Mafaa Hauhnar (1975 – 2018) chanchin

LALRINFELA (1975 -2018) CHANCHIN
(MAFAA HAUHNAR – essayist, poet, short story writer, critic, humourist & columnist)

Mafaa Hauhnar‘ (1975 – 2018) tia hriat lar H. Lalrinfela hi May ni 19, 1975 khan Aizawl Tlangnuamah a lo piang a. H. Lalsanglura leh Lalrinliani te fa paruk zinga a tlum ber a ni. An unau chu:

1.Er. Lalrinmawia (L) H/o Lalengliani, Tlangnuam
2.H. Lalrinsanga (L) H/o Valarie Tlangthanzari, Tlangnuam
3.Lalawmpuii W/o Laldinpuia (Amama) (L), Tlangnuam
4.Lalrintluangi W/o C. Ngurthantluanga, Khatla
5.H. Lalrindika H/o Lalrinpari, Tlangnuam
6.H. Lalrinfela (Mafaa Hauhnar)

Mafaa photo, Mafaa Hauhnar photo, Mafaa Hauhnar image, Mafaa Hauhnar picture, Mafaa picture, Mafaa photo, H. Lalrinfela image, H. Lalringela picture, H. Lalrinfela photo, H. Lalrinfela thlalak
Mafaa Hauhnar thlalak

MAFAA HAUHNAR THU LEH HLA LAMA A INHMAN CHHOH DAN

Lalrinfela hi a naupan laiin ‘Mafel’ tiin a chhungten an ko ṭhin a, an nau pakhat la ṭawng fiah thei lovin ‘Mafa’ tia a koh ṭhin chu a pu hlen ta a ni. Mafaa hi naupang harhvang leh thuawih thei tak a ni ṭhin a, titi thiam, fiamthu duh tak niin chhungkua leh ṭhenrual tihlim thei tak a ni ṭhin. A tleirawl tirh aṭangin Pathian thu leh rawngbawlna lam pawh a tuipui ve ṭhin hle. ‘Literature tih lovah chuan theology hi ka tuina ber a ni’ tiin amah hian a sawi fo ṭhin. Thuhriltute zuiin rawngbawlte pawhin a feh chhuak ve ṭhin.

Kum 1999 ah Lalrinmawii Colney (Mamawii) nen inneiin fapa pakhat Steven Ramthanmawia an nei a, an fapa hian tunah pawl 12 a zir mek a ni. St. Paul’s high school a kal laiin veng chhung YMA chanchinbu-ah sports columnist a ni ṭhin a. Kum 1993 khan vêng chhung YMA-ina kum puan bawhzui nana ‘Nungcha Humhalh Essay Competition’ a buatsaihah lawmman pakhatna a la a. Kum 1994-a Mizoram pum huap Chapchar Kut essay competition, Art & Culture Department leh Chapchar Kut Celebration Competition ṭangkawpina an buatsaihah lawmman pakhatna a la leh. Young Writers’ Association: Mizoramina kum 1995-a poetry inphuahsiak ram pum huapa a buatsaihah pakhatna a la leh bawk. Heta ṭang hian thu leh hla hi a luhchilh zui ta tak tak a, a hawi kir leh tawh lo.

Zirna lamah Mary Mount School, St. Paul’s High School leh St. Anthony’s College chhuak a ni. A college kal lai hian Sap ṭawng chanchinbu North East Sun, Inspirational Quotes, Jetset magazine velah poetry a chhuah zauh zauh ṭhin a. Shillong MSU chanchinbu Zirlai Aw editor a ni ṭhin. A chhuah hlimah vêng chhung kohhran leh pawl hrang hrang chanchinbu-ah leh souvenir-ah te editor a ni a. Mizoram pum huap pawl hrang hrangah adviser-in a awm nual bawk. All India Radio Aizawl Station-a thu leh hla program-a hun an pek zingah naupang ber a ni chho va, LPS Vision-ah pawh thu leh hla puala an interview hmasak ber a ni. Zonet lama thu leh hla pualah vawi duai lo sawm bika kawm a lo ni tawh bawk. Zoppen Club International (Mizo Poet Playwright Essayist Novelist Club)-ah hian founder secretary a ni a. Hun rei tak chhung, a hun laia chanchinbu tlangtla ber tih theih Sabereka Khuangkaih editor a ni a. Thu leh hla (a bik takin poetry lamah) ṭhangtharte kaiharhtu leh hmahruaitu pawimawh leh langsar tak a ni. A hnuah ZOlife magazine-ah editor leh executive editor nihna a chelh chho va “Vulmawi Writer of the Year Award 2011” te pawh a lo dawng tawh. Sawrkar department hrang hrangte, college, university, kohhran leh khawtlang pawl hrang hrangin thuziak, inhnial fiam leh lemchan, thusawi intihsiak hrang hranga endiktua a hman ṭhin a ni a, hmun hrang hrangah thusawia sawm a hlawh hle. Mizorama television show lar tak tak – Comedian Search, Talent Show leh Look Alike Contest-ah celebrity judge-ah a ṭang tawh. Seminar chi hrang hrang bakah All-India Writers Meet-ah te thlenga resource person-a hman a lo ni tawh. Thuziakmi leh Poet-te inhmuhkhawmna, India ram dung leh vangah a thu leh hla chhiara sawi zau tura sawm ṭhin a ni. Mizoram chhunga higher secondary school leh college leh university thlengin special lecture pe tura sawm a ni fo.

