KUM  2018 MIZORAM INTHLANPUI RESULT THLIRLETNA

Kum 2018 inthlanpui chu MNF –in seat 40 awmah seat 26 lai lain sawrkarna an siam thei ta a. ZPM in Seat 8 an la a, rorel lai Congress (INC) chuan seat 5 chauh an la phak a, BJP lamin seat 1 an la ve bawk. Bialtu MLA ni lai tling nawn leh mi pasarih an awm a, chungte chu Aizawl West II bialtu Lalruatkima te, Tuichawng bialtu Dr. B.D. Chakma te, West Tuipui bialtu Nihar Kanti Chakma te, Thorang bialtu Zodintluanga te, Ṭawi bialtu R. Lalzirliana te , Tuikum ah Er. Lalrinawma te, Siaha ah Dr. K. Beichhua te an ni a.

Aizawl khaw chhung i en chuan North I, North II, South I,South II, West I, West III ah te ZMP an tling a, Aizawl khaw hmawr pahnih,thingtlang tia sawi theih huam tel bial pahnih Aizawl East I (Zemabawk,Tuirial, Sihphir, Neihbawih etc) Aizawl South III (Hlimen aṭanga Sialsuk tlang dungthlengin) an te MNF an la a, Tin khaw chhungah Pu Patea bial ṭhin Zarkawt leh Chanmari velbial (North III) ah MNF an tling bawk a, West II ah hming ṭha sa Pu Ruatkima MNF atling bawk a.

Kolasib ah Candidate langsar pathumte vote hmuh dan:

MNF  Candidate  –  K. Lalrinliana – 5940
INC Candidate – Dr. Ngurdingliana – 5232
ZPM Candidate – Lalfamkima – 5622

Kolasib bial aṭangin Pu K. Lalrinliana hi thlan tlin a ni ta a. Kolasib bial aṭang hian Kolasib pawn lam khua zawng Pangbalkawn, S. Chhimluang, Meidum lehBairabi te vote tel loin Kolasib khaw chhung bika Party te vote hmuh dan chu hetiang hi a ni ang –

MNF  Candidate  –  K.Lalrinliana – 4709
INC Candidate – Dr. Ngurdingliana – 3993
ZPM Candidate – Lalfamkima – 5053

Thingtlangah hian Sem policy hi a la tla ṭha viau a, khawpui lamah erawh a tlangpuiin MNF leh Congress ni lo en chhin duhna a lian hle tawhin a lang a. Hei hi Mizoram khaw dangah a nih ve leh ve loh erawh ka hre lo a, Aizawl leh Kolasib aṭanga thlirna a ni. Tin, thingtlang lam kan tih pawh hian thingtlang lama mipuite hi Party hlun sa (MNF emaw Congress-ah emaw) an ngheh bur vanga party dang tana sawrkar theihna awm ve lo nge a nih thingtlangah te Party thar ZPM-in ṭan an lak tawh loh vang tih pawh hi chhut theih tak a ni ang.

MNF tlin chhan lian tak pakhat chu kum sawm sawrkar tawh Congress thlak duhna vang a tih loh theih loh a, chutih rualin anmahni pawhin an inbeisei zat aia tam an tlin chhan ni theia lang erawh mi tam tak kum 2013 inthlana ZNP lo vote hlawhchham tawhten hlawhchham leh hlauh vanga MNF lam vote ta tam tak an awmin a hriat bawk. Tin, vote chhiar ni ni 11.12.2018 a Party President Pu Zoramthanga’n an tlin theih chhan lian ber nia a sawi chu ‘SEDP’ policy a ni a, chu SEDP mipuite hnena an zawrhah chuan mi eizawnna nei mumal lote khaichhuahna atana cheng nuai thum thlenga sawrkar chhawmdawlna an pek tur thu an sawi bawk.

