LALPA BENGA HRIAT

-Upa K.Zalawma

Chu vâng chuan aw Lalpa Pathian, nang chu i ropui a ni; kan benga kan hriat dânin nangmah ang rêng rêng an awm lo va, nangmah lo chu Pathian rêng rêng an awm hek lo. 2 Samuela 7:22

Mihringten ziak leh chhiar kan thiam hma chuan thuin chanchin hi an lo inhlân chhâwng ṭhin a, thawnthu kan tihte hi chanchin hriat reng nân an lo inhrilh chhâwng zĕl ṭhin. Ziaka awm ta lo na ná ná chu hriat dan leh sawi dan pawh a hrang ta ṭhin a ni. Heta pawimawh pakhat chu benga hriat hi a ni. Thil chhinchhiah zel tur chuan benga riat ngei a ngai ṭhin. Pathian phei chu mita hmuh theih a ni si lo va; ziak leh chhiar an lo thiam hnuah pawh hmuh leh khawih theih loh chu benga hriat ngeia inhrilh chhawn loh chuan hriat (hear) theih a ni lo.

Lal Davida lawmthusawi ṭawngṭainaah pawh hian, “…kan benga kan hriat dânin nangmah ang reng reng an awm lo va, nangmah lo chu Pathian reng reng an awm hek lo….” a ti a ni. Israelte chuan an faten thil an hriat theih tirh aṭangin an beng hriat ngeiah, ” …..Lalpa i Pathian chu i thinlung zawng zawngin, i rilru zawng zawngin, i tlarau zawng zawngin, i chakna zawng zawngin i hmangaih tur a ni…” tiin an zirtir ṭhin. Chuvangin Lal Davida pawhin Pathian hnenah, “Kan benga kan hriat danin…nangmah ang reng reng an awm lo” a lo ti thei a ni.

Pathian hi kan beng ngei hian Pathian a nih zia kan lo hre ve tawh em? Kan fate lehkha an thiam loh hlauin sikul mai duh tawk lovin in lamah pawh kan zirtir ṭhin. Hetih lai hian an beng hriat ngeiah Lalpa hi PATHIAN A NI tiin kan hrilh ve ngai em? Kristian chhungkua din tur chuan a bul berah kan beng ngeia Pathian hi Pathian a nih thu leh amah ang reng reng pathian dang an awm lo tih kan hriat a pawimawh a, kan fate pawh kan hrilh hmasa ber ang a, chumi hnuah a thu leh a dân kan hrilh leh tur a ni ang. Ziak chhiar thiam lo leh chhiar thiam hma pawhin, mitdel pawhin he zirtirna hi an dawn hmasak hi a ngai a ni. Hetiang atan hian Sunday School kan nei hi aṭangkai em em a ni.

Communist-hoin thluak sûk an tih ṭhin pawh kha, Kristian lungin tăngte ‘Pathian a awm lo…’ tih ri chhun zan zawma an hriat tura play reng kha a ni mai. Miin benga an hriat ngun apiang khan an rinna a kaihruai ṭhin a ni.

Ni tin vawikhat tal Lalpa hi PATHIAN a ni tih sawi leh hriat hi a va pawimawhin a va ṭul em!

Kan ram ṭhang zelah hian kan state sorkar pawh hi Pathian tak ni lo, pathian dang ringtute kutah a tlu lut thei. Sum leh pai te, hnathawhna tur post te hmatheha hmangin thlemna kan tawk mek a ni. Hetih lai hian ziak leh chhiar chauh ni lovin, kan kâ ngei hian Lalpa hi Pathian a nih thu hi mitin hriat turin i puang chhuak zel ang u.

Leave a Reply

Your email address will not be published. Required fields are marked *

error: Content is protected !!