SAILO LAL VANPUILALA CHANCHIN

Brig. Ngurliana.O.F®
Venghnuai, Aizawl.

Vanpuilala hi Lallula fapa palite zinga a upa ber dawttu Lallianvunga tupa a ni a, a pa chu Lalngura a ni. Lalngura hian Laltuaka fanu Lalhlupuii Sailo nupuiah a nei a, “hemi te hi Sailo leh Sailo, lal leh lal innei hmasa her an ni e,” an ti ṭhin.

Pu Liangkhaia sawi dan chuan kum 1850-ah Vaiin Lalngura khua Sentlang an hal lai khan Vanpuilala hi kum sarih mi ni tawh awmin a sawi. Chuti a nih chuan Vanpuilala hi 1843 a piang a ni ang. Hetih lai hian Sentlang khua hi in 800 emaw 1000 emaw niin a sawi a ni. (Millitary Report phek 2-na para 3 Col. EB. Elly en rawh). Lalngura kha a khua Vaiin an hal sak hnu khan Sesawng-ah khian a kai chho ta a ni. Hei hi Lallula fapa palite khan inhawl zau dan tur an rel thluknaah khan Lallianvunga leh a thlahte chuan hmar chhak chho hi nek zau chho zel tura an ruat avang khan insawn chhoh zel tumin Sesawng-ah hian an kai chho a ni. Lalngura chu Sesawng aṭang hian Khawruhlian-ah a kai chho zel a, chuta an awm lai chuan kum 1854 ah khan a thi ta a ni ( Hei hi Pu Liangkhaia chhut dan a ni).

Vanpuilala hi a pa thih lai hian kum 12 mi vel chauh a la ni a, mahse a upate an fel a, khawtlang rorelna chu ṭha takin a kal tluang thei zel a ni. A pa thih hnu hian Phaileng-ah khian an insawn chhova, hetah hi chuan rei pawh awm lovin Zawngin-ah an kai chho leh ta a ni. Zawngin-a an kai chhoh hnu hi chuan Vanpuilala chu a lo tlangval ve ta a, a nun a ṭha si a, khua a ngah sawt em em mai a, khawtlang pawh an hlim hlein an sawi ṭhin. Chenkual nula hmelṭha Pibuki a nei a, mahse fa an neih theih loh avangin a ṭhen leh ta a. Zawngin-a an awm lai bawk hian Lalsavunga fanu Chawngpuituali an va rim ta a ni.

Vanpuilala hi pate bial nelh nawlh a ni a, hmelṭha tak; zaithiam tak leh zuhmun vawng thiam tak leh tihlim thiam tak a ni an ti ṭhin. An khawthleng a zau nuam bawk a, a lenchhuahna lam apiangah hian, in hnih inthum lai hian vawk talhin, zu an lo zuk ta ṭhin a; upa ho sawi dan chuan, “a len chhuahna lam apiangah vawk an talh ruih ruih mai ṭhin a ni,” an ti hial a ni. Heti khawpa a khuaten an chawimawi thiam leh an duat avang hian, ṭulna tak a awm loh chuan a leng chhuak ve mai mai ngai lo a ni. Pu Liangkhaia chuan heti hian a ti a, ‘Upa hovin fiamthu deuhva an sawi chu a ni tak na a, Zawngin khua chu a zau bawk a, Vanpuilala khawlai leng chhuak chu fanu nula neite chuan, Vana hawng leng awh,” an ti a, an sawm an sawm ṭhin a. Chuta a han len luhnaah hi chuan, “Lal pu ka hi thei mahna,” an ti a, an fanu nula nen khan kawng an khar khum a, an len bo san daih mai ṭhin a ni tiin an sawi ṭhin a ni a ti. Pu Liangkhaia bawk chuan, “hei hi fiamthu deuhva sawi zawng a ni tak na a, a lo ti tak tak pawh an awm a ni ang, chutia kawng an khara an len bo san theih chuan nula pa te khan veng lehlamah chuan, “Lalpu ka hi,” an va ti ngam tawh mai ṭhin a ni a ti. Vanpuilala hre phak leh a chanchin sawitu apiangte chuan a nun ṭhatzia mawlh hi an sawi tel lo thei lo a ni. A khuate hian an duat em em a, Awithangpa te, Liangkhaia te chuan Vanpuilala tluka khuate duat em em hlawh hi lal dang an awm lo vang e an ti hial a ni. Heti khawpa duat leh duhsak a ni chung hian, a nula ngaihte, a sawn thlakte, nupui dang (hmei) a neihte chu tumahin sawi tur an hre ngai lo.

