Nangni chhandam fate tho ru – Sermon

-Upa K. Zalawma

Nangni chhandam fate tho r‘u,
Hruaitu Krista bèlte chu;
Harh r‘u, aw, hnam ropuite u,
Râlin Zion an thlen hma hian.

He hla hi kum 1723-a Folknera phuah a ni a, a châng rem chu II Tim 2:3 – “Krista Isua sipai ṭha tak angin hrehawm mi tuarpui rawh,” tih hi a ni.
Tuna kan neih anga remfel-tu chu El Nathan-a (1840-1901) a ni a, a thluk siamtu chu EL Nathana rawngbawlpui James McGranahan-a a ni a, Mizo ṭawnga lettu chu Lianchâma (1890-1947) a ni. Mizo ṭawnga a lehlin hmasaah chuan a thunawn tlar tawp ber hi “Hnehtu aiin kan ropui” tih a ni a.
Rom 8:37 ….”min hmangaitu avang chuan ropui taka ngamtu kan ni” tih ang hian siam ṭhat a ni ta a ni.

El Nathana hi a hming tak chu Daniel Webster Whittle-a a ni a, November ni 22, 1850 khân Chicopee Falls, Massachusetts-ah a lo piang a. Kum 21 mi a nihin. 72nd Illinois Infantry a zawm a, a luh tirh hian Second Leutenant-in a lut a, General O.O. Howard-a hnuaiah thawkin Major lai a ni hman a ni.

Ṭumkhat chu Vicksburg indonaah General Sherman-a hnung a zuina lamah hliam a tuar ta hlauh a, râl rama kal thei lovin in lamah inenkawl dam turin an tir haw ta a ni.

Hetianga inenkawl tura a haw hnu hian sumdawnna lam company lâr tak Elgin Watch Company a zawm a, company tan pawh a chhawrnahawm hle a ni. Evangelist lâr tak D.L. Moody-a rawngbawlna chu a tawng fuh hlauh mai a, Moody-a chuan hun puma rawngbawl turin a sawm a, tichuan, sumdawnna chu kalsanin rawngbawlna lamah kalin Pathian thusawitu lâr berte zinga mi a lo ni ta a ni. D.L. Moody-a khan Major Whittle-a tiin a lam kher ṭhin.

Maj. Whitlle-a hi Phillip Paul Bliss-a nen an zai dun ṭhin a. P. P. Bliss-a thih hnu hian McGranahana nen hian an inkawp chho leh ta a ni. Hla 200 chuang a phuah a, a thlûk leh music rem fel hi McGranahan-a tih deuh vek a ni thung. Maj. Whittle-a hian a hla phuah zawng zawng deuhthaw-ah hian a hming lem – EL NATHAN tih hi a hmang a ni. El-Nathan tih hi Hebrai ṭawng a ni a, Mizo hming chuan Vanlalpĕka tihna ni mai awm tak a ni. A hla phuahte hi Pathian pĕk vek a ni a ti a, chuvangin a hla phuahah hian a phuahtu hmingah El Nathan tih hi a hmang deuh zel a ni.

D.L. Moody-a chuan, “Major Whittle-a hi tun kum zabi chhunga hla phuah thiam ber zinga mi a ni ngei mai,” a ti.

Great Britain hmun hrang hrangah McGranahana nen hian Pathian thu sawi leh zaia rawngbâwlin an zin chhuak duh ṭhin a, kum 1890-ah McGranahan-a hian a hriselna a ṭhat tak loh avangin a chawlh san ta a. March ni 4, 1901 khan kum 61 mi niin Northfield, Massachusetts-ah Major Daniel W. Whittle-a chuan rinawm taka rawng a lo bawl sak ṭhina hnenah chuan cháwlin ropui taka ngamtu nihna chu a hlen chhuak ta a ni.

‘Nangni chhandam fate tho r‘u’ tih hla hi ral dona hla a nih avangin ‘sipai hla‘ an ti mai ṭhin.
Rálin Zion tlâng min thlen khalh a, hnehna an chan mai loh nân, Chhandam fate chu tho thuai turin he hla hian min tur a ni.

Châng 2-na hian ringtu kal tate kha he indonaah hian hnung tawlh lovin an ding nghet a, Isua zârah hnehtu niin an puanzar (banners) thin chu en turin min fuih a ni.

Chang 3-na hian, thihna pawh hlau tawp lo tura kan nunna Krista hnenah Pathianah chuan thuh rûk (Deadless, we are all unfearing, Life laid up with Christ in God) a nih thu a sawi a. Tlar 3&4-naah hian mizo rilru, ropui nuam ti ṭhin kha, a letlingtu Lianchâma hian a rawn pho lang a; “Amah a lan hun apiangah ropuiin kan lang ve ang” tiin.3
He hla phuahtu Forkner-a chuan –
“In the morn of His appearing,
Flowed forth a glory flood..” a ti a. Lal Isua lo kal leh huna a ropui nasat tur zia sawina niawm tak a ni. Engpawh ni se, Pathian lalna a taka a lan chhuahna hmunah chuan ringtute pawh ama zarah fak leh chawimawi kan hlawh ve ṭhin zawng a nih hi.

Chang 4-na hian Pathian ropuizia hre turin A hmaah kan la din tur leh, amah chu chawimawi tur a nih thu te, kan rinna lâwmman kan dawn ve tur thutein min thlamuan a, chu mi chang thei tur chuan-
Pathian thu hlu chu puang chhuak r’u,
Tuipui, khawpui ri angin;
Kan sual Tlantu Krista zârah,
Ropuia ngamtu kan ni (More than conquerers are we!), tiin Thlarau ngûnhnâm PATHIAN THU chu puang turin a thunawn hian min fuih a nih hi.

He hla hi Maj. Whittle-a, sipai huaisenin a chûl mâm ni âwm rĕng a ni e.

Krista hmangaihna ata chu tuin nge min ṭhen ang?…..
Khandaihin emaw min ṭhen ang em ni?….
Ṭhen suh e, chûng zawng zawngah chuan,
Min hmangaihtu avang chuan
ROPUI TAKA NGAMTU KAN NI… Rom 8:35,37.

Leave a Reply

Your email address will not be published. Required fields are marked *

error: Content is protected !!