Mizo tawng grammar lehkhabu hmasate – R.Lallianzuala – Mizo literature

(He paper hi ‘Full Day International Seminar on Mizo Language Dt 10/8/2018 at PUC Seminar Hall a chhiar niin St. Xavier College buatsaih Mizo Society of America te sponsored a ni)

Mizo Ṭawng Grammar Lehkhabu Hmasate Thlirna

-R.Lallianzuala

Ṭawng zirna ‘Linguistics’ ah hian peng tam tak a awm a. Chung zinga ṭhenkhatte chu Etymology, Lexicography, Morphology, Philology, Phonology, Grammar, Phonetics, Semantics, Stylistics leh a dang eng emaw zatte an ni a. Heta ṭang hian Grammar chu ṭawng zirnaa peng pakhat mai a ni tih kan hre thei a. Ṭawng dik inzirtirna hi grammar-ah a chhung khung vek theih loh tih a chiang. Mizo ṭawnga kan ziaktu hmasate chuan Grammar bu an ziakin khing kan tarlan peng hrang hrangte khi an hawl kim vek lem lo. Chutih laiin an grammar bu ziakah Idioms & Phrases erawh an telh deuh zel thung. Englekhawle, a bu chhung thu-te chu eng pawh lo ni se, taima taka Grammar bu Mizo ṭawnga an lo buatsaih kha an fakawm em em a ni.

Grammar hi ṭawng zirnaa tel lo thei lo a ni a. English emaw, Hindi emaw, Mizo subject emaw-ah pawh grammar hi inzirtir tel a ṭul zel a. Mizorama School zirlaia hman tur Grammar bu hmasate chu Education Department-a Committee sangin a ziaktu tura a ruatten an ziak mai ṭhin. Chungho kut chhuak ni lo, mi mal ziak Grammar bu hrang hrangte kan tarlang den den dawn a ni.

Sl. No Lehkhabu Hming Ziaktu Chut ṭan Phek
1 Mizo Ṭawng Grammar K.Zawla 1969 160
2 Lusei Grammar R.Buchhawna Khiangte 1971 128
3 Zo Ṭawng leh Sap Ṭawng Grammar C.Z. Huala 1977 64
4 Mizo Grammar Thar Remkunga 1978 136
5 Mizo Ṭawng Grammar Rev. Z.T. Sangkhuma 2009 800
6 Mizo Ṭawng Grammar & Composition Lalzarzova Khiangte 2016 113

Heng bakah hian Mizo ṭawng hman dan dik zirna atana ṭangkai lehkhabu engemaw zat ziak a ni tawh bawk a. A zawng a zain tarlang thei lo mah ila tlem azawng han ziak chhuak ila.

Sl. No Lehkhabu Hming Ziaktu Chut ṭan Phek
1 Zirlai Puitu Selet Thanga 1960 128
2 Mizo Ṭawng Zirtir Dan Dr. Lalliani Raltea 1991 300
3 Mizo Ṭawng Chikna Ralluaii Chhangte 2001 312
4 Mizo Ṭawng Puitu Er. V. Rodingliana 2004 243
5 Zoṭawng Formula Rev. Z.T. Sangkhuma 2005 104
6 Mizo Ṭawng Kalphung James Dokhuma 2006 236

Chhut khatna theuhva a bu ziaktuten Thuhmahruai an ziak te hi a pawimawh lai chauh i han tar lang dawn teh ang.

 1.K. Zawla ziak 1969:

Mizo Grammar hi kan hnam ṭhan dan ngaihtuah chuan, nei daih tawh awm kan ni a; mahse tuman an la buatsaih loh avang leh ṭula kan hriat vangin, thei leh thei lovin ka buatsaih ta a; ka ngaihtuah rei deuh deuh va, a harsatzia ka hmu chhuak ta a; vawi khat phei chu ka ṭhulh leh titih deuh va.

Mahse Rev. Zairema leh Pu Bawnthangan, “A tirah chuan tih ṭhat nghal mai chu thil harsa a ni ang a, chhut nawn leh hunah a famkim lo lai leh a dik tawk lohna laite chu siam ṭhat leh a ni ang chu. Sapho pawhin an grammar hi a tirah chuan, tuna mi ang hi an nei hauh lo vang; vawi eng emaw zat en nawn hnu a ni tawh ngei ang. Chuvangin i theih ang tawk chu ziak la, i chhuah phawt mai teh ang,” an tih avangin ka thiam ang tawk, beitham tak chu ka lo chhuah ngam ta a ni.

Tin, he grammar bu-ah hian tih dik loh leh tih famkim loh a awm tih hre reng chungin, chhut nawn leha tih ṭhat nan (a bul ṭan nan) ka ziak peih tawk leh thiam tawk chu ka han chhuah ta a ni. Ziak dik loh belhchhah tur hria apiangin min rawn hriattir thei ula, chhut nawn leh huna belhchhah leh dik zawka siam nan, a lawmawm ngawt ang.

Tin, mi ṭhenkhat chuan Mizo grammar chu Mizo ṭawng ngan hlak, ṭawng dang tel miah lo ni se in duh tih pawh ka hria a; chu chu thil awm tak pawh a ni reng a. Amaherawhchu chutiang chuan lo siam ta ila, a hming ngawt pawh chu rei fe zir a ṭul leh dawn a. Hming awmsa: noun, adjective leh a dangte hi hmang ve mai ila, a ṭha thovin ka hria a, hnam dang kan aia changkang zawk pawhin an ṭawm ve tho bawk a; a rem lohna awmin ka ring bik lo va: Council, committee, court, boycott, curfew, helicopter tih kan ṭawm nghal mai pawh hi ṭhat lohna awmin ka hre lo va. Chuvangin noun, adjective & etc ka hmang ve ta zel a ni a.

Tin, he grammar bu aṭang hian Mizo ṭawng ngaisangtute leh tihchangkan duhtute chuan, ṭan an lak a, Zoṭawng mawi leh dik zawka ṭawng dante an hmuchhuah theih leh hla phuahtute pawhin Mizo hla kalhmang mawi leh nalh zawk chhiar ngawt pawha rilru khawih theia hla phuah theih phah ka beisei fawm bawk a ni.

Tin, chhiartuten he Grammar bu hi ka chhuan lohzia leh ṭul avanga siam chauh ka ni tih min hriatpui ula ka duh a ni.

2.R. Buchhawna ziak 1971
Kum 15 vel a ni ta, Lusei Grammar hi ziak ka tum a. Mahse ka han en velin Mizo Text Book Committee-in ziaktu tur a lo ruat tawh tih ka hria a, chuvangin ka ti ta lo va. Mahse tun thleng hian ziak a la awm ta rih lo. Tunah Shillong-a Mizo High School Headmaster leh Lushai zirtirtuten ziak mai turin min rawn a, kumin 1971 School ṭan thara hman nghal an duh a. Chutichuan ka han bei ta chuk chuk a ni.

Grammar danin ṭawng hi kan la ngaihtuah chik lo hle a, ngaihtuah ngai a awm nual ang. Entir nan, tunhmaa Double Adverb (adverb thuah) kan lo tih ṭhin kha han sawi ila. Headmaster-te leh Lusei zirtirtu ṭhenkhatte nena kan han enin Adjective nih nen kawp Adverb thu pakhat ni berin kan ngai. Adjectival Adverb tiin kan dah ta a. Chuti angin thu ziak zawm leh zawm loh tur tihte pawh hi Grammar-a Part of Speech kal dana ngaihtuah a ngai tih a lang.

