a ni a,” Meichher chanchin bua ziak thu leh hlaa kan khaw hlui Chawngtui bul leh a chhehvel-a hmun hmingte, Phunchawng zawl, Suarlaili an tih an khaw bul Tuichang kam a nih thu sawiin Kawilamho Chawngtuia an awm laia an chai reina chu kan khaw hlui bul hmanlaia Chawngtui hmun hlui nia kan hriat, hmun danga bel chu dikin kan hre lo va. Tichuan, kan khaw bul hmanlaia Chawngtui hmun hluite min va tlawh pui la, a bakah Pasalṭha Zampuimanga kan lal Dopawnga’n Bemtara a awmlaia pem lut Zampuimanga (a tar tawh lam a hruai phei leh) Tuichang ral Keltan hmunpuia pempui, thihna hmun, Upate sawi, Niliana farṭuah bul te min chhuipui bawk la an ti a.

Chutih laia an khuaa awm Forest lama an hotu Pu C. Lalengliana pawh Chawgtui lama a rawn kal tur thu min hrilh bawk a. Tichuan, Pu Lalengliana ruala kal a remchan bawk avang leh chu an mi sawmna chuan min tihphur bawk avang chuan, kal ngei ka tum a, kan ruala kal ve turin Tv.Ricky-a leh Pi Thari ten kal-ho an lo inhuam bawk si a. Tichuan tahrik Ni 8.4.1996 ah Lunglawn aṭangin Pu Lalengliana motor chuan kan kal ta a. Thiltlang kan thleng a, Thiltlang aṭang chuan footpath-ah Tuichang ke-in ka thleng a, Ni a sain khua a ṭha hle a. Tuichang lehlam Khawhlum lam ram chu, lovah an lo neiin a kang fai rul mai a. Ni a sain kan chau hle a, Zorama khaw te-ber Khawhlum chu kan thleng ta a, chutah chuan mi pakhat  Pu Rala chauh a awm a, an khua chu a te tak meuh a nih chu!

Khawhlum aṭang chuan Chawngtui khaw pan chuan zuhrei feh chhhuak ang mai, kan chho vang vang a, khua a thim ṭep tawh tihah chuan Chawngtui khaw puipate chuan min lo hmuak a, ei leh in tur min hluite chuan min tiharh-in unau hmel hai velah chuan Chawngtui chu kan thleng ta a.

A tukah chuan (9.4.1996) hmanlaia Chawngtui khaw hmun hlui chu kan va tlawh a, chhuah chhawng ram pharh ṭha tak a ni a, khaw hlui a mi tih hriat fahranin lungphun lovin thlanah te chuan lung an lo tiang thliah thluah a, Upaten an chai reina mual ni awma an sawi te leh a bula tuikhurte chu kan tlawh a. Hlamzuih thlan lung an rem chu kan hai khawk a, hlum bel chhunga nausen an phumna a niin a thu luanchhuah nana a mawng an chhut pawh, a chhunga ruh leh tisa hmuh tur awm tawh lo, vaivut, vaivut-a kir leh bak chu a awm tawh lovin bel ruak chu khaw lamah kan hawn ta a. Lusei hnah thlak mitthi sawngbawl dan a ni tih a langin Kawilamho sulhnu a nih ngei rinhlelh rual a ni lo.

A tuk, Tahrik 10.4.1996 chu Silver Jubilee lawm ni tur chu a ni a. Chawngtui khaw luah rawn kum 25-na Silver Jubilee-ah chuan khuallian atan Minister H. Lalruata an sawm chu a rawn kal theih loh avangin Chawngtui Lal nau Pu Lalthima chu Chief Guest-ah an ruat chawp ta a. Kei chu Guest of Honour-ah min ruat ta a. Tichuan, ni 10.4.1996-ah Chawngtui khaw luah nawn Silver Jubilee chu ruai ropui tak nen lawm a ni ta a ni.

