Mizo novel zirchianna – Lalrammuana Sailo

MIZO NOVEL TE ZIRCHIANNA

-Lalrammuana Sailo

Mizo Novel Platinum Jubilee puala Handbook tihchhuaha a lan dan chuan kum 1936 a Mizo novel hmasa ber ‘Hawilopari’ ziah a nih aṭanga kum 2011 thleng khan thawnthu bu 400 dawn lai a chhuak tawh a ni. Kum 1989 aṭanga Book of the Year thlan a nih aṭang khan Book of  the Year 24 awm tawh zinga 14 chu Novel bu a ni a. 2002 atanga 2012 inkarah phei chuan novel ni lo lehkhabu dang chu pakhat chiah a la lang a. Chu chu  R.Zamawia ‘Zofate zinkawngah’2007 a ni. Lemchan huangah lemchan chhuah hmasa ber Sangi Inleng chhuah kum 1962 aṭanga chhutin lemchan bu hi bu 55 vel a chhuak ve tawh a, chutah chuan lemchan 160 vel khungkhawm a ni. Novel nena a intam hleih dan khaikhinin novel hmasawn bik zia chu kan hrechiang hle awm e.

Mizo literature huanga Mizo thawnthu Thanduan bik chhan

1.Classical rules lak aṭanga a zalen vang : Novel ṭhan duan chhan ber pakhat chu Classical rules lak aṭanga a zalen bik vang a ni. Drama ziak tur chuan time, place, action dik taka vawn a ngai a, heng te hian unity an neih loh phei chuan Drama chu a hlawhchham der thei. Tin, a dan kherkhiap tak, chan leh lana ṭhen ngai ang te chu a buaithlak a. Hriatna nei sa lova Drama ziak ve tawp ṭhinten zah an tuar ṭhin. Miin epic te, ballad te, ode te phuah dawn se, Classic hoin an lo phuah dan a zui a ngai a. Mahse miin novel a ziah dawn chuan dan leh dun inphuartir loin a ziak thei, novelah chuan engmah hi thuneitu a awm tak tak lo. Drama chu darkar 24 chhunga thil thleng a ni tur a ni te an ti a, novelah thung chuan Isua pian hma aṭanga naktuk thlengin lehkhabu pakhat chhungah a leng vek.

Drama chu chantual mitthla chunga a chana chan theih tur ngei ngaihtuah tel a ngai ṭhin a. Chumi a nih avang chuan Dr Laltluangliana Khiangte lemchan Lalnu Ropuiliani te pawh hi chantuala chan tak tak tura a rem lohna chen a awm, chu chuan Drama ṭha tak a nihna tur a tihmelhem thei ṭhin. Lalnu Ropuiliani ah chuan Laltheri Saruaka a rawn tal vel kan hmu a.(Chan 3na Lan 2na) Hei hi a rem lo. Lemchanah hian saruak leh sex te a thawnthuin a mamawh a nih chuan report form angin mi  tu emaw sawi tir a ṭul a ni. Lemchan chu a chana chan ngaihtuah tel a ngaih avangin leh entute ngaihtuah tel a ngaih avangin saruak, sex leh ṭawngkam bawlhhlawh lakah a fimkhur a ngaizual a ni. Hetiang hi ‘Obscene object’ an ti a. India danin a rem ti lem lo, saruak mai bakah zahmawh rawngkai leh ṭawngkam mawi lo hmante pawh a huam vek.

2.Chhiar a awlsam : Thawnthu chu  chhiartu tan  duh hun huna chhiar tawp a, duh hun huna chhiar zawm thei a ni a, a remchang em em. Novel hi Pocket theater an ti a,  Chantual hran a mamawh tawh lova, changtu rawih hran a ngai tawh si lo. Drama an chhuaha harsatna tam tak a tawh ang kha Novel chuan a pumpelh ta vek a. Chuvangin chantual te reuhte ang mai niin an sawi ṭhin a, thawnthu chhungah engkim a tih theih vang a ni ber.

