Nupa hlimna bul – Mizo Sermon

Ṭpa Ngente.

Nupa hlimna bulpui ber chu nupaa Pathian ṭih tlat chunga chhungkaw enkawl hi a ni i’n ti tâwng phawt mai teh ang.

Ṭhenkhat chuan nupa hlimna atan hian sex education hi an ngai thupui em em a, a ber emaw ti pawh an awm hial a, rawngbawltute pawh an bang lo. Mahse, sex education buaipuia lehkhabu te hial ziak tawhte pawhin an kawppuite an ṭhen ve tho mai.

Kan pi leh pute khan sex education lam an hre lem lo va, mahse, ‘Kawplai ṭang ṭhen chu dar lehlam sah thlak ang a ni,’ ti khawp hiala nâin an lo inhmangaih thei tho va. Hei hian sex education hi nupa kar nghehna leh hlimna ber a ni lo tih a lan tir hle awm e.

Amaherawhchu, sex education hi kan hnawl vek tur tihna a ni lo va, a ṭul chin chu kan inzirtir bawk ang chu. Chutih rual erawh chuan thil ṭhalo zawk zir chhuah a awl em avangin fimkhur a ngai em em a, ngaih thupui viau loh a ṭha zawk tih kan hriat a ṭha hle mai.

Chuvangin, nupa nun sex kaihhnawih kan inzirtir ṭhin hian ṭhatna chen a neih rualin fimkhur a ngaihna lai tlem azawng han thai lang ila.

Nupaa sex hman danah hian tlema kum a la tlem deuh lai chuan thisen a la chak ṭhat avangin a pangngai pawhin kan hlim tawk viau thei vek a. Tlema kum alo tam deuh hnu hian harsatna neuh neuh a awm theih deuh avangin mawlmang lutuk lova inzir zau ve deuh pawh a ṭhatna chen a awm.

Mahse, nupa karah pawh hian sex hi hman sual theih a nih ve tho avangin inven fimkhur a ngai a, Pathian hre reng chunga nun hman a pawimawh. (Kristian te tan chuan anal sex leh oral sex hi thiang hlek lo a ni a, hengte hi Bible râwn lem lova sex education zirtirnate chuan an pawmzam mai ṭhin a, a ṭha lo hle a ni.)

Tin, nuam taka sex hman duh vanga tih dan chi hrang hrang han apply ṭhin te, hmanraw dang han rawih te hian engemaw chenah nawmna chu a pe ve teh meuh mai, mahse, a pangngai pawh ngaia neih theih a ni ang tho hian eng method pawh hi ngaia neih theih vek leh khawp kham loh theih vek a ni a, a aia uchuak duhna a piang zel a, ngaiah an neih chho zel a, a tawpah chuan hahthlak tak leh uchuak taka sex hman kher loh chuan tlingtla zo miah lovin a awm theih ṭhin a, chu chu nupa tan a ṭha lovin a hrisel lo em em a ni. Tin, Pathian thu zirtirna thianghlim chin penbo san a awl hle bawk.

Nupa hi sex hman hlimna lam um lutuk leh kal thui lutuk a awm thei a, hei hian sex-ah mi a ti sang ṭhin a. Eng method pawh hmang mah ila a ngai hlir chu inchhangkham hun a awm lo thei si lova, hetah hian mi tam tak thinlungah kawppuite khawp kham lohna a piangin uirena thlengin a thlen awlsam em em a, inven fimkhur a ngai hle a ni.

Chuvangin, nupa karah hian a tawk chauh leh in ren thiam deuh a sex hman thiam a ṭha hle mai. Nupaa la insiam lo tan phei chuan sex hman hi Pathianin a phal lo bur a, nupa nih hun atana lo hriat lawk tur chauh a ni. Condom te hi nupa karah chuan mamawh hun a awm pawhin inenkawlna hmun (health sub-centre) aṭangtein an kawhhmuhin an pe mai ṭhin a, chuvangin kristiante zinga condom fakna pho lan fo te hi thil zahthlak tak a ni.

Pathian ṭihna tel lo va sex hman zei viau te hi thil hrisel lo tak a ni a, a hlauhawm hle bawk.

Nupa nun nghehna leh hlimna tak tak chu sex-ah ni lovin Pathian ṭihnaah leh Pathianin mihring awmphung tura a ruat ang zah taka vawn tlatnaah hian a awm zawk a, nupaa Pathian ṭih tlat chunga chhungkua enkawl ṭhin chuan nupa nun hlimna ṭha leh tluantling an nei ṭhin a ni.

Leave a Reply

Your email address will not be published. Required fields are marked *

error: Content is protected !!