Ngaihnawm, maksak leh dangdai – Kohhran nu ho Kolasib-a an inkhawmpui zet chu – March 2019

Kum 2019 a Presbyterian Kohhran Hmeichhe Inkhawmpui Kolasib Diakkawn Field-a neih zet chu nuho tih takah chanchin maksak leh ngaihnawm tak tak a tam ngang mai. Tuna kan ziah khawm bak pawh hi tam tak a awm ngei ang. A rawn ziak hmasatu Muankima Khawlhring ziah te, Musa ziah te leh veng chhung whatsapp group lama an post te la khawmin kan han rem khawm vel a, tu pawi mah kan sawi em lo ang chu maw…

Kohhran hmeichhia, inkhamwpui 2019, khawmpui, Church Assembly, Mizoram kohhran hlimthla
Kohhran Hmeichhe Khawmpui Kolasib

1.Kawng bo : Kawng bo an tam em em a, a buaithlak lai ber chu an thlen in chu sawi loh, an thlenna veng hming pawh an hre fuh hleithei lo chu a ni. Nu ṭhenkhat chuan ‘Ṭanpui Veng’ ah thleng niin an insawi a, chu chu Kolasib a veng lar tak pakhat ‘Ṭumpui Veng’ nen a hming a la inzul deuh a, an thlenna zawn hmuhpui dan pawh a la awm. Amaherawhchu mi ṭhenkhat ‘Khuangpuilam’ venga thlengten ‘Lamkhuang Veng’ a thleng angin an inhre zui a, ‘Project Veng’ a thlengten ‘Agenda Veng’ a thleng niin an inhre zui a, hei vang hian an thlenna zawn hmuhpui an hautak em em mai.

Nu ṭhenkhat chuan an thlen in kha a kawta motor ding aṭangtein an chhinchhiah a, ‘Auto rickshaw pathum a ding’ te an ti a, inkhawm an han ban meuh chuan thlen in an chhinchhiahna motor te kha an lo tlan sawn leh tawh ṭhin si a, an motor hman te nen an inphur kual an inphur kual mai ṭhin a, a va hahthlakin a va hlimawm si em. Nu ṭhenkhat an thlen in te hre tawh lo khan, an thlen in an sawi theih dan ber chu ‘niminah vawk an talh a ni awm e’ tih te kha a nia, zawnpui an hautak ṭhin teh a nia.

Lam laiin kekawrte hak lai ti tla pawh an awm a nih hi

Vawi khat phei chu Pandal bul aṭangin Bus khat tlatin nuho an chuang a, an han tlan dawn chuan an chhukna tur veng hming hria pakhat mah an lo awm lo a, Bus driver leh conductor-in hre bik bawk si lo, khawtual mi a tawp thlenga chuang ve turin an ngen tawp ṭum pawh a awm. Chutih rualin “Speaker pawhin kawng a bo ve tho” tih vanga mahni kawng bo pawh ngaihngam taka fiamthu thawh nana hmang ham ham thei nuho an ni miau a, an bula awm a nuam ber mai.

2.Nuho tawnah Traffic police-te lu a hai : Scooty-ah an in threeble (mi pathum in phur) lai traffic-in an lo ham ding a, traffic lam an ṭawng hma hmain scooty hnunga chuang nu pahnih khan, “Min man lo mai ru, kan chin hria ula min lawmpui zawk ang. Chhim lama thleng kan nia, kan thlenin pa hian kan bo min zawn hrep hnuah Kolasib hmar lamah mi a rawn zawng hmu thei hram a nih hi. Min phurh loh chuan kan bo leh dawn si a, min man lovin min lawmpui zawk rawh u!” te an han ti leh rih ṭhin a, ngaihdam leh en liam mai loh chu tih dan tur avang duh asin.

Kohhran nuho, hmeichhe thlalak, nuho khawmpui, Kolasib khawmpui, Kohhran hmeichhe khawmpui Kolasib, Kohhran hmeichhe khawmpui 2019
Inkhawmpui kal nu ho thla la tur Bung an lawn lai. Pic: Achawia Renthlei

3.Thu awih lo Nu ho : Nu ho zet chu Usher ṭhalai zawk tan chuan tih thiam an har ngei mai. An fate rual te te khan an ṭhutna tur kawhhmuhin rem fel an han tum a, mahse duh dan nei hran ṭhiau tawh, mahni inchhunga thu nei pha ṭhiau chin kha an ni a, Usher tan pawh chet hleitheih a ni lo. Chutia ṭhutna kawh hmuha Usher te an buai lai leh nuhoin ro hran an lo neih fo lai chuan nu pakhat chuan Usher hnenah, ” Bawihi, ka hnung a thak lutuk, min lo hiah lawk teh” tiin a hnung a han hiah tir leh lawp lawp bawk a, kut lehlamin țhutna tur kawh hmuh a ngai bawk a, lehlamin hnung thak hiah ngai bawk. Nuho inkhawmpui zet chu indaih loh theih tak a ni. Ṭhenkhat-in information office lamah Behlawi chi an lo va zawng bawk a…

4.Inpuahchah sual : Kolasib hi District Headquarter a nih avang leh khaw lian tawk tak a nih tawh avangin mikhual thlen hnem inbeisei thleng tlem leh si te, thleng ta miah lo te pawh an awm nual a. Pa pakhat chuan a mikhualte tana ei tur tui taka siam turin eirawngbawltu tur mi pathum a ruai a, mahse mikhual pahnih chauh a thleng leh. Hmarveng pa pakhat chuan mikhual te ei siamna tur tiin Kohhran bungbel a hawh a, sangha ringawt pawh 6kg lai a lei a, mahse mikhual pahnih chauh a nei ta si a. Chutiangin pa pakhat pawhin Bagha-ah bel set- chaw chhumna tur, sa chhumna tur, bai siamna tur- a len dan indawtin a lei thlap. Chaw ei dawhkan sei a siam tir a,  gas thuk lian a lei bawk a- mikhual pathum chauh a thleng leh si a. Chhungkaw ṭhenkhat chuan an inbuatsaihna an sa lei sa te chu ei seng dawn hek lo, a repin mikhualte an hawntir vel…

Eng pawh ni se, heng thil hlimawm leh hriatreng tlak a thlen theihna chhan chu inkhawmpui hmanga Kolasib lo kal nu hote vang a ni a. Mikhual fel tak tak te an ni hlawm a. Kolasib chuan heng nuho inkhawmpui hmanga rawn kal zawng zawng te, in pasalte nen, in tu in fate nen Kolasib a rawn zin leh vek turin a sawm che u a ni.


1 thought on “Ngaihnawm, maksak leh dangdai – Kohhran nu ho Kolasib-a an inkhawmpui zet chu – March 2019

Leave a Reply

Your email address will not be published. Required fields are marked *

error: Content is protected !!