Hmanhmawh thil a nih avangin duhthu a sam lo viau ang a. Lusei zirtirtuten an han hmang ang a, dik lo emaw, belh tur emaw, tihdanglam ngai emaw te mi lo chhinchhiah sakin chhut leha hman atan mi rawn hrilh zel turin ka sawm a che u.

3.C.Z. Huala ziak 1977

Kum 50 lai Zo ṭawng leh Sap ṭawng ka zirtir hnuah he Grammar Bu te tak te hi ka lo buatsaih ta a. Grammar thu chu mawl tak leh fing taka sawi ka tum a. Pawl VI aṭanga Pawl X thlengin chhiar sela, Grammar kalhmang an hriat phah ka beisei.

Tun lai Zirtir Dan Tharah chuan Grammar hian ṭawng zirnaah pawimawhna nei lo hialin an sawi ṭhin a, “Kan ṭawng pawhin Grammar eng nge a nih kan hre lo va, kan ṭawng thei tho alawm,” an ti ṭhin. Hei hian dikna thui tak a nei a. Ṭawng zir dan ṭha ber chu, Direct Method an tih anga hman chawp zel hi a ni. Mahse Sap zinga cheng kan nih si loh chuan hei hi a tih theih loh. Hnam dang ṭawng kan zir tak tak dawn chuan, an ṭawng kalhmang Grammar tlem tal kan hriat loh chuan a harsa em em a ni. Sap ṭawng lek phei hi chu kan ṭawng nen a inang lo lutuk a, a inletling vek tih mai tur a ni. Chuvangin Grammar tlem tal thiam loh chuan vuah dik theih a ni lo.

He bu te tak teah hian, Tense hman dan te ka theih angin hrilhfiah ka tum a. Tense hi Pawl sangho pawhin an hre fuh thei lo va, chuvangin Sap ṭawng an ziak dik thei lo va. Chung dan a dang pawimawh zual nia ka hriat apiang ka la khawm a, chhiar la, mawl tak leh fiah taka hrilhfiah an ni a. Awl takin Grammar thu tlangpui chu i hre nghal mai ang.

He bu te tak te hian Zirtute ṭanpui theihna tlem tal a neih theih chuan ka lawmna her a ni ang.

 4.Remkunga ziak 1978

He lehkhabu te tak te, Mizo Grammar Thar hi tun laia Grammar zir dan ṭha ber leh ṭangkai bera an ngaih “Functional Grammar” ang chia siam a ni a, hei hian ṭawng hman dan dik leh ziak dan dik, thu hrang hrang dik taka hman dan dik leh ziak dan dik, thu hrang hrang dik taka hman dan leh thu pakhat pawh kawng hrang hranga hman a nih huna a dinhmun leh dik taka ziak dan tur mi a kawhhmuh a. Chuvangin zirlaite tan Mizo ṭawng hmang dik tur leh ziak dik tura a ṭanpui ka beisei e.

Tun lai hian mi tam tak chuan kan ṭawng mawi tak hi kan hmang dik lovin kan ziak dik lo nasa em em ṭhin a. Kan hriat theih hram hram ṭhin avangin kan lungawi mai a, mahse ṭhangthar lo la awm zel tur te pawhina he kan Mizo ṭawng hi awmze nei taka an rawn hman thiam theih zelna turin keini tuna hmangtute hian awmze nei leh dik taka kan hman a ṭul a. Chu chauh ni lovin kan ṭawng hi kan tihhauhsak zual zela, kan tihhmasawn (develop) zel a ngai a. Chu chu tunlaia khawvel hnam tin intlansiakna chi khat a ni.

Tuna kan ziak dan hman mek hi a ṭha tawk chiah lo a ni thei e, mahse siam ṭha tur chuan nasa taka beih a ngai dawn a. Tuna kan hman lai hi zawm thiam tlang turin ṭan la ta ila, kawnghmang hre tura naupangte kan kaihhruai chuan awmze nei tak leh dik leh chhiar nuam takin kan ziak thei ang.

He lehkhabu hian High School leh College zirlaite, Teachers’ Training Institute-a trainee-te, zirtirtute leh mi dangte pawh Mizo ṭawng ziak dan leh hman danah eng emaw chen chu a ṭanpui ngei ka beisei a ni.

5.Rev. Z.T. Sangkhuma ziak 2009

Mite anga sikula pawl indawta zir dan pangngaia zir ve lo nafam chuan, Mizo ṭawng Grammar te chu thiam tak tak ngaihna a awm lo ni berin ka hria a. Mahse ka nun ka thlir kirin, a tira ka hriat thiam phak lohvin Mizo ṭawng Grammar lama mi kaihhruaitu chu a awmin ka hria. Chhuan tlak ni lo mah se pawimawh riau dan a awm a, i han sawi mai teh ang.

A hmasa ber chu, Khawbung Private Middle Schoola Headmaster Pu Hrangtawna a ni. Pawl IV leh Pawl V chu Private-in kan zo ta a ni. Headmaster chuan Grammar a man viau va, Grammar kalhmang min hriattirtu a ni. Chumi hnuah Pawl VI chu Sialhawk Middle Sikula lutin ka zo ve leh ta a ni.

Hun a lo kal zel a. Private bawkin Matric ka zir lch a. Chutah pawh chuan Khawbung Middle Sikula ka zirna chu ka chhawr zel a. Matric ka zawh hnuin Pathian thu ka zir a, kan Subject pakhat chu Grik ṭawng a ni a, Grammar zir nan a ṭangkai hle. Chuta Mizo Subject-a Grammar min zirtirtu chu Pu C.Z. Huala a ni a. Ani chu Grammar thiam tak a ni. L.Th. ka zir hian Grammar lamah keimah vckah chuan hma min sawntir hle. Ka thiam tihna erawh a ni lo.

Pastor-a kum 10 chhung ka thawh hnuah Synod Publication Board chuan, kan ram lch hnam tana pawimawh nia ngaiin, ‘Zoṭawng Grammar bu’ siam ni rawh se tih a pass a. Siamtu tur mi thiam a thlang chhuak a, Convener-ah min ruat a. Kan beisei ang chuan kan siam zo va, a bua chhuah a ni nghe nghe. Chu chuan hma min sawntir hle a ni. Chumi hnuah, Mizo ṭawng chu MAL lam aṭang pawhin kan luhchilh chho zel a. Chu chuan min titui zel a, keimahin ka bei leh a. 2005 kum khan, Zoṭawng Formula a buin ka chhuah thei ta nghe nghe a; chungte chuan hma min sawntir zel a. Tichuan, 2005 kum tir lam aṭang chuan Mizo ṭawng Grammar bupui hi ka ziak a. K.Zawla Grammar bu leh R. Buchhawna Grammar bu ten min ṭanpui hle. Tuna kan hmuh ang hian a bupui chu kan hmu thei ta a. Min kaihruaitute chungah ka lawm hle a ni.

He Mizo ṭawng Grammar bu hi miten leiin zir se, Mizo ṭawng hriatna leh thiamna lamah hma sawn se tih chu, ziaktu duhthusam a ni e.

