Mizorama chanchinbu lo intan dan leh hmasawn zel dan – Lalhmangaihzuali

MIZORAMA CHANCHINBU LO INTAN DAN LEH HMASAWN ZEL DAN

Lalhmangaihzuali

Kum 1894-ah thuziakna A AW B kan nei chauh a, hemi kum hian mi pathum chauhin ziak leh chhiar an zir a, lehkhathiam kan pung chak lo hle a, Mahse ziakna kan neih atanga kum rei lo te ah chanchinbu hmel kan hmu nghal der mai a, chu kan chanchinbu neih hmasak ber chu “Mizo chanchin Laisuih” tih a ni a,Mizo tawnga thuziak than dana sawi tel ziah ngai Bawrhsap J. Shakespear (1861), Mizoin Tarmita an lo tih kha Kum 15 vel Mizoram ah Sawrkar hna a thawk a, Mizo literature lama a thil tih pawimawh tak mai pakhat chu Chanchinbu a chhuah hi a ni.

A hun laia mizo lehkha thiam hmasate chhawrin, Kum 1898 khan Mizo chanchin laisuih’, kutziak Chanchinbu vawi thum an tichhuak a. Laisuih chanchinbu chhuak hmasa ber hi hmuhchhuah a ni tawh lova, mahse vawi hnih chhuahna erawh chu hmuh theih a ni a, Thla hnih emaw thla thum dan zela chhuak niin alang. Chanchinthar leh Sawrkar thu leh hlate ziak a ni thin. He chanchinbu hi a tangkai hle a, changkanna leh hmasawnna lama ke min pen tir tantu pawimawh tak a ni.

He Chanchinbu ah hian a ziaktu hming tarlan tel a ni lova, Tarmita thlazar hnuaia chhuah a ni tih a hriata a ziaktu hi rinthu mai lo chuan a sawi theih loh. A copy kan hmuh theih chhuna inziakah hian,”Tin, thla thar hun a Borsap an chhung in phai tual lama a kal chhuak ang. Thla khat phai tual an om ang e. Khamliana leh Suaka pawh an tel ang an haw huna thil mak an hmu a piang chanchin lehkha in an ziak chhuak ang”. Heta tang hian, Mizo lehkhathawn ziak hmasa ber Pu Khamliana, Lungleng lal leh, Sap upa leh Pu Buanga ten anmahni pui tura Rahsi fel an thlanchhuah pahnih zinga pakhat Pu Suaka te hnuhma a nih a rinawm.

Kum 1902 November thla atangin ‘Mizo leh Vai Chanchin lehkhabu’ (thla kip chhuak) J. Shakespeara kaihhruaina bawka tihchhuah a ni bawk. Heng chanchinbu-ahte hian thuziak eng emaw zat thawh vea rin a ni. Khawlpui Dina Nath Press, Syhlet-a chhut ngat a ni a, phek 14 lai a ni. A.R.Giles chuan a pui a,an enkawl dun reng hnu ah Kum 1911-1936 thleng chu Makthanga (1886) enkawl a ni a, Mizo zinga chanchinbu enkawl tu pangai (Editor) hmasa ber a ni .Chumi hnuah Lalkailuia leh Sainghinga te’n kum 1937 atanga 1941 an enkawl. Mizo leh vai chanchin lehkhabu-ah 1903-1913 chhungin Zosapthara thuziak pawh17 lai kan hmu a,Mizo leh vai chanchin chhuak hmasa berah heng thu te hi a chuang a.

 (1)Sappui thu           – Tarmita ziak

(2)Vuta leh Lalpuithanga indotirna thu -Suakhnuna (Phulpui lal)

(3)Sa kah thu            – Suaka (Durtlang Lal)

(4)Aizawl chanchin –           Suaka

(5)Chatuan vawksa thu – Zosaphluia

(6)Ngaisakna            – Zosapthara

(7)Ram leh hnam thu te – Zosapthara

(8)Hmasang chanchin -Lalhrima (Sesawng lal)

Kum 1911 October thla-ah Mizoram Presbyterian Kohhran Synod chanchinbu tun thleng pawha la chhuak,  thlakip chhuak chanchinbu ‘Krista Tlangau’ tih chu chhuah tan a ni a, editor hmasa ber chu R,Dala (1884-1992) Oct. 1911- Sept 1912 theng a ni,a chhutna Press hming chu ‘Lushai Christian Press’ an ti a, chu Press chu kum 1908-a Dr. Fraser-a’n Sapram atanga a rawn ken luh a ni. Kum 1914 khan ‘Kristian Tlangau’ tia thlak a ni. Editor nilai mek hi Rev Thangzauva a ni. A tira bu 300 vel chhuah chu hma sawn in 1993 ah phei chuan copies 20,100 lai a chhuak ta hial.

