Mizo thu leh hla hmasawn dan – Lalhmangaihzuali Sailo

MIZO THU LEH HLA HMASAWN DAN

 -Lalhmangaihzuali Sailo

Thuhlaril(Literature) tih hi a tobul kan chhui chuan Latin tawnga ‘littera’(lehkhathawn) atanga lo chhuak a ni a. Chuta tang chuan ‘literatus’ a lo piang a, chu chu lehkha thiam, lehkha lama hriatna nei tihna a ni. ‘Litteratura’ a lo piang leh a, chu chuan hawrawp hmanga thuziak leh tawng dik zirna tih lam a rawn hawi ta a. French tawnga thumal pakhat, thuziak awmze nei an sawina twngkam tho ‘litteture’ tih nen hmer zawmin Sap tawng (English) thumal thar ‘Literature’ hi kum zabi 14-na atang khan an lo hmang tan ta a. Awmze puitling neia an hman tak phei chu kum zabi 19-na atang chauh khan a ni thung. ‘Literature’ hi Mizo tawnga  lehna tlanglawn ber chu ‘Thu leh hla’ tih leh ‘Thuhlaril’ tih a ni a. Thu leh hla han tih hian thuziak eng pawh a huam deuha hriat a nih avangin zirbingna huangah chuan Thuhlaril han tih mai hian a firho kha a fun kim viauin a hriat.

MIZO THUHLARIL TOBUL:

Kan thuhlaril lo awm theihna bul chu Hawrawp (Alphabet) kan nei kha a ni awm e. Hawrawp kan neih hma hian Mizo Tawng thuziak tlem azawng lanna bu hi a lo awm tawh a, chungte chu kum 1874-a chhuah ‘Progressive Colloquial Exercise in Lushai Dialect of the Dzo or Kuki Language’ Central press, Calcutta-a chhut  T.H. Lewin ziah te, Brojo Nath Saha ziah kum 1884-a chhuah  A grammer of Lushai Language’ tih te, kum 1885-a C.A Soppit ziah ‘Rankhol kuki – Lushai Grammer’ te an ni.2. Heng lehkhabute hi Mizo tawnga thuziak bul inlanna niin Mizo tawng leh Sap tawngin Mizo thuhlaril meichher an lo buatsaih reng a tih theih.

April 1, 1894 khan Mizo Hawrawp (A,AW,B) chu Pu Buanga leh Sap Upa ten zir theihin an lo peih ta a, Mizote an zirtir a, ziak leh chhiar thiam an lo pung tual tual a, kum za a liam meuh chuan zirna sang tak thlenga thiamna sang tak nei leh thu leh hla lama sulhnu nei tha leh ngah tak tak  pawh an awm ta fur mai. Mizo thuhlaril hi Hawrawp kan neih hmain T.H. Lewin, Brojo Nath Saha leh C.A. Soppit ten a bulthut tur an lo rem a, hawrawp kan neih atang chiahin kan thu leh hlate chu Bible lehlin leh Pathian fakna lehlin leh phuah hmangin a rawn inlara chak takin a thang chho ta zel a ni.

Mizo tawnga thuziak hi Hawrawp kan neih hma kum 25-ah hmuh tur a lo awm tawh avangin kum 130 (1870-2000) chhung chu Mizo thuhlaril hi awmze neiin a thang tawh a tih theih awm e. English Literature-a an hunpui then dan tlangpui kan thlir chuan kum 130 chhung chu then lovin hun khatah an chhiar mai thin. Kan thuhlaril pianna a tlai deuh avangin kum kan la chhiar tam thei lo va, he kum 130 chhung hi hmun thumah Hun Hmasa, Hun Laihawl leh Tunlai Hun tia thenin, Hunpui then hrang hranga Mizo thuhlaril than dan chu lo thlir ila.

I.HUN HMASA (1870-1920):

Mizo tawnga thuziak rawn lan tan hun a ni a. mizo ni lo,tunhmaa Mizoin ‘vai’ kan tih tunhnua ‘Sap’ kan tih te an ni ber. Thangliana (T.H. Lewin: 1839-1916) hian kum 1870 vel atangin Mizo chanchin leh tawng tlem azawng a lo thai lang tan a. Kum 1874-a a chhuah Colloquail Exercise’ah phei chuan Mizo thawnthu pathum ngawt Chemtatrawta, Kungawrhi leh Lalruanga te Mizo tawngin a lo ziak tawh a, Mizo tawng thumal eng emaw zat a lo ziak chhuak bawk, thuhlaril meichher chhit en a nih theih nana a tha thawh hi a ropui hle.

11.Jan.1894  Pu Buanga (J.H. Lorrain: 1871-1944) leh Sap Upa (F.W. Savidge: 1864-1936) Mizorama rawngbawl tura lo chhuakin A,AW,B zir theiha an peih chiah khan chit en a lo ni ta a, heta tang hian thu leh hla mei chu mit lovin a alh ta zel a ni. A tirah chuan Aw-A-B…..U-V-CH tih a ni a, mahse a indawt dan leh a rik dan hmanga tha zawk tur a an ngaih in an rem tha a-A, AW, B, CH, D, E, F, NG, H, I, J, K, L, M, N, O, P, R, S, T, T, U, V, Z hi kan lo nei ta a ni.  Pu Buanga leh Sap Upa hian Bawlhmunah sikul an dina chutah chuan Suaka leh Thangphunga’n an zir a, kar khat hnuah Khamliana’n a rawn zawm ve leh a, ani hi a rilru a chaka ziak leh chhiar thiam hmasa berah atang hial a.

