Mizo zinga thawnthu tawi (short story) ziaktu hmasate – Angela Lalmawizuali

THUHMAHRUAI

 Short Story hi thawnthu phuah(fiction), novel ziak dan kalhmang ang bawka tu chanchin emaw sawina a ni a. Saphovin ‘Anecdote’ an tih, thawnthu tawi te te ang chi te, Fables, thawnthu fing (Esopa thawnthu fing ang chi)-te nena inang chiah ni si lo a ni. Heng Anecdote leh Fables te hi chu thil thleng chi hrang hrang tar lanna ni lovin thil thleng pakhat eng emaw tawi te, awmze nei taka zuk luhkhung zeuhna ang chi hi a ni mai a.Short Story erawh hi chu novel-te ang bawka ruhrel (plot) te, a  changtu (character) te nei ve thlapa thil lo thlen dan tlangpui tarlanna a ni.

Short Story hi English literature-a a lar ṭanna hi a la rei em em lo va, a lo lar chhuahna pawh a la rei lutuk lo. Hun laihawl (Middle Age), Chaucer-a te hun lai (1340-1400) khan hla thu(verse) hmangin a lo phuah tawh thin a. Geoffrey Chaucer khan heti ang hi a tui puiin thawnthu chi hrang hrang , The Pardoneis Tale leh Tale of Melibee thawnthu fun khawmtu Canterbury tales a tih (folktale- thawnthu a phuahtu tak pawh hriat loh, ṭawngkaa inhlan chhawn ang chi) kha thutluang pangngai hmangin a lo ziak nain, khualzinte awka hmanga ziak anih avangin a tha tawk lo hle a. Prose ai mahin poetry a pawl zawk bawk nen. Italy rama a thianpa Boccacio chuan thutluang pangngai hmangin Decameron tih, thawnthu chi hrang hrang fun khawmna a ziak a; Chaucer-a ai chuan a hlawhtling daih zawk a ni.

England-ah chuan kum zabi sawmparukna leh sawmpasarihna lai vel khan Italy rama thutluang pangngai hmanga ziak, Roman Thawnthu lar tak takte kha an rama la lutin an tawnga letlingin an chhuah ve thin a. Hemi hnu 1660-1830 chhung khan Spain leh Italy ten an uar em em a, Novellete ( thawnthu sei tawi) chu la  chhuahna bul ang chuan a sawi theih an ni chiah lo.

Hetih hun lai vek hian America ramah pawh thawnthu tawi chi hrang hrang lak khawm an lo ching ve mek bawk a. Washington Irving, America rama thuziak mi lar tak chuan a lehkhabu, The sketch Book Leh The Tales of a Travellor-ah te chuan thawnthu tawi te te, Rip Van winkle leh The Legend of Sleepy Hollow te a chhuah a; miten an hlut em em a. He thawnthu hi English- ho zinga short tory lo chhahna bul nia an sawi thin chu a ni daih.

Kum 1824-a Sir Walter Scott-an, Wandering Willies Tales tih thawnthu tawi a ziah chu tun lai hun a thawnthu tawi (modern Short story) an tih lo chhuah tanna angin an sawi phah ta hlauh va. Hemi hnu hian England-ah chuan Short Story a chhuah chhunzawm ta malh malh a ni.

Ramdang ang lo takin Mizoramah chuan Short Story hi a chhuak har lo mai ni lovin thawnthu chhuak hmasa a ni tlat a. Mizo lehkhabu chhuak hmasa zinga mi, L. Biakliana ziak ‘Lali’ leh Kaphleia ziak ‘ Chhingpuii’ te pawh Short Story an ni a. Hengte hi kan neih hmasak berte an ni. Tichuan, Mizoramah Short Story a lo luh kum chu 1937 niin a lang. ‘Lali’ hi Mizo Short Story hmasa ber leh novel pahnihna ang pawhin kan sawi thei bawk ang.

SHORT STORY ZIAKTUTE LEH AN KUTCHHUAK TE

Hnam fing zawk Sapho chuan thawnthu tawi sei (novelette) an nei a. Mizote chuan heti ang hi kan nei ve lo va, novel leh Short Story tiin kan then a. Mi hrang hrangin Short Story kan pawm chin hi a inang lo hlawm hle a. Ka ngaihdanah chuan phek 100 chin hi  pawm ila a tawk viau in ka hria. Mizote’n Short Story hi kan nei ve ta nual a, a vaia kan tarlan sen dawn loh avangin keiman tha ka tih zual leh a lar deuh tarlan kan tum dawn a ni. Mahse, heng kan tarlante pawh hi an lehkhabu ziah zawng zawng kan tarlang seng dawn lo va, a lar zual chauh chhuizau kan tum dawn a ni.

Short Story ziaktu ṭhenkhatte leh an kutchhuak ṭhenkhat kan thlirzau turte chu hengte hi an ni:

  1. LALI –   L. Biakliana (1918- 1941)
  2. CHHINGPUII    –  Kaphleia (1910-1940)
  3. THLAHRANG –     Lalzuithanga (1915-1950)
  4. SIALTON OFFICIAL –  C. Thuamluaia (1922-1959)
  5. KA HMANGAIH TLAT CHE –  Lalruali (1924-2001)
  6. C.C.COY NO.27 – K.C.Lalvunga (1929-1994)
  7. REMI LEH RUATA   –   C.Laizawna (1959- )
  8. CHHINGKHUAL LUNGDI – Capt.C.Khuma(1914-1990)
  9. LAL HLAU LO ṬHI – Lalzuia Colney(1937- )
  10. PU KHUMA  –  Vannneihtluanga(1957- )

A chunga an kutchhuak kan tarlante hi thiam ang anga chhuizau kan tum dawn a ni.

1.L.BIAKLIANA(1918-1941): Biakliana hi August 26, 1918 khan Mission Veng Aizawlah Rev.Liangkhaia leh Saitual lal fanu Ngurchhawni inkarah a lo piang a. Kum 5 a nihin a nuin a boralsan a. Amaherawhchu enkawlna tha tak dawngin naupang duhawm, bengvar, chanchin ngah tak a ni chho ta a ni.

Kum 1928 khan Lawr (Lower Primary Examination) a pass a. Kum 1931 ah Middle English a zo leh a. Silchar High school a zawm a, Shillong lamah a insuan leh a. Kum 1936 ah Calcutta University atangin Matricular Examination chu First Division-ah a zo leh a. Calcutta-a Cotton College-ah I.A (PUC) a zawm a. 1936- 1937 ah tha takin I.A first year a zo a. Lehkha zir zawhah B.D zir a tum ran a. Mahse, kum 1937 tawp lamah chuan T.B. (ngawr natna) a vei ta hlauh mai a. A dam that deuh hnuah rawngbawl turin Cherra a pan a, thla thum chauh a awm tih in a natna ngai bawk avangin 1941-ah a boral ta a ni.

Biakliana hi lehkha chhiar leh ziah ching hma pawl tak a ni a, Middle Sikul a kal lai aṭangin English poems te chhiarin sap thawnthu pawh chhiarin a letling nual bawk a. Matric a beih lai aṭangin thu a ziak tan a. Kum 1936-ah Mizo zinga Novel hmasa ber ‘HAWILOPARI’ a ziak a, 1937-ah Short Story(thawnthu tawi) ‘LALI’ a ziak leh a. Heng lehkhabute a ziah hma hian Mizote’n thawnthu Mizo ṭawng ngeia ziak kan la nei lo va, Kan neih ve chhun te pawh sap ṭawng atanga lehlin an ni hlawm. A thawnthu ziah mai bakah hian hla a phuah nual bawk. Biakliana hi Mizo history-a mi pawimawh tak a ni pha tih a lang.

L.Biakliana Kutchhuak(Short Story) – LALI : Biakliana hi Kristian chhungkua aṭanga chawr chhuak a nih angin ‘LALI’ pawh hi Kristian thawnthu angin a ziak a. Lali chu Kristian tha tak a ni a, a pa erawh chu zu heh tak, a zu ruiha nupui fanaute chunga thinrimna zawng ṭhin mi, Kristian nih duh tlat lo a ni thung. Mahse, heng thil avang hian Lali chuan a rinna a hloh phah chuang lo va, Pathianah a rinna a nghat tlat a. Chu a nun mawi tak chuan a chhungte nun a hneh a, mi tha leh Pathian tih mi Biakmawia nun chu a hneh a. Sual tello thatna chuan a tawp ah rah tha a chhuah a, mi nun ngil chu a hmuingil thin tih chiang takin kan hmu a. Zuala damloh tuma a pa hnena zawhna khirh tak a zawh chuan a pa sualzia a inhriat chhuahtir a. A pa chuan nun thar a lo neih phah ta a, Kriatian ṭha tak a lo ni ta a ni. Heng zawng zawngte atang hian Lali thawnthu hi Kristian thawnthu a ni tih chiang takin a lang.