6.Lalzarzova Khiangte ziak 2016

Mi hrang hrang buatsaih Mizo ṭawng grammar bu kan nei ve ta nual a; mahse, dik tawk lo lch kimchang tawk lo a awma ka hriat avangin ṭhanemngaih thilah he lehkhabu hi ka han buatsaih ve ta chawr mai a ni. Mahni thua thutlukna siam mai ngam loh deuh chang leh chian tawk loh ka neih changin kan ṭhianpa Lalrinpuia Ralte (Mapuia) ka rawn ṭhin a; ani’n min ṭanpui peih a, a chungah ka lawm tak zet a ni.

Hetia ṭhahnemngaih thila grammar bu ka han buatsaih ve takah chuan mahni insit a nain, keia kutchhuak pawh hi a phuailuai ang tih chu ka ring. Tihdik tawk loh leh tihhmaih ka neih pawhin ralkhat aṭanga insel mai lovin a dik zawk min hrilh u la, ka lawm hle ang.

Eng pawh ni se, he ka kutchhuak tlawm tak hian zirlaite tan lch Mizo ṭawng tihhmasawn nan ṭangkaina a neih chuan ka lawm hle ang.

Kan han tarlan tak lehkhabu hrang hrangte bakah hian Mizo ṭawng chungchang leh ṭawng hman dan dik chungchang Zoṭawnga ziah lehkhabu eng emw zat a la awm a. Chung lehkhabu ziaktuten Thuhmahruai an ziah leh an lehkhabu chhunga thu chuangte han tarlang leh den den ila.

1.MIZO AWNG ZIRTIR DAN (1991) Ziaktu : Lalliani Ralte

Mizo Ṭawng Zirtir Dan hi NEHU B.Ed Course-a Method subject zingah zirlai tam berin an thlan ṭhin a ni a. Chutih laiin Mizo ṭawng zirtir dan kaihhruaina bu mumal takin kan la nei lova. He lehkhabu hi B.Ed zirlaite mamawh phuhruk nana siam, NEHU B.Ed Course (Teaching Specialisation Indian Languages) Syllabus zulzuia buatsaih a ni.

Kan mother-tongue, Mizoramah chuan Mizo ṭawng hi Primary school aṭangin High School thlengin kan inzirtirin kan zirlai tam berte pawh hian an zir deuh vek mai a. Mahse an zir rei ngaihtuahin leh keimahni hnam ṭawng ngei ni bawk si, chuti takin kan thiam lem lova, school-a zir ve lote aiin ṭawngkam hman danah phei chuan kan thiam bikna pawh a lang chuang lo emaw tih tur a ni mai thei. High school naupang tam tak thleng hian lehkha chhiar dan dik tak leh ngaihthlak nuam taka chhiar thiam lo pawh an la tam mai. Thu phuah dan chi hrang hrangah pawh zir sang vak lote kan khum chuang lo hlein a lang.

Tun lai phei chuan College-ah pawh Mizo ṭawng an la zir zel a, hetiang ni chung si hian kan zirlai tam takte High school leh College-ah pawh zir zo vek tawhte ṭawng dan leh thu ziak tam tak thlirin hma kan sawn tur angin hmasawnna hmuh tur a tam lo a ni. A chhan ṭhenkhat ni thei awma lang chu mi tam tak chuan mahni hnam ṭawng (mother-tongue) ngaihhlut nachang kan hre lo a ni mai thei. Tin, mother-tongue kan zirtir hian a thil tum (aims & objectives) lam kan ngaihtuah tawk lova, school-a Mizo zirtirtu tam tak chuan an ngainep deuh hial a ni mai thei. Hnam fing apiangin mahni ṭawng ngaihhlut nachang an hria a, Mizote pawh hian kan ṭawng hi kan ngaihluin kan vawnhim a ngai a ni. Zinirtuin a zirtir danah te, zirtuin a zir danah leh zawhna siamtuten an siam dan thleng hian Mizo ṭawng zir chhan/ a goal thleng tura ṭan lak ṭhat a ṭul hle a ni.

He lehkhabu hi duhthusam tling rih lo mah se, Mizo ṭawng zirtirna kawngah kaihhruaina ṭha tak a nih ve ngei ka beiseiin B.Ed zirlaite tan phei chuan ṭanpuitu ṭangkai tak a nih ngei ka ring tlat a ni.

2.MIZO AWNG CHIKNA (2001) Ziaktu : Ralluaii Chhangte

Ṭawng lampang hi ka tuina a nih avangin college ka kal lai aṭangin Sapṭawng hi ka subject thlur bik (major field) a ni a. Sap sikula ka kal reng avangin Mizo ṭawng tak hi chu Lower Primary School 1952 a ka exam hnu chuan Matriculation 1959-a ka exam dawn kuma tlem ka zir tih mai loh chu ka zir hranpa lo va. Mahse, mahni seilenpui ṭawng (mother tongue) ni na na na chu, ṭawngkam thiam ni lo mah ila, Zoṭawng kalphung hi chu thiam ve thawkhatah ka inngai a ni.

Kum 1977 – 1979 – a Andrews University-a M.A ka zir laia linguistics subject-a ka thil zirte chuan ṭawng lampanga ka tuina a lo tisosang a. Tichuan, ṭawng lampanga ka tuina chu literature lam ai mahin linguistics leh grammar lam hi a ni zawk tih ka hre chhuak bawk a ni. Chuta ṭang chuan Mizo ṭawng hi chik takin ka ngaihtuah ṭhin a. Lehkhabu ka la ziah duh dawna ka rin avangin, ka chik chhuah zinga thil pawimawh deuh deuh nia ka hriatte chu ziak loh bu pakhatah ka chhinchhiah zel a. Tunah zirtirtu ka nihna aṭanga ka lo pension tak hnu hian, ka hunte a thawl ta deuh zawk bawk a, chung ka thil lo chhinchhiah aṭang chuan hemi lchkhabu, Mizo Ṭawng Chikna -, tih hi buatsaih puitlina chhut theihin a lo awm ta a ni.

Linguistics (Ṭawngchikna) lama M.A te, Ph. D te zo tawh Mizo zingah an awm nual a. Chungte chuan hetiang lehkhabu ziah hi chu an tlin zawk em em ang tih hre chungin, linguistics-ah hian ka tui ve em avangin, ṭul nia ka hriat hriatte chu ka theih anga ṭhain ka han ziak chhuak a ni a. Thui zawka kan ṭawng chik duhna leh chik thiam tura linguistics zir chakna mi tu tute emaw ṭhinlunga a tuh theih beiseina nen he lehkhabu hi ziah a ni.

Zirna lamah kan hnam chu kan sang chho zel a, Zoṭawnga M.A zir theih hial khawpin lehkhabu-te pawh kan ngah ve tawh a. Lehkhabu chi dang dang chu tam tawk hle mah sela, kan ṭawng chikna lehkhabu hi kan lehkhabu la mamawh berte zinga mi nia a lan avangin, he lehkhabu hian kan ṭawng chanchin kan zirna lamah Zoram mipui mi a puih bakah, a bik takin zirlaite tan ṭangkaina tak a neih ka beisei a ni. Kan ṭawng chikna lehkhabu dang pawh chhuah belh zel ni se tih beiseina sang tak nen he lehkhabu hi chhuah a ni. Lehkhabu ka chhiar aṭanga thil hrang hrang ka hriatte chu awm ve bawk mah sela, he lehkhabua thil chuang hote hi chu ka rilrua lo puak chhuak ka lawrkhawm an ni deuh ber a. Thil telh awm tam tak telh loh pawh a awm ang tih ka ring a. Tin, ka thil ziahah hian chik taka chhiartu ṭhenkhatte chuan mit tlun lohna hmun ṭhenkhat khatah in hmu ngei ang tih ka ring bawk. Chuvangin, he lehkhabu hi ennawn (revise) a nih huna thil dik lo laite tihdik leh, thil sawi hmaihte telh a lo nih a, lehkhabu ṭha zawk siam a nih theih nan, lehkhabua thil dik lo nia lang hmu emaw, sawi lan awm tak sawi hmaih hria emaw chuan, lehkhabu chhuahtu hi inthlahrung lova in hrilh theih chuan ka lawm em em ang.