Dr. Fraser-a hand press pek chu a chhe ta mai a, chu chu Granville Henry Loch chuan a lo hria a, khawl thar lei nan Pound 100 lai a pe a, a petu hming chawiin Loch Printing Press tih a ni ta a, he hming hi kum 1973-ah khan ‘Synod Press’ ti a thlak chauh a ni. G H Loch hi kum 1891 khan Captain-in a lo chhuak a, Mizoramah kum 23 chhung awmin kum 1914 khan Mizoram a chhuahsan ta a ni.

G.H Loch avang hian Kristian Tlangau pawh tluang takin a chhuah theih phah a ni, Mizopa kutchhuak ngei chanchinbu kan hmu thei ta a, thu leh hla lama kan hmasawn chak zia a tarlang a ni. Kristian tlangau-ah hi a hunlai thuziaktu lar kan neih te khan thuchhuah nan an hmang tangkai hle a, Laingkhaia pawhin a thuziakte tarlangin a tangkaipui hle, kum 1911 atanga kum 1983 thleng khan a thuziak 121 lai chhuah a ni. Article leh Essay lam pawh tha tak tak a Kristian tlangau ah hian a chhuah a, thu leh hla lama hma kan sawn theih nan a thawh hlawk hle a, Mizo thu leh hla than chhoh dan chhuinaah hian he chanchinbu hi pawimawh tak a ni. Kohhran pawl bik chanchinbu a ni lo, he chanchinbu chhuah theih nana hmalatu mi 11 te chu.

  1. R Dala Mizo Missionary hmasa ber, Manipura kal.
  2. Suaka Dahrawk Babu.
  3. Zakunga Sikul hotu hmasa, a hnua dawrkai.
  4. Daia, C I (Rahsi)
  5. Dohnuna H K Bawihchhuaka pa mi hausa hmasa.
  6. Thangruaia C I a hnua Lunglei Lushai Clerk.
  7. Bawrhsap pisa Babu.
  8. Lianhmingthanga Pastor ni ta.
  9. Thanga Mizo matric Pass
  10. Chawnga Mizo sikul Headmaster hmasa ber.
  11. Kawlkhuma, Salvation Army dintu.

Chanchinbu lamah pawh nasa takin hma kan sawn hle, kum 1920-ah “Thahdo-Kuki Kristian chanchinbu’ a chhuak a, rei vak lovah ‘Kristian’ tiin a hming an thlak ta a ni. Kum 1931-ah ‘Sipai Tlangau’ Salvation Army chhuah a rawn chhuak a, ‘Tlawmngaihna’ tih chanchinbu pawh kum 1934 khan a lo chhuak bawk, he chanchinbu hi Baptist Mission serkawn Lunglei enkawl a ni, a hnuah ‘Robawm’ tiin an thlak a ni. Kum 1937 chho vel khan Biakliana leh Kaphleia te pawn kutziak ngatin chanchinbu an lo chhuah ngat ngat tawh a, thu leh hla lama an tui  avangin an thu leh hla puan chhuah nan chanchinbu hi an lo hmang a. Kum 1939-ah ‘Tun hapta kar chanchin’ tih chu kartin chhuak chanchinbu hmasa ber a ni. Chanchinbu hming leh a chhuah kum tlangpui lo en ila.