2.CHAWNGPUITUALI NEN AN INNEI TA:

Zawngin-a an awm lai hian Chawngpuituali chu an va rim ta a, an va neihna khua hi kan upate chuan, “Lamzawla an awm laiin,” an ti mai ṭhin a; Pu Liangkhaia nu erawh chuan, “Chawngpuituali an va neih lai hi chuan a nu bula awm a ni a, Zatezo-ah an awm a ni,” a ti. Zatezo chu Ruallung leh Lamtual inkara awm a ni. Chawngpuituali hian nuṭa pahnih, Vanhnuailiana leh a nau Lalphunga te a nei a. Laizawn eng zat nge a neih chu kan hre lova, kan hriat chhun chu LALTHERI, a tlangvalpa an thah sak tak kha a ni. Chawngpuituali an va neih lai hi chuan a nuṭate pahnih hi chuan khaw hrang an sat ve ve tawh a ni awm e.

Hmanlai lal inrimte hi chu thla hnih thla thumte hi an inchelh ṭhin a, hnathawh a ṭul si ṭhin avangin Lal Upate leh lal ṭhian tlangvalte kha an inthlak zak zak ṭhin a ni.

Chawngpuituali an va rim lai hian lal inah chuan ni tinin zu an in mai si a, Vanpuilala upate chuan heti hian hla an phuah a:

1.Lamzawl lal chu thu tin ropui tuah thiam Lungliana,
Biahzai nem, khamrang khuai ang kai nan a ṭha e.

2.Chawngpui nunnem tuk loh ram ang kan hual,
Vangkhua tui ang siam liante chhung, thlang vai ang la i.

3.Chawngpui manah kan neih sum tam behṭhi kal zove,
Hmartlang ka run in te leng lo, Kawlkhen dar lo chu.

4.Thai ah kan hel Chung Pathian Siam a ngur bungdawntuai,
Chawngpui kal la, hmartlang lalreng runin thim ruaiah.

5.Chawngpui kal la, hmartlang Lalreng runin thim ruaiah,
Tuai a tam leh Tiandar bu riat nempuan in awi .

6.Hmartlang laldanga u te chuan ṭuan kan rel love,
Bel zu kungah Chawngpui sakhming, dai ten kan awi e.

Heng an hla phuahte hian Chawngpuituali nuṭate chu a tilawm em em mai a, an han insawi rem dawn tak tak hunah phei kha chuan, “In hla phuah te reng reng pawh hian Sial a man e,” an ti a, Chawngpuituali man chu Sial-in an ti tlem ta nghe nghe a ni.

Tun thleng pawh hian zuhmunah kan upate chuan Lamzawl zai an sak dawn hi chuan, “Se man zai kha i sa teh ang u,” tih an la ching viau ṭhin a ni. An insawi rem ta a, Chawngpuituali chu Zawngin khuaah chuan a lawi phei ta a. Kum 1860-ah khan fapa duhawm tak mai an nei ta a, a hmingah chuan Lalhleia an sa a ni.

3.VANPUILALA TE NUPA NGILNEIH ZIA :

Mizoram Mautam an hriat hmasak ber kha a lo thlen lai a ni a, mihring han intun nun theihna tur buh leh bal a vang em em a; mi tam takin lal in an pan a, mahse lal inah pawh ei tur awm seng bik hek lo; ni tin hian ramhnuaiah kamrah leh ei theih tur apiang zawngin an vak chhuak sung sung ṭhin a ni. Lal inpui bel tura lo kal, mite rilṭam lo hnar chu Vanpuilala te nupa hian harsa an ti em em mai a, chutih lai chuan Vanlung urtute chu chhungkaw 30 an tling reng a ni an ti.

Ṭam a reh hnuah pawh tlangval pakhat phei chu ramhnuaiah ramsa ang maiin a lo awm rei tawh bawk a, khaw chhunga rawn kir leh a zak a, a vak a vak mai ṭhin a. A rilṭam zual chang phei chuan lawm rual chawfun te hi thlawhlaia an bun hlanin lo eiruk sak te a ching a, intuam lumna tur silhfen pawh a nei tawh lova. Chutiang chanchin chu Vanpuilala te nupa chuan an hre ta a, chu tlangval chu an zawntir ta a ni. An hmuh veleha an pek tur silhfente an ken tir bawk a. A zawngtute chuan an hmu ta ngei a, an lal pek puan leh kawrte chu an han sin tirin an han hak tir a, an lalte nupain an khawngaihzia te chu an han hrilh a, “khuaah lo lut sela, a duh phawt chuan lal inpuiah pawh rawn cheng ve se,” an tih thute an han sawi chuan a mittui a tla zawih zawih mai a, a zui haw ve ta nghal a. Ama duhna ang ngeiin lal vanlungah an hruai lut ve ta a ni. Nakinah chuan lal in nupui a neihsak a, an indantira, a thlahte pawh tun thlengin Vanpuilala thlahte khuaah an la awm a ni.

