Lusun chhungte pualin – Hla taka khaw dur leh ruahpui sur piah lam saw – Sawizauna – K. Zalawma

HLA TAKA KHAW DUR LEH RUAHPUI SUR PIAH LAMA SAW – Fanny Jane Cros(1820-1915)

-K. Zalawma

Dt. 17.2.2019 khan Thingdawl Pastor Bial Hmeichhe Inkhawmpui, Thi ngdawl Hmarveng Kohhranah an hmang a, Kalasib Vengthar bialtu Pastorin a hmui lai anih avangin Pastor ṭawiawmin ka han tel ve a. Kum 2018 chhunga an member thi 7 lai sûnna hun Chawhnu inkhawmah an nei a. Member thite sûnna ngawi renga dinga kan neih khâr nân inkhawm chairman chuan Bial Inkhawmpui Chairman a sawm a. A ṭawngṭai bul ṭan nan,

“Hla taka khawdur leh ruahpui sur,
Piah lama saw,
Chatuan ĕng ropui tak a lang e…”

a rawn tih chuan ka thin lung a khawih thar ta em em mai a!

He hla phuahtu Fanny Jane Croshi March 24, 1820 khan New York aṭanga mĕl sawmnga chuanga hla, Brewster khuaah a piang a, a pa hming chu John Crosby-a a ni a, a nu hming chu Mercy Crosby-i a ni. In serh hrang pawl (Puritan) zinga mi an ni. Thla ruk leka upa a nih laiin hritlâng leh mit nâ a nei a, daktawr pangngai pawh ni lo, tualchher daktawr an râwn a, ani chuan a mit nâah chuan anṭam densawm tui a thlawr a, a hnawih a, a tuam hnan bawk a, chu chuan a mit hrui (nerve) chu a tichhia a, a mit a chhiat phah ta der a ni. November 1820 khân thla ruk chauh a nih laiin a pa John Croschuan a thih san a, tichuan a nu leh a piin an enkawl sen lian ta a ni.

Heng hmeichhiate pa hnih hi rinna kawnga a nun hruaitu ropui tak an lo ni ta a ni. F.J. Crosby-i hi kum thum mi chauh a nihin North Salem, New York-ah an pĕm a, a mit hi Doctor an en tir a, vanduai thlak takin a mit hrui( nerve) chu a lo chhiat vek tawh avangin tihdam theih a ni tawh lo va, dam chhunga hman theih loh turin a del zui ta a ni.

A nu hian Kristian inenkawl dân dik takin a enkawl a, khaw hrang hranga an pem kualnaah pawh Kohhran bĕl tlat zĕl mi an ni. Bibke chang sei pui puite pawh an zirtirin chungte chu ṭha takin a vawng ṭhin a. Kum 10 a tlin aṭangin Crosby-i hian Bible-a bung nga kar tin a vawng a, kum 15 a tlin meuh chuan Chanchin Ṭha pali leh Mosia lehkha bu panga – Genesis – Deuteronomy te bâkah, Thufingte, Hla Thlankhawmte hi en lovin a vawng tawh a. Sam number tam tak pawh hi en lovin a vawng nghe nghe a ni. Edith L. Blumhofer-a, historian tar tak chuan, “Kristian lungphuma innghat chhungkua” tiin a sawi nghe nghe a ni.

Kum riat mi a nih aṭangin hla chham mi (poem) a ziak ṭan a, a ziah hmasak ber hi ‘Mitdel’ chungchâng a ni. F.J. Crosby-i hian hla 1900 zet a phuah a, a hla aṭanga sum a lak luh zat ve hi mi rethei te tân a pe ṭhin. Mit del chunga a thawh chhuahte retheite tâna ui lo tu Crosby-i hi Pathianin mal a sawm a ni ngei ang, hla rĕng a phuah hnem mai. F.J. Crosby-i hla phuahte hi Kristian Hla Bu-ah hian 31 lai seng luh a ni. (F.J. Crosby-i chanchin kimchang leh ngaihnawm tak hi Kristian Hla Bu Bihchianna V.L. Luaha Renthlei, pp – 11-19-ah chhiar tur a awm e.)

Hla taka khawdur leh ruahpui sur.. tih hla thlûk siamtu chu S.C Foster-a a ni a, a hla thu leh a thlûk siam feltu chu Ira D. Sankey-a a ni. Mizo ṭawnga letlingtu chu Brig. Kawlkhuma (1890-1971) a ni. Brig. Kawlkhuma (Salvation Army) hi November, 1890-ah Lungtian khuaah a piang a, a pa chu Chhimthangvunga a ni. A hla lehlin 5 lai chu Kristian Hka Buah seng luh a ni a, chungte chu –

1. Isu i thianghlim e
2. I sual tam eng ang mah se
3. Lalpa hmangaihtuten
4. Hla taka khawdur leh ruahpui sur

(Brig. Kawlkhuma chanchin ngaihnawm tak hi Kristian Hla Bu Biahchianna V.L.Luaha Renthlei, pp – 270-273-ah. Chhiar tur a awm e.)

F.J. Crosby-i hla tam takah hian vanram ngaihna hla a tel a, a hring nun hman mĕk aṭanga thlirpuiin, piangsual awm tawh lohna Jerusalem thar a ngaiin a thlir tlat tih a hriat theih.

“Lungngaite u lawm ru,
In tân ropuina ni chu a hnai ta e;
Lâwmin i zai ang u,
Kan lal ber kan nghah chu a lo kal dawn e..”

tiin ringtu, lungngaihnain a man mekte a fuih thei a ni.