  1. L.A. Thubelh (1936)
  2. Pawl chanchinbu. (1938)
  3. S.A. Chanchinbu (1938)
  4. Scout Thlirna. (1946)
  5. Mizo (1946)
  6. Kohhran Beng Nitin Chanchin. (1939) (Baptist kohhran)
  7. Mizo Zirlai (1947)
  8. Zoram Thupuan (1947)
  9. Mizo Arsi (1948)
  10. Upa Lengkhawm (1949)
  11. Thudik Tlangau (1951)
  12. Thlirvelna (1951)
  13. Sikul thlirna (1952)
  14. Hun Thar (1954)
  15. Krista Thuchah Puangtu (1956)
  16. (1957)
  17. Cathalic Kantu (1960)
  18. Ramthar (1961)
  19. Mizo aw (1964)
  20. Tawrhbawm (1968)
  21. Zalen Chanchinbu (1969)

Kum 1970 hnu lama chanchinbu Nitin, kartin leh thla tina chhuak tlangpui i lo thlir ho ila. Kum 1972 ah ‘Highlander’ chu kartin a chhuak a,kum 1979 atang ni tin chhuah a ni a a, Editor C. Lalkhawliana (1937) ni in, a ta a ni bawk. He chanchinbu hi Mizoram leh Mizo chanchin hnam dangin an hriat theih na tura chanchinbu tangkai tak a ni.

Kum 1972 khan “Didakhe” chanchinbu Kohhran huang a mi, Pathian thu lam ziahna pawh hian Book Review an chhuah hma ve hle a, tun thlengin a la chhuak nghe nghe, hei lo pawh hi “MUP Tlangau” pawh hian hmanlai chanchin thangtharte tan bengvar thlak tak tak an chhuah thin a ni.

MZP chanchinbu Thu leh hla lam hmasawn nana thawh hlawk zing ami a ni a. Kum 1938 khan MZP chanchinbu hi a lo chhuaka kum 1973 ah Siamkima’n a enkawl a. He chanchinbu hian thuziak thlitfim lama hma kan sawn na tha tak a ni. Kum 1973 January thla chhuakah chuan lehkhabu thlirna (Book Review) hmasa ber chu a rawn chhuak ta a, “Ka ram leh kei” tih lehkhabu R Vanlawma ziak chu a rawn bihchiang a, heta tang hian thuziak thlitfim lama lehkhabu thlirna chin chhunzawm a ni ta a.

Kum 1973 September 1 atanga chhuah ‘Romei’ chu a tirah kar tin chhuah a ni phawt a, November 1 atangin press-a chhut a ni a. Ni tin chanchinbu Press-a chhuah hmasak ber a ni, a ti atanga tun thleng hian a neitu leh Editor Robert Lalchhuana(1940) a ni a, chanchinbu puitling tak chhiar manhla tak a ni. Hemi kum vek hian  Mizorama tlawmngai pawl lian ber pawl chhuah, ‘YMA Chanchinbu chu a rawn chhuak ve leh ta a, he chanchinbu hi a darhzau hle a, thu leh hla lama hmasawnna mai bakah zonunmawi inzirtirna leh Mizo hnam vawnna lama thawh hlawk tak a ni. Tun thlengin tluang takin a la chhuak ta zel a ni.

Kum 1975 march ah thla tin chhuak ‘Zoram Eng’ School Education, Adult Education wing in an chhuah a, kum 1975 October atangin ‘Meichher’ tia thlak a ni a. Kum 1975 March atanga 2000 August thleng midang in an enkawl zeuh na a, Pu R.Lalrawna(1940) thu leh hla a thawh hlawk tak chu Editor a ni ngar ngar a, Thu leh hla leh mithiamte kutchhuak chhuahna ber a ni a, Kum eng emaw chhung chu thla tin Magazine awm chhun a ni, Magazine lar tak a ni. Kum 1974 vek hian ‘Chhawrpial’ chhuah a ni a, Editor C. Lalmuanzova a ni.

Kum 1978 ah  thla tin chhuak  ‘Zawlbuk’ chhuah a ni, R.L.Rina chu Editor leh a neitu a ni a, chhiar a hlawh hle in thu ziak tha tak tak ten  an thawh tha hle a, a lar viau nain kum 1988 khan a tawp. Kum 1978 ah tho hian ‘Vanglaini’ kartin in chhuah a ni phawt a, kum1984 ah nitin chanchinbu ah hlangkai a ni a. A neitu leh Editor K. Sapdanga a ni, Mizorama phek hlai awm chhun a ni, Mizorama copies chhuak tam ber a ni a, A editorial pawh a bu in a chhuah bawk hial.