Kumpinu piancham lawmpui nana kum 1897-a a thuziak chu Mizoin Mizo tawnga awmze neia thu a ziah hmasak ber a tih theih mai awm e. Pu Buanga leh Sap Upa hian thu leh hla than nan tha an thawh hlawk hle mai, Bible an letling a, hla an letlingin an siam nghal bawk a, an thawhrim zarah chanchintha ‘Luka leh Johana’ ziak chu kum 1898 khan chhiar theihin chhuah a lo ni ta a, ziaka Mizo hla vawn that hmasak ber ni turin kum 1894 kum tawp lam khan ‘Jisu vanah a awm a’ tih chu an siam. Pu Buanga hian mizo tawng thumal tam tak a lakkhawm hmang tangkaiin kum 1898 khan ‘The Lushai Grammer & Dictionary’ chu a chhuah a.

Anni bakah hian Mizorama kohhran ban rawn phuntu kum 1897-a lo chhuak Zosaphluia (Rev D.E Jones: 1870-1947) leh Zosapthara (Rev Edwin Rowlands: 1867-1939) kum 1898-a lo chhuakte  khan tha an thawh tam hle a. Bible lehlinhna thawk chhunzawm chat in leh Fakna hla phuah in Zosaphaluia’n hla 40 leh Zosapthara’n hla 83 lai Kristian Hla Bu ah a lang, lehlin kawngah nasa takin an inhmang ve a. Anni pali thawhrimna a zarah ‘Kristian Hlabu’ hmasa ber chu 1889 khan hla 18 awmin a lo chhuak thei ta a, an kutkawih liau liau a tih theih awm e.

Tarmita ( J. Shakespear: 1861-1905) kaihhruainain ‘Mizo chanchin Laisuih’ chu kum 1898 khan  tihchhuah a ni a, kum 1902 November thla atangin ‘Mizo leh Vai Chanchinbu’ (thla kip chhuak) a kaihhruaina bawka tihchhuah a ni bawk. Heng chanchinbu-ahte hian thuziak eng emaw zat thawh vea rin a ni. Tin, ‘Mizo leh Vai Thawnthu’ tiin Vai thawnthu 3 leh Mizo thawnthu 7 lai  ‘Thangsira Pa’, ‘Nuhlupi’, ‘Tlumtea te unau’, ‘Sichangneii’, ‘Liandova te unau’ leh ‘Pa fa hruai bo thu’ te chu Assam Secretary Printing Office atangin a lo chhuah bawk. A tha thawh hi Mizote tan a chhinchhiah tlak hle.

Zosap kan tih bikte khan  Bible lehlin chu Kristian sakhaw vawrh darh nan an buaipui chhunzawm zel a, chhiar thiam an pung chho ve zel bawk a, a bu mal an lehlin zawh a piang kha mipui chhiar theihin an chhu chhuak zela kum 1898 atang phei chuan kum tin deuh thawin a chhuak chho a. Kum 1916 a lo nih meuh chuan Thuthlung  thar  bu hi ‘Kan Lalpa Isua, Chhandamtu Thuthlung  Thar’ tiin an lo chhuah thei ta a, thuthlung thar bu 23 zingah hian Pu Buanga’n bu 9 a letlinga Sap Upa  nen bu 4 an nei bawk. Tin, Zosapthara’n lehlin tawh sa ennawn chungin bu 7 lai a thawh a, Zosaphluia’n bu 2 a thawh ve bawk. Heng bakah hian Kristian nun chawm nan leh hnam nun chawi san nan zirlaibu an siam a, lehkhabu tha tak tak an letling bawk.

Zosaphluia, Sap Upa leh sap dang ten Mizo thuhlaril tihhmasawn nana an tha thawh kha hmuh hmaih hauh lo tur a nih rualin Thangliana, Pu Buanga, Zosapthara leh Tarmitate tha thawh kha a ropui zual a, Mizo thuhlaril sak pum a nih theih nan ban pawimawh tak an phun hlawm a ‘Sap Banpui Palite’ tih mai an phu em em a ni.Ringtu hmasate kha ziak leh chhiar thiam hmasa an niin rawngbawlna lamah pawh Zosapte puitu tangkai tak an ni. Kum 1908-ah Challiana chuan ‘ Pathian Lehkhabu Chanchin’ chu a letlinga a hnu kum 1910 khan Chuautera pawhin John Bunyan-a lehkhabu ziah ,The pilgrim’s progress, chu Kristian Vanram Kawng Zawh’ tiin a letling bawk. Rodala’n ‘Jona’ (1911) a letling a, Thanga pawhin ‘Solomona Thufing tawi’ (1914) leh ‘Zawlnei Daniela Bu’ (1915) a letling ve bawk.

