NUN THAR

-Upa K.Zalawma

Tin, Krista thlamuanna chuan in thinlungah ro rêl rawh se, chutiang ni tûrin taksa pumkhata koh in ni rêng asin; lâwm nachâng hre bawk rawh u. Kolossa 3:15

Pathianin mihringte hi maltlat turin min siam lo va, a huhova awm tur leh inpui tlâng turin min siam a ni. Chutiang chuan chhungkua, khawtlang leh ram leh hnam ang tea awmho turin min siam a ni.

Chutih rual chuan inngeih leh pumkhata awm erawh a har em em si. Mi kan awmkhawm tam poh leh ngaih dan leh duh dan a tam ting mai a, mahni ngaih dân hi ṭha ber nia ngaih tlat hi a awl phian lehnghal a. Midang ngaih dân pawm thei mi nih hi awm ho leh khawsa ho tur chuan a ngai a ni.

Mihring rilru leh nunphung pangai hi chu suala tlu chhe tawh a nih avangin, sualna chi hrang hrang duh leh àwn reng ani a; châkna sual leh ropui leh thu neih duh mi, It’s my life tih rilru pu ṭhin a ni.

Chu khawvel nun zia chuan awm ho leh inpumkhat a ti harsa fo va, nupa inṭhenna te, chhungkaw keh darhna te, pâwlho inngeih lohna te, khawtlang lungrual lohna te, ram leh ram innghirnghona te a thlen ṭhin a, Pathian taksa Kohhranho ngei pawh hi a ti ṭhen darh fo ṭhin. Hei hi khawvel nun zia a ni.

Pathian thu chuan sualna leh a hnathawh chi hrang hrang, mahni inngaihpawimawh berna thinglung leh thu ber nih duhna hian mihring a tihpumkhat loh ṭhin avangin, chung chu tlan san a, nun thara nung turin min ti a ni. Chutianga kan awm theih nan, “Krista thlamuan na chuan in thinlungah rorĕl rawh se, chutiang ni turin taksa pumkhata koh in ni rĕng asin; lawm nachâng hre bawk rawh u.” min ti a nih hi.

Taksa pumkhata koh tih awmzia chu, Pathianin amah nĕn inrem leh pumkhata kan awm theih nan Lal Isua taksa ngeiin min rawn ko ang khan, keini pawh taksa pum khat ni turin mi ko tihna a ni ang. Taksa hi, pĕng hrang hrang, inang lo tak tak inzawmkhawm a ni a, chu chuan mi ang a nihtir a, kut hmawr pakhat tĕ pawh hi lo kim lo ta se, mi piangsual kan ni mai.

Sual hnathawh hian Min va tipumkhat lo nasa em!  Chhungkua, khawtlang leh ramah harsatna min va thlen nasa em! Krista taksa – Kohhran ngei pawh hi taksa pumkhat nih a va har em!  Piangsual hmĕl kan lo pu reng lo maw? Heng harsatna zawng zawng hneh theihna chu Krista thlamuannain kan thinlungah ro a rĕl hmasak phawt hi a ni. Chutah chuan   NUN THAR a lo chhuak dawn a ni. Tichuan, Krista thu chu finna tin rengin keimahniah a lo awm ṭeuh ang a, Lapa chu thinlunga khawngaihna neiin hla kan saksak ve thei tawh ang.

Leave a Reply

Your email address will not be published. Required fields are marked *

error: Content is protected !!