4.KHAWLIAN AH AN KAI CHHO TA :

Ṭam te a lo reh ta bawk a, Khawlian tlangah an kai chho ta a, ram thar zuan an ni bawk a, an hlim em em a ni. Khawlian aṭanga K.M. 5 velah khian daido turin in 50 a dah a, chuta an awmna chu tun thlengin Daido hming a pu hlen ta a ni. Hriangmual-ah khan a nau Hrathleia chu nupui pawh nei hman lovin a thi ta a. Hetih hun lai hi chuan Durtlang leh Khawlian inkar tlangdung tinah hian Khawper in 100 lek lek chu a dah deuh thluah niin Pu Liangkhaia chuan a sawi. Darlawn tlangpui, “Hmunpui,” an tihah phei khi chuan a nu Lalhlupuii hovin in 300 zet chu an awm bawk a ni. Khawlian-ah hian Vanpuilala in chu a dung hlam 30 a ni a, a vang lam erawh chu tunlai ang hian chungdalte, tukrawpte invuakzawma tih nachang an la hriat ve loh avangin upaho sawi dan chuan, “Tuivai phai maupui tlin tawkin kan sa a ni,” an ti mai ṭhin a, chu chu hlam thum emaw hlam li aia zau emaw a ni mai thei e.

Khawlian-ah hian Zawlbuk 10 a awm a, Pum 30 a awm bawk a ni. A lian ber Mualveng Zawlbuk chu hlam sarih a ni an ti. Vanpuilala chuan a khaw in zat a hre duh a, tlangval ho a chhiar tir ta a. An chhiar dan chu Tlangval khan Iptepui an ak a, intina kailawn buI aṭang chuan lungte pakhat an chhar zel a, an lungte chharkhawm chu lal inah thlangra chungah an bun khawma, an chhiar ta a ni. Upa ho sawi dan chuan, “sang khua kan ni,” an ti mai ṭhin a, mahse hmarlam Vailian kum 1871 Krismas Khawliana hmangte khan an chhiar ve a, Khawlian chu in 1040 ni zawkin an hria.

Awithangpa sawi dan chuan hetih hun laia Khawlian hming than dan leh Vanpuilala ropuizia chu, zin veivak hote pawh hian Khawlian khua hi an tlawh hram ṭhin a ni a ti. Khawlian khua hi Ralte hlang hlak an ni tiin a sawi theih awm e. Lusei ho, lal sadawt kilpui thei chu chhungkaw tlemte chu an awm a, mahse chung mite pawh chuan Ralte ṭawng vek an hmang a, an lalte chauhvin Lusei ṭawng chu a hmang a ni. Mikhual rawn kal Lusei ṭawnga rawn ṭawng te pawh hi, “Ku ha, lal pauva pau chu, lamthangah sawn tha ua,” (Tunge lal ṭawnga ṭawng chu, kawngthlangah namthla rawh u) an ti mai ṭhin a ni. Vawikhat chu mikhual pakhat hian chhimthler tawp lam aṭang khian, “Khawiahnge lal in a awm? Ka en ve teh ang,” tiin upa pakhat hi a zawt a. Upa chuan hetiang hian a hriIh a: “Nakel vang vang inga, in saupui nachu mu inga, himah leh lal in a hi oving. Nakel leh vang vang inga, tuala pitek putek nakhung fer fur ke na chu mu inga, hi zet chu Vanpuilala in a hi ngei kah ing nati inga, a hi leh ovinga. Nakel leh vang vang inga, tuala sial luphan tam tak ana awm inga, pitek putek, kel lam haw lam chingmik pem suak bang mai na chu mu inga, sawngkapui ana awm bawk inga, mi chu mi chu ana chawk tuak luau luau vingua- chu zet chu Vanrawng in a hi kah ing.” Lusei tawngin: “I kal vang vang ang a, in sei tak i va hmu ang a, mahse lal in a ni lovang. I kal leh vang vang ang a, tuala pitar putar ṭhu fer fur te i va hmu ang a, hei zet chu Vanpuilala in a ni tawh ngei ang i ti ang a, mahse a la ni leh lo vanga. I kal leh vang vang anga, tualah Seluphan tam tak a lo awm ang a, fanghmir pem chhuak ang maiin, pitar leh putar haw lam leh kal lam i va hmu anga, Leihkapui a awm bawk ang a, chutah chuan mi chu, mi chu an lo fawn tawn luau luau ang a, chu zet chu Vanrawnga in a ni tawh ang.” a ti a. Ralte upa ho chuan Vanpuilala hi an koh duatnaah chuan, “Vanrawnga,” an ti ṭhin a ni.

5.KHUANG A CHAWI DAWN TA :

Vanpuilala hian sakhaw biakna lam hi a ngaisang em em a, khuate a ngah a, a neinung bawk a, a damrei loh tehlul nen vawithum Khuang a chawi hman a, a vawithumnaah phei chuan Sesawm-in Khuang a chawi a, Zau a dawh bawk a ni. A khuangchawi vawithumna tur a buatsaih lai hian chhak lama Mualbem khaw lal (Sukte lal) Zapauva pa Semthawnga chuan Tumpang Sial thlah Sechal ṭha em em mai hi a nei a, Vanpuilala chuan Khuangchawi nana hmanah a it em em mai a. Chu Sial han lei tur chuan upate zinga fing ber leh ṭawngkam thiam bera a hriat Darphawnga hovin mi tamfe an kal ta a. Darphawnga chuan, “Zapauva pa, i Tumpang Sial hi kan lal-in Khuangchawi nan a it em em mai a, kan kai mai anga, a man atan chuan Darbel lian tak, a chhunga pa mut theihna leh Ṭhival fual tak, lai thleng dulha awrh tur kan rawn pe ang che,” a ti a. Paihte chuan Darbel lian leh Ṭhival fualte chu an ngai ropui nasa mai si a, Zapauva pa chuan Darphawnga thusawi chu a ring tawk bawk a, Sial chu a kaihtir ta a. Hetih hun vel lai hi chuan Vanpuilala hi chu a chhehvel hnam dang lal reng reng chuan an hlauh tlawn vek zawk a, Sial chu ui hle mahse pek loh chi ah an ruat lova, a ui ngam ta lo a ni.

