LALPA DÂN

Upa K.Zalawma

I dân chu ka lâwmna ni suh sela chuan, Ka hrehawmnaah khân ka boral tawh tûr a ni.  I thununna thute chu eng tikah mah ka theihnghilh lo vang; Nangin chûng chuan mi tiharh ta si a. Sam 119:92‭-‬93

Mihringte hian lawm zawng chi hrang hrang kan nei ṭhin. Rom vanglai khan an lawm zawng chu ennawm en a ni a, an mit a râwp tawlh tawlh a, ransa in sual te, mi chak insual leh inbei te kha, a chak zawk zawn nana in beih kha an duh tâwk lo va, a chak zawkin a chak lo zawk kha a that/tihlum ngei tur a ni. A tihhlum duh loh chuan, a chak lo zawk khân a rawn tihlum leh zawk mai tur a ni. An inbeih/insual laia a chak lo zawk a tlûk ve leh, a entu mipuite chuan “that rawh that rawh” (kill him kill him) tiin an lo au ṭhup ṭhup ṭhin. Thisen in chhuah lai hmĕl hi hmuh an châk ber a ni.

Misual Kross-a khenbeh tur an hruai laia an tihduhdah leh an khenbeh ná tuar au lai hmĕl te hi ennawm/hmuhnawm an ti a; a en turin an pungkhawm luih luih ṭhin. Chutiang bawkin tunlai pawhin inkhel te, insual(fighting) chi hrang hrang te, concert te kan lawm em em a, intihhlimna chi hrang hrangte hian min hip em em a ni.

Sam ziaktu erawh hi chuan Lalpa dân (law) hi a lâwmna ber a nih avangin  nunna atân a hmang thung a. A hrehawm tuarna zawng zawng, boralpui thama nasa pawh Lalpa dán (moral law) kha a lawm na a nih tlat avangin nun nan a hmang a ni.

Kei ni ve hi chuan he khawvel dân hi kan ngainat leh lawm ĕm avang hian kan hrehawm phah thung a, kan boral phah thung si; Pathian miten Lalpa dân an dampui laiin khawvel dan- nawm chenna leh duhâmna hi kan thih phah zawk ṭhin, a va pawi em!

Pathian mite chuan, “I thununna thu (commanment)-te chu ka hre reng ang, chung chuan mi tiharh ṭhin a ni,” an ti a, lungngaihna leh hrehawmna te, hmuhsit leh sawichhiatna te an tawrh lai pawhin Lalpa thuin a thunun tlat a, hausak leh ropuina te, fak leh chawimawi an hlawh pawhin Lalpa thu chuan a thunun tawh a, Setana thlĕmna thangah an âwk duh ngai lo.

Kan tunlai khawvel, huau huau leh nawmchenna chi hrang hrang, ei leh in, zûk leh hmuam, ruih hlo leh sex, sum leh pai leh silh leh fèn lama khawvel dân lamlian zaupui mai zawh aiin, Lalpa dân chu kan lawmna lo ni zawk se; a thununna thu chu kan nunna atâna hmangin, kan lungngaih leh mangan chang pawhin min tiharhtu lo ni zĕl zawk rawh se.

Leave a Reply

Your email address will not be published. Required fields are marked *

error: Content is protected !!