Mahni infiah thin ang u – Mizo Sermon

Lal Ramhluna Ralte

II-Korinth 13:5 “Rinnaah chuan in awm emaw, nangmahni ngei inchhin thin ula; nangmahni ngei in fiah thin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duh loh in nih nghal loh chuan.”

Rinnaa kan awm leh awm loh mahni kan infiahna tur te:-
1. Thil tih hmangin : Pathian duhzawngin ka awm em tih mahni inzawt thin ila.Ka thil tih thin te hi Pathian thu angin ka ti em tih inen fo tur a ni.
Lal Saula kha Amalek nen an indo khan Pathianin Amalekho leh an ran te chu that chimit vek turin a hrilh a. Hnehna a chan khan Amalekho chu a that chimit duh lo va, ama ngaihdana tha nia a hriat angin an bawng thau tha tha te, an beram te chu Pathian hnena inthawina atan a hawn a, an lal Agaga pawh a zuah a, a nung chungin a hawn tih kan hria. Ama tha tihzawnga Pathian tana a thahnemngaihna chu lal atanga paihthlak anih chhan a lo ni reng mai!
( 1 Samuela 15:22-23 Tin, Samuela chuan, “LALPA chuan LALPA thu zawm chu a lawm angin hâlral thilhlante leh inthawinate hi a lawm em ni? Ngai teh, inthawina aiin thuawih chu a tha zawk a, berâmpa thau aiin a thu pawm chu a tha zawk a ni. Helna hi aienthiamna sualte nen a inang a, luhlulna hi milem biak leh Pathian lem biak tluk a ni. LALPA thu i duh loh avângin ani pawhin lal atân a duh ta bik lo che a ni,” a ti a.)
Keimahni ngaihdana kan thahnemngaihna ringawt hi Pathian thu a lo ni lo thei anih chu!
Ka tih hi Pathian thu anga ti ka ni em? Ka sawi hi Pathian thu anga sawi ka ni em tih inenfiah fo ila, rinnaah kan la awm em tih kan inhre thei ang.

2. Sual huat leh sual tlansan: Rinnaah kan la awm reng em tih mahni kan infiahna tur chu ‘sual kan hua em, sual tlansan kan duh em? tih mahni inzawh fo tur a ni. Pathian thuin,”Sual lam chu hua ula, tha lam chu pawm tlat rawh u.”(Rom 12:9) a ti.
Kohhran lo inphun atanga tun hun thlengin Pathian thu lak dalna(Liberalism) hian Kristiante nunah kua a hreuh reng a, sual chu sual a nihna anga pawm phal loh te, sual ngaihzamnate a nasa em em a ni. Sual haw lo ringtu/rawngbawltu kan lo nih reng mai chuan rinnaah kan lo awm tawh lo aniang tia Pathian lam hawi a mamawh hle ang.
Bible-in, “sual tinreng lakah inthiarfihlim rawh u.,(I-Thes.5:22 )a ti. I-Kor.6:18 ah chuan,”Inngaih hi tlansan rawh u. Mihring thil tihsual tinreng hi taksa pawn lamah a ni; mi ngaih hmang erawh chuan ama taksa chungah thil a tisual a ni.” a ti.
Aiguptaah khan Potifera nupui thlemna nasa tak lakah Josefa chuan Pathian a tih /hlauh avangin inngaihna sual lakah a tlanchhe ngam a, Pathian a rinna chu a vawng reng tih kan hre thei. Josefa anga sual tlansan ngam kan ni em tih mahni inzawt fo ila.

3. Thlarau Thianghlim hruaiin ka awm em tih hriat chian tur.
Rom 8:14 Pathian Thlarau hruaia awm apiangte chu Pathian fate an ni si a.

Pathian thlarauvin a chhuahsan Lal Saula bawk kha, a nun a ro va, midang tihnat a pawiti lo va, itsiknain a khat a, a nunrawng a, a tawngtaina pawh a mumang lam thlengin chhangtu reng a nei lo. A nun chu a ro vawng vawng mai a ni. Pathian rinnaah a awm tawh loh vang a ni.

A tawp berah chuan, Galatia 5:19-25 a tisa thiltih leh Thlarau rah a sawite hmangin rinnaah kan awm leh awm loh kan inenfiah thei ang. Thlarau rah hi keimahniah a awm loh chuan tisa duhzawng lamah ka lo awm daih tawh a nih hmel e.
Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!