He thawnthu hian Mizo nunphung tam tak a tarlang a, hman lai hunah hmeichhiate dinhmun hniamzia leh chhanchhuah an ngaihzia min hrilh. Hmeichhiate’n in lamah hnathawh tur an ngahin hunawl pawh nei lovin an buai zankhua a. Heng hunah hian mipate’n an pui ngai lem lo va, ram lam hna chauh an thawh turah an dah vang niin a lang. Heti ang dinhmun hi Lali chungah pawh a thleng a ni.

Hmeichhiate’n an pasalte an zahthiamzia leh an rinawmzia Lali pa zuruiin a nupui kut a thlak ṭuma chhuak tura a tihin, Pathian hmaah thu an lo tiam tawh avang leh a fate a hmangaih avangin hreh takin a chhuak tih kan hmu a. Nupui pasal thuah nu leh pate’n mi hausa leh neinung an ngaihsanzia a tarlang tel bawk. Hman lai hunah hausa leh rethei inkar a hlat avangin nu leh pa tin in an fate tan nupui pasal hausa deuh an chhungkaw khawsak khaiding thei tur leh an hnemhnarpui theih tur an duh thin a, duh lo deuh chung pawhin an fate tirh luih dan tur an zawng thin. He dinhmun pawh hi Lali chungah a thleng ve tih kan hmu a. Tin, Lali chungchangah nu hmangaihna a lo lang a, Lali  tan zawnga a tawngkam apain a lo khak dan atang hian inchhungkhurah mipain thu an neihzia leh hmeichhe dinhmun hniamzia a lang chiang hle.

He thawnthuah hian hmeichhiate an intodelhzia kan hmu a, anmahni thawmhnaw tur chu midang ta ban buai lovin an tah mai thin tih a lang. Tin, hmangaihna thuah an rinawm a, Lali pawhin chhungkaw awm thei tak Rozika zu in mi neih ai chuan thu a lo thlunpui tawh, a Kristianpui Biakmawia neih a duh zawk dan atang hian an rinawmzia kan hmu a. L.Biakliana hian Mizo nunphung ṭhangtharte’n an hriat loh, bengtivar thei leh entawn tur tam tak  a tarlang a ni.

2.KAPHLEIA (1910-1940) : Kaphleia hi January 10, 1910 khan Thiakah Chhingvunga leh Chuailovite inkarah a lo piang a. Sialsukah an pem a, chuta ṭang chuan Thiakah bawk an kir leh a. Kum 1927-ah Tachhipah an pem leh a. Chu khua chu a lu an phumna hmun a lo ni ta a ni.

Kaphleia hian Sialsukah pawl 3 thleng lehkha a zir a, chumi hnuah Aizawlah Middle School a zova. Govt. High school, Shillong atangin 1934 khan Matric a zo leh a. Kum 1935- 1937 a. Chutih laia Zofate zingah mithiam hmasa pawl tak a ni a, mi pawhin an hre lar hle. Vanduaitlak takin T.B. (Tuberculosis) ngawr natnain a tlakbuak ta hlauh mai a, phai atang chuan Mizoramah a lo haw a. Durtlang damdawi inah a thianpa L. Biakliana, T.B. vei ve bawk nen an awm dun a. An awmna tur Inte Thawveng dinsakin chutah chuan an hun hnuhnung an hmang dun a. November 13, 1940-ah a boral ta a ni.

Durtlang damdawi ina an awm lai hian Zosapte kha thil pawimawh an ziaksak nual a. Biakliana nen khan thu leh hla lama tui v eve an ni a, kutchhuak pawh an nei tha dun hle. Kistian Tlangau leh Mizo leh Vai chanchin lama chhuah tur thuziak a nei nual bawk. L. Biakliana nen Chhura chanchinbu an chhuah dun bawk. 1939-ah Mio thawnthu hmasa 3-na  turin CHHINGPUII a ziak a.  Hei bakah hian hla phuah a nei nual bawk.

 Kaphleia Kutchhuak(Short Story) – CHHINGPUII : CHHINGPUII tih thawnthu tawi hi kan hnam chanchina thil thleng ngei hmanga a phuahchhuah a ni a, chhak leh thlang indo tarlanna a ni. Hnam chanchina innghat thawnthu anih avangin a hun hrephak ve lo thangtharte an chuan a bengvarthlakin hhiar a manhla hle.

He thawnthu hi pasaltha huaisen Kaptluanga leh nula hmeltha Chhingpuii sawiselna leh elrelna kara an inhmangaihna chanchin tarlanna a ni a. Kaptluanga chu pasaltha sa kap thei tak anih avangin a khuate pawhin tlukloh enin an en a. Tlangval ve ta fam chuan nula melh bik leh duh bik a nei lo thei lo va, a nula bik Chhingpuii lah chuan mitmei hmuh dan tawk a lo thiam hle si  a. Chutia Chhingpuii lungtlukna tak a lo nih tak vang pawh chu a ni a nge,amah itsiktute’n Kaptluanga chu an dawi a, a dam tha hlei thei ta hauh lo mai a. Mite’n ngaihsan leh ngaihsak  reng tlakah an ngai ta lo va. Chhingpuii chauh lo chuan Kaptluanga chu eng vakah an ngai ta lo a. A dam thei mai si lo avangin hreawm a ti hle a, Chhingpuii pawhin Kaptluanga rilru a nat hlauvin tlangval dang a lawm duh ngai lo va. Feh kawngah pawh putar rualin a kal thin a.  A ngaihzawng ramtuileilo a awm tawh miin engamaha an ngaih lo tan chuan tan chuan a rinawm hle a ni.

Tuk khat chu Tuirial rala awm Tachhip khaw rammuho chuan lo nang fuhin Chhingpuii chu an sat hlum ta der mai a, lawm zetin a lu an lam a.Chu thu Kaptluanga’n a lo hriat chuan tlawm thlak a ti zet mai! Damsam lo reng renga hun hmang a ni a, amah avanga thi nia ngai leh, Chhingpuii ngai ngawih ngawih chunga dam reng ai chuan tiin Kaptluanga chu a in kaphlum ve ta a ni.

He thawnthuah hian nula leh tlangval inhmangaihna thuk theihzia kan hmu a.Chhingpuii pawhin a ngaihzawng Kaptluanga ramtuileiloa a awm hnu pawhin a mit mei vengin tlangval dang a kalpui duh ngai lo va. Mi na zawngin an tih ngai lo,tlawm leh zah pawh dawn lovin Kaptluanga chu an inah a va len chilh thin a, thei te hawnsakin a sam te a khuihsak thin a.Chutiang chuan rinawm takin hmangaihna par an tlan dun a.

Nula te’n an in leng te  chunga  ṭhat an chhuah thinzia kan hmu a.An ngaihzawng pawh hriat theih loh khawpin an inthup thiam a. An in lengte chungah that chhuahin an duh loh zawng leh ngei  zawng pawh ni se,tha takin an be thin a. Nula hmeltha leh la deh thiam  chuan in leng an ngah hle thin. Inlengte an kawm danah nula hawihhawm deuh chu an hriat hle thin.

Hman lai hunah Mizote hi indo ṭhin hnam kan ni a. Khua leh khua indo a,  inrun ṭhin kan ni. Khaw khata tlangval awm tawh phawt chu an dam a nih chuan rammu turin an chhuak a. An inrunin nunau pawisawi lo chenin an that a, a then salah an man a, khuate hial an inhalsak thin. Heti ang dinhmuna an din avang hian nun a ralmuang lo va. Khaw chhanhimtu pasaltha te chuan ngaihsan an hlawh em em a, sa leh ral laka an nunna thapa khawtlang tana thawk thin an nih avangin an ngaisangin duhsak an hlawh a. Mahse chutiang zingah chuan ertu an lo awm ve  fo thin bawk. Chu thil chu a tak ngeiin Kaptluanga nunah kan hmu a ni.

Hei bakah hian rammu hlawhtling haw an lo hmuah dan kan hmu a. Khawtlangin kawtchhuahah an lo hmuak a, mipa naupang ral kai lote chu chem an pe a, mi lu chu an sahtir a. Puak lai chenin mipa fa tawh phawt chu an nute’n an kut leh chem an hmehbel a,an sahtir a, “Ral a that e” an ti thin. Chu chu huaisen inzirtirna leh ral la that tur tih entirna a ni. Ramchhuak an hlawhtlin chuan nula te’n zu fang an lo tulh thin a,pasal tha te’n hlado chhamin silai an kap a khawchhung an lut thin. In lamah zu leh sa nen a lawmna hun an hmang thin bawk.

Mizo nunphung hrang hrang mai bakah  hausakna chi reng rengin thian a siam  theih dan leh retheihna chi reng rengin thian leh hmangaihtu dik a finfiah ranzia CHHINGPUII thawnthu hmang hian Kaphleia hian a tarlang a ni.