Dr. Peter Frazer khan kum 1908-ah chhut khawl (hand press) a rawn chaw lut a, an hmangtangkai hle. Kum 1911-ah Major G. H.Loch khan Printing Press a rawn chaw lut leh bawk a, hei hi tun hnua ‘Loch Printing Press’ an tih tak kha a ni. Krista Tlangau a hnua ‘Kristian Tlangau’ leh thil dang chhut nan an hmang tangkai hle. Hetia chhut khawl a lo changtlun chhoh zel avang hian Mizo leh Vai chanchinbu leh Kristian Tlangau pawh chatlak lovin a chhuah chhoh theih phah a ni.

Heng chanchinbu-ahte hian thuziak tam tak hmuh tur a awm a, 1910 atang phei chuan he hun chhunga thuziak thawhtu tam zawk chu Mizo an ni. Makthanga khan 1911-1931 thleng Kristian Tlangau a enkawl a, thuziak a thawh nual rin a ni a; tin, Liangkhaia (Pastor ni ta) pawh khan he chanchinbu-ah hian 1920 hma pawh khan thuziak a nei tam hman hle. Mizo leh Vai chanchinbu chhuak hmasa ber kum 1902-ah khan Mizopa thuziak mi kan hmu tan der tawh.Kristian Tlangau 1911- 1920 inkar khan Liangkhaia’n  thuziak 59 lai a nei hman a, chanchinbu dangah pawh a neih tho a rinawma a thawh hlawk hle..

Hla lamah chuan kum 1899 tawp lamah Mizote hlabu hmasa ber, phek 36-a chhah, hla 18 awmna chu chhuah a ni a; heng zinga hla 7 hi Pu Buanga leh Sap Upa kutchhuak an ni. Kum 1903-ah chhut that leh a ni a, hla 81 lai a chhuang tawh a, Thanga lehlin “Lalber hmaah kan ding ang” tih a chuang tawh a, mi dang nena an leh dun 2 a chuang bawk. Kum 1904-ah phei chuan hla 125 lai a awm tawh a; Thanga, Vanchhunga leh Dala thawh hla 16 lai a chuang tawh nghe nghe a ni. Kum 1908-a chhuakah hla 273 a tling tawh a, hla phuah leh letlingtu 29 zinga 16 lai chu Mizo an ni hman tawh a ni. Kum 1919-ah phei chuan hla 558 lai a chuang a. Kristian hlabu bikah chuan hun rei tak chhung hla tamna ber a ni thin.

Zosapthara khan hetih hun lai hian hla phuah leh lehlinah kutchhuak a ngah berin a rinawm a, Fakna hla  ni lo  Chhamhla  (Poetry) pawh 5 lai a lo neia, Bawih chhuah hla’, ‘Thil nawi te te’, ‘Ka nu’, ‘Mizo fuihna hla’ leh ‘Bei nawn rawh’ tih te an ni. Kum 1903 atangin Thanga (Thangthura: 1884-1977) chuan ama sawm chhuak ngeiin Chhamhla leh Fakna hla (Hymn)-te a lo phuah a. Kum 1910-ah phei chuan hla tha tak mai Aw Lalpa chungnung ber kan fak hle a che’ tih a lo siam hial a ni, hla 31 letlingin hla 8 a phuah bawk.

Ani bakah hian Mizo Kristian hla phuah leh siam hmasa chu Rev. Liangkhaia (1884-1979) hi a ni, kum 1910-a Kristian hlabu chhuakah khan a hla lehlin 51 lai a chuang tawh a, kum 1919-a chhuakah khan a hla lehlin leh phuah 20 vel a awm tawh nghe nghe. Kum 1913 -1915-a Cherra-a a awm laia a phuah Thlalera ka vah vaih chhungin’ tih te, ‘Thisen hlu, thisen hlu’, ‘Thumak ka sawi nin theih loh’ tih leh ‘Thil tha kan hmuh ang hi’ tihte phei chu kum 1919 harhna thlen tuma an hla sak nin theih lohte an ni hlawm.

Awithangpa (Hmarlutvunga: 1887-1959) hla phuahte hi a tirah chuan ziaka dah a ni lo a, kum 1950 chhovah ziaka vawn a lo nih tak avangin heng hun laia a kutchhuakte kan lo hriat phah ta a ni. A hlate hi tlar thum zai chi, chham, hril leh sak chite an ni a; khuarel leh mihring hlaa a chawina, inphuah elna (Satire) leh Sunna (Elegy) lam hawite an ni deuh ber. Heng Mizo mi hmasa pathumte hi ‘Zo Lungthu Pathum’ tia chhal mai tlak an ni.

Hawrawp kan neih hnu-ah hma kan sawn hle a, hun hmasa hun chhung hi Mizo thuhlaril bulthut tak meuh a ni a, lemchan lamah kum 1912-a Krismas an lawm tumin lemchanga intihhlimna zanah an nei a, heta an entir pakhat ‘Borsap lem leh thuchhia neitu 2 leh rahsi lem chang be’  phei chu lemchan phuarkhawmtu Thawnthu ruangam (plot), inbiakna tawngkam (dialogue) leh a changtu (character) a nei ve thlap a, heta tang hian sakhaw thila puipunnaahte lem chan thin a ni. Kum 1918-ah phei chuan lungdai khaw Biak inah chakai khawrh lem an chang hial a ni. Thuziak lam kan thlir chuan Mizo ni lo Sap ten bul an lo tan naw naw a, chhut khawl a lo awma  chanchinbu chhuah a nih atang phei chuan thuziak chhiar tlak tak tak kan hmu. Hla lamah pawh Pathian fakna hla lehhlin leh phuahin bul an lo tan bawk.

