PA HNEN THLENNA KAWNG

Upa K.Zalawma

“In thinlung mangang suh se; Pathian in ring e, kei pawh mi ring ve rawh u. Ka Pa inah awmna tam tak a awm a, a awm loh chuan ka hrilh tawh tûr che u a ni; in tân hmun siamin ka kal dâwn hi. Tin, in tân hmun ka han siam chuan, ka lo kîr leh ang a, ka hnênah ka la ang che u; ka awmnaah nangni pawh in awm theih nân. Ka kalna tûr a kawng chin in hria e,” a ti a. Thoman a hnênah, “Lalpa, i kalna tûr chin kan hre lo asin; a kawng engtin nge kan hriat ang?” a ti a. Isuan a hnênah, “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo. Kei mi hria ni ula, ka Pa pawh in hre tawh tûr; tûn achinah amah in hria e, amah in hmu tawh bawk,” a ti a. Johana 14:1‭-‬7.

Lal Isuan a chunga thil thleng turte fiah takin a zirtirte a hrilh ṭan ta a. Chung chuan an thinlung a timangang tih a hria a, “In thinlung mangang suh se, Pathian in ring e,” a tih bâkah, “Kei pawh mi ring ve rawh u,” tiin a thlamuan a ni.

Pathian hnenah awmna tam tak a awm tih Isuan a hrilh a, misualte tan hmun a awm ve loh avangin an tân hmun siama a kal tur thu a hrilh a, an tân hmun a siam zawh chuan an mahni la turin a lo kal leh dawn thute a hrilh a; “Ka kalna tur a kawng chin inhria e,” a ti a.

Thoman a hnenah, “Lal pa i kalna tur chin kan hre lo asin, a kawng chin engtinge kan hriat ang?” tiin a zawt a.
Lal Isuan, “Keimah hi kawng leh thutak leh nunna chu ka ni, keimaha kal lo chu tumah Pa hnenah an thleng ngai lo,” tiin a sawi ta a ni.

Thoma hian hre lo nih hreh miah lova Isua kalna tur a zawt ngam hi a fakawm hle mai.
Kei ni ve chu hre lo nih hreh si hriat tak tak nei mang lo te kan ni a. Thoman a zawh a zarah Lal Isua hi Kawng leh Thu tak leh Nunna a ni tih leh, Amaha kal lo chu tuman Pa hnen an thlen loh tur thu te a sawi phah ta a, a va vanneih thlak em!

Isua kalna kawng chin:
Lal Isua kawng chu misualte chhan chhuahna kawng a ni a, kawng awlsam a ni lo. Van ropuina leh chawimawina hlîpin tlâwmna nun nĕn khawvelah a lo kal a, a nausen lai aṭangin tihhlum tuma zawn nghal a ni a, Lei lal laka humhimna kawng zawhin Aigupta ramah tlan bopui a ni.

An lo haw leh hnu pawhin Judai ramah Heroda fapa Arkelausa a lal avangin Galili rama Nazareth khuaah an kal ta a.
Rawng a bawl chhûng zawng khan mi tâna thawk rim leh dam lote ti damin Chanchin Ṭha a hril a, Sakhaw hruaitute duh loh leh man tuma phiar a tâwk reng a, a hun tâwpah a zirtirte hnena a lo sawi tawh angin tih hlum a ni dawn, a kalna kawng chin pawh an hre ve tawh turah a ngai a ni ngei ang.
Mahse Thoman an hriat loh thu sawi pahin a zawt ta nghal a nih kha.

Lal Isua kawng chu Kross kawng a ni a, thihna kal tlanga nunna a siam dawn avangin Kros kawng kha a zawh a ngai a ni.

Kawng leh Thutak leh Nunna:
Lal Isua chuan mihringte tana kalna tur leh nunna tur, thutak (truth) a nih thu a sawi hi sawi belh a ngai tawh chuang lo ve.

Kawng leh Thutak leh Nunna -Lal Isua hi ringtuten kan tlan pĕl ang a, keimah ni nuam tih zâwng leh ṭha tih zâwng kawng lamah kan kal vak ang tih a va hlauhawm em?

Kan zui ber Isua kawng chu hmuhsitna, mite nuih zat leh engdawng hlawhna kawng, mahni inphata ni tin mahni Kraws pua midangte tâna nun pĕkna kawng, thih thlenga rinawm taka Pathian tâna nunna kawng a nih avangin; chu kawng chu kan zawh ve mĕk a nih hi.
He kawng ni lova, a pumpelh leh a nuam lam kawng chuan tumah Pa hnenah a hruai thleng dawn si lo.

Lal Isuaa kal hi Pa hnen thlenna kawng a ni e.

I kawng hlîngin lo khat mah se,
Aw, Lalpa lû chu ngaihtuah la;
I rilru tilungngai mahse,
Mi thianghlim zâwk mah a chhun ta.

Hrehawm mahse thawk zĕl ta che,
Ṭawngṭai – engmah theihnghilh lovin;
I chawlhna ni a lo hnai e,
Nghak hrâm la, phun nawi lo vang che.

Leave a Reply

Your email address will not be published. Required fields are marked *

error: Content is protected !!