Mizo sermon – A thupekte chu a khirh si lova – Lal Ramhluna Ralte

-Lal Ramhluna Ralte

I-Johana 5:3 “Pathian kan hmangaihna chu hei hi a ni, a thupekte kan zawm hi; a thupekte chu a khirh si lo va.”

Kan sermon ziah thenkhat comment-ah chuan, “A va tha em, mahse a va har si em!” tih a awm zauh zauh a. Hei hian ngaihtuah a tithui hle mai. Pathian thu awih mai hi nge khirh zawk, setana thupek awih hi tih i lo ngaihtuah teh ang.

Johana hi chuan, “Pathian kan hmangaihna chu a thupek kan awih hian a ni a, a thupek chu a khirh si lo va.” a ti thèn mai!  Keinin khirh leh harsa kan tih hi Isua bula awmte chuan khirh an lo ti ve lem lo a nih chu! I-Johana 5:4 kan chhiar zawm chuan, “Pathian hrin tawh phawt chuan khawvel a ngam zel si a; hei hi a ni, khawvel hneha ngamna chu, kan rinna hi.” a ti a. Khawvel ngam theihna neitu chu Pathian hrinte hi an lo ni reng mai! Keinin kan ngam lo, kan thei lo kan tih lai hian ,”Kan ngam, kan thei” titu an awm theih si chuan kan inenlet a va ngai awm ve. I-Johana 3:9ah phei chuan, “Tupawh Pathian hrin chuan Pathian chi amahah a awm reng avangin thil a tisual thin lo; Pathian hrin a nih avangin thil a tisual thei hek lo.” a la ti deuh deuh lehnghal! Thil hi tihsual theih a nih laiin thil sual tih erawh a hlauhawm zawk, thil sual kan tih theih fo hian Pathian hrin niin kan la inchhâl ngam zel dawn em le?

Thil sual ti tura a harsat leh a khirh tehlul nen hian awlsam zawkah kan ngai tlat mai si! Entirna pakhat i lo sawi teh ang. Mi thil ru tur chuan a neitu awm loh lai kan chàn a ngai a, zan reh tak tak thleng mengin zan khaw vawt leh thim thamah kan chet vel a ngai a; in rawkna tur hmanrua tuboh, chem, pliers etc. kan ngaihtuah a ngai a; in neitute awm loh hun emaw an muthilh hun kan nghah a ngai a, min hmutu an awm leh awm loh kan thlithlai vek a ngai a, an tukverha lawn nan leihlawn ngaihtuah a ngai a, kan tih tur kan tih zawhah hmanhmawh baklênga kan tlan chhiat a ngai leh thin. Rûkruk leh mi rawk chu a va khirh si em! “Ru suh” a ti a, hetia kan awm pangngai anga ruk loh mai hi a lo awlsam zawk daih a lo ni.

Tualthah tumin a hun a khawhral nasat zia te, inngaihna sual tih chingten an hun leh ngaihtuahna an hman nasat zia te, mi thil kan awh avanga nei ve tura kan beih nasat ziate hi a va khirh zawk si em! Pathian duh loh zawng titura kan ngaihtuahna, kan hun leh kan beihna hi a lo khirh fe zawk tih hi lo ngaihtuah chhunzawm ve teh.

Pathian chuan heti mai hian min chhandam a, heti mai hian rinnain kan lo awih a, Amen kan lo ti mai a, a khirh lo zawk hle lo maw? A thupekte zawm tura tan kan lo lak ve chiam a ngai lo, Mari anga “Amen, i thu ang zelin ka chungah thleng rawh se,” tih mai hi a hahdamthlak zawk teh a sin. Pathian hrin, piangthar inti chunga hlep ruk tur kan dap reng a, uire tur leh ngaih tur kan melh reng thei a, mi rel leh sawichhiat kan ching reng anih chuan kan inenna tur darthlalang fiah ber Isua kan en a va mamawh dawn em! Amahah chuan sual leh bawlhhlawh reng reng a awm ve lo va, elrelna leh sawichhiatna a awm lo va, a kaah ngamthlemna thu reng a awm hek lo, mi hauhva a awm laiin a hau ve lo va, fel taka ngaihtuahtu hnenah chuan a inkawltir zawk thin.(1Pet.2:21-24).

A hniaka kan zuina tura entawn tur min hnut chhiah chu khi khi a ni a. Chumi tihpuitlina a awm theih nan Sual lamahte thi tawhin felna lamah kan nun theih nan amah ngeiin thingah khan a taksain kan sualte a phur a; amah vuakna vualte chuan tihdamin kan awm ta tih hi hriatreng a pawimawh em em a ni.

Johana anga Lalpa thupek khirh ti lova kan zawm ve reng theih nan Lalpaah chakna dil ila, a khawngaihna vang chauha chhandam kan ni tih hi i theihnghilh ngai lo vang u.

Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!