Heng hun chhunga lehkhabu chhuakte pawh Bible-ami bu hrang hrangte leh Sap tawng atanga lehlinte an ni ber. Mizo pa ngei thuziak mi leh hla phuah mi an lo inlar ve bawka an tha thawh a chhuanawm hle. Kum 1870-1920 inkarah hian Sap lehkhabu Pathian thu lam hawi lehlin leh chu lam hawi thu leh hla phuah atangin Mizo thuhlaril a rawn keuva, a thang hlek hlek bawk a, thuhlaril hma sawn zel nana rahbi pawimawh tak he hun hi a ni tiin kan sawi thei awm e.

 2.HUN LAIHAWL (1920-1970)

Hun Laihawl tia kum 1920 atanga 1970 chhung kan huam tir hi ‘Hranghluite hun’ ti pawhin a sawi theih ang. Thlur hrang hrang pian dan leh than dan thlir ila Mizo thuhlaril hmasawn dan a lang chiang thei viauvin a rinawm. Hun hmasaah khan hla lehlin leh Pathian thu lam hawi thu leh hla hmangin a keuva, he hunah erawh hi chuan fir tha tak (pure literature) a rawn piang tan a, a thang chho zel a, duah em emin a vul chhuak ta a ni. Thu leh hlaa kutchhuak nei hote hi Mizo an ni deuh vek tawh a, Zosap thenkhat ten nen. Ram pumpui thlirin ziak leh chhiar thiam an pung zel a, Mizoram pela lehkha zir mithiam tak tak pawh an awm fur ta mai. Chhut khawl lam pawh a changkang chho tial tial a, chanchinbu pawh a chhuah belh ve zel a, thuziah leh lemchan lamah intihsiakna buatsaih a ni bawk a. Hengte avang hian thuhlaril pawhin hma a sawn phah hle.

CHHAMHLA (POETRY) :

Chhamhla (Poetry) thluk nei lo hmasawn dan kan thlur dawn a, kum 1920 chhova Kristian hla thar leh a phuahtute i lo en ila. Tin, Ramthartih mai leh Kaihlek hlate pawh ilo thlir teh ang.

Zosapthara khan hun hmasaah khan bul a lo tan a, Awithangpa leh Thanga hla thenkhat pawh bul tanna tha tak an ni. Anni meichher lo buatsaih hi Liangkhaia (1884-1979) chuan Hun Laihawl tirte-ah hian a lo dep kai a, chuta tang chuan vawin thlengin mit lovin a alh zual zel a ni, kum 1922 khan R. Dala sunna hla’ chu a phuah a, Mizo kutchhuak Chhamhla puitling hmasa bera chhal ngam a ni. Ani hian Chhamhla 10 lai a lo phuah a, a tam zawk hi Sunna hla (Elegy) a ni. Heng a Sunna hlate hi a tam lam leh a ril lam chhut chuan ‘Father of Mizo Elegian’ tia chhal ngam a ni mai awm e.

Hrawva (Rolala: 1893-1956) kum 1920-24 chhovah hlahril a lo phuah tawh a, Chhamhla 9 ngawt a phuah niin a lang. Heng a Chhamhlate hi sei tak takte an ni hlawm a, a hla pakhat ‘Rairahtea hla’ chu chung khatah tlar thum zel awmin chang 59 laia sei a ni. R.L. Kamlala (1902-1965) pawh hian Chhamhla a lo phuah nual a, Kristian hla a phuah bakah amah ngeiin ‘ka hla chuam’ a tihte hi Chhamhla tha tak tak an ni hlawm. ‘Ka hla chuam’ a tihah hian Chhamhla 9 lai a nei a.

Biakliana (1918- 1941) Kum 1930 chho atangin a rawn lang tan a, a hla phuah leh lehlin hi a vaiin 33 vel hmuh tur a awm (Laltluangliana Khiangte: Biakliana Robawm). Heng zinga hla 10 lai hi chu Chhamhla fir an ni. A hlaahte hian rhyme scheme pawh a hmang ve nghe nghe. Tin, Kaphleia (1910-1940) pawh khan hla 5 vel chu a nei ve bawk. Kum 1936 khan Nuchhungi Renthlei (1914-2006) chuan tun thlenga lar ta em em Arpa hla’, ‘Ui note hla’ leh ‘Zinga ni eng’ te a lo phuah a.Kum 1950 hma lam hret atang khan Zikpuii Pa (K.C Lalvunga: 1929-1994) khan Chhamhla a lo phuah tan a, 1949-1952 chhung ringawt pawhin Chhamhla 10 a phuah hman der a ni. A hnu-ah hian Ngurchhawna, Rokunga leh mi dangten kutchhuak an rawn nei ve bawk.