MAFAA KUTCHHUAK LEHKHABUTE

A irawm chhuak lehkhabu panga: Chawlhna Tuikam (1997), Thlaler Aurawl (2008) leh Vaihna Varṭian (2010), Hlim Ni leh Nuih Lai Ni (2011), Hringnun Hrualhrui (2018) a tichhuak tawh a. He’ng a lehkhabute hi a hun lai ṭheuhvah Mizorama lehkhabu hralh kal ber a ni vek a ni. Vaihna Varṭian phei hi chu kum 2 pawh tling lovah vawi 10 dawn chhut nawn a ni a, bu 15,000 vel hralh a ni. A thu leh hla hi Sapṭawng, Assamese leh ṭawng dangtea engemaw zat lehlin a ni tawh. Sapṭawng chanchinbu lamah pawh thu leh hla engemaw zat a chhuah tawh a ni.

A kutkawih ni lo lehkhabu dang buatsaih a nei bawk a. Chu’ngte chu: Thaikawi Palai (1999), Khawithlar (2001), JF-a German Ral Run (2010) te an ni. He’ng a lehkhabuho pawh hi lehkhabu dawra lei tur awm tawh lo vek khawpin a kal a ni. He’ng bakah hian lehkhabu engemaw zatah tha thawhin co-editor angin a lo pui tawh a, Nghilhlohna Par (Selected Songs of PS Chawngthu), JB-a Damlai Sulhnu (Selected Songs & Sketches of JB), leh lehkhabu dangah te. Tunlai thuziakmi zingah chuan mite hriat lar leh thuziak leh thusawi tura sawm hlawh ber pawl a ni awm e. Chanchinbu lama editor nihna a chelh loh hnuah hian a hun tawp thlengin freelance writer a ni. Mizorama chanchinbu lian ber Vanglaini-ah thu leh hla huang changtu a ni.

MAFAA DAM LOH  DAN

Kum 12 (2006 vel) liam ta aṭang khan zunthlum natnain a tibuai ve ṭan a. He natna hian a hun hnuhnung lamah phei chuan a tibuai viau a, hei hian a nerve a khawih bawk nen, ṭhenrual pawh a pawl theih loh phah fo bakah bengvar pawh a chhuah theih loh phah fo. Mafaa hi ṭhian ngaina tak a ni a, fiamthu duh, fiamthu ngaihlu tak a ni. Theology hi a tuina a ni a, pastor te leh theology lama tui te pawh a kawm nasa ṭhin. Bible pawh vawi tam a chhiar chhuak a, naupang te a nih laiin Bible hi tui takin a chhiar ṭhin tawh. Sports lam pawh a tui a, chanchinbua a thuziak hmasate pawh football chanchinte a ni. Rimawi a tui em em bawk a, Mizo hla leh sap hla a tuipui ve ve a, khawvel huapa Kristian hla larte hi a nun khawihtu an ni hlawm. Chutianga tuina hrang hrang nei ni mah se Zoram khawvelin as hriatna ber chu literature hi a ni awm e.

Naupang te a nih lai aṭangin literature hi a tui a, a inhmang hma ta reng bawk a, Pathian malsawmna dawngin mi hriat pawh a hlawh hma a; kum 20 a tlin hmain a thu leh hlate vang hian hriat a hlawh tawh a ni. Chutiang taka thu leh hla lama tui a nih vang chu a ni ngei ang, kum 21 mi a nihin a lehkhabu hmasa ber Chawlhna Tuikam a tichhuak a, mipui ngainat leh lawm pawh a hlawh hle a ni.

Literature-ah hian prose a ziah bakah poetry a phuah bawk a, creative writing lama a inhman bakah criticism lamah a inhmang bawk. English literature-ah a tui a, Mizo literature nen hian amahah chuan an kal kawp tiin a sawi theih awm e. Word play a tuipui a, hei hi a nuam tihzawng a nih bakah literature lama a hmanraw pawimawh pawh a ni awm e. Thu leh hla hmasawnna tura a thawh hlawk em avang hian a awmna Tlangnuam YMA Br pawhin ṭum hnih lai chawimawina a lo pe tawh.

