Mangan nia chhangtu Pathian – Inawhhlum tum a piangthar – Biakhmingthanga Chhangte

“Mangan niah chuan mi ko la; Ka chhanhim ang che, tichuan nangin mi chawimawi dawn nia,” Sam 50 : 15.

“Mi au la, ka chhang ang che, thil ropui leh inthup i hriat ngai loh chu ka entir ang che,” Jer. 33 : 3.

Kan Pathian hi amah ringtu ten manganga a țanpuina dila a hnenah tlulutte chu mak leh ropui takin a chhandamin a humhim a, an hnenah nungin a inpuang țhin. Pathian rinawm, a thutiama dingnghet a ni. Lungngai, mangang, buai leh thlaphanga pantu te chu a angchhungah hlim leh lawm takin hmangaihnain a lo kuangkuaha, a lo țanpui țhin. Chutianga a țanpui Millie-i, Harrisburg, Pensilvania, USA ami, Thuhriltu ropui Ken Gaub-a hmanga Pathianin a mangangnaa a tanpui dan chanchin hi i han en teh ang.

Missionary Ken Gaub-a : Missionary Ken Gaub-a chu America mai pawh ni lovin khawvel hmun hrang hrangah Crusade neiin a nupui Barbara leh a fate nen an zin kual țhin a. Magazine, radio leh television te hmanga rawngbawlna a neih bakah țhalaite zingah nasa takin rawng a vawl bawk țhin a ni.

Lalpa duhzawng a ni em? : 1970 vel khan Dayton, Ohio-ah rawngbawlna nei tura an chhungkuaa an kal chu a inngaihtuah buai hle mai a. Pathian rawngbawltuten harsatna tawh chang leh chauh changte an nei ve fo țhin. Ani pawhin chutiang hun chu a tawk mek a ni. A rawngbawl dan chu Pathian duhzawng leh hriatpui a ni em, A duhna hmunah A rawng a bawl em tihte ngaihtuahin a rilru a buai hle a ni.

Thil ei turin an chawl :

Chutia Ken Goub-a a inngaihtuah bual lai tak chuan a fapa chuan a rilțam thu hmun pakhat an thlen lai chuan pizza ei a rawt a. Tichuan a remchang hmasa berah kawngsira ei tur zawrhna hmunah chuan an ding ta a. Signboard a lo intar tuar mai a, an bus te an han hun rem hnu chuan ei tur zawngin an chhuk ta sap sap a. Ken-a chu a inngaihtuah muk hle mai a, an nuin thil ei tura a rawn sawm pawhin a rilțam loh thu leh vah thawven a duh zawk thuin a lo chhang a.

Ken Goub-a an be duh e :

In tur a lei a, a tei kual vel a, chutih lai chuan a bul maia Public Phone Booth-a mi telephone chu a lo ri ral ral a, a han khawih kual vel a, dawr hnathawkte lah chuan an rawn ngaihsak hlawm bawk si lo, a ri reng mai bawk si a, emargency a lo nih palh thulhah tiin phone chu a va la ta a. “Hello!” a han tih chuan operator-in, “Ken Goup-a an be duh e,” a rawn ti chu a phu zawk mai a.

Nun beidawng inthah tumin a rawn bia :

Chu lai hmun chu an zin kawng mai a ni a, chutia telephone-a an rawn be duh ta mai chu thilmak a ni reng a ni. “Ken Goub-a an be duh e,” operator-in a rawn tih leh pawh chuan miin tihder an tum a nih a ring hial tawh a ni. A chhungte leh a țhianteho chu dawrah an la țhu țhap mai bawk si, chulai hmunah chuan hmelhriat a nei lovin amah hretu pawh an awm bawk si lo. Operator chuan vin deuh hlek a, “Ken Goup-a an be duh e,” a rawn tih leh chuan a harh chhuak zawk mai a, “Ken Goup-a ka ni e,” a han tih chuan hmeichhe aw hian, “Kha mi ngei kha ka biak duh chu a ni e,” a rawn ti nghal a. “Ka hming chu Millie-i a ni a, Harrisburg, Pensylvania ațangin ka rawn phone che a ni. Ka nun hi a mangangin a buai em em mai a, mahni inthah mai pawh ka pawisa tawh lo a. Ka chhungte lehkha ka hnuchhiah tur ka ziah lai mekin ka rilruin Pathian hnenah ka țawngțai a, “Lalpa, mahni nunna em lak hi chu ka duh bik lo, mahse kawng dang ka hre tawh si lo, min ngaidam ang che,’ ka tih lai takin ka mitthlaah television-a Pathian thu i sawi lai kha a lo lang nghal a. He thuhriltu hian ka mangannaah min țanpui thei dawn a nih hi ka ti a. Mahse tihngaihna a vang khawp mai, tunge i nih leh i phone number ka hre bawk si lo.