Chhamhla phuahtu (Poet)-te kutchhuak thenkhat thluk a neih avanga Chhamhlaa kan chhiar tak chiah lohte hi hun kal zelah chuan Chhamhlaah a lo chang (transform) thei dawn a, Hun Laihawla Chhamhla pawh a lo pung dawn a ni. Thluk a neih avanga Chhamhla phuahtua kan ngaih lohte hla (Song) pawh hun lokal zelah chuan Chhamhlaah a chang dawn a ni. Chuti anga Chhamhlaa chang thei hla phuahtu (Song Writer)-te chu lo thai lang zawr zawr ta ila.

Kum 1922 atanga hla phuah tan Vankhama te, a hnu deuha hla phuah tan Lalzuithanga, Laltanpuia, Lalzova, P.S Chawngthu, Romani, Liandala, Damhauhva leh mi dang te. Kum 1932-1946 chhunga Serkawn Concert an neih thinnaa hla thawhtu Lalmama, Liandala leh Chhuana leh mi dangte, kum 1960 chhoa inphuah elna hla (Satire) phuahtu F. Laltuaia leh a hnu deuha kutchhuak nei Roliana Ralte leh mi dangte an ni.

THAWNTHU PHUAH THAR (NOVEL) :

Kum 1936 khan L. Biakliana (1918-1941) chuan thawnthu phuah thar ( Novel)  ‘Hawilopari’ tih chu a rawn ziak ta hlawl mai, hei hi Mizo thawnthu phuah thar hmasa ber a ni. A hnu kum 1937-ah ‘Lali’ chu Mizo thawnthu tawi (Short story) hmasa ber ni turin a ziak leh bawk, kum 1963 khan mipui chhiar theiha chhut chhuah a ni nge nge. Kaphleia chuan kum 1938-1939 khan ‘Chhingpuii’ a ziak bawk. Lalzuithanga (1916-1950) a lo lang vea ani hian thawnthu puitling pahnih ‘Thlahrang’ tih leh ‘Phira leh Ngurthanpari’ a ziak a, thawnthu tawi 16 teh meuh a ziak bawk.

Kum 1945 khan  C. Thuamluaia (1922-1959) chuan ‘Eng tin awm ta zel ang maw?’ tih a lo ziak a, thawnthu tawi pahnih ‘Sialton Official’ leh ‘Leitlang ding di’ tih a ziak bawk. Kum 1950-ah Burma ram atangin Capt C. Khuma’n ‘Maymyo Sanapui’ a rawn chhuah a, hei hi Mizo thawnthu a bua chhuak hmasa ber a ni. Thawnthu tawi 5 lai a ziak bawk. K.C. Lalvunga pawhin ‘C.C Coy No. 27’ (1963) leh ‘Nunna kawng thuampuiah’ (1986) tihte a ziak a, thawnthu tawi ‘Silvarthangi’, ‘Hostel awmtu’ leh ‘Kross bulah chuan’ (1963) tihte a ziak bawk.Heng mi 5-te bakah hian R.L Rina, (Lungtiawi leh Parchuailovi: 1961), Rev. Zokima (Pathian Samsuih: 1970)-te leh mi dangte an rawn inlar hman.

THUSEP (ESSAY) :

Kum 1938 a rawn nih meuh chuan Mizo Thusep puitling hmasa ber nia ngaih Thlirtu’ tih chu Kaphleia’n a rawn ziak ta hlawl mai. ‘Ui’ leh ‘Kurtai’ tih a ziak bawk. Kum 1945 chhovah C. Thuamluaia’n ‘Zoram Nipui te, ‘Pu Hanga leilet vengte, ‘Kan nun kuarei an chang tur hi’ tihte leh thuziak dang dang a rawn nei a.Tin Zairema pawhin kum 1940-1950 vel atangin M.Z.P chanchinbu-ah thuziak a nei tan a, ‘Ka pa ka ei zo vek dawn e aw’, ‘Neuh neuh’, ‘Dul pen’ leh ‘A no ber mai no ber mai’ tihte chu a thusep lar zualte an ni.

Kum 1950 vel khan thusep hi Zikpuii Pa pawh in a ziak tan a, ‘Zoram rilrui’ (1952), Thian’ (1954), Ka tiang kha (1954) tihte chu belhchian a dawl hle. ‘Mang n Mang’ tih leh ‘Thanpuii Pa’ tih hming lem pu thin J.Malsawma pawhin 1950 ah chanchinbu-ah a thuziak a chhuah tan a, thusep tha tak tak ‘Harsatna’ (1950), ‘Kan mizia’ (1960), ‘Mihuaisen’ leh ‘Fur khawhnawm’ tihte chu a ngaihnawm hle.

Heng bakah, Hrawva, Ch. Pasena, Rokunga Theiriat te, a hnu deuhvah Sangliana, Laltlankima, Sangzuala Pa (Dengchhuana), Lalhmingliana Saiawi leh James Lianmawiate pawh an rawn inlar a, sawi vek sen erawh an ni lo. Chanchinbu hrang hrangah Thusep chi hrang hrang hmuh tur a awm chho mawlh mawlha nakin zela chai la hlawh tur ril tak tak he hun chhung hian a piang a ni.