Mautam kha a lo reh ta bawk a, an lalpan se sawma khuang a han chawi tur chu, mi tin mai hi an phurin an hlim tlang em em mai a ni. Lal in atanga chhim thler phei zawng zawng chu, a mual a nuamin a zawl phei nuam bawk a, zan thla enga nula leh tlangval Chawng buhdeng ho te chu a fawn hian an fawn luih luih mai a ni an ti.

6.CHAWNGTHING PHURHNA:

Khawlian-ah hian nula lian zet zawt chak em em mai a awm a. Tuivai phai aṭangin buh kawt khat (ṭin thum) pawh phur sela, chawl hauh lovin Khawlian tlang a thleng ṭhin a, tin, kal paha titi sawi pawh a thlah ve chuang ngai lova. An lal Khuangchawina tura Chawngthing an phurh ni hian tlangval hovin he nula chakzia hi an hre chak a, Fahthing fak 100 an phurhtir a, chutiang khawpa rit chu phur mahsela, a ṭhiante rualin a thleng ve thei tho a ni an ti. He nula chak tak hming chu Khawlnemi a ni. Aizawl Electric venga Pu Hnema C.A nu saw, he nula chak fapa upa bera fanu a ni. Kan naupan lai chuan a tar hle tawh a, hmanlai nula chak a ni an tih avangin kan en huai huai ṭhin.

An lalin se sawm meuhva Khuang a han chawi tur chu, thing a duh tam dawn tih an hrereng a, nula tlangval an tam bawk a, an thawk kim awm hle mai. Vungtuala pa sawi dan chuan, ‘intihhlim nan an ti ani ang chu Chawngthing phurhnaah hian se talh tur Sechal pathum lai an hruai a, nula tlangval ṭhenkhat thing ek leh thing tana an ṭul em em lai pawhin mual ṭhenkhatah chuan tlangvalho se lo chaih hum hum tawk te an awm a ni a ti.’ Vungtuala pa hian Vanpuilala nen chuan kan inrual chiah a ni a ti ṭhin.

7.THINGDIMNA ROPUI:

Heta Thingdim (Khuallam) hote hi an tam si a, an mawi em emin an sawi ṭhin. An lalnu leh an khawnbawl mitha nu hote chuan an puan thulkhung ṭha ṭhate kha an rawn phawrh chhuak a, nula leh tlangvalte kha an rawn ban (sin tir) zung zung mai a. Chhimthler aṭanga an rawn let phei chu Lal upa hote khan an lo hmuak a, “Ei mah Vanpuilal, ni leh tha kara leng ka hi nai uh,” (Keimahni Vanpuilala, ni leh thla kara leng kan ni ngai e) tiin an lo vangpauva, Silai an lo kap awrh awrh a, thingdim hote kha an lo chhaih vel ṭhin a ni.

An inkap palh: An zinga upa pakhat chuan Zawng kahna tura a musep thun pakhat chu phawrh hmaih a lo nei a ni ber ang chu. Upa dang ang bawk khan phur em em in Thingdim hote chu a lo chhhaihin a lo vangpau ve a, “Kawiha, khuangbengpa hnar takah chun aw i han kap teh ang,” tiin mualzawla lungpui khi a lo phen a, a han kap ta a. Khuangbengtu chu a kap tlu hlauh ta mai a. He lungpui hi tunthleng pawhin a la awm. A kaptu pa chu a zak em em mai a, khawdanga raltlan bo daih a tum a, mahse lal upa hote chuan an chelh a, “Tai oving, imah nati oving, lal than nang a hi zawk ngai e,” (Tlan lovang, engmah i ti lovang, lal thanna tur a ni zawk ngai e) an ti a, an chelh thei ta a ni. An kah thluk mitthi ruang pawh hi an seng fel thuai a, thingdim hote chu a tibuai hman reng reng lo a ni an ti ṭhin.

8.SENVAWNAH INSAWN PHEI A TUM:

Kan hriat tawh ang khan Khawlian tlang chu nuam hle mahse Sangkhua tan meuh chuan han awm reng theihna rual ni chuang hek lo, an kum khat ram bawh tawk pawh a zau em em mai si a, Sang khaw dawl zo tur chu Senvawn ram chauh saw niin an hria a. Hetih hun lai hi chuan Pherzawl-ah te, Tinsuang-ah te, tin, a piah leh deuh Balhla-hmun an tihah te sawn Mirawng te, Meitei te leh Thahdo te an awm hlawm a, Chung ho chu va hnawhkian hmasak kha ṭulin an hre ta a, Vanpuilala ho meuhvin vawi hnih an va run ta a ni.

