Mafaa leh A Hringnun Hrualhrui – C. Lalnunchanga – Lehkhabu bihchianna

MAFAA LEH A HRINGNUN HRUALHRUI

-C. Lalnunchanga

Eng emaw thil tih khâwm nikhua leh thian zaho zingah a hlim thei ang berin a lang a; hetiang hi mi dang pawhin an hmuh dân a nih ka ring. Mafaa Hauhnar nen hian kan inkawmna a rei ve ta viau mai, pa hawihhawm, a bula awm nuam tak, nui huah huah reng mai a ni; tin, mi dangte ngaihsak leh an dinhmun hriatthiamna zau tak a nei a, an theihna thilah mi chawimawi a thiam hle. Vawi khat chu he thu hi fiamthuin min hrilh a. “Kum 1995 khân bazarah ka zak ve thelh a, kha bâk kha zahna nên kan inhnaih leh tawh lo,” a ti a. Amaherawhchu, hêng hi Mafaa nihna dik tak a ni lo. Tlêm lai deuh khân he thu hi a sawi a, “Thusawi tura mipui hmaa ka din hian ka zâm a, ka khûr ru fo thin asin. Vawi eng emaw zât ka ding ve tawh; mahse, chhûngrila ka zâmna hi ka tireh thei lo; chuvâng chuan inthup ka tum nasa thin,” a ti.

Vawi tam tak lehkhabu release-naah te, seminar leh thil tih khâwmna dangah te, television-ah te, live leh live lo pawhin Mafaa thusawi hi ka ngaithla tawh a. A zâm ve thin thu min hrilh hi âwih harsa ka ti lek lek mai; mahse, dâwt min hrilh lo vang tih ka hre chiang.

RL Stevenson-a novella, ‘Dr. Jekyll and Mr. Hyde’-ah khan mihring pakhata hringnun inang lo tak pahnih kan hmu a, mize hrang hlak puin an inlan chhâwk thin a. Mafaa lehkhabu thar, ‘Hringnun Hrualhrui’ tihah pawh hian vântlâng leh a thiante pawhin kan lo hmuhpui ngai loh, Mafaa pang khing (lehlam) a lo lang a. Chutah chuan Mafaa, mi khawhar, thlipuiin nasa taka a hringnun a sawisak vêl kan hmu a, chu chu thu leh hlaah a rawn chantir ta a ni. Amah Mafaa tawngkam mawi ka tih zet mai chu, “Ka nui ri i hriain, ka hlim hmêl i hmu fo ang ti raw? Mahse, ka mittui tla i hmu tawh em?” tih hi a ni. He a khawvel lehlama harsatna chi hrang hrang nena an inchai nasatzia ka ngaihtuah a, a hrehawm hmêl a tilang duh ngai lo. John Keats-a hringnun kha hrehawmna leh natna hlirin a bâwm em maw tih tur a ni a. A hla, ‘Ode to a Nightingale’ kan chhiar chuan Keats-an he khawvel chai hahthlak a tihzia a lang chiang hle a. Beidawng leh natna a tawrh laia zan sava lo hramin a nun a chhâwkzia; mahse, chumi chhung rei lohzia; kha hun, hlim vena det a chan chhung rei lo têa thih mai pawh a hreh lo thu a sawi a.

Mafaan a ‘Hringnun Hrualhruai’ a sawi fiahna — “Ka nun inthlun khâwmna hnukpui, mihring nêna min suih zawmtu hruihruala a zai hraw ber chu, ka tan chuan, literature hi a ni a. A chang chuan ka tana chawlhna hmun ralhim leh ralmuang awmchhun a ni thin,” a tih hi Keats-an a hringnuna poetry pawimawhzia a sawi nên pawh a inang hle a ni.

Keats-a kha mi bawrhsawm, natnain a bawm reng mai a ni a. Poetry hmanga a insuangtuah thawvenna kha a nuna thil duhawm lo lang awmchhun em maw tih mai turin — zâna sava lo hramin a lungngaihna leh natnate a rawn lak kiansak thu ‘Nightingale’ tih hlaah khan a chham a. A tân chuan khawvel chu mi zawng zawng beidawnna hmun, hmangaihna pawh eng mah lo ang maia rei daih lo, a hnua tawrhna tizual tam ting chauh a ni a. Zu no han tlak piap a, a hrehawmna pawh theihnghilh daih duh thin mah se, chu ai chuan an huan beech thing buka nightingale lo hram leuh leuh, chu zân sava ruala thlawh bo ve daih chu a thlang zâwk a.

Hla hmanga a insuangtuahna chu zuiin nightingale rual chuan ngawpui tûl pik, zân thim, thla pawhin a êng a chhuah lohna hmunah a va tum a. Thing hnah thli chhêm kuak kâra vân karak vâr mai lo chu a thim phui mup a. A bul vêlah eng pangpar nge pâr a, thing kungte chu engin nge bâwm hmu thei lo mah se, rannung hram ri te a bengin a hria a, rose leh violet pâr rim tui takte chu boruakah a lêng a. A suangtuahnain (poetry) thim thamah chuan a ding reng a; chu hmunah chuan a lungngaihna te, a natna te chu a theihnghilh a; chu hunah chuan a nunna chu tâwp dawn mah se, lungawithlak dâwn hlein a hre hial a. Chutiang tak chuan Keats-a atân khawvel hi a nunrawng a ni.

