Mizo sermon – Thutak chuan bawih a ban ang che u – Upa K.Zalawma

THU TAK CHUAN BAWIH A BÀN ANG CHE U

Upa K.Zalawma

“Tin, thutak in hria ang a, thutak chuan bawih a bân ang che u,” a ti a. Tin, anni chuan a hnênah, “Abrahama thlahte kan ni asin, tûn thlengin tu ma bawihah kan awm ngai lo, ‘Bawih a bân ang che u,’ eng ti tiha i ti nge ni?” an ti a, an chhâng a. Tin, Isuan an hnênah, “Tihtakmeuhvin, tihtakmeuhvin ka hrilh a che u, tu pawh thil tisual apiang, sual bawih a ni. Bawih chu kumkhuain inah a awm reng lo; fapa erawh chu kumkhuain a awm reng ṭhîn. Chutichuan, Fapain bawih a bân che u chuan in chhuak takmeuh vang. Johana 8:32‭-‬36.

Lal Isuan thutakin bawih a bàn thu a sawi hi Judahoin an hre thiam mai lo.

Aigupta bawihah te, Babulon bawihah te, Rom sawrkar bawihah te an awm tawh. An tisa thil mai maiah an ngai a, an inhriat dan chuan Abrahama thlah, Lalpa hnam thlan, tuma hnuaia awm loah an inngai tlat a ni. Bawih rilru pu lovin lal rilru an pu a, an rilru a khauh em em a ni.

Thil tisual apiang sual bawih an ni:
Judaten bawih an nih an inhre lo va; Isuan, “Thil tisual apiang hi sual bawih an ni a. Nangniho pawh hian Pathian in ring lo va, a mi tirh in ring bawk lo va, sual hnuaiah in la awm reng a ni,” a ti. Pathian leh a Fapa Lal Isua rin loh hi thil tisual nihna a ni.

Abrahama thlah:
Judaten, “Abrahama thlahte kan ni asin, tun thlengin tuma bawihah kan awm ngai lo,” tiin Isua an chhang a. Isuan, “Abrahama thlahte ni mah ula Abrahama angin Pathian in ring ve lo va, min thah te in tum a, Abrahama thlah nihna tak tak chu rinna hi a ni asin, tisa thila thlahtu bul mai thil a ni lo ve, Abrahama zawngin hetiangin a ti ve lo, nangni zawngin in pa thil in ti ṭhin,” a ti.

Isua kha tihhlum hial an duh avangin an pa chu tualthattu Setana a ni zawk a tihna a ni. Chuvangin sual bawihah an la tâng reng tihna a ni.

Bawih:
Bawih chuan amahin zalĕnna a nei lo va, a pu thu thuin a awm a, a pu inah pawh awm reng thei lovin a puin a duh hun hunah a hralh leh mai ṭhin.

Fapa:
Fapa erawh chu bawih a ni ve lo va, a pa inah kumkhuain a awm reng ṭhin. Pathian ring lo va thil sual ti ṭhinte chu sual bawih, sual thuhnuaia awm an ni a; Pathian Fapa Lal Isuan ringtute erawh chuan fa nihna an nei tawh a, hralh leh mai mai chi an ni tawh lo va, sualin a bawih pha tawh lo va, Pathian hnenah an awm reng tawh zawk a ni.

Thutak (truth)
Lal Isuan, “Keimah hi kawng leh thutak leh nunna chu ka ni,”(Jon 14:6) a ti. A tira thu awm, Pathian hnena mi, a taka tisaa lo chang – dâwt thu mai ni lo, thu tisaa lo chang ngei kha ‘thutak, – Lal Isua hi a ni.

Thutak chuan bawih a bàn ang che u:


Sual thuhnuaia awm, Pathian thu aia khawvel thil leh sual nawmna thlang zawktute hi ‘sual bawih’ an ni a, chûng mite chhanchhuak turin Lal Isuan a Pa thu a hlen chhuak a. Sual bawiha tângte chu a rawnchhuah zalèn ta a; bawih nihna chu a rawn tibâng ta a ni.

Ringtute hi sual laka zalèn kan nih tawh avangin sualin min thunun thei tawh lo. Thutak – Lal Isuan bawih nihna min tih tâwp sak (bàn) tawh a; sual bawih ata chhuak a, Pathian ringa a duh zâwng titute hi Abrahama fa tak te chu kan ni zawk e.

Bawih ni lo turin Krista chuan min chhuahtir kha,
Chutichuan ding nghet ula;
Bawih nghawngkawlah chuan tâng leh tawh suh u.(Gal 5:1)

Leave a Reply

Your email address will not be published. Required fields are marked *

error: Content is protected !!