REVISED EDITION

Hei Mizo Ṭawng Chikna chhuahna pawh kum riat lai a lo ni ta a. Chhut nawn a lo hun ta mai a. Chutia chhut nawn tura ka han buatsaih lai chuan chhut nawn mai ni lovin, en nawn a ṭul nia ka hriat avangin, ka theih ang angin ka han en nawn a. Tin, ka han en nawn lai hian, thil dah belh leh tihdanglam deuhte chu ka nei nual nain, a lehkhabu chul mam leh a lan dan leh remkhawm dan tihdanglam hi ka hna pui zawkah ka ngai a. Thil tihdanglam zinga thil han sawi ṭul nia ka hriatte chu a hnuaiah hian ka han sawi dawn a ni.

1.Face diagram kan tih mai, kan ṭawng laia rifang hran hran kan tihrik zawnga kan hmui leh hmai kan ṭawng hmanraw dang dang awmna leh lan dan lantirna milem hi tihdanglam a ni a. Mahse, hemi tihdanglam hian a milem lan dan mai hi a tidanglam a, ṭawng hmanraw awm dan a tidanglam chuang lo.

2.Chhuah hmasaka Bung 6-na, “Thu Kan Phuah Dan” tih bunga kan zeh ve “Hla Thu (Poetry)” tih kha “Hla Kan Phuah Dan” tihin a hrangin Bung 7-naah kan siam a. Tin, khami bung bawka kan zeh mihring leh thil chi hrang hrang hming kan phuah dan kan ziah kha Revised Edition-ah hi chuan amahin Bung 8-naah a hranin “Hming Kan Phuah Dan” tia dah a ni bawk a. Hemi bunga “Kan Inkoh Dan” tih hnuaiah hian thil eng eng emaw belh a ni bawk. Chuvangin, hemi lehkhabu bung kua chauh nei khan bung sawm leh pakhat a nei ta a ni a. Chhuah hmasaka “Ṭawng bungrua” kan tih kha Revised Edition-ah chuan “Ṭawng hmanrua” tiin kan thlak a. Hei hi Pu Lalthanzauva Pudaite (Late) in Thu leh Hla, October 2002 issue-a hemi lehkhabu thlirnaa a rawn sawi lan a ni a. Hetia thlak hi thil tihawm tak nia ka hriat bawk avangin “Ṭawng bungrua” tih aiah “Ṭawng hmanrua” tih hi kan hmang ta a ni.

4.Chhuah hmasakah khan “hmeichhia” tih aiah “minu” tih kan hmang a. “Mipa” tih hrula “minu” tih han hman chu Zoṭawng chiknaah chuan inhmeh hlein hman chak hle mah ila, thlak hi thil urhsun lutuk pawh a ni lo bawk a, mi tam zawk pawm leh hriat thiam theih zawngin Revised Edition-ah hi chuan, “minu” tih aiah “hmeichhia” tih kan hmang ta zawk a ni.


5.“Mizo Ṭawnga Rifang Hmante” tih bunga ‘Consonant Thlima’ tih hnuaia Riirtlir leh Riirtlirlo tih chart-ah hian chhuah hmasak khan ng, m, leh n hi lehkhabu print tura buatsaihnaah a awmna hmun hi an lo sawn palh hlauh mai a. Khata Riirtlirlo hnuaia dah palh kha, Revised Edition-ah chuan a awmna hmun tur dik tak Riirtlir hnuaiah dah a ni.

3.ZOAWNG BULPUI LEH A HMANNA (2002) Editor : B. Lalhangliana
Mandalay khawpuia Rev. Chhunvela inah ni 27 January 1984 khan literature lama tui awm deuh deuhte kan inhmu khawm a. Tun hma deuh aṭanga Pu F.Lalbiakmawian tam fe a lo ziak khawm “ZoṬawng Bul” thlirhona kan nei a. Lehkhabu neih ngei chi, puitlin ngei atana ṭha, Mizo literature hmasawn zelna atana hmanraw ṭangkai tur niin kan ngai a. Tichuan bawhzui dan turte kan ruahman nghal a.

Hna thawh a awlsam zawk nan hotu chan chang tur te kan inruat a. Pu F.Lalbiakmawia chu Secretary atan, Chairman mawhphurhna la turin Pu B.Lalṭhangliana kan ruat a… Mandalay group chuan phur takin kan thawk zui a. Rev. Chhunvela leh Pu B. Lalṭhangliana inah kan inhmuhkhawm chhawk a. Kar tin Thawhleh, Zirtawp leh Pathianni zan apiangin Ṭawng Bulpui ziak sa chu kan ennawn leh thlap a, kim lehzual turin kan chik a, a hman dan thuhlawm khat (sentence) a siam zelin kan thawkho ṭhin a ni. kum 1984 January aṭanga August thla bul lam thlengin kan thawkho va. Hmun thuma ṭhena hmun hnih dawn lai kan zo thei a. Tahan group chuan eng mah an rawn tlin ve ta lo va. Rangoon lam erawh chu a group-in an inhmuho thei lo na a, Capt. L.T. Vutan tlawmngai takin thumal tam fe a rawn zo a, a lawmawm hle.

Kan hmabak hmun thuma ṭhena hmun khat zet chu keimahin ka mal thlur zui ve leh a. 1984 October thla bulah ka zo thei ta a. Tichuan a bu pum riruang hmasa ber chu kan zo fel ta a ni. Tichuan, 1984 December thla tawpah kan ching fel thei hram a.  Tichuan 1985 February thlaah ka thawk zo thei tawk a. A chhuanawm loh hle na a, hetiang hian a bu chu kan puitlin ve ta a ni. 

awng Bulpui

A hminga “Bulpui” kan hman kher hian awmzia a nei a. Hnam changkang zawkte neih anga Zoṭawng pumpui Dictionary han buatsaih chhoh chu ṭulin ṭha dawn hle mah se, a hautak lutuk bakah thawh hmasak neih hi ṭhain kan hria a. Tichuan Zoṭawng lam ri khat (one syllable) chauh thlan chhuah zai kan rel ta a. hei hi ṭawng ṭobul ber niin a lang a. Heng aṭang hian a peng chhuak a, a ṭaidarh leh ber a ni zawk a. Chuvangin “Bulpui” tih hi kan vuah phah ta a ni.

Chutianga ṭawng bulpui zawng chhuak tur chuan a aw b indawt danin kan han rem chho phawt a. Chumi zawhah lam rik chhuah a nih theih nana ziak ho theih te kan thlur leh a. Hetiang hian a lo chhuak ta a: a, ang, ah, ai, aih, ak, al, alh, am, an, ap, ar, arh, at, an, auh.

Hei hi ziak kual theih zinga a tlem ber pawl a ni a. Hawrawp dangah chuan ziak chhuah theih a tam hle. Chutianga kan ziak chhuah zawng zawng chu thumal 3200 aia tlem lo a tling thei a.