I cannot see what flowers are at my feet,
Nor what soft incense hangs upon the boughs,
But, in embalmed darkness, guess each sweet
Wherewith the seasonable month endows
The grass, the thicket, and the fruit-tree wild;
White hawthorn, and the pastoral eglantine;
Fast fading violets cover’d up in leaves;
And mid-May’s eldest child,
The coming musk-rose, full of dewy wine,
The murmurous haunt of flies on summer eves.

Mafaa pawhin a nun khawhar tak chu — “A chang hi chuan thing kûnga thli chhêm tân lehkhachaih, hrui chat tawh, uai vêl mai mai hi ka inchan thin,” ti hialin a sawi a ni.

‘Hringnun Hrualhrui’ tih lehkhabu hi phêk 230-a chhah, thu chi hrang hrang hlawm pakuaa then a ni a. A chhûng thute hi inrâl kah tak tak, thil chi hrang hrang a bihchianna te, a hringnun a phawrnate ni mah se, chhiar a nuamin a ngaihnawm a, hmana Mafaa kan hriat thin kha a la ni reng a. Pu A. Thanglura leh Khushwant Singh-a chanchin zangkhai leh ngaihnawm taka min hrilh laiin, ‘Hmangaihna Kuhmûm, Pâr Chhuak Ve Ta Lo Chu,’ a tih Pu Vankhama hla, ‘Awmkhawhar Lenkawl,’ tih chu lungchhiatthlak thei ang berin a rawn thet leh daih a. Thu chichawm tak tak min hlui a, thawnthu sawi thiam tak emaw, zai thiam takin hla mawi tak hmang emaw a, tlâng atanga luipui min fanpui a, khawpui inbengberek kâr atanga phûl pangpâr hmuna min hruai leh daih thin hi ka chan ber.

A lehkhabu pum thlir dâwn chuan a sei dâwn lutuk a. A thu thlûr bing eng pawh hi khalh fal ngat ngat tham a ni hlawm a. A ngaihnawmna lam chauhva thlir chuan — a thupui hlawm thumna, ‘Hranghlui Hrilhfakawm’ tihah hian Lalmama te, Kaphleia te, A. Thanglura te, Lalhmingliana Saiawi te, James Lianmawia te, Rokunga te, Khushwant Singh te chanchin sûnna angrengin a rawn pho chhuak a. Amah Mafaan, “A hun laia A. Thanglura sawisak ve loh Mizopa kha chu an lâr tawk lo tihna a ni deuh ber mai,” a tih ang deuhvin, Mafaan hêng kan Mizo puipa a rawn ziahte hi chu thu leh hlaa mi ropui tak an ni. Omar Khayyam leh Sangzuala Pa te kutchhuak a sawi malh malh a; chutah F. Thanliana, mi bathlar leh mi in rel vela riak lawp lawp thin hla:

‘Awmhar valeng riakmaw lo leng la,
“Thiang maw?” tiin thing tin zawh lai bang la;
Puah lai run in sangpar dawhrema’n,

Zantiang chhin har lunglen i hril dun ang,’ tihte chu min hrûtpui leh a. F. Thanliana hi ka lo la hre ve ngai lo va. Zân arsi hnuaiah, mi in rel laia zan sava, riakmaw riahpuia lo sâwmtu nun chu, amah eng mi pawh lo ni se, a khawhar ve khawp ang le. Amaherawhchu, thu leh hlaah na na na chuan F. Thanliana hi pa ropui inthup a lo ni reng mai.

Pu Rokunga chanchin a ziahah hian literature chauh lo, rimawi pawh a man hle tih Mafaa hian a hriat a. Heti hian a sawi a — “Nikhua a hriat theih tirh atangin Rokunga kha khuarel rimawi siam hian a lo hîpin, a lo aizial tawh a. Eng ri mai pawh kha a mawina a lo dawng fuh thin a, a beng a dawh thiam riau. Nipui thereng hrâm rî te, âr khuang âl âl te, lêngkîra tuikhawhthla ri hum hum te, thâla lui dunga tui fim tak luang ri her her te, tui mal fal ri keuh keuh te thleng hian a beng a verh a, ngaihnawm a ti thin. An rualin, an hla sak chu a thinlungin a lo rempui ve a; a solfa tur âwm ang te a lo dah fiam thin.”

Pu Rokunga kha mi rilru hrisêl, a ngaihtuahna pawh, a hla pawh thianghlim tak a ni a. A hla thu-ahte hian lunglênna sawi ri chhuak si lovin, mite thinlungah lunglenna zangkhai tak a siam thiam a. A nuna thil duhawm tak chu a tlâwmna kha a ni a, chu chuan ropuina tlângah a dintir si a ni. Mafaan, “Rokunga hla thlûk mawina chu a mâwlna hi a ni a; tluangtlam tak anga lang si hian a thûk ruih mai a…… Solfa leh chord biru leh harsa tak taka hla thlûk siam kha tul lo a ti ngam a…. Solfa thiam tak tak chin a nih avangin mite hneh tum rana han intihthiam hi tul a ti lem lo niin a lang,” a tih hi a music lamah chuan a dik hlein ka hria.

Hêng kan Mizo mi ropui, thu leh hlaa mi rilte thuruk a rawn khawrh chhuak thiam em em mai hi Mafaa tân pawh, amah chawi sângtu a ni a. ‘Hringnun Hrualhrui’, Mafaa suangtuahnaa zu luh ve zet chuan kan tê chem chem a; kan rilru hi a duh duhna lamah a chhêm kual vêl a ni ber e.

 

Hringnun Hrualhrui lehkhabu thlalak
Hringnun Hrualhrui book cover

Leave a Reply

Your email address will not be published. Required fields are marked *

error: Content is protected !!