Nu leh pa thu awih – Upa K. Zalawma

NU LEH PA THU AWIH

Upa K. Zalawma

Lalpa i Pathianin thu a pêk che angin i nu leh i pa chawimawi rawh; tichuan, Lalpan ram a pêkah che hian i hmuingîl ang a, i dam rei dâwn nia. Deuteronomy 5:16.

Naupangte u, engkimah in nu leh in pate thu zâwm rawh u, chu chu Lalpaah chuan a lâwmawm si a. Kolossa 3:20.

Thu sawm pek kan tih maia a hmasa palite hian Pathian lama rilru put dan tur a kawhhmuh a, a hnuhnung parukte hian mahni mihringpuite lama rilru put dan tur a khawhhmuh thung a ni.

Kan thupui hi ‘nu leh pa thu awih’ tih a ni a, changthlan Deut. 5:16 hi chuan ‘nu leh pa chawimawi’ tur a ti thung a, nu leh pa thuawih chu an mahni chawimawina a ni tih ring phawt ila a ṭha ang e.

Thupêk dang chu khapna ‘suh’ tih a nih laiin thu pek 5-na hi chu tih tur ‘rawh’ tih a ni thung a, Nu leh pa thuawih/chawimawi chuan dam reina a keng tel a ni. Nu leh pa tih hian Hebrai rilruah chuan pi leh pute pawh a huam vek a. Thlahtu ngaihsân a zirtir a ni.

Nu leh pa ngaihsân leh chawimawi hi khawvêl hnam tam takin an uar hle. Ṭhenkhatte phei chuan thlahtu thi tawhte kha pathian angin an be hial. Chutiang chu he thupek hian a phût lo va, mahse Pathian hriatna leh thlahtute ngaihsânna hi a inzawm hle a ni. Abrahama Pathian, Jakoba Pathian tih te pawh hi, thlahtu ngaihsânna a ni.

‘Chawimawi’ tih ṭawngkam hi awmze thûk tak a ni. Hebrai ṭawnga chawimawi ‘khaved’ tih lo chhuahna chu ‘rit’ tihna a ni. Chumi awmzia chu, la nêp lo ,rilru luah, nuna thunei tihna a ni. Nu leh pate chawimawi awmzia ber pawh an pawimawhna leh hlutna ngaihnep loh, rilruah leh nunah khata hmun luah tlat tihna a ni. Thil kan chawimawi chuan rilru a luah ṭhin. Nun leh thiltihah a lang chhuak bawk ṭhin.

[adToAppearHere]

Nu leh pa chawimawiin rah a neih nghal mai chu ‘damreina’ a ni. Hei hi Juda rilruah phei chuan a hlu leh zual. Tunlai angin chatuana nunna beiseina a la chiang lo va, miten chhandamna anga an pawm leh an châk chu damreina a ni.

Damrei tur chuan hrisel a ngai a. Nu leh pa chawimawina nun chuan rilru a tihlim a, hlimna chuan mi a tihrisel a. A hranpaa Pathian hnathawh tel lo pawhin damreina chu thlen thei mai âwm a ni rêng. Chu bâkah Pathian thutiamin a delhkilh leh nghal.

Nu leh pa zah loh leh sawichhiat chu thihna thlenga hrem theih a ni (Exod. 21:17) Nu leh pa zah lo zawnga zirtir pawh Isuan a lawm lo (Mk. 7:9-12. – Rev. Lalthanmawia).

He lai thu hi Thuthlungthar lamah Paulan hmun hnihah a la chhuak a, a pakhat zawk chu kan changthlan Kol. 3:20 hi a ni a, “Naupangte u, engkimah in nu leh pate thu zawm rawh u, chu chu Lalpaah chuan a lawmawm si a,” tih hi. Ephesi 6:1-ah ‘ Lalpaah chuan..” a tih laiin Kolossaah hian “Engkimah..” a ti thung a, naupangte chu nu leh pa thu thua awm tur tihna a ni ber ang.

1. Nu leh pate hi leia kan Pathian hmuhtheihte an ni: Pathian hian directin min enkawl hran lo va, min hringtu kan nu leh pateah fanau malsawmna ni turin Pathian pek kan ni a, Pathianin min enkawltu atân nu leh pate hi min pe a ni.
Chuvangin nu leh pate hi kan Pathian hmuh theihte an ni.

2. Nu leh Pa thuawih hi malsawmna a ni: Mahni fate tana ṭha tur hi nu leh pa duhthusam ber a ni ṭhin. Kan ṭhatna tûr a nih dâwn phawt chuan thununna pawh fate chungah an lek ṭhin. Thuawihte chungah chuan thununa lek a ngai lo va, lâwmna an nei zawk ṭhin a, chu chuan duhsakna a siam a, sual leh thil ṭha lo laka fihlim hi nu leh paten fate chunga an duh thusam a ni ṭhin a; nu lehpa thu awihte chungah chuan malsawmna a thleng ṭhin a ni.

[adToAppearHere]

3. Nu leh pate thu awih hi Pathian thu awihna a ni: Pathian chuan kan ṭhatna tûrin a thu zawm tur min pe a, chu chu nu leh paten an kengkawh tûr a ni. Min enkawl tûrin Pathianin nu leh pate hi min pêk an nih avangin, nu leh pa thu awih chu Pathian thu awihna a ni.

Nu leh pa thu awih tih hian rilruah naupangte an lo lang ṭhin. Amaherawhchu, khawvela lo piang chhuak tawh phawt chuan nu leh pa an nei vek a, kan nu leh pate an dam chhûng chuan puitling pawh ni ila, kan zah a, kan chawimawi a, an thu kan awih hi mi tin tih tur a ni. Nu leh Pa enkawltu nei lo pawhin an mahni enkawltu apiang kha an nu leh pa-te an ni tih hre reng bawk rawh se.

Miin nu leh pa thu awih si lovin Pathian thu a awih thei lo vang.

Bible-in min zirtir thu hi zâwm ta ila chuan, vawiina sualna tam tak, chhungkua, khawtlâng leh ram leh hnam tâna hnawksakte hi an kiam sawt ang a, mi hring pawh kan dam reiin kan hrisel zawk bawk ang a, kan ram hausakna hai chhuakin keimahni pawh kan intodelh zawk ngei ang le.

“Miin fapa luhlul tak, hel hmang tak nei ang sela, a nu leh a pa thu âwih lovin, an thununna pawm duh lo sela, a nu leh a pa chuan an kai ang a, an khaw upate hnênah an khaw kulh kawngka bulah an hruai tûr a ni. Tin, an khaw upate hnênah chuan, ‘He kan fapa hi luhlul tak leh hel hmang tak a ni a, kan thu pawh a âwih duh lo va; inkhawhral hmang leh ruih hmang mi a ni,’ an ti tûr a ni. Tichuan, khuaa mi zawng zawng chuan lungin an dêng hlum tûr a ni; chutiang chuan in zîng ata, chu thil ṭha lo chu in tibo tûr a ni; tin, Israel mi zawng zawngin an hria ang a, an hlau vang. Deuteronomy 21:18‭-‬21.

[adToAppearHere]

Leave a Reply

Your email address will not be published. Required fields are marked *

error: Content is protected !!