Thu leh hla lama ram pum hriat hlawh a nih hnuah pawh mahni indah lian chi a ni lova, Tlangnuam Br YMA chanchinbu ‘Chhimhleitlang’ editor nih a ṭhulh phah lo. Taitesena Section, Tlangnuam YMA-a Leader ni chung pawhin Section YMA Chanchinbu ‘Taitesena Times’ bul ṭantu a ni.

A zunthlum avang hian tun hnaiah a chak lovin a taptawm hle a, nimin lamah a pum a nawm vak loh thu a sawi a, amah leh a chhungte pawhin ngaihṭhat lohna an nei lem lo. Nizan lamah pawh ngaihṭhat lohna nei lovin an mu a ni. Zing dar 4:30 velah a nu-in a awm dan dik lo deuha a hriat avangin a blood pressure a han en chuan a lo hniam em em mai a, inbawihsawm em em hman pawh awm lovin tukin dar 5:00 vel khan min peih lohsan ta a ni.

 

Mafaa Hauhnar Uina Thu :

*“Mizo hnam tana Mafaa hum luah hi a pawimawhin a hlu em a, kum za hnu-ah pawh a hum luah ang luah zo tur hi Zofate zingah an piang leh tawh kher lo ang. Thlamuangin chawl mawlh rawh se. – Darrokima

*“Zoram hian Mafaa ang hi eng tikah nge a hrin leh ang? Zoram fiamthu khawvel tan pawh channa nasa tak a ni” – Mapuia Hauhnar

*“Thu leh hla lama thawh hlawk tak, Mafaa’n heti maia min kalsan hi chu a miṭhawn a na hle mai. A tel lo chuan thu leh hla khawvel hi a chul ruih mai dawn ni hian a hriat.” – Muansanga

*“Chawimawi phut lo, mahni mimal hlawkna duh a tumah tlawn leh mi mit hmuha mawi bik tumna nei ngai lo, Mizote thu leh hla zahawmna atana dingnghet, i hlutna hi kan la hre dawn chauh si. Thlamuang takin chawl ang che.” – Rotea Chhakchhuak

*“Ka tliak hnawp mai. Van seramfimte u ka thianpa Mafaa chu lo hmuak rawh u aw.” – C. Lalnunchanga.

*“Tukin ka zing tho min lo hmuaktu chanchin chu a va ngaihnawm loh ve le! Thu leh hla arsi lian Mafaa a herliam ta an tih chu! Thu leh hlaa ka ngaihsan em em a ni a. Ṭawng thua harsatna ka neih chuan ka au thuai ṭhin a. Ka kutchhuak nawi te tete hi min hlutpui thiam em em thin asin! Thuruk 90 min fak sakna thumawi em em mai kha ka phone hluiin a chhiatpui ta a. Amah Mafaa nen an thamral hlen dawn ta a nih hi! Mahse amah hriatrengna tur thu dahṭhat ka la nei e, Thank you, Mafaa. Thu leh hlaa kan ram robawm tha berte zinga mi a keh ta a. Keiin ka thian ka chan ta a ni. Sawi tur ka ngah..ka haihchham lawi si.” -Dr C. Lalhrekima

*“Thu leh hla lama tuihal ṭhalaite chhawlhal tireh ṭhintu, Zoram thu leh hla khawvel a englai pawha a kam chhuak kan nghahhlelh, thu leh hla khawvel chawk nungtu leh Zofate zinga hla lehlin thiam berte zinga mi Mafaa tel lova kan thu leh hla khawvel khawhar turzia ka ngaihtuah hian ka ui ngawih ngawih a. A kal mai tur hi ka phal mawlh lo va, amah ngaisangtu ṭhalai tam takte hrilhai tur ka ngaihtuah hian ka hrehawmna ka ngaihtuah chang lo hial a. Engtikah tak a kam chhuak rawn inlar leh ang maw ti a ka lo thlir reng laia hetia a kal thu kan han hria hi a bangbothlak a. Mi hawihhawm, inngaitlawm, thu leh hla khawvela kan tluk loh Mafaa tel lo Mizoram hi a kim dawn ta lo.” -PL Liandinga

*“I thu leh hla thiamna te, i finna leh hriatna zauzia te hi theihngilh a va har dawn em! Mangṭha, Mafa.” -Hmingsanga