3.Novelin reality a hnaih bik vang leh Drama tlakhniam vang : A dan kherkhiap leh hriatthiam har tak avang khan Drama chu mipui nawlpuiah a tla na lo telh telh a. Tin, tarlan remchagn lo tam tak a awm bawk avangin a chep a, a ziaktuin a duh zawng leh a vei zawng sawi tur pawhin hun leh hmun thawl a nei lem lo. Poetry lah ni se form bik nei hluah hluah a lo nih bakah T.S Eliot phei chuan, “Poetry is not a turning lose of emotion, but an escape from emotion, it is not an expression of personality, but it is an escape from personality” a lo ti bawk si. Novelah chuan thil hi a tak tak anga tarlan theih a nih avangin hei hi a lar zualna chhan a tling.
4.Literature-a huang dangte aia a bengvarthlak a, chutih rualin mipui vantlang tana hriatthiam awlsam ber a ni bawk : Drama leh poetry te hi a limit em avang hian novel angin chhiartute hnenah information a pe tam thei lo. Mi tam tak ngaihdanah Poetry phei chuan philosophy leh rilru lam (emotion) a hnaih zual a. Drama kherkhipna leh Poetry chepna hian thawnthu tan kawng a hawng nasa a. Thawnthuah chuan thiang lo a awm lo thluk a ni a, sex a ni emaw, tualthahna a ni emaw, insuatna rapthlak tak chanchin pawh nise a leng vek a ni. Novelah hian a thawnthuin a mamawh bak pawh a ziaktuin a duh phawt chuan a tarlang thei. Entirnan, Anita thawnthuah chuan Bombay chanchin te, a thawnthuin a mamawh ni lem lo ang kha a tarlang a. Hriatna zau zawk zawng mi tan chuan Novelah hian information a tam ṭhin avangin thil dang ai chuan a thlanawm sa reng a ni.

5.Market ah hralh a kal : Khawvel hmasawnna leh finna kal zelah hian mipuiin lehkha chhiar tur an mamawh a. Chumi a nih avang chuan thuziak huang hrang hrang zinga mipui nawlpuiin an hriatthiam theih ber Novel/ thawnthu hi a lo a dingchhuak berah aṭang hi thil mak a ni lo. Lehkhabu hralh tla ber ber hi thawnthu bu a ni tlat ṭhin. Novel ngaihnawmna, ziah awlsamna leh a zalenna te, chhiartute a hip bikna leh chhan hrang hrang infawk khawm hian a hralhna Market a nghawng a. Market-a hralh kal na na na chu ziaktute pawhin an ngaihven lo thei lo a ni.

MIZO NOVEL ZIAKTUTEN AN BUAIPUI / THUPUI LAM

1.Rambuai leh Indona : Zorambuai (1966-1986) a innghat thawnthu hi thawnthu puitling, thawnthu tawi, lehlin leh sapṭawnga ziak huam vekin 50 bawr vel hmuh tur a awm a. Entirnan Zikpuii pa ‘Nunna kawng thuampuiah’ te, Mafeli ziah ‘Nghilh har kan tuar an’g te hi. Tin, indopuia innghat emaw behchhan emaw thawnthu engemawzat a awm bawk a. James Dokhuma a langsar hle a, a kutchhuak ‘Thla hleinga zan’, ‘Hmangaihna thuchah’, ‘Irrawady Lui kamah’, ‘Goodbye Lushai Brigade’, ‘Kimo Syonora’ te an ni.

2.Thriller/ Supernatural (thinṭhawng thawnthu) : Lalpekkima ziak ‘Taunu Zawlaidi’ leh ‘Lungpuk Huai’ te, Pi Luti thlahrang, Khawkil Bung huai, R.Zuala ‘Rauthla leng’, Lalzuithanga ‘Aukhawk Lasi’, Lalropuia (Apuitea) ‘Hringnun piah’, Zikpuii pa ‘Hostel awmtu’, Zonunsiama Ralte ‘Inrukbona rapthlak’ ang chi te a awm ta bawk a.

3.Detective story leh crime story a awm leh a , Lianhluna Renthlei hi a ziaktu langsar tak a ni. ‘Jojo stop I & II’ leh ‘The Adventures of Dindin I,II& III’ a ziak a, heng bakah hian Lalzuithanga ‘Thlahrang’, Thuamtea Khawlhring ‘Detective Denga’, leh TN Vanlaltana ziah ‘Sailo Khawma’ tih te pawh a awm bawk.

