Mi tluang nih i duh chuan – Rev. VL Nithanga – Sermon

MI TLUANG NIH I DUH CHUAN

– Rev VL Nithanga.

Mi tluangte lamlian chu sual kalsan a ni, a kawng vêng țha chuan a nunna a humhim a ni (Thuf.16:17).

Thlawhtheihna chu boruaka thlâwk tûra siam a ni a, leiah ding ta reng se chuan a chhe thuai mai dawn a. Lawng pawh chu tuifinriata kal tûra siam a ni a, khawmualah ding reng se chuan a chhe mai bawk ang a. Motor pawh tlân tûra siam a ni a, tlân lova dintîr reng chuan a chhe thuai mai a ni. Chutiang bawkin mihring pawh hi Pathianin sual kalsana, thil țha ti tûra a siam leh a tlan chhuah kan ni a. Kan nih tur tak kan nih a, kan tih tur tak kan tih hian kan tluang mai a ni.

Chutih lai chuan mi tam tak chuan piang thar inti reng chung si hian sual kawng kan zawh lui tlat a. Zû kan in a, drugs kan ti a, kan hlêprû a, inngaih sualah kan tlu a, sual dang tam tak kan ti hreh lo va. Chuvângin, kan ram hi a chhia a, kan kristianna quality hi a hniam hle a ni. Kan țhalaite film chan ve țhinah te pawh hian kan ram quality hniam zia chu a lang chiang țhin. Sual nasa takin an han chên phawt a, sualin a lo ei chhia a, Hiv an lo nei a, an han lungngai leh a, sual ei chhiat tawh hnuah Pathianah an han inhmu chhuak a, chu chu ropui kan tiin kan hnuk tiulh lai chu a ni a. Ka ngaihtuah thin a, film mah nise a tak hlim thla a ni si a. Kan ram mipui tam zâwk mah hi chuan, sual nasa tak tih hnu, sual hliamna ser reh thei tawh lotena min bawm khah nuk tawh hnua, pian thar hi ropui hleah kan la ngai deuh tlat a ni.

Nu leh pa kaihhruaina hnuaia naupang nungchang țha taka seilian, naupan lai ațanga nu leh paten Biak ina an hruai țhin, naupan lai ațanga Sunday School kal tluang chho zêl, tleirawl lai ațanga sual kawng dai lem lo, Lal Isua chu amah chhandamtu a nih zia a thinlunga lo intuh nghet tlat tawh, țhalai rawngbâwlnaah pawh inhmang chho ve zêl, Kohhran hruaitu atân pawha hman tlâk zel, an dam chhûnga Lalpa tâna mi rinawm, an tu leh fate pawh an hnung zui zêl thei tûra kaihruai zel mite kawng zawh hi, mi tluangte lamlian chu a ni a. Piantharna quality țha ber pawh a ni.

Mihring chu Pathianin sual kawng zawh lo tûr leh thil tha ti a, amah chawimawi tûr leh a rawngbâwl tûra a siam kan nih tlat avângin, hetiang kawng kan zawh hian kan ngeih ber a. Kan rilruin a ngeih a, kan hlim tlat mai a. Kan taksain a ngeih a, kan hrisel tial tial a, kan dam reina tûr pawh a la ni zêl.

Mahse, zû kan in a, drugs kan tih a, inngaih sual kan chîn a, kan hlêprûk a, sual lam kawng hlir kan zawh chuan kan ngeih lo em em a ni. Kan rilru a hah a, kan hlim lo va, chhûngkua kan buai a, kan faten zirtirna țha an dawng lo va, zirnaah an hlawhtling zo lo va. Kan hrisel thei lo va, kan retheih phah a, sual vângin kan dam rei loh phah fo bawk. Fate, tute thlengin eng kawngah mah a tluan tak tak theih loh a ni. Pathian thu chuan, “Mi tluangte lamlian chu sual kalsan a ni a, a kawng vêng țha chuan a nunna a humhim a ni,” a ti a ni (Thuf.16:17). Mi tluang nih i duh chuan sual kalsan la, thil țha ti la, tichuan i lo tluang zel dâwn nia.

Leave a Reply

Your email address will not be published. Required fields are marked *