Mizo pipute ngaihhlut zawng thu leh hla atanga lang thei te – Mizo thil ngaihsan zawng

-Lalrammuana Sailo

Hnam tin hian ngaihsan zawng leh ngaih pawimawh zawng an nei ṭheuh a, an chenna ram leilung, sik leh sa, anmahni hual vel tu thing leh mau leh ramsa te leh an chhehvela cheng hnamdangte awmdan chuan an khawsak dan leh rilru puthmangah kawngro suin an ngaihsan zawng thlengin chung thilte chuan a nghawng ṭhin.

Entirnan, indona leh hmun ralṭi a awm te tan chuan Pasalṭha leh hruaitu ropuite an ngaihsanawm ṭhin a, chutih rualin hmun ralmuangah erawh mi khawsa thei te, mi dang te mit leh beng ti tlai thei te leh hmelṭhaten ngaihsanawm an hlawh ṭhin a ni. Thu leh hla, a bikin Mizo pipute thu leh hla aṭangin Mizote ngaihsan zawng thil ṭun ṭumah hian sawi chhuah kan han tum dawn a ni. Pi pute ngaihsan zawng tia kan sawi hian a sawitu a zirin an ngaihsan zawng nia kan hriat pawh hi a inang lo thei viau awm em.

 1.Hausakna –

Hmanlai Mizote khawtlangah chuan hausakna tehfung langsar tak te zingah Buh, Sial, Ṭhi, Dar neih te a tel a, silai hi thil vang leh neih har tak a nih avangin a hlu a, silai nei thei chu an langsar hle bawk. Hausa te inelna leh inphochhuahna chu khawtlang hrai tam thei nihah a ni a, hausakna chu kawmpui mai loin vantlang tan malsawmna nih tumin an inhmang chhuak ṭhin a ni. Khuangchawinaah chuan heng Ṭhi, Dar, Pawisa, Bel, Darkhuang leh Silai te hi mipuiten an lo lak turin an vawrh darh chuai chuai a, Khuangchawinu, khuangchawipa te chu midangten an zar zo tur an neih ṭhin avangin an ngaisang em em a ni. Chu chuan an hausakna a tihlan chian rualin an dinhmun siamna a ni bawk. Mizo hla hlui kan en chuan Mangkhaia Zai aṭangin Mangkhaia te chhungkaw hausakna, an ṭhi leh dar ngahna chu tlangthang hial khawp a ni tih kan hre thei a. Khawnglung run ṭuma Pawi hoin sal atana an hruaite pawh kha an sal man chhungte chuan ro thilin rawn tlan leh tura an tihna an hla phuah aṭang hian a hunlaia an thil ngaihhlut te chu a hriat theih bawk. A hla hi lo tarlang ila:

In ngunte, ṭhite in Liando dar, hlawh ang in phal chuan e,
Lentlang liam hnu i tuai, bing ang a lo kir leh ang.

Liandova te unau kha fahrah rethei tak, mite hmuhsit em em mai an ni chung khan an lal fanu Tuaichawngi khan Liandova te unau an lo hausak tak thu a hriat hnu kha chuan Liandova kha pasalah hial a thlang a. Retheihna leh mite hmuhsitna ata an dinhmun siam ṭhatu ber pawh an mizia ni loin an hausakna kha a ni. Chu chuan hausakna an ngaih pawimawh ve zia leh an dahsanzia a tarlang chiang hle.

Chawngi, Chawngvung man tam sumhluani,
Ṭhi ka peka duh lova, dar ka peka duh lova,
I nun kan darhuai kher a ngen e,
Chawngvung man tam sumhluani.

Tumchhingi leh Raldawna thawnthuah chuan Tumchhingi chuan ṭhi a awrhin ngun a bun a, chu chu Phungpuinu pawhin a awt ve hle tih kan hmu a. Lalruanga thawnthuah Kelngoteii chu a ṭhiannu nen ngun chher thiam panin khaw dangah an kal tih kan hmu bawk. Ṭhi leh dar lam chi hi a van avangin mi hausa tak, ro thil ngah tan lo chuan neih mai mai theih a ni lo a. Mi nazawng neih ve loh ṭhi leh dar an ngahna chuan an dinhmun a chawisang a. Ṭuanpuii leh Chhawrtuineihlala te thawnthuah Ṭuanpuii te chu mi hausa tak ṭhi leh dar tam tak nei ni mahse Chhawrtuineihlala nena an inneih chuan a ṭhi leh dar zawng zawng te chu a dah bo a, chuvang a hausakzia hre lotu Chhawrtuineihlala nu chuan a hmusit em em a, a fate nupa chu a inṭhentir hial a. Mahse Ṭuanpuii haw tur ṭhi leh dar nena inthuam a han hmuh chuan a awt leh em em a, ko haw leh turin a fapa chu a tir tih thu kan hria a ni.

