THLAMUANNA PATHIAN

-Upa K.Zalawma

Ka rilrua ngaihtuah tam tak ka neih lai chuan, I thlamuannate chuan ka nunna hi a tihlim ṭhîn. Sam 94:19

Sam ziaktu hian Pathian hre lo roreltuten sualna kawng tam tak an zawh ṭhin leh, Lalpa mite an hnehchhiah ṭhin laia an chapo zia a ngaituah a,  manganna khura a awm lai chuan thil tam tak a ngaihtuah a, chutih lai chuan Pathian in a rawn thlamuan ṭhin a; ‘dâna thil tihsualna tur siam chawptute chuan an pâwl ve ngai lo che a ni’ a ti.

Kan dinhmun a lo harsat a, hmusittu emaw, hnuaichhiahtu emaw-in dik lo takin kan chungah kut an lek chang te, kan ni tin khawsakna leh hna kan thawh mĕkte leh rawng kan bawlnate ti ṭha thei lĕk loa natna leh rokhawlhna dang hmanga fiaha kan awm chângte hian, kan rilru a văn ruai ruai a, thil tam tak kan ngaihtuah ṭhin a; hei hi mihring zia a ni. Hetih hunah ngei hian Pathiana rinna nghat tlattute chuan,

“Ka rilrua ngaihtuahna tam tak ka neih lai chuan,
I thlamuanna chuan ka nunna hi a tihlim ṭhin,” an ti thei a ni.

Pathian kan rinna hi manganna leh harsatna kan tawh hun atan tak hian a pawimawh ṭhin a, mihring lam kan ngaihtuaha lungawi lohna leh vuina tur tam tak a awm theih lai hian, Lalpa ring tlattute chuan lawmna tur an hmu ṭhin a, an mangannaah chuan Pathianin a rawn tlamuan a, hlimna an hmu ṭhin a ni. A hun takah mi dangte hmangin a rawn pui bawk ṭhin.

Kan mangan leh lungngaih niah te, harsatna hnuaiah pawh chumi chu tuar chhuak thei turin Pathianah i innghat tlat ang u, a ni chu Tlamuanna Pathian a ni si a.

Pathian Thlamuanna, rilru rĕng rĕngabhriat sèn loh khan,
In thinlung leh in ngaihtuahnate chu Krista Isuaah chuan vèn sak che u se la;
Pa leh Fapa leh Thlarau Thianghlim,
Pathian Engkimtitheia malsawmna chu in zaa hnenah awm rawh se.

Amen

Leave a Reply

Your email address will not be published. Required fields are marked *

error: Content is protected !!