LEMCHAN (DRAMA) :

Lemchan hi hun laihawl chhung hian a thang  hle, kum 1912 vela an lo chin tan tawh kha kum 1925 chhovah Ch. Pasena khan a rawn thar thawh leh , ‘Heroda chawimawina’ ( 1925), Sailoka (1926), Fapa tlan bo (1927), ‘Tinreng daih khawl (1928), Ransa Khawmpui (1929), leh Khualbuk mi a leh Rorelna (1933) tih Lemchante a rawn huaihawt a. Mizo Lemchan lama sul lo su hmasatu a nia Lemchan than chhoh zel nana mi dangte cho phurtu a ni bawk. Kum 1935 ah Lalkailuia’n Mizo nunhlui tarlang zawngin tha a rawn thawh ve leh a. Drill Shed (A.R Cinema Hall) hmunah ‘Tualvungi leh Zawlpala’ (1935), ‘Liandova te unau’ (1935), leh ‘Puithiam leh salu lam’ (1937) tih Lemchan a rawn huaihawt ve leh a. Ch. Pasena leh Lalkailuiate Lemchan hi ziaka vawn a ni lo va, a tla chawpa sawi belh leh chan nghal zel a ni a, a huaihawttute hi an pawimawh hle.

Kum 1934 atangin Chawngzika’n ‘Krista Palai’ tih Lemchan kalhmang fel takin a rawn remkhawm a, ziakin a dah nghal bawk a. ‘Hausakna nun dik tak’ (1932),‘Princess Pacahontas’ (1940), ‘Lal fanu leh vawkpui’ tih leh  Lemchan dang a ziak bawk. Kum 1940-a Lemchana inelna huaihawt a nih khan Lemchan thawnthu a pian tam phahin he lama mi inhmang pawh an pun phah hle. He Lemchan intihsiaknain a vawrh chhuahte zinga mi chhuanawm tak, a hnu zela Lemchan ziak chhunzawm zel chu Lalzuithanga hi a ni a. Hemi tuma a ziah Kulikawn Y.L.A chan  ‘The Black corner of Aijal in 1999’ tih leh Lemchan dang ‘Horrible’(1941), ‘Westerners’ (1941), ‘Hawaiian Fantacy’ tih leh a dangte a ziak bawk.

Biakliana huaihawtin Saitual tlangvalho khan hemi hunlai hian  Lemchan an lo tui pui hle tawh a. Lalmama leh a thiante huaihawtin chhim lamah Serkawn Sikul naupang ten Lemchan an lo tuipui hle tawh bawk. Tin, mi dang Lemchan lo buaipui tawk an awm thei tho awm e. Kum 1944 kha Mizorama chanchin tha lo thlen kum 50-na a ni a. A hma pawha Lemchan lo buaipui tawh Zosiami Pa (Samuel Davies) chuan he hun lawm nana chan tur ‘Thuhriltu’ tih Lemchan a ziak a, hei hi tun thlengin hmuh theihin a la awm. Lemchan lama sul lo su hmasa Ch. Pasena, Lalkailuia leh Lalzuithangate kutchhuak kha hmu thei lo mah ila an tha thawh leh an boruak siamte kha Mizo Lemchan than chhoh zel nan a tangkai hle.

Mizo Lemchan ziaka vawn Kum 1960 ah a rawn awm chho ta a, chu mai ni loin Lemchanbu pawh a rawn chhuak ta a. Lalthangfala Sailo chuan July 12, 1959 atanga a ziah tan March 2, 1962-a a ziah zawh ‘Sangi inleng’ chu kum 1963 khan a chhuah a, Mizo Lemchan a bua chhuak hmasa ber a ni. Kum 1965-ah ‘Liandovate unau’ tih a chhuah bawk a, a hnu-ah Lemchan eng emaw zat a ziah chhunzawm zel. Lalhmuaka chuan 1965 khan ‘Lemchan Bu’ tih a rawn chhuah leh bawk a, hetah hian ama Lemchan thawnthu tawi pali lai leh Lalzamliana leh RK. Dingliana ziah pakhat ve ve a awm bawk. Lalhmuaka hian Lemchan Bu-a a dah ‘Lo kir leh mai rawh’, ‘Ranthleng mak’, ‘A ni mai thei’, bakah hian Lemchan dang a ziak nual bawk.

THUTLUANG (PROSE)

Chanchinbu hrang hrangah thutluang hi hmuh tur a tam  hle a, chu lam chu thlir vak lovin thutluanga ziah lehkhabu chhuak lam lo thlir thuak ila.  Kum 1938 khan Tarmita (J. Shakespear) mak tih khawpin Rev. Liangkhaia ziak ‘Mizo chanchin I’ chu a rawn chhuak hlawl mai. Ani hian Bible hrilhfiahna chi hrang a chhuah bakah thutluang ziah lamah kutchhuak a ngah hle a, bu 10 vel kutchhuak a nei hial awm e. Kum 1953-a LR. Sailo ziah Awithang Pa te, H.K. Bawichhuaka ziahNundan’ (1954) te, Selthuama ziah ‘Saikuti’ (1964) te, Pastor Challiana’n ‘PiPu nun’ (1969) a ziah te, Kum 1969 veka C. Saizawna ziah ‘Pipute tawng kauchheh leh thurochhiahte’ chu a chhuak lar zual deuh an ni. Heng lehkhabu lo pawh chhuak chu a awm tho awm e.