Kan Hmabak

He lehkhabuah hian Mizo a aw b hmanga ziak chhuah theih zawng zawng, tuna awmze neia kan hman tih loh te pawh tarlan vek a ni a. Hetia kan ziak chhuah chhan hi chu, ṭawng hian hma a sawn zel a, tuna awmze neia kan hman rih lohte pawh kum rei vak lovah awmze neiin kan la hmang mai thei a. Hnam dang ṭawng ni hauh lo, kan ṭawng ni ngei awm, kan lehkhaa ziak chhuah theih te a nih avangin kan han khung tel a ni.

Tun hnai deuh maiah pawh ṭawng ṭhenkhat awmze nei tharin a lo chhuak a. A lar tawh fu nghe nghe a. Ni tin ṭawngkamah a tel tam hle ta awm e. Entir nan:

Nguar: ‘lo’ sawina
Tawih: ‘nalh, hmeltha’ sawina
Zei: chet dan fel leh ṭha sawina

Hetianga kan ṭawnga awmze nei thar thei awmte tam fe kan han tarlang hi, ṭawng hmasawn leh pun zelna atan a ṭangkai kan beisei a. Amaherawhchu tunah awmze neia hman nghal mai a nih rih loh avangin zawhna chhinchhiahna  (?) kan dah zel a ni.

Kan hmabak pawimawh ber pakhat chu “Ṭawng Bulpui” hi chu a bul ṭanna chauh a ni a, heta ṭang hian Zoṭawng pumpui Dictionary buatsaih chhoh zel beisei ila. Tunah hi chuan a bulpui ber, lam ri khat chauh kan thlang chhuak a ni kan tih tawh kha. Hcta ṭang hian kan pakai chho zel ang a. Entir nan ‘ai’ hi lo la chhuak ta ila:-

Aiawh, aiawhtu, aiawt, aibawp, aibuh, aichhin, aichhiat, aidu, aidu sentil, aihal, aieng, aifiar, aihni, aiin, aikam, aikhata luang za, aikhiangi zai, aikhirh, ailaidum, aimit thlawn ang, ainawn, ai, aipui nei aisan.

Hetiang hian Zoṭawng pumpui hi ziak chhuah tlap a, a awmzia leh a hman dan dik tak tarlan nghal a a ṭha hle mai. Chu chu Pu Buanga pawhin “My original plan”a tih ngei kha niin a lang. Mahse a puitlin ta bik lo va, a pawi hle. Kum za lai a her liam a, Mizote zingah mithiam tam fe kan awm hnu hian zau tak leh kimchang zawka kan dapchhuah a hun ta hle. Chutiang hna thawk tur chuan mi mal emaw, ṭhian zaho emaw chauh ni lovin, Sorkar meuhin ‘grant’ pea ‘Commission’ hial dina chet chi a ni ngei ang. Chung atan chuan he ‘Ṭawng bulpui’ hi a ṭangkai kan ring a.

Kan Buatsaih Chhan

Kawl lehkha leh Mizo lehkha hi a inlet chiah a. Kawl lehkha chu chhiar thiam chauh tur pawhin zir fe a ngai a. An a aw b bakah hawrawp belh an ngah avangin beih fat fat a ṭul ṭhin. Mahse chhiar thiam khawpa zir hnu vek vek chuan chhiar sual a har hle a. A hawrawp leh a belhna hrang hrang khan a lam rik dan te a keng fel nghal a. A ri chhuak ṭha hle a ni.

Kan hriat theuh angin Mizo lehkha chu a aw b a tlem a, hawrawp belh a awm ve loh avangin chhiar thiam satliah ngawt tur chuan zir rei a ngai lo hle a, mahse ri phei, ri hniam, ri kual, ri sang, leh ri naran te a awm avangin chhiar sual a awl em em thung a. Chutiang zawng zawngte Mizo ang maia thiam ṭha ve tur chuan anmahni zinga chen ve hi a zir dan awmchhun leh ṭha her a ni, Pu Buanga’ n a lo ti hi a pawmawm hle. Chutiang harsatna sutkian nan chuan he lehkhabu hi a ṭangkai kan beisei a ni.

Kan buatsaih chhan dang leh chu mahni ṭawng vawn ṭhat nan te, venhim nan te, ṭhangthar zel tan, a bik takin hnam dang kara cheng Mizote tan Zoṭawng zirna ṭha a nih kan ring a. Mizo ṭawng zinga hman sual awl ber ‘thu uarna’ chi hrang hrang, Zoṭawng hausakna lai ber hi a chinchhuak leh a nih dan dik taka kan hman theih nan he lehkhabu hi a ṭangkai kan ring bawk a.

Ram hrang hrangah Mizote hi kan khawsa hlawm a. Hma kan sawn zel ang a, khawvel dai darin kan la tlat hran deuh deuh pawh a rinawm a. Chumiin a ken tel pakhat chu kan chenna ram leh khawsakna a dan ang zelin kan Zoṭawng te pawh a hrang hret hret zel dawn a. Tunah pawh tlem tlem chu a dang deuh tih kan hre ṭheuh ang a. Chutiang laka min tipumkhat a, lehkha pakhat leh ṭawng chi khata min phuar khawm zel a, zai khata min luantirtu atan hmanraw ṭangkai leh ṭha a nih ngei kan beisei bawk a ni.

Kum zabi 17-na thleng khan Sap (English) ho pawhin Dictionary ṭha an nei rih lova. Mahse Dr. Johnson-a chuan a ṭulzia a hria a, an mamawh dan pawh a hmu kiau mai. Tichuan mi dangin an phur puiin an pui lo na a, amah chauhvin a buatsaih chho ta ngat ngat a. Kum 7 meuh rim taka a thawh hnu chuan a lo hlawhtling ta nge nge a, a hmaa ngaihsak lo lal hnam te pawhin an bengkhawn ve ta hle thung a.

Mizo mipuiten engtin nge he Zoṭawng Bulpui hi an ngaih dawn kan hre lova. Keiniho erawh chuan buatsaih chhan leh beisei sang tak neiin kan buaipui ve a. Keimahniho kutkawih liau liau hi kan rawn theh chhuak ve ta rawih mai a ni.

Ṭawng bulpui nia kan hriat zawngte kan lakchhuah bakah, a hman dan dik ber nia kan hriat angin kan tarlang a, mahse, hei hi a dik ber niin kan puang lova. Tihsual palh leh hman dan dik lote pawh a awm ngei ang. A dik zawk hria chuan min hriattir thei ula, kan lawm em em ang.

He lehkhabu hi ni 21 February 1985 khan chhut mai theiha peih fel diam a ni a. Mizo ṭawng thiam tak tak Pu Lalzuia Colney chu 1987 khan min thlirsak turin kan sawm a. Taima takin min ensak ta a, rawtna ṭha tak tak a rawn siam a, a pawmnahawm hle a, a chungah kan lawm hle.

Kum 17 lai sum harsatna avangin kan dah ṭha vang vang a. Tunah Mizoram Publication Board ṭanpuinaa khaw eng a lo hmu ta hi kan lawm takmeuh a ni.

Hetianga a bu chhuah a nih dawn hian rilru tak tak hmang leh uluk em emin ka en chhuak leh parh a. Mizoram pawn aṭanga Mizo ṭawng kan thiam dan leh a hmun ngeia kum 16 lai chen ve hnua ka hriat dan chu a inang lo thei hle mai a. Tichuan taima tak leh ngun em emin a ṭul apiang ka siam ṭha ta zel a. Tlem chuan a famkim leh changtlun phat sawt kan beisei a ni.

