AIZAWL TRAFFIC JAM FREE RALLY NEIH A NI

Vawiin khan Aizawl Traffic Jam Free Rally Mizoram Enfield Riders ten an nei a. Thuampui atanga tlan tanin Aizawl Veng hrang hrang-ah an tlan kual a. Transport Department Directorate Office-ah Aizawl Traffic Jam Free Rally kharna hun hman a ni a. Programme hi NEDP hnuaia Transport Department buatsaih a ni a. Aizawl traffic a thawl theihna tura mipui hrilhhriatna hmanruaah Rally hi ruahman a ni.

Aizawl Traffic Jam Free Rally Working Group Committee Chairman leh Home Addl Secretary  Pu Lalbiakzama chuan driving rules hi mipuiin zawm tha ila tun ai hian traffic jam hi a ziaawm

 ngei ang, a ti a. Rear view mirror pawimawhna leh double overtaking hlauhawmna a tarlang a. Kawng kual laia motor dah khap a ni tih hre reng chunga dah lui an awm thu sawiin kan kawng zim nen traffic jam hei hian a thlen a, dah loh hram i tum ang u tiin kalkhawmte chu a fuih a. Aizawl Traffic Dy.SP Pu K.Laltluangliana chuan thu sawiin mahni motor theuh ken chhuah ai chuan public transport hman tam hian traffic jam a ti zia thei a ni, a ti a. Tunlaiah school naupangte pawh motor in nu leh pa emaw chhungten kan thlah nasa a, naupang pakhat motor pakhata hruai ai chuan veng khata awm tan motor pakhatah a huhovin hruai thei ila, traffic jam nasa lutuk hi a ziaawm dawn a ni, a ti a.  Aizawl traffic jam nasat chhan ber chu motor tam lutuk hi a ni a, motor hmang tam lovin ke a kal tam kan inzirtir a ngai tel a ni, a ti a. Traffic Regulation lehkhabu mitinin kan hriatthiam theih tura buatsaih chu mipuiin chhiar uar lehzual a pawimawh thu a tarlang a. Motor fit tak, kawng laka chhe mai lo tur kan neih a ngai a, motor pakhat kawng lun lai taka chhia hian nilengin traffic jam a thlen a ni, a ti. AMC Councillor Pu R. Lalbiakthanga chuan mizote hian dan kan ngai pawimawh lo hle a ni tiin Aizawl khawpui chhung kawng laia motor dah nasa lutuk hian traffic jam a thlen a, mipui ten hetianga motor dah hi loh theih lohin kan tih thin a ngai si a, motor dahna zau zawk traffic jam thlen si lo kan neih a ngai a ni, a ti a. Aizawl khawpui chhung Bazar area-ahte hian motor dahna tur awlah pawh motor tam lutuk avangin dah tur chin bak kan dah nasa a ni, a ti a. AMC  chuan khawpui chhunga traffic jam a tlem theih nan theihtawpin hma an lak thu a sawi tel a ni.

Aizawlah hian lirthei nuai 1.4 chuang a awm a, kum 2016 atang khan Co-ordination Committee on Traffic Management ten traffic management chungchang an lo ngaihtuah tawh thin a, sawrkar department-Transport in hma la se tih niin motor neitu ten an motor dahna tur garage an nei vek tur tih thuchhuah siam a ni a, mi tam takin garage siam nan hma an la a, November 2017 khan garage siamna hun tiam a tawp ta a, December Ni 1 atangin veng hrang hrangah kawng sira motor dah endik turin thawh chhuah tan a ni.

Kharna hun hi Transport Department Jt.Director Er.R.Lalrammawia chuan a kaihruai a. Kalkhawmte lawmna hun Transport Director Pu R. Remmawia’n a hmang a. I&PR Director Pu David L Thangliana chuan mipuite tan Aizawl khawpui chenna nuam a nih theihna turin traffic rules zawm tum theuh ang u tiin kalkhawmte chu traffic rules zawm a, midangte hrilh darh turin a fuih a. I&PR Director hian lawmthu sawina in hun a khar a. Aizawl Traffic Jam Free Rally Working Group Committee, Mizoram Enfield Riders Association leh Transport Department hotute leh hnathawkte an tel a. Rally puala siam leaflet leh bookmark sem chhuah a ni.

Leave a Reply

Your email address will not be published. Required fields are marked *

error: Content is protected !!