3.LALZUITHANGA (1916-1950) : Thawnthu phuah thiam leh lemchan lam a sulsutu pawimawh tak pakhat, hla phuah leh lemziak thiam ni bawk Lalzuithanga hi April 16, 1916-ah Kulikawn kohhran upa Chawnghnuaia leh Zachhungi te inkarah a lo piang a. Zirna lamah chuan pawl 8, Middle English Sikul zo chauh a ni a. Pianpui thiambil ngah chi a ni bawk a, hna chi hrang hrang, zirtirtu, sipai leh pisa sum enkawl hna thlengin a thawk a, politics lamah a tui deuh bawk. Kum 1950 khan Cachar-a Monachera Tea Estate-ah lungphu chawlin a thi ta a ni.

Lemchan leh hla lama a inhmandan chu thuang hrana sawiah kheh hrih ila, thutluang ziak kawnga a kutchhuakte thlir kan tum dawn a ni. Lalzuithanga hian thu ziak thenkhat chu chanchinbuah a chhuah ve zauh zauh a. Chu’ng zingah chuan essay tia koh theih pawh a awm nual. Pianken tih a ziak phei chu mihring chhia leh tha hriatna lam kaitho zawnga thu awmze nei funkhawm chhiar manhla tak a ni.Thawnthu phuah lamah hian Zuithanga hian a thawh hlawk viau a. Thawnthu pahnih THLAHRANG leh PHIRA LEH NGURTHANPARI a phuah a. Heng bakah hian thawnthu tawi te te 15 lai a ziak bawk. A thawnthu ziak hi mipui chhiar theih tura chhut chhuah anih mai loh avangin Lalzuithanga hian hriat a hlawh lutuk lo va, zirlaite erawh chuan a thawnthu pahnih atang ringawt pawh hian Lalzuithanga thawnthu phuah thiamzia an hrechiang hle.

Lalzuithanga hi Mizo thawnthu phuahtute zinga sulsutu pawimawh tak a ni a. Thawnthu sawi thiam a ni a, lemchang thiam a ni bawk a, hla phuah thiam a ni leh zel a. Mizo literature zirna mualah chuan hum hnih hum thum lai a lo luah a. A khawia pawh hi chik taka thlir tham a ni zel a ni.

Lalzuithanga  Kutchhuak(Short Story) –THLAHRANG : ‘THLAHRANG’ tih thawnthu tawi hi sualna chhui chhuahna lam hawi (detective story) a ni a. Tawia’n Parmawii a chhanchhuah dan, khawtlangin thlahrang an buaipui chhoh dan leh chu thubuai avanga Tawia’n jail hial a luh pui dan tar lanna a ni a. Tawia’n dawt sawi duh lova jail-a a tang te leh Bawrhsap-in Mizoram a hmangaih avanga  mite entawn atan Tawia a tan tir te hian Kawla rilru a hneh a.Ram tana a thahnem ngaih lohzia leh a thil tih sual te hriatchhuahtirin, amah avanga an tawrhna te chhui letin dam tlak niin a in hre lo va.A thil tih sual vanga hreawm tiin ama nunna a la ta hial a ni.

Lalzuithanga hian mi tih dan ang lo takin bul atan a,thlahrang tih thupui hmeh tak turin tiril leh thling fan thei chi ‘hmeichhe thlaphang leh thlabar a-in atan a.Hemi nena hmehbel theih tur a Chawii, Lapiangi leh Ralkapi te’n mumang in zul tak tak an nei te hian a thawnthu tum ati langchiang hle.Thlahrang pawh hi ahmutu a zirin a hlauhawmin a hlauhawm lo mai niin a lang a,nunphung a ti khaihlakin a tibuai thei hle tih pawh he thawnthu hian a tarlang chiang hle.Thlahrang thawnthu innghahna hi Aizawl a ni a, a thawnthu hun leh a ziah laia Aizawl dinhmun hi a inthlau lo viau a.A chhiartu tam tak te’n an mitthla thei thawnthu, a hmunhma an hmebel nghal zel theih a nih avangin miin an hlut hle.

He thawnthu atang hian a hun laia Mizote khawsak dan leh an nunphung a tarlang chiang hle a.Aizawl chu Mizoram khawpui ber  mah ni se,a mi chengte an la mawlzia leh an khaw hawi lo zimzia pawh pawh a chiang viau. Mahse chu nun mawl tak ringawt chu an nei lo tih a lang chiang hle a.Hnam dang tana hmuhsitawm leh nuihzat theih hial tur khawpa nun tluangtlam leh mawl karah huan ‘tuikep lunghlu’ a lo inphum ru a, chu chu Tawia nun atangin a lo lang a. Mite tanpui duhna leh chhan ngaite chhan duhna rilru,Mizo tlangval pasalthain an tih tura an ngaih thin chu Parmawii a tanpui danah kan hmu.Parmawii tanpui ngai ngawih ngawih a tanpuina lamah tualthat anga ngaih a ni a, Tan-in hial rap tura Tawia chungthu rel a nih chhan hi ama mawl vang leh a sahimna tur a zawn thiam loh vang a ni satliah ngawt lo va.Tawia chu thu dik duh mi; dawt sawi duh lo, a tuarna turah pawh tlanchhe duh lo a ni tlat;chu chu Mizo tlangval a ni.

Chu  nun chu Tawia pa nunah pawh kan hmu a,Mizo pa mawl ve tak chuan dawt sawi vanga him ai chuan a fapa, a chuan leh hmangaih em emin a tuar pawh a phal a, tunhnua mite zirtirtu atan tiin a fapa chu a hlan ngam a;chu chu ropuina a niin Mizo nun mawi tak pho langtu a ni.Chu dikna ngaihhlutna chuan Kawla thinlung a hneh a, a thil tih sual hriat chhuah tirin thu dik a puanchhuah tir ta hial a. Hei hian mihring nunah diknain hmun a chan thukzia leh mi a hneh theihzia a tarlang a ni.

Tawia chungchanga Kawla leh Dahrawk inbiak velna hi thu fing tak vek a ni a.Kawla’n remhre taka Tawia sahimna tur,kawng lehlamah ama sahimna tur ni bawk a dap a, Dahrawkin fing taka a chhan thlak dan te hian heng hun laia an diplomacy sanzia a tarlang a. Tawia chungchang a police ho chet vel dan atang hian thu dik a lalzia leh dik takin ro an rel tih a lang a,mipui sahimna an ngaihtuahzia kan hmu bawk.

4.C.THUAMLUAIA (1922-1959) : Thutluang ziak mi (prose mrite) dik tak C.Thuamluaia hi kum 1922-ah Pu Lalnghinga Darlianchhungi te inkarah a piang a.Zirna lamah mi hmasa pawl, kum 1950-ah B.A zo, zirtir hna pawimawh thawka Lunglei High School Headmaster a tang zui ta, ram inrelbawlnaa ring rawlh (1957 khan chhim bial MLA-a thlan tlin ngat), a hun tawp thlenga Mizoram tana a thiam leh theihna hmang zo ta a ni. Kum 1959 May ni 29 zana Politik inkhawmpui hmang tura insiam, ram tana hna la thawh zel tum tak chu lu nain a thi ta thut mai a.Lunglei khawpui a ngui ruai mai.Amah hriatreng nana a thuziak an chhuahte leh a kutchhuak dangte bak chu thangtharte chuan kan kawm ve thei ta lo a ni. Thuamluaia hian thawnthu pathum- ENGTIN AWM TA ZEL ANG MAW?, SIALTON OFFICIAL leh LEITLANG DINGDI te a ziak a. Hengte hi a ngaihnawmin suangtuahna ramah min chen tir thei a ni.

C.Thuamluaia Kutchhuak(Short Story) – SIALTON OFFICIAL : ‘SIALTON OFFICIAL’ atang hian C.Thuamluaia themthiamzia kan hmu a.Zonuam khua hi Mizoramah a awm kan hre lo va, Hotel Odyana pawh hi tunlaia  Mizorama hotel changkang ber ai pawhin a changkang zawk a.Mizorama thil awm thei lo tluk a ni,mahse chhiar tute’n a awm thei lo a ni tih pawh hriah loh khawpa an chhiar theih turin Thuamluaia hian angaihruatna a phuah chhuak thiam a ni.

He thawnthu hi hmangaihna makzia leh hmangaihnain mihring a bual at theihzia pho lanna a ni a.A changtupa ber pawh hi nupui fanau neiin hlim takin an khawsa a,a ngaihzawng hlui an theihnghilh tir a.Mahse chanchinbua  a ngaihzawng hlui a hmuh leh meuh chuan nunhluiah a ngaihtuahna a kir a,  a hmangaih ngawih ngawih a nupui fanaute a hnungchhawn tir a.Chu a ngaihtuahna vak vel avang chuan a fate’n an kohna pawh hre lovin a ngaihzawng hlui hlir akawm a, chanchinbua Dorothy te nufa chan chhiat zia a hmuh chuan an inngaihzawn laite hrechhuakin a khawngaih ta em em mai a.Anmahni hmuh tumin Shillong lamah te a kal a. Chutianga angaihtuahna hlir akawm avang chuan rilru baihvai takin a awm a,a hriat lohin thlemna a lo akal a, zu a in ta a.Zu a in lai chuan a nupui fanau te’n hotel-ah an lo nghak reng a,mahse nghakchhuak zo lovin an lo muthlu palh a,kangmei chhuak avangin an boral ta a ni.A zuin a harh leh meuh chuan khua a lo tlai zo ta si a,a nupui fanau te chu a chhhan hman ta lo a ni.