4.MIZO AWNG PUITU (2004) Ziaktu : Er. V. Rodingliana

Buan buan, ruah sur buan buan, kan tih te, dan dan, Liana a lo kal phei dan dan mai, kan han tih hi adverb a ni a, adverb ṭhiang (double adverb) tia sawi pawh kan awm nual awm e, double chang awm mah se, a pahniha inkawp lova awmze neih loh chang a awm tho va. “Ruah a sur buan a”, tih chu a dik thci si lova, chutiang bawkin “Liana a lo kal phei dan mai”, tih pawh a dik lova, amaherawhchu “Ṭhangi chu a ṭap ṭhat a”, tih chu a dik a, “Ṭhangi chu a ṭap ṭhat ṭhat a”, tih pawh a dik tho a ni. Hetiang hi vuah duh dan kan nei hrang thliah mai thei a, a enga pawh chu vuah ila, ka hnial lem lova, tunah chuan adverb ṭhiang (double adverb) han ti ve phawt mai ila. Heng hi thil sawifiah nan a ṭha hlawm em em a. Kan nu kan pa rual tan chuan “Enge maw hengte ziah a ṭulna le”, tih mai pawh a awl maithei a, amaherawhchu hriat ang ang han ziah ve a, a khawma han dah ve hi a ṭhatna te a awm ve takin tih leh ṭhangthar zel tan pawh a ṭangkai ve beiseiin ka han ziak khawm ve ta chu a ni a. Tih hmaih pawh tam tak a awm thei a. Lungdum lo deuh lai te pawh a awm thei a, Chung chu mithiam leh kan ṭawnga tui, ṭawng pawnlang leh ṭawng dal tual tual ngaimawh leh kan ṭawng hum duhte la thual nawn lehah dah ila.

A thu hrilhfiah kawngah hian hrilhfiah tur awm chin hriat a har angreng a, a ṭhen chauh tarlan a ni a, a vaia hrilhfiah leh a vaia a lam dan sawi chu a tam tham deuh bawk a, a ṭul vek lem lovin ka hria a. Tin, a hrilhfiah chungchangah hian ngo deuh te, hang deuh te, te deuh te, lian deuh te, cher deuh te, thau deuh te, ṭuan muang deuh te, ṭuan ṭha deuh te, ṭawng rang deuh te, ṭawng muang deuh te kan awm a, hang deuh te, cher deuh te hmusit ni awm taka sawi chang te pawh a awm a, hangah hian tumah inngaihbel lo turin ka ngen a, thu awmzia tiifah thei tur a nih si avangin a chang chuan ṭawngkam mawi lo leh ngaihthlak hrehawm deuh deuh te pawh ziah lan a nih chang a awm ṭhin a. Ṭawng ngeiawm deuh te, zahmawh rawng kai deuh te pawh a awm a, hengah hian he lehkhabu chhiartute hriatthiam ka ngen a. Kan ṭawng chhuanawm tak, thil hrilhfiah nana ṭha tak, hnam dangin an neih ve hauh loh hi ṭhangtharten an theihnghilh mai loh nan leh mithiam leh a tuimite phei chuan kan ṭawng tihausa zawng leh humhim zawnga an rilru leh ngaihtuahna te an hman phah theih takin tiin ka theih ang tawkin ka han buatsaih  ve a. A tirah chuan “Ka hriat ang ang hi ka ziak khawm zung zung anga a tawk mai alawm”, ka ti rilru a, ka han ziak ṭan a, chuti mai chu a lo ni ta hauh lo mai a, ngaihtuah ngun a lo ngai hle mai a, khaw hmu phe riai ruai chung te hian zan rei fe fe ka men phah nghe nghe ṭhin a ni.

Tin, thiamna leh finna chaw chhuak tur chuan sap ṭawng thiam a ngai a, sap ṭawng hi zir pawh kan zir nasa, thiam pawh kan thiam sawt khawp mai, sap ṭawng hi kan tan a ṭangkai em em a, ṭawng dang ai chuan pawh kan ngam deuh sarh a, thiam pawh kan thiam thei deuh ber niin a lang. Amaherawhchu kan ṭawng hi nachang kan hriat loh chuan sap ṭawng hian kan ṭawng hi a tipawnlangin, a tidal tial tial a, hei erawh hi chu kan hriat a, kan ṭawng kan humhim ve hi a ṭul hle a ni. Chuvangin sap ṭawngin kan ṭawng a tih dal theih dan te, chu mi lak ata kan fimkhur theihna tura thil ṭul nia ka hriat ṭhenkhat te ka ti tel ve hlek bawk a.

Ṭawng chungchang mai bakah kan hnam nunzia leh kalphung te min hrilh ṭhintu, englai maha ka theihnghilh ngai loh ka pa V.Thangvela kha ka ngai ngei mai. “A ṭhat lai te khan heng hi han chai dun ila”, ka ti rilru vang vang ṭhin. Tin, ṭawng lama min kaihruaitu, Mizo Synod High School-a kan kal ve laia Mizo subject min zirtir ṭhintu Pu C. Darhlira ka hre reng ṭhin a, amah leh kan zirtirtu dang zawng zawngte vanga

High School te rap chhuak thei ka ni tih ka inhre reng a, an vaia chungah ka lawm ṭhinin, kan tan an hlutzia hi ka theihnghilh thei ngai lo a ni. Tin, Pu K. Zawla (L) pawh kan zirtirtu ni lo mah sc, Mizo subject min zirtirin a lo kal ṭhin a, Mizo subject kan zir dawn hian ti hian ka ngaihtuah ṭhin a, “Kan la hriat ngai loh emaw, kan hriat chian loh eng chanchin emaw zir dawn ila chu ka hrethiam, chuti tih hlcih loh, Mizo kan ni a, Mizo ṭawng enge zir a ṭulna, enge kan zir ang?” tiin. Mahse Pu Darhlira te, Pu Zawla tcn min han zirtir min han zirtir a, zir tur chu a lo awm nameuh mai a. Anmahni avang hian Mizo ṭawng hi ngaihven nachang ka hriat phah a, ka tui phah em em a, an hnen aṭang hian thil tam tak ka zir chhuak a, an chungah ka lawm tak meuh meuh ṭhin a ni.

Tin, he lehkhabu chhiartu zawng zawngte hnena ka ngen duh chu, “Sap ṭawng te, vai ṭawng te hi a ṭangkai em em a, thiam viau mah ila, Mizo ṭawng, keimahni ṭawng ngei kan hriat chian leh si lohva, kan ngaihthah mai chuan kan zahawm tur angin kan zahawm thei dawn lo va, Mizo ṭawng hi kan ram lch kan hnam a lo changkan zel hian a pawimawhzia kan hre ṭulh ṭulh dawn a. Chung hunah chuan hnam dangte pawhin kan ṭawng te hi an la zir ve duh thei a, chumi huna kan zirtir theih nan te, keimahni ngei pawhin mahni ṭawng a tam thei ang ber leh a zau thei ang bera kan hriat theih nan te, mi thiam te, Mizo ṭawng lo pawnlang tial tial tur lak ata vengtu leh kan ṭawng humhim duhtute rilru leh ngaihtuahna kaithotu a nih theih takin”, tiin he lehkhabu hi buatsaih ka ni tih min hriat sak hi a ni. Han chhiar ve teh le.