Mizoram chu Kum 1980 hnu lamah chuan changkang chho hle a, chanchinbu pawh a changkang in hma a sawn hle, chhuak thar tha tak tak a awm chho ta zel a, thu leh hla tlafir lam bik ngawr ngawr thlirna chinchinbu pawh a chhuak chho ve ta zel a ni. A bik takin “Thu leh hla” chanchinbu MAL chhuah hian thu leh hla hmasawn nan a thawh hlawk hle a, editor nilai mek chu Dr. R.L Thanmawia a ni a, Thu leh hla lama mithiam tak takte kutthlak na a ni a, he magazine lo enkawl tawh, thu leh hla a thawhhlawk tak takte leh hmasawnna kawng min kawh hmuhtu ti ila kan sawi sual awm love a then lo tarlang ila, Dr. Laltluangliana Khiangte, Lalzuia Colney, Siamkima, C. Chhuanvawra, B. Lalthangliana, Lalrinawma, Rozama Chawngthu te an ni. He chanchinbu hi thawkkhat lai khan a chawl zeuha tih chhunzawm leh niin tun thlengin a la chhuak vel zel a.

Mizorama ‘News Magazine’ kar tin chhuak hmasa ber ‘zo eng’ chu kum 1983 ah chhuah tan niin tun thlengin a la chhuak ve zel a, Editor Runbika ni in, ama ta a ni bawk, kum eng emaw ti chhung chu lar ber zinga ami a ni. Kartin chhuak tho ‘Sakeibaknei’ chu kum 1985 ah a chhuak tan a, J.Lalthangliana chu Editor in chief niin aneitu a ni bawk a thu bengvar thlak tak tak chhuah thin in chhiar hlawh tak a ni.

Kum 1984-ah chuan “Meichher” chanchinbu a rawn chhuak ta a, he chanchinbu hi a pawimawh ve hle a, thu leh hla lama mithiam tak tak kutchhuak tarlanna tha tak a rawn ni chho ta a, MAL chanchinbu “Thu leh Hla” kha an chawl zauh a, chumi chhung a kan thu leh hla thiam tam tak te in hnangfakna ber a ni. Tun thleng pawh hian thu leh hla  hmasawnna tur lam hawi leh thu leh hla thuang hrang hrang an la tarlang tha hle a, a chhuak hnuhnung ber November 2010 chhuakah pawh Book Review hmuh tur a la awm nghe nghe a ni. He chanchinbu hi Adult Education wing chhuah a ni a, tluang takin a la chhuak zel a ni.

Chanchinbu hrang hranga thuziak thawhtu zinga langsar leh kutchuak ngah deuhte chu  sap ho zingah chuan Tarmita (1861-1940) te, Zosaphluia (1870-1947)te, Zosapthara ( 1867-1939) te leh Sandy-a te an ni a, mizo zinga chuan Vanchhunga (1875-1956) te, Thanga (1883-1957) te, Liangkhaia (1884-1979) te, R. Dala (1884-1922) te, Makthanga (1886-1942) te, Hrawva (1891-1956) te, Dohnuna te, Ch Pasena (1894-1961) te, Ps. Dahrawka (1897-1978) te, R.L Kamlala (1902-1965) te, anni lo pawh midang an awm nual.

Hun lo kal zelin, Chanchinbu pawhin hma a sawn hle a,chu hmasawnna tura thuziak lama thawhhlawk tak takte a then lo tarlang ila, R. Buchhawna (1900-1983)te, Kaphleia (1910-1940)te, Lalhmuaka (1912)te, Zairema (1917)te, L.Biakliana (1918-1941)te, C.Thuamluia (1922-1959)te, Zikpuii pa(1929-1994) leh Thanpuii pa (1930) te an ni.

Thangkhat lian zet chu Media hmasawnna hian rahbi a rap a, Media  hmasawnna chu a zuang sang hle ti pawhin a sawi theih. Cychostyle hunlai atanga kan tunlai khawvel print media, offset khawl changkang tak dinhmun thlir hian, media hmasawnna sang takah a in vawrh a, Mizoram chhunga chanchinbu 100 dawn lai a awm tak avang hian, hei hian a ti chiang hle awm e.Tunhma lama kan hmuh ngai loh, thlalak nen chanchinbu-ah kan hmu thei ta a, hei hian a chhiar tu thinlung a khawih nghal avangin, he changkanna hian chanchinbu chu sang tak-ah a vawrh chho mek a ni.

