MI ZAWNG ZAWNG CHUNGA THIL ṬHA TIH

Upa K.Zalawma

Tu sual mah suala thungrûl lo tûrin fîmkhur ula, eng lai pawha thil ṭha intihsak tawn zâwkin mi zawng zawng chungah thil ṭha ti zêl rawh u. 1 THESALONIKA 5:15

Thuthlung hlui lamah chuan miin a ṭhenawmte tih chhiat tuma a hek chuan, roreltu hmaah an ding dûn anga. Roreltu chuan ngun takin a chhui ang a, a hekna chu dawt a nih chuan a hekna ang chiah chuan a chungah tih tur a ni. Mit aiah mit, ha aiah ha, kut aiah kut, kei aiah ke, nun aiah nun a ni ang tih kan hmu a (Deut 19:16-21). Mi tihchhiat an tumna aia nasa zawka tih let erawh danin a sawi lo.

Lal Isua erawh chuan hmĕlmate hmangaih zawk tur leh, an ṭhatna tura ti zawk turin min zirtir a ni. Keini chuan mitah mit, ha aiah ha tih aia nasa zawk daihin misual nia kan hriat te chungah hlei kan lèn ṭhin. Tirhkoh Pawla pawhin tu sual mah suala thungrul lo tura fimkhur turin leh, englai pawha thilṭha intihsak tawn zawk tur te, mi zawng zawng chunga thil ṭha ti zawk tur tein min zirtir a ni.

Keini chuan kan thiam loh dan inang rengah pawh kan khingpuite aia thiam zawk niah kan inngai fo ṭhin. Motor ka chuan tawhna ṭhenkhatah, inpelh sual deuh emaw, side lak loh deuh chungchangah emaw, hmaa mite lehpelh duh changa min pass mai loh chang emaw te hian, Driverte hian mi dang zawk kha an melh rumin an rĕl zui fo ṭhin. Vawikhat pawh kan Driver kha a hmanhmawh deuh va, kan hmaa motor kha horn a pe ṭhin a, min pass har deuh a, remchang a tih huna a han din chuan kan tlan pel mai dawn emaw ka tih laiin motor hmaah chuan kan ding ve ta a.

Kan Driver chu chhukin chu Driver chu a han bĕng leh tĕ tĕ a, kan kal leh ta a. Kei pek chuan, kan Driver chu a hmanhmawh hle emaw ka ti a, ‘ding lovin tlân zĕl ilang chuan khuuuuúah kan thleng tawh tur’ ka lo ti rilru a. Mi chunga kut thlaktute pawh hian ‘mit aiah mit leh hnâr, ha aiah ha leh kut’ tih ang ziazângin hleihluak takin kan che fo ṭhin.

Pathian thu chuan tú sual mah suala thungrūl lo tura fimkhur tur leh, mi zawng zawng chunga thi ṭha intihsak tawn zawk turin min ti a ni. Miin kan chunga thil ṭha an tih hian kan lawm ṭhin; lawm mai ni lovin mahni theihna lam lam zawngin thil ṭha i tilĕt ve ṭhin ang u.

Vana ro nei tur phei chuan, rulh lĕtna tur nei ve lote chungah ngei thil ṭha ti turin Lal Isuan min zirtir a ni. Mi chungah ṭhil ṭha. kan tih ṭhin chuan, kan lamah an ṭang ṭhin. Hmelma hnehna ṭha ber chu an chunga ṭhil ṭha tih hi a ni.

Ṭawngkam ṭha ringawt pawh hian rilru ná a thàwi dam ṭhin.

Leave a Reply

Your email address will not be published. Required fields are marked *

error: Content is protected !!