5.Z0 AWNG F ORMULA (2005) Ziaktu : Rev. Z.T. Sangkhuma

Zoṭawng Formula, a bua hmuh theih a ni ta hi lawmawm ka ti hle mai. Hemi thuah hian thil mak tak a awm a. Mite sawi ṭhin angin Zoṭawng hi Lamrik tin awmze nei ‘Monosyllabic Language’ a ni a. Lam rik tin awmze nei chin chu engzat nge ni ang tiin an chhui tawh ṭhin a. Myanmar rama an awm laiin B. Lalṭhangliana leh a ṭhiante, ṭawng ngaihtuah miten an chhui a, hmuh chhuah kim tumin nasa takin an bei a. A awmzia an hriat loh pawh Zoṭawng kalhmang dik nia an hriat chin zawng chu an chhiar a, thumal 3220 an hmu a ni.

Chumi hnuah Lalṭhanzauva Pudaite, ṭawng lama mi tui leh ngaihven mi, India palai (Ambassador) Taiwan-a awm chuan a rawn pension chhuah hmain a chhui nasa mai a, ani chuan thumal 3258 a hmu a, a hmaa chhuitute ai chuan a hmu tam nghe nghe a ni.

Hetianga chhui hmasatute chhuina hi kei pawhin ka en ve ve a. An chhui danah chuan nghenchhan bik engmah nei hran lo an ni ve ve a. An chhuina hrim hrim chuan, chhui theih a nih leh hmuh chhuah theih a nihzia min ngaihtuahtir a, chhui ve turin min tithatho ta a. Ka inthlir let lehin an chungah pawh ka lawm hle a ni.

Ka han chhui ve takah chuan pakla hisap tih ang deuhva ziak chhuah ngawt chu dikin ka hre lo va, a Formula a awm ka ring a, ka zawng ta a. Thumal zat hmuh chhuah theihna Formula chu ka hmu chhuak ta a. Vowel hi a lo ni reng mai a. Hemi ka hmu chhuak hi ka lawm ngawt mai. Chuta ṭanga chhui chuan Thumal 3220 ni lovin, 3258 ni hek lovin 3456 a ni ta zawk a ni. A chhui chhuah dan pawh hi chhiarkawp ang a ni a. Vowel-ah thumal l6 nei chi leh l4 chauh nei chi a awm. Chung aia a tam emaw a tlem emaw chuan a dik lo tihna a ni. Nambar 2 leh 2 belhkhawm chu 4 chiah a ni a; Chutiang deuh chu a nih avangin a dik zat sawinaah ‘chiah’ tih pawh a awm nual reng a ni.

‘Formula’ tih hi chi hrang hrang a awm thei. Algebra ah a awm a, thil dangah pawh a awm thei ang. Algebra Formula aṭang chuan, a hmanna tur chinah chuan a dik thlap naa, Algebra zawng zawng chawh chhuah vek theihna Formula chu a ni lo tih kan hria. Chutiang bawk chuan ‘Zoṭawng Formula’ kan tih pawh hi, lamrik khat china dik a ni a, Zoṭawng zawng zawng chhui chhuah theihna Formula chu a ni lo. Formula a nihna lamrik khat chinah chiah a dik a ni.

He lehkhabu ziak hi, Mizoram Publication Board ah ka thehlut a. Expert-in uluk taka a en zawh hnuin Board chuan a pawm a, a bua chhuah theih turin approved a ni ta hi ka lawm tak meuh a ni. He lehkhabu hi a neitu apiangin uluk takin chhiar se, Zoṭawng tihhmasawn nan leh Zoṭawng Grammar dik hmuh chhuah nan hmang ngei se tih chu ziaktu beisei leh duhthusam a ni a, chhiartu zawng zawng Pathianin malsawm rawh se.

6.MIZO AWNG KALPHUNG (2006) Ziaktu : James Dokhuma

Politics-ah hian thuk taka lo inrawlh tawh ka nih avangin kan ram leh hnam din khawchhuah (survive) theihna tur hi ka duh ngawih ngawih a. Mahse Politics-a hmanraw ṭangkai berte zing ami thiamna (education) nei lo ka nih avang erawh chuan ka awmna Party-in rorelna lo chang ta tehreng pawh ni se, Minister nih chu sawi loh MLA nih pawh phakin ka inhre lo. Ka pianphung rilru-ah reng reng hian hausak tumna emaw, lal tumna emaw ka neih loh avangin ‘Pu Speaker’ ti ve phak turin ka piang lo tih ka inhre chiang em em a. Hnam Politics lah hian thil pawimawh tak tak pali a humhim ngei ngei tur a keng a.

Chungte chu :(1) A ramri sahhual chhung a chiangin tichhe theitu lakah a veng him tur a ni. (2) Ram mipui hmasawnna a ngaihtuah tur a ni. (3) A ram mipui sakhua a veng him tur a ni. (4) Hnam nunphung leh zia (identity) a vawng nung (survive) reng tur a ni si a. Chungte chu tihlawhtling turin thuneihna (power) a ngai a. Thuneihna kawltu ka nih si loh chuan a enga-mah chu keini ang ṭhi beh lo chuan tih theih kan nei lo tih pawh chiang sa a ni. Heng Politics aṭanga ram leh hnam humhalhna chawi kan tur pali zingah hian thuneitu ka nih loh pawha ka ṭangkai ve ber theihna tur ka ngaihtuahin ‘hnam nunphung leh zia’ humhim turin tha tlem ka thawh thei tih ka hria a. Chuvangin, keima chhanah (sanah) ni lovin, kan tu leh fate ka hnutchhiah ang a, eng ‘ro’ khawm tur nge ka neih ang tih ka ngaihtuah a.

Chu avang chauh zawk chuan Pathianin ‘talent’ te tak te min pek lehkha ziak lam hi kan hnam tan ka tih theih sang ber niin kahria a. Hnam tana ṭangkai tur leh tur loh pawh dawn chang lo-in, miten an hlutsak tur leh tur loh pawh dawn lo-in ka beng ka hup a, ka maimichhing bawk a. Miten barah khawn loin lo sawiin lo sel ta pawh ni se, ka phak ve tawk a niha liamah tiin tunah pawh hian ‘MIZO ṬAWNG KALPHUNG’ tiin ka’n thai leh ta ringawt mai a ni. Ziak famkim lo-in kan ṭawng kalphung kilkhawr ber thlengin luhkhung zo lo mah se, ṭawng lama tui-mite sih hmuhna leh ngaihtuah zuitirtu a nih chauh pawhin kei chuan hlawhtlingah ka inngai tho ang.

Kan ṭawng hi ṭawng mak tak a ni a, kan ṭawng ‘grammar’ hi siam dawn ta ila, Sapin ‘parts of speech’ an tih ang pawh hi engzat nei tur nge a nih kei chuan ka hre phak lo. Thumal hrilhfiah harsa tak tak mi tinin a awmzia kan hriat leh kan hman thiam theih si, kan ṭawng ngei pawh la hre lo hnena hrilhfiah harsa tak tak nei hnam kan ni a. Heng ‘manilomaha’ tih te, ‘beuh, sek sek, ba-le’ tih angte hi awmze pawimawh tak nei, hrilhfiah awl-ai si lo tak a ni.