Hmanlai Mizote chuan anmahni kutchhuak hmangin an inthuam ṭhin a, a siam hna chu hmeichhe mawhphurhna a ni thung. Kan thawnthu te kan en chuan Ngaite, Ṭuanpuii, Kungawrhi, Tumchhingi, Vanchung nula te thawnthu leh a dang dangah hmeichhiate inthuam dan kan hmu a. A langsar deuh chu  ṭhi te, ngun leh banbun te, dawhkilh, samkhui leh bengbeh te a ni.

Entirnan, miin ‘Tawlhloh puan’ a sin chuan mi huaisen a nih a hriat a, ‘Thangchhuah kawr’ a hak chuan mi ropui, pialral thlenga ropui tur a ni tih a hriat theih a ni, Miin ‘Vakulchang’ a tawn chuan amah chu Lal a ni emaw a sa kah hmanga khawtlang lo hrai tawhtu emaw a ni tih a hriat theih a, ‘Chhawn’ a tawn chuan ral that tawh a ni tih a hriat theih a, ‘Zawngchal’ leh ‘arkeziak’ hmanga inchei thei te chu ral beihnaa kal tawh mi hmingṭha an nih a hriat theih a, heng mite hi chu mi naran tan cho mi an ni lo a ni.

2.Pasalṭha: Hmanlai chuan Pasalṭhate leh Nula hmelṭhate hi an ngaisang em em a. Miin fa a neih a, mipa fa a nih chuan ‘Sa kap thei tur, ral lu la tur, nula ngai thei tur’ tiin ṭawngṭhain an chhilh a, mal an sawm ṭhin. Pasalṭhate chu an ngaisangin an ngai ropui em em a, khawi hmunah pawh awm sela, mi zah leh biakrawn an hlawh ṭhin. Pasalṭhate hi khawtlang tan an pawimawh em em a, Sakawlh leh ral laka khawtlang muantu an nih avangin miin an ngaisang a. Lal pawhin a pasalṭhate zara tlang ṭhut thei leh ral laka him a ni tih a hria a. Chuvangin an thu leh hla pawh a ngaichang hle ṭhin. Khawtlang tana pasalṭhate an muanpuiawm em avang hian pasalṭha neih hlutzia hriain pasalṭha hmingthangte chu lal dangte pawhin an khuaa pem turin an thlem fo ṭhin a ni.

Tlangvalte rual elna leh intihsiakna ber chu sum leh paiah ni lovin, in leh lo ṭha ni hek lovin pasalṭha nih kawngah a ni a. Tlangvalte duhthusam ram chu pasalṭhate khawvel a ni a, an mangphan ṭhin ber pawh ral leh sa laka an huaisenna leh chungnunna tih lan chu a ni. He rilru ropui tak hi Mizo hla hlui tam taka a thupui ber a ni bawk.

3.Thangchhuah : Hmanlai Mizo nu leh pa, nula leh tlangval, pitar leh putarte duhthusam ber pakhat chu thangchhuah nu leh pa niha pialrala faisa ringa khawsak theih a ni. Hnam tin hian beisei ram kan nei ṭheuh a, kan pi leh pu te pawh kha an khawsak dan leh an puithunate thlir chuan mawlmang viaua an lan chang awm mahse an duhthusam ramah erawh hnamdang ang thoin thih hnua chawlhna ram awmin an ring a, chu chu ‘Pialral’ an ti a. Chuta kal thei tur chuan in lamah emaw ram lamah emaw ‘Thangchhuah’ nih a ngai a, chuta kalte tan chuan hnathawh hah a ngai tawh lova, faisa ringin thawk lovin an ei tawh zawkin an ring a. Chu hmun an suangtuah dan chuan an duhthusam sang ber ‘thawhrimna aṭanga chawlh an chakzia a lantir’ ni pawhin a sawi theih ang. Pi pute hmun ropui ber ‘Pialral’ chu Kristianten Vanram an suangtuah ang leh Greek hoin Elysium an suangtuah ṭhin ang hian mitin kal chakna hmun a ni a. Amaherawhchu chu hmunah chuan a thei leh tling fa Thangchhuah nu leh pa chauh an kal thei a ni.

