Ni 5 chhung Aizawl khawpuia Zero Tolerance neih chhungin dan bawhchhia man 307 an awm

Source – Vanneihthanga Vanchhawng, Mizo Special Report

4th June, 2019 (MSR) : Traffic Police leh Transport Department hnuaia Motor Vehicles Department ten May 27-31, ni 5 chhunga Aizawla Zero Tolerance an kalpui chhungin lirthei dan bawhchhia man 307 an nei. Heng zinga lirthei 133 te chu an manna hmunah pawisa chawitir nghal an ni a, chung mite pawisa chawi tlingkhawm chu cheng nuai 11,65,100/- a tling.

Traffic Office atanga thudawn danin, Zero Tolerance kalpui bultan ni May 27, Thawhtanni khan lirthei dan bawhchhia 59 man an niin, heng zinga 27 te chu an manna hmunah pawisa chawitir nghal an ni a, an pawisa tlingkhawm chu Rs 28,500/- a ni. Thawhlehniah lirthei dan bawhchhia 74 man awm lehin, lirthei 34 te a hmun a pawisa chawi tlingkhawm Rs 48,100/- a ni. Nilainiah dan bawhchhia 61 man niin, lirthei 24 te a hmun a an pawisa chawi chu Rs 27,500/- a ni. Ninganiah lirthei dan bawhchhia 58 man awmin, a hmun lirthei 29 te pawisa chawi tling khawm Rs 35,400/- a ni a, Zirtawpniah dan bawhchhia lirthei 55 manin, a hmun a pawisa chawitir nghal 19 te chawi chu Rs 25,600/- a tling.

Zero Tolerance kalpui, ni 5 chhung khan lirthei dan bawhchhia man zawng zawng chu 307 niin, a hmuna pawisa chawitir nghal 133 a awm a, heng a hmuna pawisa chawi tir nghal ni lo, dan bawhchhia mante hian Traffic Office lamah an pawisa chawi hi an la pe leh dawn a, hemi vang hian tun dinhmunah Zero Tolerance kalpui chhunga lirthei dan bawhchhiatna vanga pawisa chawi tlingkhawm zat hi hriat kim theih a la ni rih lo.

Zero Tolerance week, no tolerance week, aizawl traffic, traffic jam in aizawl
Khatla Kawn – Peak Hour during Zero Tolerance Week

Zero Tolerance kalpui chhung khan Traffic police leh Transport Department hnuaia Motor Vehicles department Duty te chuan lirthei leh a khalhtute chu lirtheiin a neih tur lehkha pawimawh hrang hrang an neih kim leh kim loh te, chhiah an pek leh pek lohte bakah lirthei khalhtuin Driving License a neih leh neih lohte an endik a. Lehkha pawimawh nei kim lote chu ngaihdamna tel lovin an man nghal zel an ni.

Traffic Police hotute chuan, lirthei an man zingah Road Tax pe lote, Insurance nung tawh lote, lirthei atanga khu chhuak chu dan pawm chin a nih leh nih loh endikna, Polution certificate nei lo leh Driving License nei lova lirthei khalhte an tam zual tih an sawi a, dan bawhchhia an mante chu a hmunah pawisa chawi tir nghal zel an ni a, pawisa chawi tur nei lote pawh an lehkha pawimawhte hren sakin, Traffic Police Office-a an pawisa chawi tur pe tura tih an ni.

Thubelh: Zero Tolerance week / No Tolerance Week hman a nih chhung hian Aizawl khawpuiah lirthei a thawl hle a, hei hian a lantir chu lirthei document fel lo, neih ngai ang nei lo an tamzia a ni. Traffic lam hian ngun leh zualin check se a lawmawm hle ang.

 

Leave a Reply

Your email address will not be published. Required fields are marked *

error: Content is protected !!