He  thawnthu hian Mizo nunphung leh tih dan thin tam tak tarlan a nei a.Tunhma chuan nupui pasalah hnamdang an nei ngai lo niin a hriat a,hemi a lanna chu a changtupa hi Shillong-a a awm laiin a hmangaih hmasa ber ni turin Khasi nula Dorothy nen an inngaizawng .An induhin an inhmangaih hle a. Hlim takin hun an hmang dun thin a.A hmangaih hmasak ber niin duhin hmangaih hle mahse an hnam a inan loh avangin an inkarah daidangtu bang a awm tlat a.Inneih lovin nupui pasal atan chuan mahni hnampui ngei thlangin, inhmangaih tak chungin an inthen ta a ni.

Hmangaih hmasak ber theihnghilh har ti a an sawi thin hi he thawnthuah hian a dik hlein a hriat. A changtupa hian a hmangaih hmasak ber chu hnam inan loh vang leh inneih a rem loh avangin a then a.Tichuan a hnathawhna hmunah nula dang, angaihzawng hmasa Dorothy theihnghilh tir theitu a tawng a.Inneiin fa duhawm tak tak  pahnih an nei a,chhungkaw hlim tak  niin tumah awt lovin an khawsa a.Vawi khat chanchinbuah Dorothy hming a hmuh leh meuh chuan a theihnghilh tawh emaw a tih chu a lo la theihnghilh lo nasa mai a.A ngaihtuahna a luah a,Dorothy nena an nunhlui an intawn dan te, an inngaihzawn chhoh dan leh an hun hman dun zawng zawng te a thinlungah rawn thar lehin Dorothy hlir chu a ngaihtuah a.Athinlungah khawngaihna leh hmangaihna lo lutin Dorothy te nufa retheizia a hmuh chuan amah chu anmahni chhanchhuak turin an nghak ni tlatin a hria a.Chutiang chuan a ngaihtuahna chuan Shillong thleng thlengin a fang a.Chutia a ngaihzawng hlui hlir ngaihtuaha nunhlui ngaia hun a hman chuan  ahmangaih ngawih ngawih a nupui fanaute a theihnghilh tir thei tlat  a ni.

Mizo kalphungah hian khaw tinah hmeithai zu zuar an awm ve ziah niin alang .Hmeithai zu a thlum tha ti tein an sawi fo thin. Heng ho hian dawrtu pawh an hmu thei phian thin a ni awm e.Mipa te’n rilru hahna an neihin zu inah an tlak fo thin niin alang.Zu hian an rilru natna leh hahna zawng zawng la kiang thei turah ngaiin inhnem nan tiin an in thin a. Amaherawhchu a hnem thei tak tak lo tih a lang a,rilru mumal lo put tir thei tu a nih avangin thil pawi tak pawh a thlen thei a ni. He thawnthuah ngei pawh hian kan hmu a,zu in lovin a nupui fanaute bula awm ni zawk se chu an boral kherin a rinawm loh.

Mizote hian kan chhung kan hmangaih takte kan then hian anmahni hriatreng nan thlanlung kan phun thin tih kan hmu a.Tin hmangaih takte then hi eng anga na nge tih leh rilru mumal put a harzia te, Pathianah chauh lo chuan innghahna tlak tak tak a awm lo tih he thawnthuah hian kan hmu bawk.

5.LALRUALI (1924-2001) : Dokunga Khiangte fanu Lalruali hi kum 1924 Feb thlaah a piang a. Sihfa lal fapa nen an pian rual avangin an lalnu chuan Sihfa Lalruali tiin a phuahsak a chuvang chuan Lalruali Sihfa tih pawh a inhmeh hle thin.

A naupan lai atangin mi hlim thei tak leh rual pawl thiam tak, thian pawh kawm zau tak a ni thin. An khua Sihfaah chuan sikul a lut a, 1935 khan pawl 3 a zir a. A thiam thei reuh hle a, scholarship lak tumin 1936 Jan thla atangin a inbuatsaih a. Nimahsela, Jan thla chawhnu lamah a khup a lo na a, a vung ta tlat a. A malpui ah kai chhoin a khumbet ta a. Enkawlna tehchiam a awm lova, a natna chu ruhnget a ni a. A natna chuan a taksa pum a khawih a, a mut that theih bawk si loh avangin a tap hial thin.

A zakdawm tiang pahnih hmangin a kal chhet chhet thei a, vah vel a harsat hle. Synod  Hospital, Durtlangah inenkawl in, Rinna Ward-ah chuan a tap chawt a. A awm rei hle a, amah dawrtute hlim takin a be thin. May 1962 atangin Hospital Evangelist hna hlim takin a thawk tan a ni.

Kum 1983 August thla khan a tlu sual leh hlauh mai a, a bawksawp leh ta a. Awmhmunah midangte tan tangkai nih a tum ve hle a. Mi a tanpui bakah lehkha te ziakin, hla a phuah bawk thin. Ngal nget neiin pianphunga rualbanlo ni tawh mah se, hna pathum- Pathian thu sawi, lehkha ziak leh pangpar siam hna te rei tak a thawk a ni. Hla pawh 19 lai a phuah a, thluk neiloa a chham a chham chi a awm nual bawk. Natna khirh takin a bawi reng avangin Sept. 3, 2001 khan a boral ta a ni.

 Lalruali Kutchhuak(Short Story) –KA HMANGAIH TLAT CHE :KA HMANGAIH TLAT CHE’ tih thawnthu hi phuahchawp ni mah se a tak tak a thil thleng leh mi tam tak nuna a taka thleng behchhana ziak niin a lang. Indopui II-na neih kum leh chung hun laia buaina chhuahdan te, ram tam tak an inhuatdan leh an indodan te a tarlang a chumi hnua Assam Regiment kan ngaihsandan te a tilang tel bawk. Kum 40 vel liam tawh a Mizo nun peng pawimawh tak tak min hrilh a ni.

He thawnthu hi Assam Regiment-a ṭang Sanga leh Thanpuii an inhmangaihdan chanchin tarlanna a ni a. Thanpuii hian natna khirh tak tawkin, chu a natna chuan tawngah leh a ke lamah harsatna a tawh phah a. Chu a piansualna chuan mi zingah a inkiltawihtirin mi zinga awm hrehawm a ti a. Chu thu Sangan a hriat chuan Thanpuii fuih zawngin a sipai tanna hmun atangin thu tha tak tak lehkha hmangin a thawn thin a.Chu thu chuan Thanpuii pawh a tihlimin a chhungte leh Sanga fuihna avangin a dinhmun pawh a ziaawm hret hret a. A piansualna haiderin kohhranahte inhmangin mi tangkai tak a ni chho va. Sanga pawh chu mi rinawm leh Pathian tih mi, an khuaa a haw chang pawh a kohhran bel tlat mi a ni a. A ngaihzawng Thanpuii piansualna chu a hmangaihna thuk tak avangin a haidera, nupaah an inseam ta a ni.

He thawnthuah hian hman lai Mizoten an ngaihsan zawng leh an nun peng pawimawh tak tak kan hmu a. Hman lai hunah sum te a vangin hausa leh rethei kar a inhlat hle thin a. Hei vang hian lehkha thiam lo ber tan pawh hna hmuh awlsam ber anih avangin a thei te chu sipaiah an lut ruih ruih thin a. Sipaite hian khaw tinah ngaihsan an hlawhin, nupui pasal thuah pawh duhthlang thei dinhmunah an ding niin lang. Sipai nun dan ralmuan lohzia kan hmu a. Indona hmun a khawsa thin an nih avangin mahni sa himna zawnga an buai a ngai thin. An inkaihhruaidan a thain hotute an zah a, an hotuten thupek engpawh chhuah se an zawm thlap thlap thin. Khaw khata kamding awmchhun an nih deuh mai avang hian a ni ang e ngaihsan an hlawh viau.

Mizote hi hnam dang zingah pawh kan nep lohzia a tarlang a, Sanga pawh a hnaa a rinawm avang leh a thawh that avangin hotute mit a tliung a Subedar-ah kaisantir tura tih a  ni a. Mahse, direct a kaisan aiin mahni thiamna hmanga kaisan a duhzawk avangin Promotion course zirin a kaisang ta a ni.Hei hian Mizote hi kan tum phawt chuan dinhmun sang takah hnam dangten hotua min en theih turin kan invawrh sang thei tih a tichiang hle.

