LALPA CHI THLAH

Upa K.Zalawma

Nimahsela, Lalpan ani chu vuak thitlin a duh rêng a ni; a tina ta ngei a. A nunna chu sual tân thilhlana i hman tikah, a chi thlah chu a hmu tawh ang a, a dam chhûng nite chu a tisei ang a, Lalpa duh zâwng chu a kutah hlawhtlingin a awm ang. Isaia 53:10.

Tin, an ei laiin Isuan chhang a la a, mal a sâwmsak a, a phel a; tin, zirtîrte hnênah chuan a pe a, “La ula, ei rawh u; hei hi ka taksa a ni,” a ti a. Tin, no a la a, lâwm thu a sawi a, an hnênah a pe a, “In zain in rawh u; hei hi ka thisen, sualte ngaihdam nâna mi tam tak tâna chhuak tûr, thuthlunna chu a ni. Matthaia 26:26‭-‬28.

Lal Isua lo kal hma kum 700 daih tawhah khan Isaia chuan a zawlnei mitin kan tuar ai tuar a, Pathian fa kan nih leh theih nâna Lalpa kut tuar Lal Isua chi thlah, chung lam aṭanga hrin kan nihna tur chu a ma hun laia mi ang maiin a lo aupui tawh a. Thuthlung Hlui hun bi a lo kim khan mi zawng zawng tân chu hrilhlâwkna chu Lal Isuaah a lo thleng famkim ta a ni.

Lalpan vuak thitlin a duh rĕng a ni:
Kan bawhchhiat avanga hremna hi kan chungah Pathianin nghat ta se, chhandam tur awm lovin kan boral vek dawn a ni.

Thil tihsual avanga Pathian laka thi tawh kha sual lamah kan nung si a, chatuana thihna leh boralnaa kan kal loh nan, Lal Isua chu Pathianin vuak thitlin a duh a, a ti ta ngei bawk a. A nunna chu lakin a awm a, thihna chelh hlen rua loh a nih avangin thihna hnehin Pathianin a kai tho leh ta a, chatuan atân a nung ta reng a ni.

Sual tâna thilhlan:
Thil tisualtu ngaihdamna chu ran nunna thisen Pathian hnena inthawi nâna hlan a ni ṭhin. Chu chuan, Lal Isuan a nunna hlân ngeia mi zawng zawng tâna Pathian vuak a tawrh tur a lo entir a ni.

Lal Isua nunna chu sual tâna thil hlana kan hman chuan, Pathianin Lal Isuaa min hrin tharna kan chang tihna a ni a, keimahniah Pathian chi a lo awm ta a, Lal Isuan a hlawkna, a thih chhan ngei kha a tĕl let ve ang a, Lalpa fak leh chawimawi a hlawh phah dâwn a ni.

Lal Isua thihna hi a pawimawh lo ni lovin, a nunna hi sual tâna thil hlana hman tur thu kan changthlanah hian kan hmu thei a ni. Ran thisena inthawina pawh hi, Pathian hnena an hlan tak chu a nunna (a thisen) kha a ni a. Lal Isua nunna kan tih hian a thisen kha a kawk tel a ni tih hria ila.

Lal Isua taksa leh thisen thuthlunna:
Zanriah hnuhnung an kil lai khan Lal Isuan, chaw atana an hman ṭhin chhang a la a, mal a sawm a, a zirtirte hnenah laa ei turin a ti a, a taksa entir nân a hmang a; kan ni tin nun nân chaw kan mamawh angin, chatuana kan nun nân Lal Isuan a taksa min hlan a ni.

Chaw hmeha an hman ṭhin wine (no) kha a la a, lawm thu a sawi zawhin a zirtirte a pe a, “In zain in rawh u, hei hi ka thisen, sualte ngaihdam nâna mi tam tak tâna chhuak tur thuthlunna chu a ni,” a ti.
Tun hmain thuthlung rĕng rĕng chu thisena tihngheh zĕl a ni ṭhin.

Thuthlung Hluia ran thisen thuthlunna chuan thlamuanna nghet a pe zo lo va, Lal Isua thisen lo entir lawkna a nih angin Lal Isua chuan ‘mi tam tak tâna chhuak tur thuthlunna chu a ni’ a rawn ti ta ni.

Lalpa chithlah:
Vawiinah hian Lal Isua tuarna, a taksa leh thisen kan aia a pĕkna hi ‘sual tâna thilhlana’ hmang a, kan aiawha atana ringtu chu Pathian fa, Pathian in Lal Isuaa a chithlah an lo ni ta a, an sualte ngaihdam saka tlen fai sak an lo ni ta a ni.  Lal Isua nunna hi i sual tâna thilhlanah hmang ve rawh le.

Juda maichâm chunga,
Ran thisen luangtawh chuan;
Rilru a thlamuan zo lo va,
Sual kai a tibo nâng.

Vân Beram No zet hian,
Ka sual zawng a kalpui;
Krista inthawina thisen chuan,
Sual ser a tireh thei.

I hmaah inchhirin,
Ka rinna kur phar hi;
I lu chhîp hlûah lo dahin,
Thupha ka chawi a ni.
Amen

Leave a Reply

Your email address will not be published. Required fields are marked *

error: Content is protected !!