4.Post Colonial rereading : 1957-ah Indian ho British lakah an hel a. British hoin chu chu ‘Sepoy Munity’ an ti a. Mahse history rewritten a nih hnuah Indian writer te chuan ‘The first war of Independence’ an ti ta a. Mahni hnam humhalhna a ni. C. Lalnunchanga ‘Pasalṭhate ni hnuhnung’ 2006 ang chite hi post colonial rereadingah ka dah a. A chhan chu he thawnthu hian mizo lal leh pasalṭhate dinhmun thlir dan thar min pek vang a ni. Kum 2011(?) khan C. Lalnunchanga te ho nen hian PUC ah interaction kan nei a. Tah chuan heti ang lampang hian a sawi a, ‘kan pi leh pute kha hnam mawl tawp, an kawng kal te pawh Zawng ang maia zuang kal deuh theuh theuh tur anga kan ngai hi ṭhiah ka duh a. An finga, ro an rel thiam a ni tih hi lantir a hun tawh ka ti a ni’ ti lam hawiin a sawi a. Chumi chu a thuziakah pawh a tak ngeiin a hmang a, kan pi leh pute lo finzia leh huaisenzia te tarlan a tum ṭhin.

5.A novel about reformation : Zirtir nei thawnthu a ni a. Hemi huang chhungah hian Kristian love story leh khawtlang nun chhe zel tarlanna leh siamṭhatna lam te, Kristianna leh sakhaw dang tarlanna aṭanga kristian nun dahsanna thawnthu te, Hnam dang leh mizo inkara inngaihzawnna ang chite ka dah a. Hemi huang hi a len deuh vang leh mi tam tak buaipui ber a nih avangte pawh hi a ni ang, ziaktute zingah hmeichhia an lang nawk mai. A langsar deuh zingah Lalhmingliana Saiawi thawnthu ‘Lungrang Hmangaihna’ leh ‘Nukawki’ te, leh C Laizawna science fiction ‘Omnus’ te khing thla a, kum 2004-a Book of the year dawngtu H. Lalngurliani ziak ‘Zorinpari’ te, Khawlkungi ziah ‘Duhtak Sangpuii’, ‘Zawlpala thlan tlangah’, ‘Pasal duh thlan’ tih leh lehkhabu dangte, Lalruali ziak ‘Ka hmangaih tlat che’ tihte, leh tunlai ziaktu zingah Romuanpuii Zadeng ‘Sihlipui’, Mafeli ‘Confession’ te leh ‘Nghilh har kan tuar’ te,Rozamliani ziak ‘Lawm a kim lo’ tih leh lehkhabu dangte an ni a. Mipa lamah Dr H Lallungmuana ziah ‘Ram leh i tan chauh’ tih ang chi leh adangte.

Tin, ziaktute zingah Novel/ thawnthu hi mipuite thil zirtir nana hmang an awm bawk. ” C. Remtluanga chuan a thawnthu ‘Fate nu atan’ tihah chuan tlawmngai pawltena khawtlang a sualna then faina hna an thawhna kawngah Dan (IPC) an ngaih pawimawh tawk loh avanga harsatna an tawh a, lung inah te hial an tan phah theih dante a sawi a. A thawnthu hmangin Dan palzuta thiltih a ṭhat lohzia lantir a tum ṭhin.” Chutih rualin ‘Khualzin nula’ ziaktu Lalhriata ve thung chuan, “Mihring hi apawng apuiin sual sain an piang vek lova, Mizo upaten ‘Sial rangin sial rang a hring an lo tih pawh hi a dik tawh vek hek lo. Inenkawl dan a zir mai a ni” tih a thawnthu lamah tihlan a lo tum ve bawk a.

