MIT TINRĔNGIN AN LA HMU DAWN

-Upa K.Zalawma

Ngai teh u, ani chu chhûmte nên a lo kal dâwn e; mit tinrêngin an hmu ang a, a chhuntute ngei pawh khân; khawvêla hnam zawng zawngin amah an ṭah bawk ang. A ni, Amen.  “Kei Alpha leh Omega ka ni,” Lalpa Pathian, awm mêka leh, awm tawha leh, lo la awm tûra, Engkimtitheia chuan a ti a ni. Thu Puan 1:7‭-‬8

Tirhkohte Thiltih 1:9-11-ah chuan Isua vana a lawn chu chhumin hmuh phak lohva a hruai tâk thu leh, vana a chho ang bawka a lo kal leh ngei tur thu vartirhkohte (puanvar sinte) sawi kan hmu a. Thupuan buah hian Johanan chhumte nen a lo kal  dawn a, mit tinrengin an hmu dawn a ni a ti.

Lal Isua a lo kal leh hun chuan mi zawng zawng ro a rel sak ang a, an dam laia khua hmu ve thei lo mitdelte pawhin, Isua khawvela a chĕn laia amah hmu ve hman lo leh, hmu lova ringtu zawng zawng leh, amah diriam taka khengbettute leh a nâka chhuntu pawhin, mit ngeiin kan la hmu dawn a ni.

Heta kan hmuh leh hriat theih pakhat chu, mi tinin Lal Isua hi kan mit ngeiin kan hmu vek dawn tih leh, taksain kan la tho leh vak dawn tih hi a ni.

Tho leh taksa awm dan chu Luka ziak bung 24:36-43-ah kan hmu a, helai thu lehlin fuh tawk loh avang hian Isua hi thlarau ang leka ruh leh tisa nei lo emaw ti an awm nual mai. Tho leh Isua chuan, “In mi hmuh ang hian, thlarau chuan ruh leh tisa a nei ve lo ve, ka kut leh kete hi en teh u, kei chuan ruh leh tisa ka neih hi,” a ti a ni.
Tho leh taksaah chuan mitdel an awm tawh lo ang a, kan mit-in Isua kan hmu (every eye shall see him) vek dawn a ni. Chumi hunah chuan taksa thawh lehna ring thei lote pawhin an awih ve ngei tawh ang.

Lalpa Pathian, awm mĕka leh awm tawha leh lo la awm tura (awm loh lai nei ve lova) chuan, “Kei a bul leh a tawp (Alpha leh Omega) ka ni,” tiin Johana hnenah a rawn sawi a, awm ṭan ni leh tawp ni nei lo Pathian hi, ni leh thla, hun leh kum bi chhiarna ram khawvel aṭang chuan hriat fiah zawh rual a ni lo va, a thu pawh mihring ṭawng chuan sawi fiah sen rual a ni lo. Chuvangin Pathian inpuanna thu Bible-in a sawi awiha rin mai hi engthawlna a ni e.

Leave a Reply

Your email address will not be published. Required fields are marked *

error: Content is protected !!