Thangchhuah nih theih dan hi chi hnih a awm a, in lama thangchhuah leh ram lama thangchhuah te an ni. In lama thangchhuah tur hian mi neinung nih a ngai a. Sum leh pai nei kher lo tan pawh ranvulh leh buh leh bal lama hausak a ngai a. Chawnfangte, Sedawi chhunte, Zankhuang leh Mitthi rawp lamte an zawh vek a ngai a. Chung zawng zawng an zawh hnu chuan Khuangchawiin a hmawr an bawk ṭhin. Khuangchawinaah hian a tlem berah pawh sepa pathum, vawkpa pakhat leh vawkte pahnih talh a ngai a, sepui pakhat ‘tlangphal’ atan a ngai bawk. Heng thil zawng zawng hi an hlenchhuah theih chuan ‘Thangchhuah nu leh pa’ niin pialrala kal thei tawh tura ngaih an lo ni ta ṭhin a ni. Rev. Zairema chhinchhiah danin kum 1942-ah khan Farkawn lalin khuang a chawi a, kha kha khuangchawi kan hriat hnuhnun ber a ni ta a ni.

Pialral luh theihna kawng dang pakhat chu ‘ram lama thangchhuah’ a ni. In lama thangchhuah tur kha chuan mi neinung fal tan lo chuan a tlina han tlin chi rual a ni lo. Ram lama thangchhuah tur erawh chuan hausak kher a ngai lova, mi tam tak tak pialral kai ve theih an beiseina tinungtu a ni ngei ang. Ram lama thangchhuah nana sa kah ngai nia hriatte hi sawi dan a inang lo hlek hlek a, awmna hmun a zirin a danglam hret hret pawh a ni mai thei. A tlangpuiin Tumpang (Ramsial emaw Sele emaw) te, Savawm, Sakhi, Sazuk, Sanghal te hi thangchhuah nana kah ngei ngei ṭul a ni a, mi ṭhenkhat chuan Tumpang aiah Saza sawi tel zawkte pawh an awm. Tin, mi ṭhenkhat a thei fal deuh chuan ‘Thangchuang’ atan Rulngan leh Muvanlai te an kap ṭhin bawk. Miin hetiang a lo kah tel chuan pialral a luhna kawngah a Sazuk kah chungah chuangin sazuk ki hreuah chuan Rulngan chu a inkual ruah ang a, chung lamah vanlaizawl aṭangin Muvanlai chuan thlawh huala lo vengin ropui taka pialral lut turah an ngai a ni.

Thangchhuah nu leh pa chuan Mitthi khaw kawtchhuaha Pawla sai hlau lo leh inchhuang tak chungin an nun an hman theih phah a. An sakah emaw an khuangchawina chuan an thlarau nun thlenga awmzia nei phak tura an rin avangin chutiang ti hlawhtling thei te chu an ngaisang em em a ni.

4.Hmelṭha  leh mi chungchuang bikte an ngaisang hle bawk: Hmelṭha an ngai sang a, nula mai bakah tlangval pawh hmelṭha tak chuan ngaihsan a hlawh em em bawk. Miin fa an neihin hmeichhia an nih chuan hmelṭha tak nia pasal a neih huna man tam tak man turin an duh a, “La deh thiam, sial man tur” tiin emaw an ṭawng thlamuan ṭhin. Hmeichhiate chu an hmelṭhatna leh an la deh thiamna te, an khawsak ṭhatna leh taimakna te chuan dinhmun sangah a hlangkai a, an ropui tehna ber pawh a ni.

Tlangval hmelṭha leh huaisen, lal ni bawk Lalvunga kha amah aia hmelṭha Lianchia nen hun khatah, khaw khatah an vanglai an hmang a. Nula te chuan Lianchia chu an dah sang zawk mah a. Ṭumkhat chu Lianchia hovin nula leh tlangval rualin chawng an lo chen mup mup mai a, nula zawng zawng chuan Lianchia lam an hawi ṭhup a, khawkhat lal ve meuh ni si amah Lalvunga aia midang langsar zawk awm ta chu Lalvunga chuan ngai thei loin heti hian hla a phuah a.

Miah Lianchi awm e, in sel e Lalvunga,
Tualah ngulrua ka bun, kawkvahai tlar na ngai.

Tiin, hei hian hmelthate an ngaihsanzia a tilang hlein ka hria. Thlihranthanga leh Aithangveli te thawnthuah chuan Thlihranthanga nu chuan an awmpui pitar chu a haw em em a, mahse chu pitar chu nula hmeltha em em mai, pitar lem chang mai mai a ni tih a hriat chhuah hnu chuan amah chu a zak a, a tlan hial a ni tih kan hmu a. Lal chhungkua meuh pawhin Aithangveli hmelṭhatna chu an ngai hlu hle a ni.

Tiin. Tin, mi chungchuang bik heng zaithiam hmingthang Buizova te, hla phuah thiam Pi Hmuaki, Saikuti, Laltheri Awithangpa, tin mi chak hmingthang Saizahawla, Mualzavata te, ṭuan rang hmingthang Aihniara te leh mi hrang hrang chanchin te thawnthu angin an thawnthuin leh hlain an phuah nasa hle bawk.