Vanpuilala hi mi huaisen, ralhrat tak niin an sawi ṭhin a, ramchhuahnaah erawh chuan a tel ve chang pawhin a ṭhiante ho kha sa hliam han beihna lamah te hian an huai lutuk deuhvin a hre ṭhin a, a ṭhian ṭhate a chan zovang tih a hlau va, a tel ṭha ve ngam lo a ni an ti ṭhin. Senvawn chhehvela hnamdang hnawt darh tura an va run hmasak ber ṭum hian Meitei Reng lal sipaite nen an va intawng nghe nghe a, rei lo deuh an han inbeih hnuah chuan Reng sipaite chu an tlanchhe ta a, an silai pahnih an laksak a, chu silai chu tunlaia, “Tukuli,” kan vuah tak te hi an ni. Hei hi Mizorama Tukuli Silai lakluhna hmasa ber a nih a rinawm.

Heng lai ram an va run vawihnihna chu Pu Liangkhaia sawi dan chuan kum 1869 a ni a ti. Tin, hei hi sawrkar lam lehkhabua inziak dan a ni a ti bawk. An run vawihnihnaah hi chuan an va hlawhtling hle a, an pasalṭha Burkhawni pa pawhin Mirawng palian zet mai hi a man a, a nunga hawn a duh si a, a that phal lova. Mahse an awmkhauh hleiin an chak hlei nasa mai si a, Burkhawni pa chu a namper dawr dawr thei mai si a, a la vanduai phah ang tih an hlauva, a ṭhiante chuan an thahsak ta a. A sal man an thahsak tih Burkhawni pa’n a han hriat chuan, “A nanga hawt ang ka ti hi le, I tan a tulum mai u ha,” (A nunga hawnah ka ti a sin le, engtia in lo tihlum mai nge ni le) a ti a, mahse a naute hovin amah an ngaihtuah vanga an tih a nih a hria a, a thinur tak tak duh lem lo a ni. Hemi ṭum hi chuan Tinsuang piah a Balhlahmun an tih a Mirawng khua saw an va run ber a, an va run hnu hi chuan an tlan darh zo vek a, khua a awm leh ta lo. Tuiruang kama Maulian ram chin saw an va lak ram leh an va hauh chin chu a ni ta a. Kum 1944 ah khan kei pawhin kan pute ram lak chin leh an hauh chin ram chu ka hmu chak e tiin Maulian khua hi ka va tlawh a ni.

Vanpuilala pawhin hemi ṭum bawk hian Mirawng nu naupua hi a man ve a, damtakin Khawlian tlangah an hruai thleng a, Vanlungah a chentir ve a; mahse, chumi hnu lawkah chuan Vanpuilala chu a thih thut tak avangin chu Mirawng nu chu lal upa ho chuan, “Mitthi khuaah kan lal rawngbawlsaktu atan a ṭha ang,” an ti a, an that ve ta mai a. A fapa erawh kha chu upa ho chuan, “Kan lal fapa Lalhleia hi a mal em mai a, lal pianpui (lal unau) atan awm sela, a hming atan pawh Laltiamthanga i sa ang,” an ti a, an zuah ta a. Upaho duh ang leh beisei ang ngei chuan a rinawm em em a, khawtlang tan pawh a ṭangkai em em a ni. Kum za chuang lai a dam a, kei pawhin ka hmu phak a ni.

9.VANPUILALA ṬHATNA (NGILNEIHNA) :

Vanpuilala Khawliana a awm lai hian Vanhnuailiana kha Champhaiah khian a awm a. An chhaka Sukte ho nen khian an indo ṭhin a, an inhneh tawk hle ṭhinin an sawi. Chutia leido nei renga awm chu a tu lam ve ve tan pawh a hrehawm a, Sa-uitan meuhva inremna siam an lo rel ta a. Sa-ui an tan dawn chuan, hetiang hian thutiam an siam a, chu chu an tiam ve ve a ni. “Vahmim meiin ban a chen hma leh Run tui a lehluan hma chuan indo tawh lo ila, tin, kan chhiahhlawh tlan chhuakte pawh lo awm sela kan inpe kir leh vek ang,” tiin. Vanpuilala erawh chuan, “Sukte ho ka khaw Pum zat lek te chu ka hlau lova,” a ti a, Sa-uitanna-ah chuan a kal ve duh lo a ni.

