Mizoram Chief Minister thusawi laia bengchheng siam

Mizoram Chief Minister thusawi laia bengchheng siam

-Lalrammuana Sailo

June 9, 2011 a ni a. Lammualah chuan Santosh trophy Mizoram team leh The rest XI ten an khel dawn a. Entu mipui pawh an thahnem  meuh mai. Announcer chuan khuallian lo thlen huna amah chibai buk nana lo ding vek turin mipuite chu a ngen a. Khuallian Lal Thanhawla a lo thleng zui nghal a, announcer vek chuan mipuite chu khuallian chibai buk nana lo ding vek turin a ngen nawn leh a, mahse pavilion a thute chauh lo chu tu mah ding an awm lo. Mipui chu an thutna hmun theuhah chuan ngawi rengin an thu khat hmur mai a.

Khaw chhiatni, ruah sur lai mek a nih vangin han din buai vel a rem lutuk lo bawk nen, announcer ngenna chu mipuiten an ti hlawhtling thei loah lo ngaihsak pawh ni ila, Khuallian thu sawi lai lehzela chhak lam gallery atanga bengchheng an siam zui thawm lehzel kha chuan ngaihtuah a tithui hle mai. Khuallian thu sawi laia bengchheng leh au el thawm hi pavilion atang pawn a hriat theih thu an sawi a. Bengchheng chu mi pakhat siam mai a ni lo a, tam tak chu an au nuaih nuaih a ni. Chhak lam gallery-ah hian college zirlai an thu tam hle a, kan hnung chiah a thute phei chuan college student vek kan ni hial ang a, a ti a, mahse chu em em chu a ni lo ang a, mahse a tam zawk chu zirlai an ni ang. Mahse chung mite zinga tam tak chu au chhuak zingah an tel si. Ka ngaihtuah zui tak chu khuallian lawm nana kan ding lo leh a hnu lehzel a bengchheng kan siam zui chu a ni. A hmun a thu  kan ni a, au chhuak kha an tam hle tih kan hria a. Chu chuan kan ram hruaitu thenkhat te mipuiin kan ngaih dan tur awm ang min suangtuahtir a ni.

Narendra Modi-a an state mipuiten a an ngaihsanzia an sawi ka hre thin a. Andra Pradesh CM boral tawh YSR Reddy pawh a ram mipuiten an ngaihsanzia leh a thihnain a nghawng avanga thi ve ta an tam ziate pawh an sawi thin kha. Punjab ram India atanga in lak-hran chak em em thin ramtena Manmohan Singh avanga an intih Indian tak em em dante pawh hi ngaihsan an neih vang a ni a; chung an ngaihsante chu politician-te an ni a, anni chuan heng an hruaitu te hi mi zahawma an hmuh vang a ni. Keini chuan kan CM ber thu sawi laiin kan au bengchheng a. Chutin kan ngaisang tehlua lo pawh a ni ta ve ang. Khami chungchang thuah khan mipuite pawn kan ti dik chiah lo a ni mai thei a, chutih rualin  kan ram hruaitute pawh chawimawi tlak leh lawm tlak ni tura kan duhna leh kan nawrna kan lantir ve thiam dan pawh a ni thei mai thei.

Leave a Reply

Your email address will not be published. Required fields are marked *

error: Content is protected !!