5.Nula ngai thei:

Mipat hmeichhiatna chungchangah Mizo mipate chu a tam thei ang ber nula ngai tura ngaih an  ni a, chu chuan an thlarau nun thlengin a nghawng a ni. Nula ngai thei nih chu mipa tan inchhuanna a tling tak meuh a. Mi, nula ngai hman lova a thih chuan Mitthi khaw kawtchhuahah Pawlan a sairawkherh lianpui chuan a lo sai ṭhin niin an ring a. Chumi avang chuan Pawla sai pumpelh ngei tumin mipaten ṭan an la ṭhin a ni.  Mizo hla hlui pakhatah chuan,

 Di nei lo Pawla’n a sai an ti.
Fam mah ila min sai bil tawh hlei lo’ng e,
Ka nemrang puan ṭial ka di zawnna

tih kan hmu a. He hla hian Mizo piputen thih hnu piah lam ram an rin dan a tarlan rualin mipat hmeichhiatna kawnga mipate rual elna a tarlang bawk. Mizo nunhluiah chuan mipate tan hmeichhe ngai thei nih hi thil ropui tak a ni a. Tlangvalte tan hmeichhe ngai thei nih chu inelna leh infiamna a tling. An thlan lungah te an ziak lang fo. South Sabual khaw hlui, Mamit District-a thlan lung pakhatah chuan “NULA 16 A NGAI” tih an ziak tel a hial a ni.

6.Lal nihna leh dinhmun pawimawh dang an ngaihsan te:

A tlangpuiin khaw khat lal nihna chu thlahtute aṭanga inhlanchhawn a ni a. Dinhmun ṭha a nih avangin khua leh tuite pawhin an ngaihlu lo thei lo a ni. Dr. Laltluangliana Khiangte chuan Mizo lalte chungchang chu heti hian a sawi a, “Lalna an ngaihhlutzia chu tlang an insem chak danah a hriat theih. Kumpinu Sawrkar hnuaia an awm hnuah pawh lal te chuan lal nih zel an duh a, Sawrkar thu thua rorel tur pawh nise rorel chu an duh tlat a,” tiin. Mizote pipute thu leh hlaah pawh lalna inchuh vanga lo piang a awm nual mai. Chhak leh thlang indo bul ṭanna pakhat Vuttaia leh Lalpuithanga te indo ṭanna chu hla a inphuah el vang a ni a.

“Buanhmun pai anga pawm tawh hnu
Chengteah lam ang let e,
Lalpuithang lema.”

Khawnbawl Upa: Khawnbawl upa hi khawkhata pa challang leh dinhmun nei ṭha an ni a, chu ti ang dinhmun a ding thei nih chu an chak ṭheuh. Pa neinung leh chhungkaw hung deuh, pasalṭha leh lal vua leh vang hnaivai deuhte hi lalin khawtlang a awpna kawnga amah pui turin Upa atan a ruat ṭhin a. Lal Sadawt apiang chu Upa min ber chan chang a ni deuh zel a. Heng Sadawt, Puithiam leh Bawlpu te hi khawtlangah an dinhmun a sang hle bawk.

7.Tlangkawmna: Cicero chuan ‘kan pian hmaa thil thleng te ngaihven lohna hi puitling thei lova min siamtu a ni’ a ti a. Chanchin hlui zirchianna hian thil thar ṭha zawk hriat chhuahna min neih tir ṭhin rual hian min tifing var sawt bawk. Mizo ten an pi leh pute aṭanga an lo inhlanchawn sakhua leh khawtlang inawp dan, nupui pasal inneih dan, thuneihna inhlanchhawn dan, an inchei dan leh an thu leh hla inhlanchhawn kan sawi takte khi chhinchhiah a vawn ṭhat a zirchian hi a pawimawh awm em em a. Thangchhuah leh Pialral thurin chu chhawm nun tlak ni tawh lo mahse hausakna te, khawtlang tana mi inpe Pasalṭhate rilru erawh tun thlengin a la hlu reng a, he khawvel awm chhung chu hmelṭha te pawhin ngaihsan an hlawh reng dawn niin a lang. Mizo pi pu te khawsak dan, an thawnthu leh an rilru luah ṭhintu zir chian hi Mizo hnam lo ṭhan danglam zel dan hriat nan te a pawimawh a. Hnam dang te nena khaikhina an nep bik loh zia leh kawng tam takah an damkhawchhuahna atana ṭangkai thei tur chin dan phung tam tak an lo neihzia te ngaihtuah chunga Mizo pi pute nun hlui zir zel hi a hlawkthlak hle a ni.

PS: Heti lam hawi tho Folk inheritance and value system in Mizo article chhiar duh tan  hetah hian click rawh
Hmanlai Mizo incheina tlereuh hrang hrang chhiar duh tan hetah hian click rawh 

Leave a Reply

Your email address will not be published. Required fields are marked *

error: Content is protected !!