Hetia inremna an siam hnu lawk hian Sukte lal Zapauva chhiahhlawhte chu nupa tuak 30 lai Vanhnuailiana inah chuan an rawn tlan thla ta mai si a. An rawn umzui a, Sauitan ṭuma an thutiam tawh ang khan pekkir leh zai an rel ta mai si a. An zinga Dongula te nupa chu Vanhnuailiana mo nu (Doṭhiauva nupui) Romangpuii khawngaih thla an la riau bik mai a, thu a hrilh ru ta a. “Hei kan pa hian a hum ngam dawn si lo che u a, nangni nupa hi khawngaih em em che u a ni. An pek kir leh che u zawngin an lo that che u emaw a ni ang a, chuvangin ka u Vanpuilala hnenah kal ang che u, ani zawngin Sukte lal ho chu a hlau ve lova, Sa-uitannaah pawh a rawn tel ve duh lo a ni, a lo hum ngam ngei ang che u,” a ti a. Romangpuii hrilh ang chuan zanah an relhru chhuak ta a, Vanpuilala khawper Hiangmualah an lut hmasa a, tah chuan a nupui chu a dah rih a, amah chauhin Vanpuilala chu a va bia a, tin, Romangpuii thurawn dan te kha a hrilh vek a. Vanpuilala chuan, “Ka sutpui rawn pan tawh chu tumahin ka thu lo chuan an la chhuak thei lovang, engmah hlau suh. Ṭha takin awm la, nupui pawh ka khaw nula i duh ber ka neih sak ang che,” a ti a, chupa chu thlamuang takin a awm ta a ni. Vanpuilala mitmei chu a enthla renga, nupui nei a nih pawh kha a la zep tlat a. Thla khat lai hnuah chuan Vanpuilala chuan, “Nupui ka neih sak ang che a, ṭha takin ka indan tir ang che,” a han ti ta mai a, chutah zet chuan ti tak tak hmel niin a hre ta a, “ka pu nupui chu ka nei a, i khawperah sawn ka dah a, mi hum duh tak zet dawn a nih chuan ka va hruai ang e,” a ti a, a va hruai ta a ni.

An nupa chuan hlim takin an awm dun ta a, Vanpuilala chuan Siali’n an thla a hual a, unau angin a dah ta a ni. Tin, fa an han nei a, an fa chu an puaksak a, chaw te an han fah sak ta mai a, an lawm lutuk chu an nupa chuan an mittui a tla zawi zawih mai a. Sukte lal ina an awm lai kha chuan fa pahnih an hring tawh a, “mahse an fate chuan an hnathawhna an dal e,” tiin an lo feh hlanin an lo tihhlum sak ṭhin a. Chunglai hunte nena an han ngaihtuahin tuna an awmna lalte nen chuan an in ang lo em em hian an hria a, an lawm avangin an mittui a tla ṭhin a ni. Chhiahhlawh dang an lal Zapauvan Vanhnuailiana hnen aṭanga a hruai kir leh hote lah kha mipa zawng chu Lentlangah khian an that vek a, “Khawthlang an ngai alawm,” an ti a, an lu pawh Lentlang-ah chuan Khawthlang lam hawiin an tar vek a ni tih thuthang te kha an lo hre si a, anni nupa chunga Vanpuilala te nupa ṭhatzia hian vawi tam tak a ti ṭap ṭhin. Dongula te nupa hian fapa pahnih leh fanu pahnih an nei a, an fate chuan Vanpuilala a thih hnu pawhin a fapa Lalhleia chu an bel zui ta zel a ni.

10.VANPUILALA THIH THU:

Vanpuilala thih dan chu hetiang hian an sawi ṭhin: Paihte lal Hautinkhupa pa Zatuala chuan Tumpangsial thlah Sechal a nei a, tin, Khuang ṭha tak mai a nei bawk a. Vanpuilala chuan, “In Tumpangsial hi chi thlahtu atan kan awt ve em em mai a, kan lo kawl ve rih ang a, tin, in khuang pawh kha zai a chawiin a ṭha em emin an sawi bawka, kan lo kawl hawh ve ang e,” tiin a han dil a, chu chu an lo hnial ngam si lova, an lo pe ta a. Sial leh Khuang chu a pekkir leh phal an ring lo a niang chu an lawm lo em em mai a. Hetih hun lai hi chuan an chhehvela hnam dang lalte hian an huphurh em em mai a, a ruk taka elrel riau siin tlawn lam ang siin, a chhiatna tur an zawng ta ni berin an ngai a ni.

Nikhat chu Zatuala khan Vanpuilala be turin a upate Zupeng pai meuhvin a rawn tir a. Vanpuilala chuan zu te a lo zuk a, hlim takin an inkawm a, thu ṭha tak takin an sawi hova. An hawn dawn chuan an zinga pakhat chuan, “E! kan zu pai kha, hei lal in khawp lek chu a la awm e,” tiin a han bun chhuak a, lal chuan a han in ta a. Chuveleh upate chuan an hawn san ta thuai a. Chu zupeng a han in hnu chuan a pum a na ta mai a, rei pawh tuar lovin kum 1869 khan a thi ta a ni. Vanpuilala a thih a, an Silai kah rite chu Zatuala upate khan Tuivai ral Chiahpui ram aṭangin an hre hman a ni an ti. (The Lushai Expedition page 29, para 4. By R.G.Woodthorpe).

