Mizo National Front (MNF) movement-in Mizo mipuite a tha zawnga a nghawng dan – Lalthantluanga Chawngthu

MNF Movement lo inṭanna hi ram, hnam leh sakhua hmangaihna aṭangin a ni a. Chu chu October ni 28, 1961(Inrinni zan)-a MNF (Mizo National Front) Pu Laldenga in, Tuikhuahtlanga din a nih aṭang khan a lo lang chhuak ta a. Heta dintu kalkhawmte hi mi pariat niin chungte chu- Kailianchhunga, C.Hermana, H.Zirliana, Vanlalliana, R.Vanlawma, Lairokunga, A.Rohnuna leh Laldenga te an ni a. A tirah hetiang hian hruaitu tur an insiam a:

Chairman – Laldenga
Secretary General – R.Vanlawma
Joint Secretary – A.Rohnuna
Treasurer – Vanlalliana

April ni 2-3,1962-ah Aizawl Cinema Hall-ah leh Pu R.Vanlawma in, ‘Zalen Cabin’ ah MNF Inkhawmpui hmasa ber neih a ni a, palai pawh an kal ṭha hle a ni. Hemi hunah hian pawl hruaitu thlanna neih a ni a, hruaitute nihna hming pawh siamṭhat nghal a ni. Hruaitu a tana thlanchhuah hmasak ber leh an nihna te chu hetiang hi a ni:

President – Laldenga
Vice President – J.F.Manliana
General Secretary – R.Vanlawma
Asst. Secretary – Isaac Zoliana
Treasurer – C.Rochhinga
Fin. Secretary – Jesse Denghmingthanga

MNF Party lo dingin a thil tum ber chu ‘Mizoram leh Zofate tana Zalenna’ a ni a. Hei hi Ram rorelna chungchanga mahni duhthlanna sang ber (Political self-determination) tihna a ni. Hemi thu hi April ni 2-3, 1962-a an inkhawmpui hmasa ber zawhah khan hetiang hian ziah chhuah a ni ta bawk:

1. Mizoramin Zalenna sang ber nei a, Mizo hnahthlakte rorelna pakhat hnuaia awm.

2. Kristian Sakhua humhim tlat.

3. Mizo Hnam tihhmasawn leh chawisan.

MNF thil tumte hi a taka tihhlawhtlin a nih theih nan nasa takin hma lak nghal a ni a. Mizo mipui lam pawhin MNF chu an bawh nasain Mizoram zalenna thu chuan mitin thinlung a luah a. Zalenna turin MNF lam pawh a inpuahchah uluk hle a. March ni 1, 1966-ah MNF chuan Mizoram Indepence chu a puang ta rup mai a. Chu chu a taka chantir a nih theih nan hmun hrang hrangah India Sorkar dovin an pen chhuak ta a ni.

MNF-in Mizoram Independence puanga silai nena India Sorkar an do ta mai hi mi ṭhenkhat chuan ṭul lo leh harsatna tam zawk Mizote min tawrhtirtuah an ngai a. Kawng tam takah harsatna chu kan tawk nasa hle tih chu phat rual a ni lo. Heng harsatnate hi India Sorkarin a ram chhunga a ngaih Mizoram mipuite a hmangaih lohzia lantirna, an rilru ze dik tak hriatna a ni a. Pawisawilo tam tak te chunga nunrawng taka an che mai kha a rapthlak hle a ni. MNF Movement avanga India Sorkar rilru puthmang tam zawk hretute kan nih avangin Mizote’n India Sorkar chungah ngaih dan tawk kan neih hi a la ṭul hle a ni.

Eng thilah pawh hian a ṭha ber leh a chhe ber hi a awm tak tak thei lo va. Ṭhatna leh chhiatna a nei ve ve thin. MNF Movement pawh hian a ṭha lam leh a chhe lamah nghawng lian tak a nei ve ve a. Amaherawhchu, a chhe lama nghawng a neih hi rin thu leh dawt hmanga sawi uar belh a awm fo thin; hei hi politics-a inchirh thehna a ni a, sim a ṭha viau ang. A ṭha lama nghawng a neih dan hi zir chian tlak a nih avangin chu’ngte chu lo tar lang ila:

1. MIZORAM LEH HNAM HUMHALHNA A NI : MNF te hian Mizoram zalenna sualin bei ta lo sela, tuna kan dinhmun hi kan chang phak lo mai thei a ni. Kum 1966 khan Mizoram hi Assam State hnuaiah District Council pakhat ve mai kan la ni a. MNF Movement avangin kum 1972-ah Union Territory-ah hlan kai kan ni a. Inremna thuthlung vangin kum 1987-ah State-ah hlan kai kan ni leh a ni. He inremna thuthlungah hian tuna Mizoram leh hnam humhalhna tur dan eng nge maw zat siam a ni a. Chung inremna dan te chuan chimrala kan awm lohna turin Mizoram leh hnam hi min humhalh a ni.