Keltan Hmunpui lamah: A tuk 11.4.1996 chu a rawn her chhuak ta a. Chawngtui nula leh tlangval (YMA) tam takte nen Pasalṭha Zampuimanga thlan dap chhuak turin Keltan hmunpui lam panin kan liam thla ta a. Keltan khaw hluia an Lal Dopawnga te thlan leh Laltuchhingi, Pu Keihawla ni thlante kan han hmu ta a le. “Laltuchhingi-pa zing khaw vauzawl i thlen chuan / Pawla kawtah chengrang kau ang che. Hnam len la sat dai rawh,” tih hlate kha ka hre chhuak vawng vawng a. Thui vak lo, thlawhbaw ngaw thelh kan kal hnu chuan Niliana Farṭuah bul nia kan rin chu kan thleng ta a. Farṭuah lian vak lo, upa tak lo ding bul lawka laih zawl hmeithai in sakna khawp vel-a zau lo awm chu Zampuimanga thlan a ding tlarin an han hmatiam a, lei thar hlir an chek chhuak a, thlan lei thi vur awm an hmuh tak loh avangin Fartuah bul hnaia Kawldai pi fing feng lo to kual chu thlan chhinchhiah nana an vihphun a nih kan ring ta deuh a. Chu chu a hma ang bawkin kan han lai hmatiam a, lei hlui leh thi, thlan vung chhilh hmel chu kan kan ring deuh a. Lei laihna hmanraw kengte chu hmu tain thlan hmun ngei a ni tih kan hre ta a. Tichuan, keini Lunglei lama haw leh tur kan niin, chu thlan chu laih zawm tawh lovin lung kan phun ta a.

ZAMPUIMANGA CHHAKCHHUAK tih kan ziak a, thlate kan laho a. Mahni in lam panin kan inṭhen darh ta a. Thlan dap chhuaka hlawhtlinga inhriain, kan hawng ta hlawm a nih chu! Tichuan, keini lam chu Khawhlumah kan riak thla a. Chawngtui unaute chu a hnu leh rilruk ranin Siang lam an pan ta bawk a ni.

Tichuan, Chawngtui unaute chuan atuk leh 12.4.1996-ah chuan thlan chu chian leh zual turin funpui er meuhin hma an la leh ta a. A ruang zalhna thlenga laiin, Pasalṭha Zampuimanga chu Zoram leilungah a lo chang zo tawh a. A ruhro pawh a awm tawh lo. Vaivuta siam mihring chu vaivut a lo ni tawh a ni. Mahse, a zen rawt lung, falung ang tak leh lampei a ruang zalhnaa awm chu Chawngtui unaute chuan an hawn ta a ni.

Tichuan, Pasaltha Zampuimanga thlan kan hmuh chhuah thu chu Pu C. Lalmuana thianpa ka hrilh a. Ani chuan, Zampuimanga tupa Pu C. Lalmuana chu a hriattir ta a. Ani chuan i he lovin a pu thlan ngeiah pawm hmiahin a pahnihna atan hmun dang a dap lovin hetiang hun ropui hi kan thleng ta a nih hi!

Ngaihdan phir awm thei: Pu K. Zawla, Mizo pipute leh an thlante’ tih a ziakah Zampuimanga chu Bemtara thi angin a ziak a. Bemtar Lalpa Dopawnga hian a khuaa pem turin a sawm a, a pem ngei bawk a. Dopawnga chu Bemtar aṭangin Keltan Hmunpuiah a insawn chho va. Chutah chuan, Zampuimanga chu a thiin veng tawp Niliana Fartuah bulah an phum a ni tih Dopawnga thlah, Chawngtui lal leh a khua-leh-tui-ten chiang taka an sawi theih avangin Zampuimanga thlan hi harsa lutuk lovin kan dapchhuak ta a ni a.

Hetianga Pu C. Lalmuanan, sum tam tak senga heng a lung a phun avang te, a lung dawh silai muala a siam abaka Zampuimanga building in ropui tak a sak tak avang hian Zampuimanga thlahte hi mi tak tak leh chhuanawm an nih-zia leh kan sawrkar ten an hlutpui hi Zoram tan malsawmna a tling tak meuh a ni Tichuan, kan ram leilungte hi, kan pipu taksa a ni a, i rohvin i humhalh tlat ang u. He lehkhabu hlu tak Pu C. Lalaudinga’n a lo ziak tlangzarh a ni ta hi a lawmawm takmeuh a ni.

Ka lawm e.

Leave a Reply

Your email address will not be published. Required fields are marked *

error: Content is protected !!