Inngaihzawn kawngah an rinawmzia kan hmu a, an inkarah hmelma Thanzika an nei a. Mahse, ringhlel a inthen phah mai lovin thu dik an zawng chhuak a, thil tisualtu chu tihmualpho a awmin a tawpah an innei tih kan hmu. Sanga leh Thanpuii hi Kristian tha tak ve ve an ni a. Sanga pawhin a hna petu chu a hnathawhna hmunah a hrereng a, Pathian a rin tlat na chuan kawng dikah hruaiin a hnaah pawh hma a sawn phah a. Kohhran bel tlat mi anih avangin a ngaihzawng lakah pawh a rinawm a. A ngaihzawng Thanpuii chu pianphunga rualbanlo ni mah se a hmangaih tlatna hian a rinawmzia a tilang. Thanpuii pawh hi a dinhmun a dintirtu Pathian chungah a vui ngai lo va. A dinhmun avangin mi aia hniam bikah awm a tum lo va Kohhrana inhman a thulh chuang lo va. Mite entawn turin a nun a hmang thei tlat a ni. Nula hmelchhe lo tak anih avangin ngaizawngtu dang pawh a nei a mah se a ngaihzawng lakah a rinawm hle tih kan hmu bawk.

KA HMANGAIH TLAT CHE tih thawnthu hmangin Lalruali hian Mizo nunphung tam tak a tarlan mai bakah thangtharten hman lai mite  nuna entawn tur kan neihte a tarlang a. Hei bakah hian hmanlai huna thil thleng tam tak kan hrialoh tam takte min hrilh hre bawk.

6.K.C. LALVUNGA (1929-1994) : K. C. Lalvunga (Zikpuii Pa) hi kum 1929 December ni 27 khan Aizawl Venghluiah Hrawva Khiangte leh Lalluii Chhakchhuak te inkarah a lo piang a. Lehkha zir mi tak a lo ni a. B.A. a zawh hnuah 1962 khan Indian Foreign Service (I.F.S) a inziak tling ta daih mai le! Mizo zinga I.F.S. hmasa ber a ni a, India Ambassador niin khawvel ram hrang hrangah hna a thawk kual zar zar a. A thawhna ram miten an lo lawm em em zel a, India ram tan pawh he Mizo tlangval hi a chhuanawm hle thin a ni awm e.

Kum 1948 September ni 5 khan Darhmingrhangi nen an innei a, fanau malsawmna pawh an dawng tha hle a. Hlim taka lehkha a ziah chhoh zel lain October 10, 1994 tlaiah a chau thut a, kar lovah marphu a awm tawh lohna ram a pan ta mai a. A tuk October ni 1-ah Venghlui thlanmualah vui liam a ni ta.

Thu leh hlaa tui takzet, ziak pawh thiam, sawi pawh thiam a ni a. A titi pawh a ngaihnawm em em thin. Thu engemaw zat a ziak a, thawnthu panga vel a ziak bawk. A thawnthu ziak mi hriat hlawh leh lar zual te chu- NUNNA KAWNG THUAMPUIAH te, C.C. COY NO. 27 te, SILVERTHANGI leh KRAWS BULAH CHUAN tih te a ni a. A thawmthu sei leh tawi ziak hote zawng zawng hi a ngaihnawm viau zel a ni.

Hla phuah lamah pawh a duai lo hle a. A saka sak tur chi leh A chham a chham tur chi hla a phuah zinga chhinchhiah tlak zualte chu, Sikni eng te, Lungrukah mi vei ve la te, Hruaitu Vana pa kan ngai leh Zoram par tih te a ni. Zipuii Pa hi chhamhla phuahtu (Poet) ti a chhal ngam , chhamhla tam tham phuah kawnga Zofate zinga mi hmasa a ni. A saka sak theih chi pawh tlem azawng a phuah bawk.

K.C.Lalvunga Kutchhuak (Short Story) –C.C. COY NO. 27 : K.C. Lalvunga hiann a lehkhabu ziakah reng reng Mizote kan kan nep lohzia a tarlang thin a.Mizo hnam a chawimawi thiam hle. C.C. COY NO.27 hi lehkhabu a chhuah hmasak ber a ni a.He thawnthu hi Ralkapzauva chanchin a ni a,Ralkapzauva chu khi-ah khi-ah, kawlvalenchham khawchhak Tuipui ral, thim leh eng inthenna ramah,mipui mawl tak zingah, nu leh pa mawl tak karah a lo piang a.Mahse a tumruh em avang leh taima taka lehkha a zir avang te,a pain a tuipui avang tein  hlawhtlinna ropui tak a chang a.Hnam dang te’n pu en a an en hial khawpa sang dinhmun a chelh a, sipaiah pawh Major hial a thleng thei a. Hei hian rethei ber tan pawh tum phawt chuan kawng a awmin mi ropui takah a chhuah theih tih a ti chiang hle.

Ralkapzauva nun atang hian education-in Mizo nun mawl tak leh khawsak dan mawl tak a khawih danglam theihzia kan hmu a.Education avanga khawvel thar leh nunphung dang, Mizo la hriat ngai loh hmu chhuakin, Mizo tan khawvel dang thlirna tukverh a siamsak a.Hlawhtlinna tlang a thlen bawk.

Mawlna leh atna ram atanga khawvel eng,Mizovin a panna kawng chanchin leh harsatna leh hreawm tam tak kal tlanga chu khawvel thar chu a lo thlen theih dan he thawnthuah hian kan hmu a.Ralkapzauva chu khaw kilkhawr takah piangin harsatna leh buaina kara a taksa leh rilru  lo than chhoh dan he thawnthu hian min hrilh a. Mi mawl leh retheiin hlawhtlinna ram pan tura ke a pen dan kan hmu a. Ralkapzauva pa chuan French ram kal tawh anih avangin Tukuli mal leh Marshelli khawpuia a French nula rim kawrchung dum da  tawh tak a nei a,thil neih har tak a ni a.Chu thil chuan Ralkapzauva chu High School a kal tir theih ngei a pa pawhin a ring a ni.He thawnthu hian a huam hun laia Mizo lalte leh an khua leh tui inlaichin dan leh, sum leh pai lama kan nu leh pate dinhmun pawh a sawi chiang hle.

Hlawhtlinna ram pan tur hian inrintawkna neih a tulzia kan hmu a. Ralkapzauva kuli-in ‘Babu’  tia a koh chuan a rilru a hneh hle a.Inkoh dan mawi leh dik hman hi mi hawihhawm hriatna a nih mai bakah mihring inlaichinna tinghettu a ni tih he thawnthu hian a tarlang chiang hle. Mizo lehkha zir hmasa phai a awmte nun chan leh hnam dang kara an chet tlat dan te,kan hnam hmasawnna tur chuan hnam changkang zawkte kawm ngeiha an nun dan kan zir a pawimawh tih he thawnthuah hian kan hmu bawk.

Ralkapzauva chu lehkha thiam a lo nih a, Sap a nih hnu pawhin a pian leh murna khua leh nunphung a ngaihsan avangin chawimawi a hlawh a. Heti ang malsawmna hi mi hlawhtling bikte dawn thin a ni tih kan hmu.

Ralkapzauva pa leh Bahadura chu mawl tak an ni a. Sapramah kalin hnam fing hmu ve ve an ni a. Hun a lo kal chuan Bahadura chu kuli hna thawkin a fapa pawhin chu hna chu a chhawm a. Mizo pa fapa erawh chu sipai officer a ni thung. Ralkapzauva Shillong Govt.High School-a a kal laiin an headmaster chuan “Mizo tan  Bengali tluk loh thu a awm em ni? Hmanlai pawhin an lu in la thin a  lawm!” tia a fuihna tawngkam atangte hian Mizo kan nep loh zia a lang a.Bengali leh Khasi naupang tlim zingah Ralkapzauva chu sang filawrin exam-naah a tling te leh Dehra Dun Military –ah mingo leh mihang gentleman cadet tlim zingah Best cadet a ni thei te hian, hnam tlem te ni mah ila kan khawvel dai phak chinah Mizote hi kan invawrh sang theiin kan hnam kan chawimawi thei a ni tih he thawnthu hmang hian Zikpuii pa hian a tarlang chiang

7.C.LAIZAWNA (1959- ) : C.Laizawna hi Tualpui khuaah Jan.10,1959-ah Manvela leh Lalduhi te inkarah a lo piang . Lehkha lamah PUC zovin thuziak lamah a inhmang ta a. Chanchinbu enkawltute zingah tel vein, Chanchinbu hrang hrangah a thawk tawh a, thu a la ziak chhunzawm zel bawk.