Printing press hman anih lai khan, chhut sual palh han siamtha ( Proof reading ) leh turin khawl ha rem tawh suanthlak a ker chhuah leh vek a ngai leh thin a, tunah chuan computer thiamna hmangin, duh lo lai pawh awlsam takin a nawhreh (Delete) zung zung theih ta a, hei ringawt pawh hi chanchinbu mi te tan chuan thil zangkhai thlak leh chhenfakawm a tling a, hmasawnna lian tak a tling.

Information Technology hmasawnna hi media te tan bik a siam ni awm takin media mite hian ngai fo se, thil tihawm tak a ni ve thei. Tun hmaa awm ngai lo Internet te, mobile phone te chu chanchinbu mite hian hmasawnna rahbi pawimawh takah an hmang tawh a, an kut ke ber a ni ta. Hei hian media te chu sang takah a vawrh chho ta dawrh ti pawhin a sawi theih ang.

Media hmasawnna a chak tawh avangin, zoram hmun hrang hrang, kilkhawr ber thlengin report a lut zung zung tawh a, hei hian kan ram hruaitu leh sorkar officer thlengin nasa takin a khalh ngil a, media mite chu ram hruaitu ten an hlat ngam lo.

He hmasawnna avang hian Chanchinbu pawh a tam tawh hle, kan sawi vek seng lo ang a, a tlangpui ilo tarlang ila.

1.The Zozam times
2.Lengzem
3.Sabereka Khuangkaih
4.Sakeibaknei
5.Zozam
6.The Aizawl Post
7.Zolife
8.Real life
9.Zoram Tlangau
10.Zoram Today
11.Vanglaini
12.Highlander
13.The Frontier Despatch

Mizorama Chanchinbu kan neih tan atanga tun thlenga, chanchinbu enkawltu zinga tha zual Thu leh hlaa thawh hlawk tak tak an awm nuala, a tha zual ilo tarlang ila, anni hi chanchinbu hmasawnna kawnga mi pawimawh tak an tih theih hial ang, an kum leh chanchinbu enkawl lai leh enkawl tawh te ilo thlir teh ang.

  1. F Laldailova (1925-1979) Furchhuak, Thupuan, Hunthar.
  2. Malsawma (1927) Thlirvelna, MZP
  3. Lalbiakthanga   (1927) Zoram Thangau
  4. Lalkhawliana (1937) Highlander
  5. Lalzuia Colney (1937) Thu leh hla
  6. Siamkima (1938) Thu leh hla
  7. Ellis Saidenga (1940-2008)             Zo en
  8. Robert Lalchhuana (1940) Romei
  9. Lalrawna (1940) Meichher
  10. Chhuanvawra (1941) Thu leh hla
  11. Lalthangliana (1945) Thu leh hla
  12. Lalrinawma (1952) Thu leh hla
  13. L Thanmawia (1954) Thu leh hla
  14. Rozama Chawngthu (1955) Thu leh hla
  15. Sapdanga (1957) Vanglaini, Zo eng, Chhawkhlei, Aizawl.
  16. Laltluangliana Khiangte(1961)Thu leh hla, Thalai Kantu, CentralYMA Chanchinbu, Kristian thalai. Thlakip chanchin hruaitu.
  17. Vanlalmuana (Mamuana)(1975)Vanglaini Sport Column,Daily Sport Editor,Y2Goal, LPSSportNewsEditor.
  18. Laldinmawia (1980)The Zozam Times, Zoram Today.
  19. Thangliana Mizo Arsi, Sakeibaknei.
  20. Paul Lalremruata – Sabereka khuangkaih.

Mizorama chanchinbu enkawltu zinga mi challang (Prominant journalists) tak tak kan neih te chu C.Lalkhawliana (1937) Highlander, Ellis Saidenga (1940-2008) Zo en, Robert Lalchhuana (1940) Romei te an ni a, anni hian chanchinbu hmasawnna kawnga kawng min kawh  hmuh tute an ni awm e. Chanchinbu hmasawnna atana pawimawh tak pakhat chu Editor te in pekna hi a ni.

Khati zawng kha tun tuma Thu leh hla hmasawn dan leh Mizorama chanchinbu intan dan leh Hmasawn dan a tawi thei ang bera kan zirna chu a ni e.

Leave a Reply

Your email address will not be published. Required fields are marked *

error: Content is protected !!