Mi zawng zawng nen inrema awm – Upa K. Zalawma

MI ZAWNG ZAWNG NEN INREMA AWM

Upa K. Zalawma

Lâwmte chu lâwmpui ula, ṭapte chu ṭahpui rawh u. Ngaihtuah hmun khatin awm tawn ṭheuh rawh u. Inngaihtuah sâng lutuk suh ula, mi tête pâwl zâwk rawh u. Intifing suh u. Tu sual pawh sualin thungrûl suh u. Mi zawng zawng ngaiha thil mawi ngaihtuah lâwk rawh u. A theih phawt chuan nangmahni lam tal, mi zawng zawng nên inremin awm rawh u. Rom 12:15‭-‬18

Rom 12:14-18-ah hian mi dang nena kan inrem theihna tura awm dan tur point 5 kan hmu.

Rom khua mite hnena lehkha thawn a ni chungin a lo dawngtute chu Kohhranho tho an ni. Kohhranho inkarah mai ni lovin, ringtute chu mi zawng zawng nen inrema awm turin Paula hian a fuih a ni. Mi dang nena inrema awm tur chuan hengte hi a pawimawh:

1. Min tiduhdahtu anchhia lawh mai lo va, malsawm hlauh zawk tur a ni.

2. Lawmte chu lawmpui a, ṭapte chu ṭahpui ve tur.

3. Ngaihtuah hmun khata awm a, inngaihtuah sàn lutuk loh tur.

4. Tu sual pawh suala thungrul lo va, mi zawng zawng laka thil mawi ngaihtuah zawk tur.

5. Mahni lam tal, mi zawng zawng nen inrema awm tur.

[adToAppearHere]

Midangte dinhmun hriat thiam a pawimawh:
Mi dang nena kan inkarah hian keimahni dinhmun aṭanga an mahni teha ngaih dan siam hi a awl hle. Midang nen inrema awm kan duh chuan, an dinhmun ngaihtuah hmasak a, hriatthiampui phawt tur a ni.

School naupang zingah thiam thei lo deuh emaw, thu awih lo deuh bik emaw an awm fo thin; chung mite chu haua hrem mai lovin, in lama an chhungkaw dinhmun leh boruakte hriat chian tum phawt a ṭha. Broken family aṭanga lo kal emaw, nu leh pain an ngaihsak vak loh pawh an ni thei.

Chutiangin Sunday School emaw, Kohhran memberte emaw leh kan hnathawhna hmun hrang hrangah mi dang bula kan awmin, an dinhmun hriat tum leh hriatthiampui a ngai thin. Keimahni ang vek tura kan d ah chuan inrem a har thin. Mi dang dinhmun hriatthiam phawt hi inremna kawng hmasa a ni.

Sual, suala thungrul lova, mi zawng zawng ngaiha thil mawi ngaihtuah a ngai:
Rom mite zingah hian bawih engemaw zat an awm ngei ang; tihduhdah tuar ṭhin pawh an awm ni ngei tur a ni. Paula chuan, “A tiduhdahtu che u chu malsawm ula, anchhia chu lawh suh u,’ a ti.

Kan chunga sual tak emaw, rilru tha lo tak pu emaw nia kan hriatte chungah hian ṭhat chhuah har kan ti fo thin. Ringtute chu midang nen inrema awm tur kan nih miau avangin min hawtu emaw, min tiduhdahtu pawh ni se, malsawm zawk a, ânchhia phei chu lawh hauh loh tur kan ni. Mizo pi pu-te chuan, “Mi anchhe lawh chu mahni chungah a thleng duh,” an ti thin. Mi zawng zawng ngaiha thil mawi ngaihtuah tur a ni a, kan rilru leh ngaihtuahna te, a taka kan nungchang leh thiltihah te mi ngaihah a mawi ang em? tih ngaituah hmasak ṭhin tur a ni.

[adToAppearHere]

Ngaihtuah hmun khata awm tih pawh hi, thil thuhmun ngaihtuahin awm rawh u tih nen a inang awm e. Duh zawng in ang lo chu inkawm pawh a har, Inngaihtuah sang lutuk lova, mitê te, mi hnuaihnung zawkte pâwla kâwm ṭhin zawk hian, inrem a awl deuh. Inngaihtuah san viau hi inngaih hlutna bul a ni.

Mi zawng zawng nen inrema awm tur kan ni:
Mi sualna thungrûl lo va, mi zawng zawng nen inrema awm tur chuan mi zawng zawng laka thil mawi ngaihtuah zel te hi a ni. Kan changthlan hian, “A theih phawt chuan, nangmahni lam tal mi zawng zawng nen inremin awm rawh u,” a tih ang hian, miin min rem hleithei lo a nih pawhin, ringtute chuan mi dangte nen inrema awm kan tum tlat tur a ni.

Remna siamtute chu an eng a thawl e,
Pathian faa vuahin an la awm dawn si a. (Mat 5:9)

[adToAppearHere]

Leave a Reply

Your email address will not be published. Required fields are marked *

error: Content is protected !!