Tin, MNF Party hian an tihfuh tak pakhat chu Party chhung boruak a ṭha a, candidate an siamin Candidate chan loh vanga lungawi lo leh titau a pawl dang din emaw pawl atanga chhuak ta langsar leh thawm nei tham an awm lo a. Lungrual takin hma an la tlang thei a, hei hi an chak chhan pakhat niin a lang.

Congress tlak chhiat chhan hi tam tak sawi tur a awm ang. MLA 34 nei aṭangin MLA 5 chauh neiah an tla thla ta a, a chhan lian ber pakhat chu an Party Leader Lalthanhawla vision dik loh vangah a puh theih. Lal chhungkua din tum anga puh a nih fo laiin chutianga ngaihbel theih turin Party tana mi thawhhlawk tak tak, Party a anmahni thlawptu leh zuitu tam tak nei an MLA ni lai te chu a ṭhen Party aṭangin a hnawtchhuak a, a ṭhenin an chhuahsan bawk a. Chutiangaa MLA ni lai chhuak ta te chu Home Minister leh Congress Vice President ni lai R. Lalzirliana leh Lalrinliana Sailo, Ex Minister, Tuichang bialtu ni lai te, Dr. B.D. Chakma, Tuichawng bialtu ni lai leh Minister dinhmun pawh a chelh tir tawh te, Hmingdailova Khiangte te, MLA ni lai te, Speaker ni lai Pu Hipheia ten an chhuahsan a. Heng Congress chhuahsantu MLA panga zinga pathum te hi Party dang aṭangin MLA inthlanah hian hnehna an chang leh thei a. Tin, hnehna chang zo ve ta lo, Tuirial bialtu ni lai NPP ticket a ding zui ta Hmingdailova Khiangte  pawh hian Congress vote a pawt hek viauin a hriat a. Pu Hmingdailova hian Congress vote hmuh tur tiphel lo se chu he bialah hian Congress tlin phakna tur khawp vote an la neiin a lang.

Zu zawrh duh lohna thawm nasa tak chhuah a ni a, Kohhran-in nasa takin hma a la bawk a. Chutih laiin kawng chhe lutuk pha lui tlat a, a ṭhatzia sawi lang tlat Congress Leader Lalthanhawla ṭawngkam te chu mipuite fiamthu thawhna a ni a. An inluling lutuk tia sawisel leh thlak duh an tam em em bawk. Chutihlaiin Zo Carbon leh Dihmunzawl vanga hming chhia Pu Zodintluanga erawh a bial ngaiah a tling leh bawk.

ZPM hi mipui tam tak, a bikin party zawm bik nei lo leh Party-a ruh ve lo ten tling se tia enchhin an chak a ni a. An thawm a han ring chho viau dawn emaw tih hnuah an boruak chu MNF lamin a rawn luahlan zui a. Chuti chung chuan khawpuiah chuan an tla na viau tho a. Zpm vote tu tam tak hi MNF leh Congress sawrkar aia Party danga hmasawn zawk inring an ni a. Kum 2013 ah ZNP boruak nasa takin a lian e. Kuminah erawh khatiang kha phak lo mahse MLA erawh an nei ta nual a. Kum 2023 inthlanah la din zel an tum a, sawrkarna siam an duh a nih chuan tun aia chak zawkin thingtlang lamah hma la se an zia chho thei ang.

Congress leh MNF Party hi Party hlun, in lal chhawk reng maian ni a, tun 2018 inthlana Congress a han tlahniam viau chung pawh hian rei loteah an lo tho chhuak leh thut thei a, a leader a zirin boruak danglam sangchho thut thut thei reng an ni a. Party-a i inziak lut dawn a nih chuan, annipahniha a eng emaw zawk zawk hi zawmin awm ta ngat ngat la, sawrkarna vuantutezingah i la awm ngei dawn tih a sawi ngamin a hriat.

A hnuaia link ah hian inthlan result, Party hrang hrang candidate te vote hmuh dan chhawp chhuah a ni

Leave a Reply

Your email address will not be published. Required fields are marked *

error: Content is protected !!