Mizo sermon – Thianghlimna – Upa K.Zalawma

THIANGHLIMNA
(2018 Kolasib Presbytery Thlarau lam Thupui)

Upa K.Zalawma

I Pet.1:14-16.
Fa tihawihte angin, in hriat loh laia in hmânlai châknate anga awm lovin; a kotu che u a thianghlim angin, nangni pawh in chêtzia zawng zawngah lo thianghlim zâwk rawh u; “Nangni in thianghlim tûr a ni, kei ka thianghlim si a,” tih ziak a nih kha.

Mihring din hmun hi suala a tlûk hnuah chuan thianghlimlo (unclean) a ni a. Pathian ngaiha bawlhhlawh a ni tih pawh inhre lo, châk zawng ang apiang tia nung ṭhin, ei leh inah pawh serh leh sang nei chuang lo a ni.

Ram tiam pana Israelte Sinai tlanga an awm lai khân Pathianin dân leh thupék tam tak a pĕk zingah ‘thiang hlimna dan’ hi a pek tel a ni. A pek chhan pawh ei leh in lama an invawn thianghlim Pathianin a duh avanga he thu hi a pĕk a ni.

In hriat loh laia in hmanlai châknate anga awm lovin:
Petera hian ringtute chu, Dân a awm tih pawh hre lo leh Dân nei ve lo Jentail-te anga tisa châknate anga awm lo turin a fuih a. Tisa châkna sual chuan mi a tihbawlhhlawh ṭhin avangin Pathian Thianghlim nĕna inpâwlna a dal ṭhin a ni. Chuvangin, min kotu a thianghlim angin, keini pawh kan chĕtzia zawng zawga thianghlim turin min ti a nih hi.

Kan thianghlimna turte:
1. Ei leh inah:
Kan ei leh in turte hi a thianghlim loh chuan kan taksain natna a tuar phahin a chhiatpui ṭhin vangin, taksa hriselpuina tur chi leh thianghlim taka siam chauh ei tur a ni. Sa kan ei tam tak hi kanchhiatpui fo va, Biblein ei loh tura a tih te hi chu ei loh tluk a awm lo. Chhandamna lam thu aiin taksa hriselna atana ṭha a nih vangin ei tur leh ei loh tur, thiang leh thiang lo an ni zawk.


2. Ruih theih thil leh zûk leh hmuam lakah:
Zû leh ruih hlote hian mihring rilru pangngai a tibuai a,, hriselna a tichhe bawk a, mi a inthlahdahtir a, rilru mai nilovin taksa pawh a inthlahdahtirin bâl leh bawlhhlawh a pawisak lohtir a, Pathian Thianghlim nĕn a inpawl theih loh. Zûk leh hmuam chi hrang hrang pawh hi taksa tâna ṭha a awm lo. A titute rim a tichhia a, hmĕl a timawi lo va, sum sĕnna ṭul lova inkhawh ralna mai a ni. Pathian Thianghlim nena inpawl tur chuan heng ruih hlo leh zûk leh hmuam lakah hian inthiarfihlim tluk a awm lo.

3. Kan in leh khawsaknaah:
Pathian awmna chu hmun thianghlim a nih avangin, Pathian chĕnna – Pathian in kan taksa a thianghlim rualin kan khawsakna kan in leh a vel te, kan bungrua leh silhfente a faiin a thianghlim tur a ni.

4. Khawtlang leh tuallai, Office pawh:
Kan tuallai, kawng, bazar, restaurant leh Office te hi keimahni ṭheuhin kan vawngfai tur a ni. Mimal ṭheuh hian faina leh thianghlimna hi khawtlangah pawh mahni inchhung angin vawng ila chuan, Department-in thawktu a hrana rawih a ngai miah lo tur. Khawtlang lama kan chet dân hian Thianghlimna lamah hmasawn kan ngaihzia a la lantir tam hle.

5. Rilru, ṭawngkam leh thusawi lamah:
Kan ngaihtuahna leh rilru lam hi a thianghlim loh chuan kan thusawi duh daàn te, kan sawi duh zâwngte hi a thianghlim lo ṭhin. Kan ṭawngkam chu chia al, khawngaihna tel ni zel rawh se.

6. Duhâmna leh châkna sual lakah:
Tunlaia kan ramin thlemna a tawh hautak ber pakhat chu sum îtna leh duhâmna hi a ni awm e. Hei hian châkna sual chi hrang hrang leh mipat hmeichhiatna hman khawlohna chenin a keng tel nghak bawk.  Rawngbawltu tam takte pawh he Setana tawktarhah hian an âwk mek a ni. He tisa châkna leh duhamna nun hi a bawlhhlawh a, kan chĕtzia zawng zawnga kan thianghlimna tur a dal tlat ṭhin a ni. Chuvangin, min kotu a thianghlim anga kan thianghlim ve theihna turin a daltu nun ṭha lo zawng zawng hi dah bo ila, fa tihawihte angin kan chetzia zawng zawngah i lo thianghlim ve tawh ang u.

“Mi zawng zawng nêna inremna leh thianghlimna ûm rawh u, chumi thianghlimna lovin tu mân Lalpa an hmu lo vang,” (Hebrai 12:14) tih a nih kha.

I hun tithianghlim la, Lalpa pâwl fo rawh,
Amah chu kumkhuain ring tlat zĕl ang che;
Pathian fate ṭhian la, chak lo ṭanpuiin,
Ama malsawmna chu i lo chan theih nân.
Amen.

Leave a Reply

Your email address will not be published. Required fields are marked *

error: Content is protected !!