He hun chhung hian Thutluanga ziak Lehkhabu hi a chhuak tam ber a, Lehkhabu 35 (1970 kuma chhuak chhiar telin) chhuak zingah Mizo Thawnthu 1, Thawnthu (Novel) 1, Lemchan bu 3, Hla chuanna bu 6, Mi chanchin ziahna bu 2-te a awm a, a bak zawng chu Thutluanga ziak lehkhabu a ni. Lehkhabu 35 zingah hian Rev. Liangkhaia ziah bu 9 lai a awm.

III.TUNLAI HUN (1970- 2000)

Tunlai hun hun kal mek ah hian Mizo thuhlaril hian hma a sawn hle a, lehkhabu chi hrang hrang a chhuak hnem hle a Hei hi chhut khawl lam lo changtlun vang leh zirchikmite hai chhuah vang pawh a ni thei ang. Kum 1972-ah Mizoram chu U.T-a hlan kai a lo ni a, kum 1986-ah State puitling-ah hlan kai a lo ni ta bawk a, hei vang hian sum leng vel a lo tam ta a, lehkhabu chhuah (published) kawnga mi inphal an lo pung chho ve zel a. Mizoram Publication Board a lo din tak chinah phei lehkhabu chi hrang hrang a kum telin a pung telh telh a ni. Tin, ‘Mizo Academy of Letters’ chuan kum 1989 atang khan kum khat chhunga lehkhabu chhuak zinga a tha ber ‘Book of the Year’ a thlang thin bawk a, thu leh hla ziakmite cho phurna tha tak leh thu leh hla tithanga tihmasawntu a

Kum 1970 chhova lehkha ziak a uar tan, a lehkhabu chhuak hmasate hi Thutluang (prose) a ni hlawm a, a hnuah Thawnthu (Novel) ‘Thlahleinga zan’ (1977), ‘Tumpangchal nge Saithangpuii’ (1981), ‘Silaimu ngaihawm’ (1992) leh ‘Khawhar in’ tihte a rawn ziak a. Ani bakah hian Lalengmawia Ralte khan ‘I tan a tawk’ (1980), ‘Beidawn mai lohah’ (1981), ‘A sawt tawh lo’ (1981), ‘Eternal bliss’ (1985), ‘Honey Moon’ (1985), ‘Never leave me alone’ (1987)-te a rawn ziak ve bawk a. Tin, Khawlkungi pawhin Thawnthu bu 25 chuang lai a ziak.

C. Laizawna a rawn lang ve leh a, ani hian Thawnthu mai ni lo Lemchan leh Thutluang lamah pawh sulhnu a nei tha hle a, a hming chherna ber erawh chu Thawnthu phuah lamah a ni thung. A thawnthu ziahte chu ‘Hmangaihzuali’ (1990), ‘Zizy Phus’ (1990), ‘Ka phal lo’ (1991), ‘K.S min ti maw’ (1992), ‘Ka thlang zawk’ (1993) leh ‘Anita’ (1998)-te an ni, heng zingah hian Hmangaihzuali tih leh Anita tih phei chu M.A.L-in Book of The Year-ah kum 1990 leh 1999-ahte a thlang nghe nghe. Tin, H. Lallungmuana pawhin Kum 1995-a Book of the year– a an thlan tak ‘Ram leh i tan chauh’ tih a ziak bawk.Thawnthu ziakmi tam tak an awm a, anni bakah hian, Chhamhla leh Lemchante aiin mipui ngainat leh chhiar a hlawh zawk avangin thawnthu bu leh a ziaktu an pung nasa hlea sawi vek sen erawh an ni lo.

Thusep (Essay)

James Dokhuma bawk hian thusep ah bul a tan a, ‘Ka mitthla mai a ni lo’ (1975), ‘Mihring nih chu Vanduaina’ (1976), ‘Zan’, ‘Ka thuhretu’ (1976), ‘Lungawina’ (1976)-te leh a dangte a rawn chhawp chhuak a. A tawngkau chheh a hausa em ema a ngaihnawmin chhiar a manhla hle.Kum 1978 atang khan Siamkima’n Thusep tha tak tak a rawn ziak chho a, a Thusep thenkhatte chu a lehkhabu ‘Zalenna Ram’ tihah a chuang nghe nghe. Darchhawna pawhin ‘Buaina’ (1979), ‘A der’ (1980) leh a dang chhiar manhla tak tak a rawn chhawp chhuak bawk.

Thusep chi hrang hrang a pung nasa hle a, Thawnthu phuah thar ang tho khan chhiar a hlawh hle. Thusep ziaktu langsar tak tak Dr. R.L. Thanmawia, Dr. Laltluangliana Khiangte, Thuamtea Khawlhring, Vanneihtluanga leh mi dang tha hnem tak ten kutchhuak an rawn nei chho ve zel a, he hun chhung hian Thusep a pung nasa em em a ni.

Chhamhla (Poetry)

Tunlai hun ah hian  Chhamhla a bu meuha tichhuak thei an awm nuala, Kum 1989 khan C. Lalkhawliana chuan Mizo Chhamhla bu hmasa ber ni turin ‘Taitesena / Ralthatchhunga’ tih chu a chhuah a. A kum thumnaah 1992  khan Lalzuahliana chuan Lungmawl Selin’ tih a chhuah bawk. Zikpuii Pa khan Hun Laihawl (1920-1970) huna a lo phuah tawh a Chhamhlate chu ‘Zozam Par’ tiin kum 1993 khan a chhuah a. James Dokhuma pawhin kum 1996-ah ‘Ka Thinlung Luangliam’ tih a chhuah ve bawk.

