Misualte chhandamtu Isua – Nawhchizawrhna hmunpui siamtu pawh Isuan a tidam – Biakhmingthanga Chhangte – Sermon

“Boralte zawnga chhandam turin Mihring Fapa hi a lo kal a ni reng a ni,” Luka 19 : 10.

“Mi hriselte chuan daktawr an ngai lo va, mi bawrsawmte zawkin an ngai a ni. Mi fel takte lam tura lo kal ka ni lo va, mi sualte lama simtir tura lo kal ka ni zawk,” Luka 5 : 33.

Kan thupui Mi Sualte Chhandamtu Isua tih leh Pathian thu hmun hniha kan tarlan te khi an inhmeh hlein ka hria. Bible-in mi sual a tih leh boral a tih hi mi pakhat sawina mai a ni. Chanchin Ṭha ziaktu Dr. Luka hian Luka 5 : 33 leh 19 : 10-ah te hian mi thu hmun sawi nan boral leh mi sual tiin a sawi a ni. Tichuan mihringte chu Pathian aṭanga bo leh mi sual kan ni ta a, “Pathian ropuina chang pha tawh lo” leh chatuan boralnaa kal tur kan lo ni ta a ni, (Rom 2 : 23). Nimahsela, Pathian chuan a mi hmangaihna chu fak tlakin a lantir a, mi sualte kan la nih laia Krista kan aia a thih avang khan. (Ro. 5 : 8). Chu Krista thia tholeha ngei chu mi fel takte lam tura lo kal a ni lo va, mi sualte lama, simtira, chhandam turin a lo kal a ni. (Lk 5 : 32). Mi fel leh mi ṭha lam lo va, mite hmuhsit, rel leh nuihzat, mi sualte lama Isua a lo kal hi a va mak tak em!! Chhandamtu mak tak a ni !!!!

Daktawr khawngaihna ngah Isua : Miin dam lo, natna nei a ni tih a inhriat hma chuan Daktawr a pan ngai lo va, mamawh pawhin a inhre bawk hek lo. Daktawr pantute chu natna vei, mahni intidam thei lo, ṭanpui ngai tih inhria a Daktawrin a duh ang anga a lo bawihsawm atana inpe phalin an pan ṭhin. Thlarau lam thilah Isua thu sawi hi a dik hle a ni. Sual natna nei, boral, chhandam ngai, mahnia inchhandam thei lo tih inhretute chauhvin mi sual leh boralte Chhandamtu Isua hnen lam an rawn pan ṭhin, tin, Ama hnen rawn pantute chu tumah a hnar ngai lo va, khawngaih leh hmangaiha kuangkuahin a lo chhandam țhin (Joh. 6 : 37). Pharisaite leh lehkhaziaktute – “fel inti takte” lam turin Isua a lo kal lo va, “mi sual” nih inhria a, Amah ngaitute “lama simtir tura lo kal a ni zawk. Mi chutiangte hnenah Isuan, “I sualte ngaihdam a ni tawh e” tiin a lo ṭawng thlamuan ṭhin. Mi sual Zakaia anga mi sual, Amah mamawhtu, “Boralte chhandam turin Mihring Fapa hi a lo kal a ni reng a ni”.

Nick Vujicic-a rawngbawlna aṭangin : Tunlai khawvela thuhriltu lâr leh hmingthang tak Nick Vujicic-a hi kan hre ngai em? Țhenkhat chuan TV-a a thusawi lai te kan hmu awm e. A piansual dan rapthlak tak avangin kum 10 a nihin a chhungte tana hnawksak mai nia inhriain intihhlum a tum a, mahse Pathian nen an intawk ta hlauh mai a, Pathianin khawvelah engemaw ti turin a duh a ni ang tih chu a nun khai chhuaktu a lo ni ta. Tichuan, khawvel hmun hrang hrangah Pathian thu a sawi ṭhin a, khawvel fang chhuakin mi makraduai 30 (30,000,000) chuang hmaah Pathian thu a sawi tawh a ni. (A chanchin ngaihnawm tak hi a hranpain remchangah kan la sawi leh ang). Ṭum khat chu India ram khawpui pakhat Mumbai-ah rawngbawlna a rawn nei a. Heta a rawngbawl chhung hian nawhchizawrhna hmun pakhat, ram acre (ṭin) 10 zeta zau hmunah chuan an hruai a, chutah chuan Pathian thu sawina a nei a. He hmuna awm hmeichhiate chu an kawm a, chu hmun dintu, a neitunu ber chu a taksa a zeng a, chuvang chuan chet pawh a che sawn thei lo va, khumah kum li zet a lo mu tawh a ni. Nu, la valai tak ni si kha pitar ang maiin a vunte chu a vuai sawng chhe vek tawh a, a unaunuin chu nawhchizawrhna industry chu a enkawl ta a ni.

