Mi 34 thihna Kawnpui dai Bus Accident rapthlak thlenna – July ni 7, 1981

Mizoram Images Production

Kum 1981 kuma Kawnpui daia Mizoram sawrkar Bus accident rapthlak tak thlenna hmun Kawnpui dai hi hun rei tak aṭang khan mite ṭih leh mite insawi ṭhaih hmun a ni a. He lai hmun Kawnpui dai, Sairang peng leh Zanlawn inkar hi 10 kms vela hla niin helai kawng chhuk chho leh te tak siah hian mi tam tak an accident tawh a. Accident zinga rapthlak ber pakhat chu kum 1981-a Mizoram sawrkar bus ZRX 82 accident, mi 34 laiin nunna an channa hi a ni.

Kum 1981 July ni 7 chuan Shillong lam atanga lo chho Mizoram sawrkar bus no. ZRX 82 chu zankhuaa rawn tlan tawhin Kawnpui dai hi chhun lai vela tlang tlang a tum laiin he lai kawng chhuk takah hian a driver Chhuanvawra kum 42 mi chu a muthlu nia hriat a ni a, kawng thlang lam awih takah chuan a mi chuang mi tam tak nen an liam thla ta a ni.

Accident a awm a ni tih hriat a nih ve leh a hria apiang an tlan khawm a, chutih hunlaia kal ve te chuan hliam tuar thi tur chalchang tal leh rum vel te, bawihsawmtu mumal awm loa hliam let rengte khawngaihthlakzia leh hmuh hrehawmzia chu an kumkhaw sawi a tling  bawk. Dr. Thangchungnunga chuan hemi ṭuma accident-a hliam tuar pa pakhat chu lu hek huam leh thluak lang chungin kawngah a vak chhuak a, a bula mite chu meizial zuk tur a dil a, a zuk hnu rei lo teah a thi zui tih a sawi (Ka tawn hriat 4th Ed – 18)

He accident-ah hian driver Chhuanvawra bakah a nupui Noengi pawh thi zingah an tel a ni. Thite hi

1.Aitluangi (55) – Shillong khua
2.Vanlalruati (11) – Shillong khua
3.Lalramthangi (41) – Shillong khua
4.Joseph Thangdailova (44) – Shillong khua
5.James Lalpianthanga (8) – Shillong khua
6.Lalsiami (39) – Shillong khua
7.Chhungi (31) – Shillong khua
8.Lalmalsawmi (14) – Shillong khua
9.Lalengmawii (18) – Aizawl Republic
10.Lalhlimpuii (31) – Aizawl Republic
11.Lalawii (71) – Aizawl Republic
12.Lalthlamuani (11) – Aizawl Republic
13.Lalzarliani (18) – Aizawl Thakthing
14.C.Lalhmangaihi (18) – Aizawl Thakthing
15.Zamliani (43) – Aizawl Thakthing
16.Lalthangvunga (18) – Aizawl Venghlui
17.Lalnghaka (35) – Aizawl Venghlui
18.Biakveli (45) – Aizawl Electric
19.Rohmingi (18) – Aizawl Electric
20.Chhuanvawra (42) – Aizawl Tuikual
21.Noengi (40) – Aizawl Tuikual
22.Vanlalpari (11) – Aizawl Dinthar
23.Hrangluaii (53) – Aizawl Dinthar
24.Vanpari (48) – Aizawl Khatla
25.Zaliana (30) – Kolasib
26.Z.D. Dengzika (41) – Champhai
27.R. Thanga (35) – Champhai
28.Rosemi (40) – Serchhip
29.Lungtiawia (10) – Serchhip
30.R. Kapṭhiangi (37) – Serchhip
31.Lalthanzami (25) – Ruantlang
32.Lalthanmawia (31) – Lunglei
33.Laldawngliana (71) – Saitual
34.Vanlaldiki (23) – Darlawn

He Kawnpui dai bus accident a boral te hming leh helai an accidentna hmun hriatrengna lungphun hi Kawnpui YMA te chuan ni 21.10.1982-ah an phun a, mitthi te hming leh kum zat te, an chenna hmun te nen an tarlang a, tun thleng hian khualzin tam takin he lungphun thlalak hi thla an lo lakpuiin helai hmunah hian an lo ding tawh thin a ni.

Kawnpui dai lungphun

Helai accident thlenna hmun hi mi tak takin an hlauh leh an ṭih hmun a ni a, insawiṭhaih leh hrang anga sawi a tam a, hetiang vangte pawh hi a ni ang, a sira thing kunga chuan  Kohhran pakhat ṭhalaite chuan ‘Thlamuang takin awm rawh, keiin khawvel ka ngam ta’ tih Pathian thlamuanna thu chu an tar a. Hei hian helai hmun hi a thlamuanthlak loh dan te, a hlauhawm dan te a tarlang ṭha hle a ni a ni. Hlau lo tura kan infuih chang te, hlauh tur a awm loh thu kan sawi te hian kan hlauh tawh vang a ni tlangpui bawk.

 

 

Leave a Reply

Your email address will not be published. Required fields are marked *

error: Content is protected !!