6.Sex : Art for art’s sake tih tawngkam hi a awm a, he thu a taka an hman nasatna ber hi novel hi a ni hial ang. Mizo novela sex a ngial a ngan deuh thawa rawn tarlangtu pawimawh tak chu Lalhmingliana Saiawi a ni a, class-ah kan sawi nasa tawh a, kan sawi belh tawh lo ang a. Ani rawn lan hnu hian kan thawnthuah sex hi a zalen ve ta sawt niin a lang a.. Lalrammawia Ngente lehkhabu ‘Damlai thlanthim’ te, C. Vanlalmalsawma ziak ‘Doma’ 2008 te pawh hi sexy tak a ni. Kan zirlai huang chhungah pawh ‘Anita’ leh ‘Lungrang Laiawrha’ leh ‘Nunna kawng thuampuiah’ ah te hian sex tarlanna kan hmu bawk.

7.Historical novel lam buaipui an awm bawk a. R.Lalrawna Khawnglung run te, Kaphleia thawnthu Chhingpuii te ho ang hi. Tin suangtuahna rama innghat C.Ṭhuamluaia thawnthu hrang hrang zingah a bikin “Engtin awm ta zel ang maw?” thawnthu ang chi hi.

8.Science Fiction : Science fiction hi kan la nei tam lo hlein a hriat a. Tuna ka hriat theih chu Sangzuala Pachuau ziak ‘Hun awm loh hunah’ leh C. Laizawna ziah ‘Omnus’ te ang hi. Science fictionah chuan suangtuahna leh a tak tak ram hi a inpawlh chiai a. A setting-ah plannet hran emaw, leihnuai emaw, tuihnuai emaw, kan chenna lei tho a nih pawhin dimension hran emaw a ni ṭhin a. Science fiction ah chuan hun lo la awm tura thil lo thleng thei an suangtuahna ang chi hmuh tur a tam ṭhin.

9.Comic (nuihzathlak) : Nuihzathlak thawnthu lam buaipui an awm bawk a. Capt C. Khuma ziak ‘Chhingkhual Lungdi’ te. Darrokima lehkhabu “Thih sak pawh ka ngam’ tih hi a dangdai riau a, sawi lan ṭul ka ti. A chhan chu a hma lamah hetiang lehkhabu kan neih ka hre lo a, a awm a nih pawhin a lar lem lo a ni ang e. The adventure of Tom Sawyer ang deuhin a ngaihnawmin a nuihzathlak a, a lunglenthlak bawk a. A rawn lar tak hnu aṭang khan mahni naupan lai leh mahni chanchin nuihzathlak lai ziah hi an intihhmuh zual ta niin ka hria. Hetiang lampang thawnthu hi TS Khupchawng-a ziak ‘Hmangaihna Tuboh’ ah kan hmu bawk.

Narrative Style

Novel ziah dan kawngah hian kan thawnthu ziaktute hian an hawl kim hle tawhin a lang a. Thawnthu ziah danah hian Direct leh indirect narrative style a awm a, kan hre tlang a, kan sawi zui lo ang. Hemi bakah hian Fragmented plot kan ti mai a. Heng thu hrang hrang inzawm lo deuh deuh ni awm kha bung hrang hrangah an ziak a, a tawpah a insuihkhawm leh a. Entirnan ‘Hunawm loh hunah’ Sangzuala Pachuau ziak te, ‘Beiseina mittui’ Samson Thanruma ziak ang chi te hi. Tin Diary type a ziah a  awm leh a. V.L Zaikima ziak ‘Bombay Fantasy’ ang chi te hi, he ziarang hi  Lalchhantluanga ziah ‘Zodinpuii’ ah pawh khan a hmang zeuh zeuh ṭhin. Tin chu lo lehah Novel tih theih, Drama tih theih tho si T.C Jonunsanga ziak ‘Lungsakawl’ ang chi kan hmu bawk a. Novel/ thawnthu series ang chi C. Laizawna ziah ‘Chemte thla’ ang te  pawh hmuh tur a awm. Tin, a changtunu awm miah lohna thawnthu hi a awm bawk a. C.C Coy No 27 leh Thlahrang thawnthu angte hi. Tichuan novel ziak dan chu zalenna tho a ni. A ziaktuin a duh duh dan style-in a ziak thei tihna a ni ber. A khaikhawmna chu WH Hudson an “Mi tu pawhin pen a neih a, lehkhatui a neih a, lehkhapuan leh hun a neih a, a peih phawt chuan novel hi a ziak thei reng a ni ” a tih hi a ni.