Laizawna hian kum 1982 vel atangin thu a ziak tan a. A lehkhabu chhut chhuah hmasak ber chu lemchan thawnthu- KAN TIAM TAWH SI tih a ni. Lehkhabu chi hrang hrang –NUPA HLIM NAN, FA ENKAWL DAN, NUN HRUAITU, ENGKIM HLAWKNA tih te a ziak a. Kum 1985 atangin nula leh tlangval inhmangaihna lam a ziak a,bu 20 lai a chhuah. Chu’ng te chu- THURUK, HMANGAIH ZIRI, LEI THEIH LOH RUALI, HMAITHINGHAWN, I TA KA NI SI tih te a ziak bawk.

Heng bakah hian thawnthu sei leh tluantling tha tak tak, HMANGAIHZUALI (1990) TE, ZIZYPHUS(1900), KA PHAL LO (1991) TE, K.S. MIN TI MAW (1992) TE, KA THLANG ZAWK (1993) te a ziak a. HMANGAIHZUALI  hi  Mizo Academy of Letters chuan kum 1990 chhunga Mizo tawng lehkhabu chhuak zinga tha ber, Book of the Year-1990 atan a thlang a. Tin kum 1998-a a chhuah ANITA chu Book of the Year atan vek thlan a ni bawk. A thawnthu ziah te hi a tha kim vek lo anih pawhin engemawti kawng zawng tak chuan Mizo Literature tiphuisuitu a ni a, a hlutna en khum chi a ni lo. Chuvangin, Laizawna hian Mizo Thawnthu phuah dan chanchin zirna kawngah hmun pawimawh tak a luah kumkhua tawh dawn a ni.

C.Laizawna Kutchhuak (Short Story) – REMI LEH RUATA : He thawnthu hi Remi leh Ruata harsatna kara an inhmangaih dan chanchin tarlanna a ni a.An pahnih hian chhungkaw awmthei tak ve ve an ni a, mahse chu an hausakna chuan nunkhaw lohnaah a hruai lo thung.Remi rethei taka mi awmpui anga  thingtlang a awm chu Ruata nen  an inhmel duh ta a.An dinhmun a in an lo em avangin an chhung te’n inneih an phal ta lo va,inhmuh pawh  khapsak an ni a.Ruata’n a hmangaih tlat si avangin rethei pawh huamin a hmangaih tan an in chu a chhuahsan hial. Thawh hreh pawh nei loin a hmangaih tan tiin  hna a thawk nasa hle a. Harsatna tam tak tawk mah se an rinawm tlatna chuan a tawpah hun tha a siamsak ta a ni.

Remi thingtlanga harsa taka a awm lai a inhlawhna tur hmu a, mi khawngaih a hlawh thin hian Mizo te’n rethei te an ensan lo thinzia a tarlangin mite tanpuitu nih an hreh lohzia kan hmu bawk.

Pu Lura, Ruata pain Remi a mizia a ngaihnat tak  mi awmpui a nih avanga a fapa nupui atan a iai tlat hian nu leh pa tin te’n an fate hmakhua an ngaihzia leh an hmalam hun thui tak an thlirpui thin a ni tih ti chiang hle a. Pu Lura pawhin a fapain a thiante a umphak loh a hlauh avang te,  mi nuihzat ahlauh avang te, nakin hunah a zahpui a  hlauh avang te leh a nawmsak loh a hlauh avang tein mi awmpui neih a phalsak lo a ni.

Ruata’n  a ngaihzawng a chhungte duh loh a nih avanga a neih theihna tur zawnga an in a chhuahsan hian hmangaihna an lak nat dan  leh hmangaihnain hausak leh retheiah ramri a kham lohzia a tarlang a. Ruata hian an hausakna leh an in chhung thil zawng zawng aiin a ngaihzawng hi a thlang a ni

An fapa khuahkhirh an tum lutukna lama a ngaihzawng then tura an tih duh lo va an in hial a chhuahsan hian Pu Lura thil tam tak a hriat chhuah tir a. Fate ransa ang maia thuneihna pe lo va khuahkhirh that lohzia te, kawng thenkhatah zalenna pek pawimawhzia te leh duhthlanna an hman theih loh chuan nu leh pa thuawi thei tak pawh hi thunun theih loh chin an awm thin tih a tarlang chiang hle a ni.

Ruata  thian Rosiamliana leh Remi thian Zauvi te hi  an rinawmzia kan hmu .An mangan lai leh harsatna an tawh lai pawn hnemtu leh thlamuantu an ni a , an phatsan miah lo tih a chiang a,  an thian te thuruk an zep theih dan atang te hian thian rinawm an nihzia kan hmu a. Harsatna avanga rei tak inhmu lo a an awm hnuah thil hriat sual avangin Ruata chuan Remi chu rinawm lo takah puhin amah avanga a tawrh zozai te a ngaihtuahin a rilru a nain ngaihdam har a ti a.Then a tum ta a,chutih huna thil awmzia sawia, thudik puangchhuaka, anmahni pawt hnai lehtu chu tudang ni lovin thian bawk ani. Hei hian thiantha hlutna a pholang chiang hle.

A tawp berah chuan nu leh pa hmangaihna nasatzia kan hmu a, an thu awi lo va, an in chhuahsantu Ruata chu an ngaihtuah em em a, an thu awi lotu nimahse an fapa a nih miau avangin a awm loh chuan an ngaiin khawharthlak an ti a. A awmna hriat tumin hmun tin an dap a, an hmuh leh chuan pa hmangaihna chuan a ngaidam thei tlat a ni. Remi leh Ruata thawnthu hmang hian C.Laizawna hian mihring nuna thil pawimawh leh hriat tul tak tak a tarlang a ni.

8.CAPTAIN  C.KHUMA(1914-1990) : Capt.C.Khuma, a hming tak Challiankhuma hi kum 1914-ah lo piangin,  kum 1990, September ni 7 khan a lei kumte a chhiar zo ta a ni.

Thawnthu phuah thiam leh lehkha ziak uar tak a ni a. Kum 1944 vel aṭanga lehkha ziak ṭanin thawnthute a phuah ṭhin a. A thawnthu phuah chhut chhuah hmasak ber MAYMYO SANAPUI chu kum 1946-ah ziakin kum 1950-ah chhut chhuah a ni.A thawnthu phuah dangte chu- HMANGAIH THIAMNA(1944), FAHRAH NUN(1947), PHU LOH ZUNLENG(1950) leh CHHINGKHUAL LUNGDI(1952) te hi a ni.  Kum 1950 daih tawha Mizo thawnthu chhu chhuak khawpa ngaihtuahna a lo seng hi Capt. C.Khuma ropuina tak a ni.

Capt.C.Khuma Kutchhuak(Short Story)- CHHINGKHUAL LUNGDI: CHHINGKHUAL LUNGDI tih thawnthu hi nula leh tlangval inngaihzawnna thawnthu a ni a. An inngaihzawn tan dan leh a tawp lama an awm dan erawh chu a inpersan hle thung. A thawnthu hi sipaia ṭang tlangval la naupang takin  nula pakhat, a tawntirh aṭanga a ngaihzawn nghal em em mai nena an chungchang a sawina a ni a. He nula nen hian an inngaizawng nain tlangval Chala hian a sipai ṭannaah a lumum mai ala nih vangte leh, amah a insit rih avangin a nei mai ngam lo va. A hunlaia a neih ngam loh miau avangin a tawpah chu nula chu a chang ta lo nge nge a ni.

He thawnthu atang hian Mizo nunphung eng’emaw chen kan hre thei. Mizo hmeichhiate khan an phak ang tawk tawkin hmasawnna kawngah ke an pen tih kan hmu a. Hnam dangte ngaihtuahin an dinhmun pawh a sangin, mipate tih theih leh awmdan nen an inkar a inhlat lutuk lo tih kan hmu. Muslim sakhaw kalpui firfiak deuhte’n an hmeichhiate an hnuaichhiah ang hi Mizo hmeichhiate chungah chuan a thleng lo va. Khawi ilo kalchhuahnaah pawh zalen takin an tlang par par mai a. Mipa nena an inbiak leh inkawm danah pawh an zalen hle a ni.

Mizote’n ramsa zingah sakei an zahzia leh an hlauhzia he thawnthu tawi atang hian kan hmu thei a. Hman lai hunah khan ramngawte a la that avangin sakei pawh hmuh tur an la awm zut a. Chala te’n tlawngluia lawngleng an kar lai chanchinah hian sakei chung chang an ngaihdan, rilru puthmang kan hre thei a ni.

Kan dinhmunah hian hnamdangte nena intlawhpawh tawn kawngah Mizote hi kan hniam lo hle a. He thawnthu tawiah ngei pawh hian Calcutta thleng thlengin Mizo nulate pawh an zin thu kan hmu a ni. Chu chuan hnam dangte aia indahhniam kan tum loh zia, anni aia dinhmun tha leh sang zawka din tum ranin thil kan ti thin a ni tih a ti lang thei a. Chubakah Chala hi a sipai tanna lama a hun hman danah hnamdangte aia chungnun a tumzia chu a hriat theih leh bawk a ni.

