Min siamsak tih hi – Mizo Sermon

Ṭpa Ngente.

Mitdel sai hmu an sawi ang maiin Pathian thu kan hriatthiam dan hi a inang lo ṭhin hle a. Ṭhenkhatten a ṭawngkam bungrua hrim hrim kan helh a, ṭhenkhat chuan ṭawngkam dangdai apiang kan lawm thung a. A tute pawh hian Pathian thu hi systematic taka chhui chian peih a pawimawh hle mai.

‘Min sim sak’ tih ṭawngkam tuipui tute hi chi hnihah an ṭhen theih awm e.

Pakhatna chu, ‘Pa lungawina tling khawpa mahni insim thianghlim zo lote hian Isua felna nun kan neih chauh hi Pa-in sima min chhiarna a ni a, chu chauh chu kan tlinna a nih avangin ama nun a pekte chu ‘sim sak’ kan ni ber alawm,’

‘Tin, fa nihna kan chan hnu pawh hian nitin a duh zawnga nung zel turin mihring hian chakna leh theihna kan la nei lo cheu va, Thlarau Thianghlim hruaina chauh hi kan theihna kawng awm chhun a nih avangin simna tak tak hi chu Pathian aṭanga kan dawn a ni a, chuvangin keimahni aṭanga chhuak ni lo, Pathian aṭanga kan dawn a nih miau avangin min sim sak tih loh rual a ni lo,’ an ti niin a lang.

Hengte hi mawihnai leh îtawm taka sawi tumin ‘Min sim sak’ an ti ṭhin a nih hmel e.

A pahnihna chu, a dik a dawk hre lem lo, a dangdai apiang lawm an awm a. Chung mite chuan thlaraua chang fiah tawhte sawi awmzia man lem lovin ṭawngkam dangdai hrim hrim an lawm a, mi dangte deu nan an hmang ṭhin a. Thlaraua fiahna tak tak pawh phak lo, thil dangdai apiang lawm an nih vangin ‘Min sim sak’ tih ṭawngkam dangdai tak hi an tuipui ve mai niin a lang.

He ṭawngkam hian zoram ringtute zingah inhnialna leh inṭhenna a thlen fo tawh ṭhin a, a sawi ṭhintute hian an tum an ṭhelh deuh nge an tum tak an hlawhtling tih pawh hriatthiam a har hle mai.

Chu tih laiin he ṭawngkam duh lotute pawh an inanglo ve nuaih tho. Mihringin chhandamna kan channa turah mihring lam an dah pawimawh hmasak zawk avanga he ṭawngkam hi duh lo an awm a, tin, a enga mah hriat chian nei lova hmaitlang ṭha lam tih lawm tum vanga do ve ngawt an awm bawk.

Aw le, a enga pawh ni se, ‘Min sim sak’ tih ṭawngkam hi Pathian thuah ngaih sual theih, awmze phir nei thei a nih avangin ringtu puitling chuan he ṭawngkam hi chu hman loh mai a himin kan ṭhatpui zawk a rinawm. He ṭawngkam tel lo pawh hian Chanchin Ṭha a hril theihin Krista ke bulah mite a hruai thlen theih tho si a.

Amaherawhchu, Simna a ni emaw, Piantharna a ni emaw, Thilsiam thar, Nun thar, a enga pawh hi ni se, kan Pathian hian duhlo chung barh luih a tum ngai lo va, chutih laiin duh hun huna neih theih lah a ni hek lo. Chhungril lam en ṭhintu tehna leh a hna thawh dan hi mihring ṭawng hian a hrilh fiah zo lo a ni e.

Hriat fiah i duh chuan theihtawp chhuah la, bei chiam la, i theih loh zia i hriat fiah hunah sawi fiah thiam si lovin i nunah a fiah viau thung ang. Hre fiah lem lova i lungawia Pathian i ring bur thei a nih pawhin a sualna a awm chuang lem lo ve.

Amaherawhchu, Pathian ring bur thei si lo, hriatfiahna nei tura taihmak chhuah peih bawk si lo i nih erawh chuan, tuemaw tan chuan ‘bel chhunga sa’ i ni mai thei e.

Leave a Reply

Your email address will not be published. Required fields are marked *

error: Content is protected !!