2. MIZOTE DIKNA HUMHIMA A AWM THEIHNA A NI: Mizote hi tu thuhnuaiah mah kan kun ngai lo va. Keimahni’n ram hran leh roreltu(lal) hran neiin kan luah chinah kan khawsa mai a. Kan luah chim ram leh hnam humhalh kan duh avangin phaitual thlengin kan pi leh pute’n lu chhum ban chhum huamin an lo bei a. British Sorkar an hneh loh avangin mahnia thuneihna sang tak neiin British thlazar hnuaiah kan awm chauh zawk a ni.

3. CHIMRALA KAN AWM LOH NANA KAN HNAM VENGTU A NI: Assam State Sorkar thuneihna hnuaiah Mizote chu chimral tham lekin kan khawsa a. Mautam ṭâm a lo tlak pawhin Assam Sorkar chuan min ngaihsak ṭha tawk lo hle a. Tampui avangin boral vek mah ila, pawi an ti lo niin a lang. Khatih lai khan hnam dangte’n min zuamin kan ramah sumdawnna leh politics ṭha lo hmangin nasa takin min bei a. MNF Movement a lo chhuah khan hnam dangin sumdawnna an neih tam tak chu a lo bo va. Hnam inpumkhatna kawngah Mizote kan ṭhangharh a, ram leh hnam dinchhuahna kulhpui leh chimrala kan awm lohna chu lungrualna a ni tih kan hriat thar phah lehzual a ni.

4. ṬHANGTHARTE KAIHRUAITU, ZIRLAI PAKHAT A NI: Mi tam takin MNF Movement kha ṭhangtharte nun kaihruaitu pawimawh tak mai, a ṭha zawnga ṭhangtharte hma lam hun siamtu niin an ngai a. Kan hnam nuna thil thleng pawimawh ber pakhat, hmanlai kan pi leh pute’n ram leh hnam humhim nana mahni lu zuara an beihna leh an tlawmngaihna kha ṭhangtharte nunah a rawn thar thawh lehzual a. Mizo nun mawi tak, thi lek lek tawh kha ṭhangtharte tan zirlai pakhat a lo ni ta a ni.

5. POLITICS ṬHA INZIRTIRNA A NI : British ho hnen aṭanga India ramin zalenna a hmuh dawn khan British Sorkar awp Mizoram chuan duhthlang turin thuneihna kan nei a. Amaherawhchu, khatih laia Mizorama political party pahnih Mizo Union leh UMFO(Zalen Pawl)-te khan politics ṭha lo tak kalpuiin Mizoram awm danah duh an thlang sual a. Mizo Union-in Mizo lalte ban tir leh India hnuaia awm an duh a, UMFO(Zalen Pawl)-in Burma zawm an sawimawi thung a. Chutah India ram a lo independent ta a; Mizo Union chuan India-ah min hruai lut ta a ni. Kum 1954-ah Mizo lal zawng zawngte pawh ban an lo ni ta a. He politics kal sual hian Mizote chan tur dik tak zalenna chu min neihtir thei ta lo va. Chumi chu nei turin MNF Movement a lo piang a, chu chuan politics dik leh ṭha zawk chu Mizote min zirtir ta a. Politics dik lo aṭangin zirtirna tam zawk kan nei ta a ni.

6. PATHIAN HRIATPUI LEH HUN RUAT NIIN A LANG : MNF Movement kum sawmhnih chhung kha Mizote’n thil kan thlir thiam theihna tura Pathian hun ruat, Pu Laldenga kha chumi atana hmahruaitu niin a lang a. Missionary-te kaltlanga Pathianin a zawn chhuah Mizote chunga MNF Movement hi Pathian hriatpui ngei niin a lang bawk. Pathian hian amah ringtute kal sual tur venhim nan MNF Movement hi Pu Laldenga kaltlangin a rawn tar lang a ni kan ti thei bawk ang. Chuvangin, Pathian hriatpui leh hun ruat ngei niin a lang a ni.