Mizo novel khaikhawmna

Novel chi hrang hrang a awm thei angin ziaktu chi hrang hrang an awm ṭhin a. Chung zingah chuan zirtir tum neisaa thawnthu ziak ṭhin an awm a. An tum mualah chuan an hlawhtling pawh a ni thei. Mahse hetiang thu leh hlaah hi chuan a chhiartuten tel vena leh tih theih kan nei tlem hle. Ziaktu ṭhenkhat ‘literature man lo’ deuh ka ti mai a, an awm a. Entirnan ‘Zorinpari’ thawnthu ah chuan a ziaktuin thuhmahruaiah “ka tihlan tum chu ringtharte tuarna, missionary hmasate lo tuarna leh an hnathawh rah te, Manipur ram rawngbawlnaa harsatna awm thei chi hrang hrang te, an ram dan khermei tak tak te hi an ni hlawm a….Manipur ram rawngbawlna thla hi lantir ka tum ber a ni” a ti a. Hei hian a thawnthu zirtute min hual chep ka ti. Thawnthu ni lo mahse ‘Zozam par’ Zikpuii pa lehkhabu kha lo en leh lawk ila. ” ‘Zozam Par’ hla awmzia tak leh a mi kawhhmuh tum ber chu, mihring vanglai nia a lungawina chu pangpar mawi angin rei loteah a boral leh a. Thiltih ṭha erawh chu, a zarzotu mipui vantlangin an hre reng ṭhin a, chu chu a hlu zawk e, tihna a ni.” a ti a. Hetiang a nih tak nuaih hnuah hi chuan a hla zirtuten an hmuhchhuah ve tur an zawnna kawngah Zikpuii pa hian min hualchep ta vek a, ṭan hmun dang siam hleih theih pawh a ni tawh lo a ni. Hei hi ka mimal ngaihdanah chuan ṭha ka ti lem lo. Novelah chuan miin a duh dan danin thawnthu nia a hriat a ziak tawp a, a lo thliar hran leh a huang siam sak chu a chhiartu leh zirtute hna a ni tawh a ni tih hi ka ngaihdan a ni.

Regional novel leh Exotic Novel : Mizo novel la famkim tawk lohna ber pakhat chu Regional novel hlang a ni lutuk hi a ni. ‘Regional novel’ hi thawnthu, ram bial khat chhunga innghat, a thawnthua changtute pawh ram pakhat chhung a mi niin an suangtuahna leh an rindan(beliefs) pawh an ram nun leh culture behchhan tlat a ni a. Chutiang chu kan novel tam zawk hi a ni. Ram pawna setting inzam chhuak hi ‘Exotic novel’ a ni a. Mahse kan thawnthua ram pawna a setting awm leh ram dang mi nena inngaizawngte pawh hi, ziaktute regional rilru hian a phuar tlat tho a ni. Entirnan, C =huamluaia thawnthu ‘Sialton Official’ ah chuan Mizo leh Khasi nula inngaihzawnna kan hmu a. Mizo pain a hnam rilru  a put ṭhat viau laiin Dorothy thung chuan chutiang lam a ngaihtuah vak lo, ‘Mizo nih theih ka va chak em!’ a ti hial zawk a. Anita thawnthuah ni se Anita khan Rina a neih theihna tur a nih chuan a hnam kalsan pawh a pawi ti lo a, mahse Rina zawng Mizo pa a ni a, Mizo thawnthu ziak a ni bawk a, Mizo rilru a kalsan thei lo. Kan thawnthu tam taka hnamdang langte hi Mizo rilru leh ngaihtuahnain an nundan leh chetzia a  thunun tho ṭhin niin a hriat a. Hei hi Anita-i nuin an hnam dan kalsan a, Rina leh Anita tana hun remchang a siam sak theih chhan pawh kha a ni. Zorinpari thawnthuah khan Partei pa Pu Romena kha an hnam dan zahtu leh vawn nun zel duhtu angin a lang char char a, chu chu mihring nihphung ngaihtuahin a awm em em a. Mahse ani pawh hi a tawpah a ziaktu bawkin a hneh leh tho a ni. ‘Ram leh i tan chauh’ thawnthuah hian Julie leh H.H Alnafasi inneihnna kan hmu a, hetah hi chuan Alnafasi zawk hian an hnam dan a keng tlang a. Chu chu kei chuan a awm reng pawh ka ti zawk. Mahse hetah pawh hian Julie zawk chu Mizo hnamah a rawn let leh tho. Kan thawnthu ziaktu tam takte hian hnamdang leh Mizo inneih pawlh hi an rem ti thlawt lo niin a lang.