*“Pawi zawng zawng zingah hian a pawi ber mai awm mang e aw. Pu Mafaa, i dam reng ang.” -K.T. Pakhuangte

*“Mafa, i thu leh hla kan la chhiar duh asin mawle! I bulah ka hlim a, khawvel hi nuam ka tih nen. Mangṭha i ngai ta si!” -Lalnuntawma Fanai

*“Ṭhangthar zinga kan Mizo literature arsi lian ber a her liam ta mai hi a hmun ruak kalsan a zauvi a va thuk ve le! Ka tana mi hlu a kal ta mai hi ka tliak hnawm, ka ui ngei mai.” –Dr. C. Lalawmpuia Vanchiau

*“Mafaa Hauhnar hian literature hi lo tui lo ta se, vawiina literature a tui Mizo ṭhalaite zingah hian literature-a tui ta lo an awm nualin ka ring. Amah vanga literature tui hi an tamin ka ring a, mi rilruah literature chi a kui ṭiak tih hi ka hmuh dan a ni. Nihna leh chanvo tel lovin literature tan a thawh hlawk em em a, a thawhrah hi kan la hre dawn chauhvin ka ring. Bible a ngaihhlutzia leh theology a tuizia te hi a hrana sawi tham a awm a, Pathian a hria – Pathian khawngaihna a tuipui – hei hian a rilru a khawih ṭhin. Ṭhian kawm a thiam a ni ang; a bulah insum lovin ka duh duh ka sawi thei a, chhungkaw chanchin thlengin a bulah tim lovin ka sawi ngam. Inbun ruah ngamna a ni. A inchhiar zau a, mi hrang hrangin a bulah hian an tuizawng an sawi theiin ka ring. Han inhmuh loh deuh hian a ngaihawm thuai zel a, a ngaihawm dawn chauh a ni. Khawngaihna avangin muangin chawl rawh se.” – Lalhruaitluanga Chawngte

“Zofate mai ni lovin, khawvel mihring zingah, a bik takin Zofate tan, min la kal liamsan lo tura ka duh ber zinga mi a ni. Ka ui tak zet zet a ni.” – Mamuana Y2Goal

*“A thliak lui ta, a hruai lui ta, banah a kai,
A sakruang mawi, a zungze ṭial rial anga dai;
Awmlai lunglian a rawng mang e, kan dang zo lo,
Zoleng kan vai, hrilh kan hai ngei, kan tuar thiam lo.” -Ṭhuamtea Khawlhring

*“‘Inla-Mafaa ber’ nihna ka lo hlawh ve thei kha ka chapopui telh telh dawn a ni.” -Stephen Auhmun

*“Ka hria che, ka hrethiam che, I nun hi ka ni fo ṭhin. Thu hi nun aia lian a lo ni.” – Vanneihtluanga

*“I kal thut thu hian khawvel puma Zofate min va ṭhawngin min va barakhaih nasa tak em! I taksa chu liam mahse, i thu leh hla erawh Zofate zingah a cham reng ang! Hei, nangma pualin, December 30, 2018 Pathianni zan hian USA, Indiana state-ah Mafaa Hauhnar Sunna Inkhawm kan buatsaih a ngai ta tlat a nih hi! – Mizo Youth of Indiana, USA.

LAWMTHU SAWINA

Inrinlawkna awm lova chhiat tawk thut kan nih avang hian chhungkua kan hamhaih hle mai a. Chutih ruala a ṭul ang zawng zawng buaipuitu chhungkhat laina, YMA, Kohhran leh hmun hrang hranga a ṭhiante leh amah suntute chungah lawmthu kan sawi mawlh mawlh a ni. Keini chhung chuan in ṭhatna hi kan rul sêng ngai lo ang tih kan hria a, mahse Hmangaihtu Pathian chuan a lêt tam takin a rul ngei ang che u tih kan ring. In mi hmangihna leh in mi ṭanpuina zawng zawngah lawmthu kan sawi a ni.

(He thuziak hi Mafaa Hauhnar chanchin a vui nia an buatsaih aṭanga lak a ni)

(Mafaa Hauhnar boral ni ni 30. 12. 2018 hian Social Mediaa chu Mafaa uina thuin a khat a tih theih a, whatsapp status ah, facebook story leh status ah, instagram lamah te leh thil dang dangah Mafaa boral thu chu chhiar sen loh hmuh tur a awm)

3 thoughts on “Mafaa Hauhnar (1975 – 2018) chanchin

  1. Pu Mafaa, ka van ui tak che em… Mimal tak in ka sun ache.. Chawlhna Tuikam ah chuan Chatuan atan Thlamuang takin chawl Vang vang tawh ang che… 😓

Leave a Reply

Your email address will not be published. Required fields are marked *