7. MIZO ṬAWNG VAWNHIMNA A NI: Mizorama chengte’n inbiak nana kan hman tam ber ‘Mizo ṭawng’ kan tih (Lusei/Duhlian ṭawng) hi MNF Movement khan nasa takin a rawn chawi lar a. Mizoram dung leh vanga hnam chi peng hrang hrang, ṭawng hrang nei thliah thliahte chu hlawmkhatin Mizo ṭawng min hmantir a. Mizo hnahthlak, Mizoram pawn lama awmte thlengin Mizo ṭawng hi hnam inpumkhat nan kan hman phah ta a. MNF Movement hi awm ta lo se la, Mizo hnam chi peng eng nge maw zat, chi peng ṭawng nei thliah thliahte hian tun ai hian Mizo ṭawng hi kan hmang tam lo ang a; zirna leh sakhaw rawngbawlna kawngah harsatna kan tawh phahin, inlungrualna lamah pawh kan chhiatphah thei ngei ang.

8. INHUPHURHNA TIBOTU A NI: Kum 1966 hma lamah khan mikhual inthlen chungchangah hian Mizo zingah mi hausa leh rethei inkar a zau tawh hle a. Khawpui lama chi seh lam tura thingtlang mi zin thinte harsat tawh tam ber pakhat pawh thlenna chungchang a ni. Mahni mikhualte chhawr leh huphurhna tam tak a lo chhuak a. Chu chu MNF Movement khan a rawn tibo ta vek a. Khawpuia cheng tam takte thingtlang lamah tlanchhia a, khaw sawikhawm a lo ni a, mitin mai chu inṭanpui leh inmikhual lo thei lo an lo nih takah khan, mikhualte chunga ṭhat chhuah leh neih ang ang inhluitawn duhna nun mawi tak chu a lo chhuak leh ta a. Tu mah inen hran theih a nih tawh loh avangin chumi chuan tun hnu thlengin kan hnam nun hi a siam ṭha a. Mikhual thlen kawngah inhuphurhna lam reng reng a lang tawh lo a tih theih ang.

9. INUNAUNA MIN THLEN: Kum 1947-a British Sorkar-in India ram a awp a chhuahsan khan Mizo hnahthlak tam tak chu ramriin min daidang ta a, a ṭhen Burma leh Bangladesh-ah awmin, Mizoram pawn India ram chhung sia khawsa tam tak an awm bawk a. Ramriin min daidan avang hian khawtlang nun leh ṭawng hman duh dante pawh a lo dang tial tial a. MNF Movement hian Mizo hnahthlak chi peng hrang hrangte chu a rawn tipumkhatin, hnam hrang ang hiala awm tawhte inkarah inunauna a rawn thlen a ni. MNF Movement hi awm ta lo se, Mizo hnahthlakte hi tun ai hian kan inunauna a chhiain inlungrualna kawngah kan hnufual hle ang.

10. KAN HNAM ZIA TAR LANGTU A NI: Mizote hi Pathian ringtu, Pathian mite leh Pathian kaihhruai kan nihzia tar langtu a ni a. Kan sakhua ‘kristianna’ chawi nunga engkima Pathian hmachhuantu kan nihzia te, ram leh hnam himna atan kan sakhua vawnhim tlat tum mi kan nihzia te, pi leh pute atanga ṭhian chhan thih ngam lu pu-a mahni nunna pawh inthap ngam kan nihzia te, tlawmngaihna nun mawi tak chhawmnung thei mi kan nihziate MNF Movement hian a rawn tar lang a. Mizo hnam ze dik tak, dikna leh rinawmna ze duhawm neitu leh huaisen hnam kan nihzia a taka rawn lantir lehtu a ni kan ti thei bawk ang.

MNF Movement chuan India-in Mizote zalenna a hupbehsak tlat hi a duh lo va. Zalenna tel lovin hlimna leh lungawina a famkim thei lo tih hriain; Mizote pianpui dikna chanvo, kan ram leh hnam hmakhua atana duhthlan theihna ngiatin, pi leh pute aṭanga an zalenna humhim turin an bei a. MNF Movement-a tel te khan a takin zalenna an sual a, an nunna an hlan a, a takin Mizote’n kan hlawkpui a ni.

References:
1. Hermana.C, Zoram Politics Thli Tleh Dan Vol.-1,Aizawl,1999
2. Lalawia.R, Zalenna Lungphum, Aizawl,1999
3. Zamawia.R,Zofate Zinkawngah,Aizawl,2007
4. Lalnithanga.P, Mizorama Politics Inlumleh Chhoh Dan,Aizawl,2008
5. Colney Lalrinliana, Bihchianna,Aizawl,2007
6. Zoliana Isaac, Laldenga,Aizawl,2005

THU LAKNA LEHKHABU: ZAHNA ZAKZEHIN Lalthantluanga Chawngthu Page 171-178

Leave a Reply

Your email address will not be published. Required fields are marked *

error: Content is protected !!