Nat lawk pawh awm lova, thi thut a ni bawk a, a khuate chuan an tuarna em em mai a, a hria apiangin lal in lam an pan a, in chhungin a leng si lova, tual zawlah te, inhnuaiah te an ṭhu khat tlat reng a ni. In hnuaiah mi an khah tlat reng avangin ni thum chhung chu zu pawh an in ngam lova, tuisik tih buak a hlauhawm hliah hliah mai a ni an ti.

Ralte hovin an lal an duat thiam dan leh an chawimawi thiam dan hi a makin a ropui hle a ni. England rama English ho ten an lal an duat thiam dan leh an chawimawi thiam dan te, an ngaih ropui thiam dan nen khuan ka tehkhin deuh reng ṭhin.

Ṭahtu a ngahzia : Vungtuala pa sawi dan chuan, “ Vanpuilala thih hriaa rawn tlan khawmte chu lal inpui an rawn thlen hma pawh a, khawlaia tualchara ṭap thle bawk bawk an tam em em a, Lal in chhung leh tualzawl leh in hnuaia mipui ṭap ri chu, hmun hla deuh aṭanga lo ngaihthlak phei chuan Khuai rau ang mai hian a ri vung vung mai a ni,” a ti. Pu Rostosinga puzawn Pu Chawngkhuma kha Vanpuilala a thih chuan kum 9 mi a ni tawh a, ani sawi ve dan chuan, “Vanpuilala thih chuan a khawtlang mipui zawng zawng hi kan ṭap a ni ber e, mipui ṭap ri chu a ri hum hum mai a ni, “a ti.

Vanpuilala an ui zia hi a upate chuan heti hian hlain an phuah a:

A fam ta e Liantlang rengpui, dokim sal kaitu,
Kawlkei hrang leh changsial sawm hlei;
Nghosai hmachhuanin.

Tin, a nupui Chawngpuituali chuan heti hian a phuah bawk a:

Suihlunglenin fam khua zu chuan ila,
Sakhmel sen siar Laldang;
Chul theiin ka ring lova.

Kuanga an ur zawh hnuah a ruh ṭhenkhat leh a kuang an phumna chungah chuan lung an dawh a, chu lungdawh chu feet 20 bial, feet 4 a sang a ni. (Chin Lushai Land phek 21, para 3-na en rawh). He Lungdawh hi kum 1934 March thla khan ka han tlawh a, a la ṭha em em a ni. (He Lungdawh hi kum 1972 January thla khan Khawlian-ah Chawlhni hmanga ka cham avangin keipawhin tlai ni nemah ka han tlawh ve a, Lal Lungdawh tih hriat takin a la awm a, a lunglen thlak hle. – L. Sanglura Sailo). Chu Lungdawh chhuahna-a an sak, “Tlawh Zai,” a an phuahte chu hengte hi an ni:

1.Tur nipui iang chawng chungnung in rawh,
Thinlai kawl ang a var e tahpuan khawnga;
Zia tin kai chiai e.

2.Lalchungnunga’n ṭangah bang lovin,
Vangah han zar tang e luaithli nul a;
Relthula kan chhiah.

3.An ngai ngai love, Rihtlang liam hnu an ngai ngai lova;
Kawrfen ṭhi leh tian dar lo nghak la,
Rihtlang liam lovin.

4.Zanin leng ve maw, zanin leng ve maw?
Thlafam rauthla zanin leng ve maw?
Khuangpui ri ngaiin.

Kan naupan lai pawhin Mimkut laia Lungdawh chunga upa hovin an han sakte chuan an ṭap zawih zawih ṭhin a ni. Vanpuilala lung an han dawh zo chu salu tam tak, ama kah te, Bawih ho kah te ( Bawih fate chu an indan hnu pawhin an sa kah lu kha lal inah an la thlen ṭhin) an tar a. Mihring lu erawh chu a ro pawh ni se a nu Lalhlupuii khan tar a phal lo a ni. Chin Lushai Land bu-ah pawh khan mihring lu an tar chu a sawi lo, sa lu tar a tamzia erawh chu an sawi a nih kha.

Lallianvunga thlahte heti em ema an pian tlemna chhan hi Kawlkhen Dar an kawl vang a nih an ring a. Tun hma lam pawhin Kawlkhen Dar kawltute chu an piang tlem a ni tih thu sawite chu a lo awm ta bawk a. Chawngpuituali chuan Kawlkhen Dar chu Hreipuiin a chek chhe ta vek a, Vanpuilala Lungdawh-ah chuan an tar ta a ni.

Kawlkhen dar hi Darkhuang lian tak, aw mawi tak leh ring tak a ni a, Zadeng lal ta Lallianvunga’n a laksak a ni. Hetia Kawlkhen Dar Chawngpuituali’n a lo chek chhe ta mai hi an unau Sailo lal dangte chuan an ui em em hlawm a ni.