7.MIZO AWNG PENG HRANG HRANG DICTIONARY (2006) Ziaktu : B. Lalhangliana

Ṭum khat chu ka ngaihtuahnaah tun hmaa ka la suangtuah ngai loh a lo lut mauh mai a, Mizo ṭawng ṭobul te, a kalhmang te leh a awmziate kan theih ang tawka kan zir apiang hian G.A Gierson-a Compiled & Edited : Linguistic Survey of India Volume 1, Part III leh Prof. G.H. Luce-a ziak, Chin Hills Linguistic Tour (Dec.1954) te hi kan rinchhan tlut tlut a, vawi eng emaw zat keuin kan hmang a; hengte hi kum 1904 leh l909-a ziak an ni daih hlawm a, eng ti nge tun lai mite hian kan zir chian ve loh a, Mizo hnahthlak ṭawng peng hrang hrangte inhnaih leh inan dan te kan chhui fiah ve loh? tiin.

G.A. Gierson-a leh Prof. Luce-a te hian Mizo hnahthlak ṭawngte hi an thiam bik lo a, an hre bik bawk hek lo. Mi rintlakte rinchhanin an bei a, ṭawngte an la khawm ve bawk a ni mai a. An taima a, an thawhrim peih avangin hetiang Mizo hnahthlak ṭawng peng hrang hrang awmzia leh kalhmang te hi an ziak thei mai niin a lang. Engah nge kan theih loh bik ang a, kan thawh loh bik ang? Taima takin kan thawk ang a, rim takin kan bei ve tur a ni. Anni tuifinriat ral aṭanga lokal mahin an thawh theih chuan, keini Mizo ngeite hian nasa lehzualin kan thawk tur a ni tiin, te tak te mah ni ila, rilru ka tilian lui a, ka theih leh thiam ang tawkin ka bei ve ta rawih mai a.

Hna hmasa berah Mizo Ṭawng thumal ka thlang chhuak phawt a. Chung thumalte chu Mizo hnahthlakte hman tlan theih chi, ṭawng bul leh hlun deuh te ka lawr bik a, lehkhabu eng eng emaw te ka en nual bawk. Chungte chu a awmzia sap ṭawngin ka dah zel nghe nghe. Tin, ṭawngkam khat (sentence) ṭhahnem deuh ka siam leh a. Hei hian Mizo hnahthlakte ṭawng kauchheh deuh ka siam leh a, hei hian Mizo hnahthlakte ṭawngkam khat nihphung te kan hriat chian theih nan a ni.

Chungte chu Computer-in kan chhu chhuak vek a, copies kan siam a, lehkhabu ang deuhin kan buatsaih a. Mizo hnahthlakte hi chi leh chipeng leh chi tepeng (clan, sub-clan, sub sub-clan) kan tam viau a, ṭawng hrang hrang kan ṭhahnem angreng hle bawk a. Chuvangin a vaia dah khawm chu tih rual a ni lo a, kan theihnain a tlin hek lo. Tichuan tlema a hlawm lian deuh chi sarih (7) ṭawngte kan thlur bik ta a.

Chung ṭawng peng hrang hranga min pui tur thlan a ngai ta, uluk a ṭul hle. Lehkha thiam, ṭawng lam ngaihven mi, mi rintlak, min ṭanpui thei tur awm, kan nel leh ngamtlakte an nih a ngai a. A ṭhen kan sawmte phei chuan an pha reng a. Mahse mi tlawmngai leh taima, min ṭanpui theite an lo awm hlauh a, chungte chu: Hmar ṭawng (Pu Lalpiangliana Pudaite, B.A.,B.T hi Vaitin khua) Lai ṭawng (Pu Vanpeka), Mara ṭawng (Pu S.Ngiahu, M.A., ani hi Govt. Saiha College), Paite Ṭawng (Pu Thanga hi Vangte khua), Ralte ṭawng (Pu Thangkima Ralte hi Kohhran Upa), Thado-Kuki ṭawng (Dr. Jamkhongam Doungel, M.A.,Ph.D., Govt. Lawngtlai College).

Kan thiam leh thiam loh te, hetiang lehkhabu buatsaih tura mi puitling kan nih leh nih loh te kan ngaihtuah lem lo a, kan chhut bawk hek lo, hnam tana pawimawh leh ṭul ema kan hriat avangin kan bur ve chawt a ni ber a. Tihsual a awm mai thei a, chungte chu rilru ngil leh tluang taka tih sual palh a ni tih min hriatthiampui kan duh a. Tin, Mizo hnahthlak ṭawng hrang hrangte a kim lo em em a, kan thlan chhuah chi (clan) pasarih ṭawngte pawh a kim lo hle tih keini pawhin kan hria a. Mahse hei hi kan tlin tawk a ni rih a. Ram leh hnamin hma a sawn zel ang a, tunah phei chuan Mizoram University te pawh kan nei ve ta a. Sawrkarin emaw, University-in emaw Project lian tham deuh siama a buaipui chi niin a lang a. Chung hun atan chuan tuna mi hi ‘Aitechhinna’ ang lek a ni ngei ang a, chutiang hun chu dingdihlipin kan thlir a ni.

Kum 1o0 zet liam taa G.A Gierson-an Mizo hnahthlak ṭawng ṭhenkhat a lo lak khawm leh, kum 50 vek kal taa Prof. G.H. Luce-an Chin State hmar lam tlawha ṭawng chi hrang a lak khawmte thlak nan he lehkhabu hi tih a ni lo a. Chutiang tling tham a ni hek lo. Tlema kan hriatna a lo belhchhah theih mial takin kan theih ang tawkin kan bei ve chauh zawk a ni. Tin, tun hma kum 100 zet leh kum 50 vela Mizo hnahthlak ṭawngte nen a tlat hran deuh deuh dan emaw, a inhnaih deuh deuh dan emaw zir chian nan a ṭangkai ve mial erawh ka beisei.

Tin, Mizo hnahthlakte hi, Chin state leh Manipur lama awmte chu ṭawng peng leh ṭawng tepeng a tam hle a. Heta Resource Person-a kan hmante ṭawng hriat dan leh ṭawng kan lo hriat dan inang lo te pawh a awm mai thei a. Chungah te chuan chhiartute hriatthiamna kan dil duh bawk. Mi thiam zawkten emaw, Sawrkarin emaw, University-in emaw zau zawk leh changtlung lehzuala an thawh hunah kimchang taka chhiar theih a la awm ang chu maw!

He lehkhabu hi, Mizo hnahthlakte inhriat tawn nan te, hnuk hnaitu atan te leh kuah khawmtu atan te a ṭangkai ve mial kan ring a. Chu chu tling lo tak chung pawha kan buatsaih hram hram chhan a ni.

Heng lehkhabu den den aṭang pawh hian Mizo ṭawng hman dan dik kan thiam theih nan mi ṭhahnemngaiten theihtawp an lo chhuah tih a hriat theih a. Ṭhangtharten an thawhrim rah seng tur kan nei ṭha hle. Chutih laiin kan inthlahdah chuan kan ṭawng hi kan ziak dik lo pheng phung ang a, kan sawi sual thliah thluah mai ang tih a hlauhawm: Ṭawng dik leh zahawm hi chu a awm, chu chu mi zawng zawngin kan hmang thiam vek lo a nih pawhin mahni ṭawng tibawrhbangtu ni lova tihmasawntu nih zel i tum ang u.



Leave a Reply

Your email address will not be published. Required fields are marked *

error: Content is protected !!