Mizo zinga Chhamhla phuah tam lamah a el pha tur an awm lo hial ang tih theih khawpin Capt. L.Z. Sailo chuan kutchhuak a nei tam a, ‘Awmhar Suihlunglen’ chu kum 1997 khan a chhuah bawk. Heng Chhamhlabute bakah hian ‘Senmei’ (R.L. Thanmawia: 1997),Chawlhna Tuikam’ (Mafaa Hauhnar: 1997)te leh midang an  awm bawk. Hun Laihawla Chhamhla lo phuah tawh R.L. Kamlala, Biakliana, Liangkhaia, Hrawva, Kaphleiate leh mi dang kutchhuak hmuh theihin chhawp chhuah a lo ni ta bawk a.

Lemchan (Drama)

Lalsiamthanga kutchhuak Kum 1970 atangin (Pa awkhrawl leh Ukil hlawhtling) hmuh tur a lo awm tan a, James Dokhuma’n ‘Tumna a awm chuan a hlawh tling thin’ (1976), ‘Hmasawnna’ (1978), ‘Hausakna aiin hriselna a hlu zawk’ (1978), ‘Finna hmahruai’ (1980) tih a rawn chhawp chhuak bawk.K. Saibela pawhin ‘Chhura leh Naa’ tihte ‘Thu a tawp e lumam’ (1980) tihte kutchhuak a nei bawk. Kum 1959 atanga Lemchan lo ziak tan tawk Khawlkungi pawhin ‘Zawlpala thlantlangah’, ‘Pangpar bawm’, ‘A va pawi em’, ‘Monu sual’ (1980) leh Lemchan tawi thahnem tak kutchhuak a nei bawk. Liansailova pawhin ‘Tlai ngai lo Pathian’ (1985), ‘Duaia duai bik lo’ (1988) tih leh Lemchan dang kutchhuak a nei ve bawk.

Lemchan lama thiamna nei Laltluangliana Khiangte kutchhuak kan hmu tan a, ani hi he lama thiamna  filawr a neih ang takin a Lemchante hian belhchian an dawl hle. Lemchan puitling leh Lemchan tawi eng emaw zat a nei a, a hming chherna chu Pasaltha Khuangchera’ (1997), ‘Thawmvunga’ (1990), ‘Lalnu Ropuiliani’ (1990) te an ni a, ‘Pasaltha Khuangchera’ tih phei hi chuan kum 1997 khan Book of the year a dawng a, Lemchan bu chawimawina sang dawng hmasa ber a ni. thangthar Lemchan ziah thiam tak pakhat he huna lo chhuak chu Lalchungnunga a ni a, a Lemchan ‘Salam’ leh ‘Darlalpuii’ tihte chu zirna in sanga zir leh chai laih laih a ni.

Anni  bak ah hian  ziaktu dang tam tak an awm bawk a. He hunah hian Lemchan a han nasat em avangin tarlan vek sen an ni lovang. Tunlui Hun chhung hian Lemchan hian hma a sawn hle.

An chanchin kan tarlan loh midang tam tak, ziakmi leh hla phuahtu an awm a, chhung zingah chuan L.Keivom te, R.K.Lalhluna te, Lalzuia Colney te, R.Lalrawna te, C.Lianmawia te, C.Lalsiamthanga te, Lalsiama te, Lalchungnunga te,  Daichuailova Renthlei te, Vanneihtluanga te, Darchhawna te, P.L.Liandinga te, Zirsangzela te, H.Lalrinfela te, C.Lalnunchanga te hi thangtharte hunah hian an lar hle a ni.

Heng ho hi tun tuma, Mizo thu leh hla, thlur lian tak tak pathum – Chhamhla, Lemchan leh Thawnthu a Mizo Literature lo tan chhoh dan tawi thei ang bera kan zirna chu a ni e.

 

Biakrawnte:

1.Khiangte,Dr. Laltluangliana: Thuhlaril (Literary Trends & History of Mizo Literature), College Text Book (Mizo) Editorial Board  Publications, Aizawl, Chhut li-na 2006.

2.Khiangte,Dr.Laltluangliana: Mizo thuziak thlan chhuahte, LTL Publication Chhut hnihna 2001.

3.Lalthangliana, B:  Mizo Literature (Mizo Thu leh Hla), M.C. Lalrinthanga, Aizawl Chhut hnihna,2004.

4.Lalthangliana,B:  Mizo hla leh a phuahtute, Hrangbana College,    Aizawl, Chhut khatna, 1999.

5.Kristian Tlangau Magazine (Centenary Special Issue) 2011.

6.Lalauva, R :  Mizorama mi bikte chanchin,Chhuahtu R. Lalauva Chhut      khatna 2010.

7.Chawngchhuma,CS, Journalist.

8.Khiangte, Dr. Laltluangliana : Biakliana Robawm, L.T.L. Publications, Aizawl, Chhut hnihna, 2007.

Leave a Reply

Your email address will not be published. Required fields are marked *

error: Content is protected !!