Ṭawngṭai damna ropui : Chu nu khawngaihthlak tak leh beidawng ngawih ngawi lu chungah chuan Nick Juvicic-a chuan a kut nghatin a han ṭawngṭai sak a, chawp leh chilhin a rawn ding chhuak nghal ta mai a. A thisen zâmte chu rawn chak ṭha lehin a luan dan pangngaiin a rawn luang a, hmuh theihin a rawn dam leh ta a ni. Nick-a hruaitu Indian pa chuan, “Nick-a, a mak lutuk, a mak lutuk,” a ti mawlh mawlh mai a. Ani Nick-a pawh chuan nui ho chungin, “Ni e, Pathianin a tidam a nih hi,” a lo ti ve mai a. Chutah Indian pa chuan, “Nick-a, i hrethiam lo a ni, a mak lutuk, a mak lutuk,” a ti mawlh mawlh mai a. Nick-a chuan “Engmaw, ka hriatthiam loh chu, Pathianin a tidam a nih hi,” a ti a.

Nawhchizawrhna hmun khar a ni ta : Indian pa chuan Nick- a hnenah chuan, “Nick-a, he nu chanchin hi i hre lo a ni, he lai Mumbai khawpuia Nawhchizawrhna Industry lian lutuk, ram acre 10 (ṭin sawm) laia zau dintu hi amah hi alawm. India ram leh khawvel hmun hrang hrang aṭangin hmeichhe naupang a lei khawm ṭhin a, hmeichhe naupang ṭhenkhat chu an retheih em avanga an nu leh paten an hralh te, human trafficking (mihringa sumdawnna) hmanga an lei khawm te, bumna hmanga an thlem chhuah te an ni. A pawi khawih hi a rapthlakin a nasa lutuk a, chuvang chuan mi zawng zawngin Pathian hremna a tuar niin an ngai a ni. Sakhaw hrang hrang pathian hnenah a dam chhuah leh theih nan an inthawi ṭhin a, mahse eng pathian mahin an tidam thei lo. Tunah hetia Pathianin chawp leh chilha a tidam duh hi a mak lutuk a ni” a ti bawrh bawrh a.

A tidamtu che chu Isua Krista : An in chhung bangah te chuan sakhaw hrang hrang pathian lem an tar tlar tuar mai a, chutia Nick-a ṭawngṭaina avanga lo dam ta nu chu a mutna aṭangin a lo tho chhuak a, an banga pathian lem an tarna lam chu hawiin lawmthu sawi nan chibai a buk ta mawlh mawlh mai a. Mahse, Nick-a chuan, “Ni lo, heng pathiante hi a tidamtu che an ni lo. A tidamtu che chu Isua Krista zawk alawm,” tiin a hrilhfiah a. A sualna zawng zawng ngaihdam a nih avang chuan a thinlungah thlamuanna leh lawmna luipui, tuinung lui a lo luang chhuak ta hum hum a, van lawmna leh thlamuannain a khat ta a ni. Chhandam a ni ta a, mihringhlui hlip thlain mihring thara siam a ni ta. Thil hluite chu an ral ta a, ngai teh u, a lo thar ta a ni!!! Chu Nawhchizawrhna hmun dintu leh mi tam tak nun tichhetu chu Pathianin hmangaihna tawp lovin a ngaidam a, a taksa leh a thlarau a tidam ta a nih chu!! Chutia tihdamna a chan hnu rei lotêah chuan Mumbai khawpuia Nawhchizawrhna hmun lianpui mai chu an khar (shutdown) ta hmak a ni.

Unau duh tak, he nawchizawrhna siamtu nu sualna ngaidamtu Pathian hmangaihna thukzia, zauzia, seizia, sanzia hi a makin a ropui teh e. “Sual a punna apiangah khawngaihna chu a pung lehzual țhin,” (Rom 5 : 20) Paula’n a tih hi a lo dik hle mai. Eng anga sual pawh Isuan a ngaidam zo a, a chhandam duh a ni, khawngaihna leh hmangaihna khat a ni si a. Eng ang mi pawh sima a hnen pantute chu a ngaidam a, a lo siam thar țhin. “Boralte zawnga chhandam turin Mihring Fapa hi a lo kal a ni reng a ni. Unau, eng anga sual leh bawlhhlawh pawh lo ni tawh mah la, Lal Isua hnenah i sual chung khan, i awm ang khan pan la, i sualna zawng zawng nen a lo ngaidam ang che. Amah ngeiin, “Tupawh ka hnena lo kal chu ka hnawt chhuak tawp lo vang,” a ti, (Joh. 6 : 37). “Boralte zawnga chhandam turin Mihring Fapa hi a lo kal a ni reng a ni,” (Lk. 19 : 10).

“Ka fa lo kal rawh i sual rit tak nen,
Ka lo chhawk ang che” tiin a lo nghak reng a che.

Leave a Reply

Your email address will not be published. Required fields are marked *

error: Content is protected !!