Tunhma lamah khan Mizote hian sipaite hi an ngaisang hle tih kan hre thei a. Hna thawh tur mumal neilo leh a theifa nia inngai chu sipaia tan zel an tum mai a. Chala ngei pawh hian a nupui neih huna midangte kamthuah ruala kam a thuaha, a fate harsa lutuk lova a enkawl theihna turin sipaiah hian a tang tih kan hria a. Sipai a ṭan hi hetih hunlaia hna zahawm tak leh eizawnna atan pawha ṭha tak a nih thu kan hmu a ni.

9.LALZUIA COLNEY(1937- ): Lalzuia Colney hi kum 1937-ah Farkawn khuaah  Zothanga leh Chalmawii te inkarah a lo piang a. Unau panga zinga a naupang ber a ni a,Ralte Kawlni hnam a ni.A nupui Lalzamveli nen fa 10 an nei. Zirna lamah B.A a ni. Kum 1964 atanga Thu leh Hla khelmualah lutin Essay inziahsiakah lawman vawi 15, Drama lam inziahsiakah vawi 4 lai chawimawina a dawng tawh a.Pawisa fai chuan Rs.29000/-zet a lo hmu reng tawh a.A  kutchhuak lar zual deuh deuh chu- High School (Cl-IX & X) zirlai “Mizo Thu Leh Hla Bu” te hi a  ni a. Tin, Mizo Subject (High School-M.Azirlai)-a an rawn leh a buatsaihtute zinga tel ve hian Chawngtlai M/S Headmaster te, Vanzau M.E School Headmaster te, Chawngtlai M.E School Teacher te leh, Khawzawl H/S-a teacher hna te a  thawh hnuin 1993 atanga tun thlengin K/M High School Teacher hna a la vuanin Kanan Veng, Aizawl-ah an cheng mek a ni.

Lalzuia Colney Kutchhuak(Short Story)- LAL HLAU LO THI : LAL HLAU LO ṬHI tih thawnthu hi hmanlai chanchin-a innghat thawnthu, a ruangam awmsa ring lova a ziaktuin a din chawp vek; amaherawhchu, a chhunga mihring leh thil thleng thenkhatte behchhana thawnthu phuah a ni.Lal hlau lo thi tih hi hming an sak dawna hming naran “Lal hming sak dal lo” an tih thin ang deuhin Lalin a it tham loh thi tihna mai a ni.

He thawnthu hi Dama te ṭhian hoin thi hna phur tura  Kawl rama an kal chanchin a ni a. Dama leh a thian te hian nupui te an la duh ve anga chutih hunah chuan harsa taka an awm bik lohna turin Kawl ramah thi hna phur turin an kal a. An kal kawngah hian harsatna tam tak tawkin hawh leh duh rum rum khawpin hun an hmang a. Mahse, an thil tih tum chu nakina mi zah an kai theihna tur a nih si avangin thu sut hnihne duh lovin an tum ram chu an thleng a.Tichuan hlawhtling takin thi hna chu an phur haw a, an dinhmun siamtuah tangin mi zah an kai phah hle a ni. Hmanlai hunah Lal neih aia tha neih a thian si loh avangin Dama pawhin lu chhum ban chhum huama a hlawhchhuah chu lal hriat hlauin thul mawngah a thukru a. Kum 70 hnu zalenna  khua a var hnuin a nupuiin a awrh chhuak ve chauh a ni.Hei hian zalenna hlutzia a tarlang chiang hle .

He thawnthuah hian Mizo nuna thil thleng pawimawh tak tak kan hmu a. Hmanlai hunah lalte an lal em em a, khaw khatah lal aia thil nei tha an awm a thiang lo va .An thil neih aia tha hnamchawmin an neih chuan  an chhuhsak thiang a, lal sual deuh phei chuan an chhuhsak  duh mai thin. Hei vang hian hnamchawm te’n an thil neih hlut ber chu lal hmuh loh turin thul mawngah an dah tha thin a, an keng lang ngam ngai lo tih kan hmu.

Hmanlai mite an thawhrimzia kan hmu a, Damate thian ho pawhin an thawhrim leh tumruhna avang chauhin thi hna khur an  thleng thei a. Chutah thawh hreh nei miah lovin an inhlawh leh phawta an duh tawk an ngah hnuah thi hna an phur chauh a. Chumi rah chu Dama leh Sanga’n tel zual bikin an duhtak nupuiah an nei thei phah a. Hei hian nawmsak duh chuan thawh ve phawt angai tih a ti lang.

Thutiama rinawm thin Mizo te’n, saui an tanpui Sukte Lal rinawm loh avanga thangawk ang maia a inrin loh lai, vai runa mipa zawng zawng Lalpa hova an thangbo hlana run an han ni kha an hrethiam thei lo lo. Hei hian thutiam an ngaih pawimawh thin zia a ti lang.

Nula leh tlangval inhmangaihna kawnga an rinawm zia te, nu leh pa leh fate inkara hmangaihna hrui inthlung ngheh zia kan hmu a. Dama leh Chawngi inkara phiar rukna awm hian hmamlai huna inngaizawngin harsatna an tawh nasat thin zia a tarlang a. Sukte hovin Chhingpuii te nufa an mana, tlan tur a apa han kalin a hmangaih ve ve te hruai haw zawk tur a hre lo leh a nupuiin a fanu zawk hawpui tura a ti te hian nu leh pate hmangaihna  nat zia atarlang bawk.

Mizote kum zabi sawmhnihna tir lam atang tawh renga Mizo te  kan rinawm loh zia a tarlang a. Mizote’n vaiho nena  insumdawn tawnna kan neih hmasak pawl, thelret hralh chungchangah kan hmu a. Thelreta lungtum hlum hnanin vaiho chu tum khat an  bum thei, a nawn lehnaah chuan changel bul an fun hnan thunga ti fuh an in ti hle. Hei hian Mizo nun mawi tak kha a ti dal tan niin a lang.

Mizo te khan zalenna an nghahhlelh zia a lang a, nunphung in ang lo lutuk avangin  Lalte leh hnamchawm an in thlau em em a. Lal neih  ang an nei ve phak lo va, an neih pawhin  a laksak hlauvin an dah tha thin. Hei hian an dinhmun  hniam zia a tarlanga, zalenna kawl a en meuh chuan mitin an in tluk tlanga. An dinhmun a changkang chak viau a, zalenna an lo mamawh zia a tarlang chiang hle.

10.VANNEIHTLUANGA(1957- ) : Vanneihtluanga Siama (fam) leh Nubuangi (fam) te fa paruk zinga tlum ber niin October ni12,1957 khan Aizawlah a lo piang a, Paihte hnam a ni. A nupui Lalawmpuii nen fapa pathum an nei.Tunlai Mizote zinga thuziakmi mite ngaihlut  ber pawl a ni hial awm e. Zirna lamah B.A. a zova.Thlakip chanchinbu lar tak Lengzem chanchinbu editor a ni mek.Article za chuang zet a ziak tawh a, Lehkhabu pawh panga a tichhuak tawh. Chungte chu: KRISTIANTE CHHANNA, MOTHER TERESA (1992), KEIMAH LEH KEIMAH (2002), ESOPA THAWNTHU (2001),NEIHFAKA RILBAWM (2002), RAWHTUINA MEI (2004). ESSAY HMINGTHANG TAK TAK –NIHAWI PAR, THUNDERBIRD, FAK HLAWHLO VALRUAL, tih leh a dangte ziaktu a ni a. Thu leh hla lam bakah Kohhran leh Khawtlang lamah pawh a kul a taia inhmang  thin a ni a, kum 2002-2004 chhung khan Aizawl District Wildlife Warden a ni. Computer printing lama sumdawnna khawih hmasa niin LV Arts neitu a ni. Tunah hian an chhungkuain A-9 Chanmari, Aizawlah an cheng mek a ni.

Vanneihtluanga Kutchhuak(Short Story)- PU KHUMA : PU KHUMA tih thawnthu hi rethei taka Khuma’n nun a hman dan chanchin a ni a. Khuma hi khurbinna fa a nih avangin mi ngaihnep a hlawh hle a,chutah karah a nu’n enkawl peih lovin a unaupa hnenah a hnutchhiah a. Hetiang teh hrepa nun hmang a nih avang hian Khuma hian mi hmusit a hlawhin nun hreawm tak a hmang a, atan hlimni avang hle. Mahse lung delh loh thing delh lohna fam chu lo thang lianin  pa pian tha tak khawtlang muanpui tham a ni a, hetiang nun hi nei mah se uire fa a nih miau avangin kawng tam takah khawtlangin duhsak viau mahse avangin mi nu leh pa te’n makpa atan em chuan an ti tlat a.Khuanu hian atan a tum tawk tur ruatsakin hmeithai fa Lalmawii nen an innei a, fapa duhawm tak nei zuiin thenawm khawveng pawhin an lawmpui hle a.