Chhandamtu hnenah a hruai thleng :

“Ka lehkha ziahlai chu ka han chhunzawm leh dawn lai chuan ka rilruah number hi a lo lang ta zut zut mai a. Lehkha themah ka chhinchhiah nghal a. Chu number chu ka han en vang vang a, Pathianin i phone number min rawn pe a nih ka ring ta tlat mai a. Telephone Operator hnenah chuan chu number chu min thlunzawmsak turin ka hrilh ta nghal a. Tuna hetianga ka rawn be thei ta mai che hi mak ka va han ti em! Tunah khan California-a in Office-ah em ni i awm?” a rawn tih pah te pawh chuan a la inhnit hlawp hlawp a. Ken Goup-a pawh chuan mak hi a ti em em mai a, chutia ram palailenga Public Telephone-a an rawn be ta mai chu a mak hle reng a ni. “California-ah Office kan nei lo va, kan office chu Yakima, Washington-ah a awm a. Min rawn betu zawk i ni a, ka awmna chin chu hre zawk awm tak i ni alawm le?” a han tih chuan Millie-i chuan, “Ka thinlunga telephone number lo lang kha operator ka thlunzawmtir tawp mai a ni a. Khawi hmun nge ka biak tih lam reng reng ka lo ngaihtuah hlei nem,” a rawn ti ta a. Dayton, Ohio hmun pakhata Ken Goub-ate zin hahchawl lai chu a rawn zawng hmu nawlh mai chu a lo ni. Ken Goub-a chuan telephone hmang chuan Millie-i chu Pathian thu a hrilh ta a. Nun thar pea Chhandam theitu hnenah chuan chumi zan la la chuan a hruai thleng ta a ni.

Pathian hriatpui rawngbawlna : An inbiak zawh tawh hnu pawh chuan Ken Goub-a chuan mak a ti tawp thei lo va. Amah ngei pawhin a la hriat ngai lohna hmuna chutiang thil a han tawng ta mai chu! A chhungte leh a rawngbawlpuite hrilh ta ang sela, an ring duh lovin a â ta emaw an ti mai ang tih te a han ring rum rum a. Mahse a hma lawkin a țawngțai a, a chhanna a hmu a, Pathianin a rawngbawlna chu a hriatpui a ni tih chiang takin a rawn hrilh a, hriattirna (sign) a rawn pe a ni tih a hre chhuak ta a. A thinlung chu lawmna leh hlimnain a lo luangliam ta a, a nupui hnenah chuan “Barbara, Lalpa’n ka rawngbawlna hi min hriatpui asin,” tiin a va hrilh thei ta a ni.

Kan rawngbawlna hi Thlarau hriak thihna, Thlarau Thianghlima chhinchhiah kan nihna ațangin Lalpa hnen ami kan dawn a ni em tih kan inenfiah a țul hle mai, Lalpa hriatpuia rawngbawl kan ni em? Ken Goub-a rawngbawlnaah hian nun beidawng te an piangthar ang hian miten Isua kan rawngbawlnaah an hmu ve em? A nih loh leh mite thlarau nun rilțam tuihal kan chawm em?

Mangan nia Amah autute chu amite hmangin a chhanchhuak țhin a, a țanpui a, thil mak leh inthup an hriat ngai loh a hriattir a, a chhandama, van lawmnain an khat țhin a ni.

Unau i nunah manganna leh beidawnna i tawng tawh em? I nanganna zawng zawng nen simin a hnen pan la, a lo țanpui ang che. Amah ngeiin, “Mangan niah chuan mi ko la; Ka chhanhim ang che; tichuan nangin mi chawimawi dawn nia,” a ti. A lo nghak reng ache.

Leave a Reply

Your email address will not be published. Required fields are marked *

error: Content is protected !!