Mizo thawnthu ngun taka kan en chuan thawnthu ziaktuten a chhiartute an veng thawng hle tih kan hre tel ang. A ziaktuten a chhiartu turte leh a hralhna lam(market) an ngaihtuah tel bakah a chhiartute duhdan an ngaihpawimawh a. Hemi avang hian Epiloque leh thawnthu zawmna hmuh tur a awm nual. Entirnan, ‘Nunna kawng ṭhuampuiah’ tiha Epilogue te hi a chhiartuten an ngenna avanga dah chawp leh a ni ta a. James Dokhuma ‘Thla hleinga zan  Part II’ te pawh a chhiartuten an ngenna vanga a ziah leh a ni a. Lalengmawia Ralte phei chuan a thawnthuin mi a hip theih nan, marketah hralh a tlak theih nan a thawnthu bu hmingah mizo ṭawng aia sap ṭawnga dah chu fuhin a hre zawk a. Chumi anih avang chuan a thawnthu bu hmingte pawh ‘Honey Moon (1985)’, ‘Eternal Bliss (1985), ‘Never Leave Me Alone (1987)’ tih te a rawn hmang a, mahse ani hi chuan a ngaihdan hi a thlak leh pawh a ni mai thei, a novel hnuhnung lamah chuan mizo ṭawng a hmang ve ta zawk a. A va pawi em? Eng vang nge? (1989 ve ve). Khawngaihna Batu (1990) leh adt. Hei hian a lantir chiang tak chu thawnthu ziaktute hi an zalen ti tho mah ila a chhiartute duhdan an ngaihpawimawh tel ṭhinna chu an kutchhuakah a lang leh ṭhin a ni.

Kan thawnthu tam taka a changtunu changtupa te nun leh pian ka han en hian tam tak hi chuan van rim an nam a, mihring ni loin chunglamin uluk taka a duan an ang zawk a. Mafaa’n a ‘Vaihna Vartian’ thawnthua Remi hmelṭhatzia a han sawite hi aw, “Amah hmuh chu amah duhna a ni a, van angel zingah te khian hmelhriat a nei nawkin ka ring a ni.” a han tite leh a la duhtawk loin Remi hnenah ngei, “Van aṭanga i rawn tlak thlakna lamah i insawh na em?” a han ti te hi aw. Kan thawnthua hmeichhe tam tak chu mizo nu-ah anmahni ang kan hmu zo dawn emaw ni tih tur a ni a. Chu chuan chiang taka a lantir chu kan ziaktu tam berte rilru chu nula hmelṭha tak zunin a hruaibo tlat reng tih hi a ni. An thu ziaha a changtunu leh a changtupa te  pawh an suangtuahna ram a mi a ni. Thawnthu hian mihring nun a tarlang ṭhin kan ti a. Chuti a nih chuan kan mi vantlang takte pawh hian chanchin ngaihnawm tak tak an nei ve tho ang a. Mahse chutiang chu kan thawnthuah hmuh tur a la tam tawk lo. Hemi kawngah hian hmasawn kan la mamawh hle.

A tawp berah chuan, kan literature huang mai piah lamah khawvel ram pum huap pawhin heng drama te, poetry te leh criticism te hi mipui nawlpui tana hriatthiam a harsat avang hian khawvelin hnawlin lo tlu chhe vek pawh ni se la, Novel zawng, Zalenna hming chhalin a la kal zel ang tih hi ka ring tlat a ni.

Lalrammuana Sailo…29th May, 2013…

Leave a Reply

Your email address will not be published. Required fields are marked *

error: Content is protected !!