11.VANPULALA RAM AWP CHIN: Lallula fapa pali ten nek lam tur an inṭhennaah khan, “Durtlang aṭanga rin ngil chhohvin Tualbung chungah Mawmrang tlang huapin hmarchhak chho hi nek zau chho rawh se,” tih kha a ni a. Vanpuilala ropui lai hi chuan Paihte lal ho pawh kha Tawnzang lamah khian an insawn chho vek tawh a ni, Ṭiau ral an kai chho zo vek tawh a nih chu.

Hmar lamah chuan kan upate sawi danin Tinsuang piaha Tuiruang kam Maulian chin saw kan ram chin a ni an ti ṭhin. Tin, chutih lai chuan Vangai tlangah hian tumah an awm lova, kum 1880 hnu lam thleng pawh khan an la ta chei reng a; ram chhuah nan an hmang reng a, a tlang dunga thelret te saw an va hnai ṭhin a; Vai buh lei nan an hmang ṭhin a ni. Ramri chuan Khawbawn tlang sang aṭanga rawn luang chhuak, Vawklian lui saw a zawh chhuk a, Moniarkhal chhak lawkah sawn Tuirial a rawn fin a ni.

Kum 1930 January thla khan Vawklian lui hnar Maurawp ramah sawn khua va siam ka duh deuh va, Moniarkhal-a an Forest Deputy Ranger ka zu bia a; ani chuan, “Tunah hi chuan British sawrkarin heng lai ram zawng zawng hi Forest Reserved atan a siam vek tawh a, amaherawhchu hmanlaia in ram chin (Vawklian lui chin) chhak lamah hi chuan i duhna hmun apiangah khua rawn siam rawh, Silchar Bawrhsap chu ka lo biak pui zel ang che. Forest Reserved hnuaiah chuan Mizorama in lalna Chiefship ang saw chu i rawn chhawm thei lo vang a, Headman i ni mai ang,” a ti a. Kei chuan, “Ka pu ram chin chu eng tin nge i hriat,?” tiin ka zawt a, ani chuan, “Ka pu, (ka pa pa) hi hmanlai chuan inzarzotu a ni ve a, Vawklian lui aṭanga chhaklam Tuirial dungah hian thingte, maute, hnangte a la ṭhin a, i pu Vanpuilala te, i pa Lalhleia te hnen thleng khan chhiah an pe reng ṭhin a ni. Chhiah la tur hian a chang chuan mi sawm laite an rawn tir a, a chang chuan mi pali panga lek te pawh an rawn kal a, kumkhatah hian vawi hnih an lo kal ber a. Chhiah atana an rawn duh ber chu chi (salt) hi a ni ber a, chuvangin chi nei lo chuan kan awm ngam ngai lo, ip hnih khat hi chu kan kawl reng a ni. An rawn kalna a hlat avangin an phur tam peih ngai lova, chi chu lo nei lo ila, min that duh mai awm mang e kan ti ṭhin a ni. Ka pu chuan i pate, i pu te hi an chanchin a sawi a sawi ṭhin a; titi tui takah a hmang ṭhin asin,” tiin min lo hrilh a ni.

 12.VANPUILALA ROPUINA LEH A HATNA TE

1.Sailo leh Sailo lal kara piang, lal chingkin a ni a, fapa mal a ni bawk a, a khuaten an duat em em a, a pianna leh a khaw ngah avangin Sailo lal dangte pawhin an ngaisang em em.

2.A mizia a ṭha a ni. A khuaten an duat em em chung hian amah chu a intih lalna, chapona reng reng sawi tur an hre lo a ni. Kan sawi tawh ang khan a nula ngaih te, a sawn thlak te, a hmei neih te sawi tur an hre lova. Mi sakhaw mi tak a ni a, a huaisenin a zaidam em em bawk si a ni an ti ṭhin.

3.Hmangaihna a nei ngah:

(a).Mautam mangan lai leh ei tur a van em em lai pawhin lal inpui rawn pan chu tumah a hnar duh lo.

(b).Ṭam avanga ramsa anga awm tawh chu tlangval ho a zawn chhuahtir a, a inah a la lut a, nupui a neih sak a, a indan tir.

(c)Sukte lal chhiahhlawh tlanchhuak Dongula te nupa a hum a. An inah a la lut a, Sialin an thla a hualsak a, ṭha takin a indan tir.

(d).A pa Lalngura’n vai sal pakhat a pek kir leh phal loh chu ṭha takin a enkawl zuia, a upa Darphawnga te, Thangphunga pa te, (Sehlawh lal) chuan vai ṭawng zir nan an hmang a, an ṭangkaipui em em a ni. Kum 1870 pawh khan Darphawnga chu Vailian lo chhawntu berah an hmang a, Darphawnga chu sapin Puansen leh Sakawr an pe. Mizo zingah Darphawnga hi Sakawr nei hmasa ber leh Sakawr chunga chuang hmasa her a ni awm e.

Tunah (hemi ziah lai) hian Vanpuilala thlahte chu nausen nena chhiar vekin 220 lai an la dam a ni.

(re-edited & typed L.Sanglura Sailo on,10.07 .2014)

Leave a Reply

Your email address will not be published. Required fields are marked *

error: Content is protected !!