A tunhma nun hreawm tak theihnghilha hlimna a tawng ve tawh dawn emaw a in tih laiin ram buaiin a rawn nang si leh a. Khuma chuan sipai rinhlelh kaiin an sawisa nasa hle a, a nupui an pawngsual bawk a, a nupui hlau lutuk chuan mu leh mal pawh a nei thei lo va. An fa enkawl ngai bawk, anni pahnihin hna an thawk thei bawk si lo a eitur zawn a lo ngai vet ho bawk nen an tan nun a harsa bik hle a. Rambuai chu an tuar tak zet a, an pi eizawngtu berin a boralsan leh zel bawk nen an khawsak nawm zawk ringin Aizawlah an pem a. Mahse tah pawh chuan eizawn a harsat avangin nun nuam an nei chuang lo va, enkawlna mumal an neih loh avangin a nupui chuan a boralsan leh ta zel a. Pu Khuma te pafa nun chu a hreawm tak zet a, vanneih thlak takin labour hna a hmu ve hlauh a hna hniamte ni mahse atan chuan hna nghet a nih avangin a hlu hle a. An dinhmun a ziaawm dawn chauh a, a fapa hna hmu thei lo beidawng a in awk hlum leh a Pu khuma tan chuan vanpui a chim hi a ni ngawt tawh a. Hetiang hian nun hlim pawh nei lovin Pu KHuma hian a nun a hmang ral a ni.

He thawnthuah hianMizo nunphung tam tak a lang thei a, hmanlaiin hlimna thlarau chang in ti te’n an thlarau chan avangin an pasal/nupui fanaute kalsanin an thlarau chan mil puite nen an khurbing ta thin a. Thlarau thianghlim fa nia sawiin an zah pui lo hle thin, hetiang mi hian ngaihnep an hlawh zia Khuma nun atangin kan hmu a. Sawn a nih avangin thian te leh inchhungkhurah ngei pawh en tleu a hlawh a. Hei hian hmanlai hunah sawn an ngaihnep zia a ti lang.

Rambuaiin Mizo nun a tih buai zia kan hmu a, mipa tawh phawt chu man khawmin an dawp thin, underground an nih ringhlelin an sawisa ta thin a, sa tha deuh phei chuan rinhlelh an kai hma bik hle a ni. Rambuai hian chhung tin nun a ngawng a, khawkhawm te a awm avangin awmhmun nghet an nei hman lo va, thawkmawh chhung tan phei chuan khawsak a harsa hle a. Sipaite an lalin an nunrawng zia a lang a, Mizo hmeichhia te chungah a nasa leh zual a. An duh loh chung pawngsualin rilruna takin an siam thin a. Hetiang hi an nun hman dan a nih avangin ramtuileiloa awm ta an awm phah nual a ni. Rambuaiin a nghawng dinhmun chhe tak tak an tam phah a ni.

Thingtlang mite mawlmangzia  kan hmuhah hian, Khumate’n an chhungte an zawnchhuah dawn khan an awmna pawh an hre si lo va. An zawn tur ber lah chu “Rina, damdawi zuar’ tih chauh a ni mai si. Khawpuiah “Rina, damdawi zuar” tih ringawt maia an han zawng kha a finthlak lohvin, khawpuia mihring tamzia leh an inhriat vek sen lohzia an chhut tel hauh lo a ni. Anni tan khan khawpuiah hmuh tur leh ennawm hi a tam em em a, motor an hmuh rikngawt pawhin an buai a ni.

Khawpuiah rethei tan leh thingtlang mi mawlmang, lehkha thiam lo tan nun a harsat zia a lang a. Sawrkar atanga tanpuina awm theiah pawh mi awm thei deuh te’n  an hmuh khalh zung zungin an chanai laksak pawh an hnial lo va. Hei hian Mizo te kan rinawm loh zia a ti lang a, hna zawn kawngah pawh thiamna hlu hle mahse awmthei fa leh sawrkar mi be thei deuh te chanpual a nih zia a lang a. Mi rethei deuh tan chuan beisei tur a vang hle, hei hian mi hausa leh rethei kar zau zia a ti lang chiang hle.

 TLANGKAWMNA

 Kristiannain Mizoram a rawn thlen kum 1894 aṭanga chhiara kum sawli leh pasarihna, kum 1937-ah L.Biakliana hmangin Mizote kutchhuak ngei Short Story kan hmu ṭa a. Ani hnungzuiin Kaphleia’n Short Story a rawn ziak veleh bawk a. L.Biakliana hi Mizote zinga Short Story ziaktu hmasa ber a ni tih kan hria a. A hnung rawn zuia kum 1939-a Short Story rawn ziak ve nghal Kaphleia nen hian an chhuanawm takzet a. Anni pahnih hi awm ta lo se, Mizote hian Short Story hi kan nei lawk lo mai thei a ni.

Short Story-in Mizote zinga hmun a rawn neih ṭan aṭang hian mipui lamin an hlut nghal em em a. Mizo zia leh nunphung tam tak tarlanna a nih hlawm bakah, inzirtirna lamhawia phuah a nih hlawm avangin a chhiartu thinlung lamah pawh nasa takin hna a thawk a. Kristiannain thuk taka min luhchilh tawhna chuan kan Short Story tam takte chu Pathian thu nena inkaihhnawihna nei an ni hlawm. Hei tak mai hi kan Short Story danglamna pakhat a ni a, a sap ṭawng takin ‘biblical influence’ a tam hle a. Chumi piah lamah khawtlang inrelbawlna leh khawsakhona kawnga awmdan mawi hriatna thawnthu a ṭhahnem hle bawk.

Mizo ṭawngkauchheh mawi tak tak te chu kan Short Story ziaktute hian an hmang thiam hlawm em em mai a. Chuti ni chung siin a ngaihnawmna lai tur chauh thlir lovin a kawhtum an uar leh hle thung ṭhin si. Amaherawhchu, kawhtum ran nei lem lova ziak pawh tam tak a awm ve tho va. Chu’ngte chu han thlirin Short Story ṭha tak, midang hruai sual thei tura ziah a awm lo kan ti thei ang. Hei tak mai hi kan ziaktute an ngaihsanawmna niin a lang.

A enga pawh chu nise, Short Story hi a hlu a, chhiar a hahdamin chhiar chhung a rei lo va. Kan sawi tum tak kan luhchilh theih nghal avangin thu pehhel kual vak pawh a ngai lem lo. Hemi avang tak hian Short Story hi ṭhangtharte’n kan uar lehzual a ṭul hle niin a lang a. Hemi kawnga hmala tur hian mitin kan pawimawh ṭheuh va, a hlutna haichhuak tur leh tihmasawn tura ke kan pen zel hi a ṭul a ni. Short Story ṭhan rual zel hian kan ram leh hnam pawh hi a ṭhang ve dawn si.

References:

1.Khiangte,Dr.Laltluangliana : Thuhlaril (Literary Trends & History of Mizo Literature), College Text Book (Mizo) Editorial Board  Publications, Aizawl, 2nd ed., 1997.

2.Khiangte,Dr. Laltluangliana : Mizo lehkhabu zempui (A Compedium of Mizo Bibliography), Published Mizo Department University, Aizawl, 2005.

3.Khiangte,Dr. Laltluangliana : Mizo Hla Leh Chhamhlate, L.T.L. Publications, Aizawl, 1st edtion., 2009.

4.Khiangte,Dr. Laltluangliana : Fungki, CTBEB, 2nd Edition,Aizawl, 2007.

5.Khiangte, Dr. Laltluangliana : Ainawn, CTBEB, Gilzom Offset, Aizawl, Second Edition, 2008.

6.Colney, Lalzuia    : Lal Hlaulo Thi, Mualchin Publication & Paper Works, 7th Edition, Aizawl, 2007

7.Lalthangliana, B.: Mizo Literature (Mizo Thu leh Hla), M.C.Lalrinthanga, Aizawl, 2nd editon, 2004.

8.BA zirlai thu, thawnthu tawi leh Hlate : Ainawn, College text book (MIZO) Editorial Board (CTBEB) Publication, Aizawl, 2nd edition, 2008.

9.KC, Dr. Vanlalnghaka    : Literature Kawngpui, Gilsom Offset, Aizawl, 2010

10.Lalzuithanga : Thlahrang,Gilgal Press, 3rd Edition, 1997, Aizawl. LTL Publication, 5th edition, 2002.

11.Biakliana,L. Hawilopari leh Lali, LTL Publications, Aizawl, 1993

12.Zikpuii Pa. CC Coy No.27 (Short Story), Lelte Publication, Aizawl, 1986

13.Laizawna,C. Remi leh Ruata, Aizawl, 2010

14.Lalruali.  Ka hmangaih tlat che, Aizawl, 1989

15.Khuma,C. Chhingkhual lungdi, Aizawl, 2009

 

 

Leave a Reply

Your email address will not be published. Required fields are marked *

error: Content is protected !!