Hla taka khawdur leh ruahpui sûr
Piah lama saw,
Chatuan ĕng ropui tak a lang e,
A va nuam dáwn ĕm aw!

Thla ruk lek aṭanga khua hmu thei si lovin Hla taka khaw dur leh riahpui sur piaha Chatuan ĕng ropui tak a hmu tlat mai hi, Kristian nu pahnihin Kristian chhungkua an din aṭanga lo sei lian a, kum sawm mi lek a nih aṭanga Bible chang vawng reng mi a nihna rah chhuak a ni ngei mai.

Mit var tam takin kan hmuh loh khawvel tuifinriat fawn leh a piah ram, lusûn mĕkte tâna hlimna tling hmua hla min lo phuah sak hi kan va vannei em!

Crosby-i hian khaw hmu si lovin, luipui leh tuipui fawn hlauhawm te a hmu chiang a, kan rinna nun nen min tehkhin sak a, he leia lungduh ṭhénte tan ṭhèn tawh lohna ram min kawh hmuh hi a thlamuan thlâk a ni.

Sâwta tui fâwn nasa tak piah saw,
Han thlir teh u,
Hmangaihna khawpui mawi tak chanchin,
Ropuizia min hrilh e.

Ni 29.10.2010 khan India chhim tawp Kanniyakumari khawpui aṭangin tuifinriatah lawngin chhim lam panin tuifinriat aṭanga lungpui lo pawng chhuak chunga Swammy Vivekananda Memorial-ah kan va kal a. He lai hi Idia Ocean leh Arabian Sea inrina lai a ni. Khua a ṭha a, ni a sa a, tuifawn (tide) pawh a awm lo. Zosaptharan,
“Ni ṭhenkhat tui mamin khua a thiang fo..” a lo tih, mizoram aṭanga hriatthiam har kan tih ṭhin chu, a dik ngei tih mit ngeiin ka hmu ve ta. Tuipui chu a mam zur mai. Crosby-in, “Sâwta tuifâwn nasa tak…” a tih chu ka hmu ve rih lo.

A tuk ni 30.19.2010 chuan India khawthlang lam Arabian Sea lamah, Kovalam Beach-ah kekawr tĕ chauh hain kan han chĕng ve ngial a. Vaiho ai chuan kan inphelh ruak ngam deuh.

Tlai dar li a lo rik meuh chuan midel F.J. Crosby-i hmuh kha mitvarin ka hmu ve ta. Tuipui chu a rawn fawn nasa tial tial a, sepui tia tiain a rawn in chhawp phei tup tup ta mai a, han chenna ziazâng a ni ta lo. Mahse Crosby-in a hriat bîk – ‘Hmangaihna khawpui mawi tak chanchin Ropui zia minhrilh e..’ a tih hi chu tuifinriat fawn aṭang chuan ka chhar ve mai lo. Crosby-i chuan he kan dam lai tuipui fawn, kan nun min vawrh min vawrha, thihna hial kan tawhna tui fâwn nasa a lo hmu daih mai. Rinna mit neih hi a va pawimawh si em!

‘Sâwta luipui saw unau duhten,_
An kai ta e;
Lalpa ramah kan tâwk khawm leh ang,
Inṭhen a awm tawh lo’ng…’

Kan hmangaih lungduhten chatuan ram min pan san hi, thihna luipui dai kai an ni. Mi ṭhenkhat chu kan chhungten min thihsan hian, an thlarau kalna tur kan thlir pha lo va, an nawmzia tur pawh dâwn chang lovin kan inngaihtuah lunglĕng a, thlanmual lama kal fote kan duh ṭhin. Chhungte thlânah hian hlimna chhar thar aiin lunglèn khawharna mai lo chu chhar chhuah tur a vang duh khawp mai.

Kan ṭhen tâkte khan luipui daikaiin Lalpa ramah taksa thawhlehna ni nghakin Lalpa ĕngah an awm tawh tih i ring tlat ang u. Kan lungduhte khan min ngai lovin –

“Kan lĕng dial dial,
Kan awi Lal Nunnema..” an ti tawh zawk asin.

‘Aw, malsâwm leh lawmna a inhawng,
Aw, ni ropui!
Chutah lungngaih leh mittui zawng zawng,
Isuan a hru fai ang..’

Fanny Jane Crosby-i chuan mitdel chungin Bible a by-heart a, Pathian hla tam tak, mite nun chawmtu a phuah a, a mamawh a thawk chhuak a, mi retheite tan a sum a ui lo va. A nun erawh chuan buai châng a nei ve tho a niang –

‘Aw, sual thim lungnghaih thlâk tak hian chhumpui zîng angin min tuam…’ han tih ve changte pawh a nei ṭhin. Mahse chumi piaha khawvar tur chu chhel takin a nghak tlat a. Khawvel hmun hrang hranga Kristian-ten tun thlenga kan sak nin theih loh hla tam tak phuahtu chuan kum sawmkua pangnga (95) mi niin February ni 12, 1915 khan khawvel a chhuah san ta. Midel, mahni aia retheite hmangaih a, mi dangte retheihna hriatthiampuitu, vawiin thlenga a hla phuah kan sak nin theih lnoh phuahtu chu zaipawlte’n ama hla phuah ngei ‘Isua hnenah ka him a’ tih hla sa chungin Mountain Grove thlan mual, Bridgeport, Connecticut-ah, a lungngaih leh mittui zawng zawng Isuan a hrûk fai sak turin an thlah ta a ni.

He hla aṭang hian khawhar lusûn faten hlimna leh beiseina thar nei ṭheuh turin Lalpan malsawm rawh se.

Tin, Lalpa thlante chu an kir leh ang a,
Hla sa chungin Zion chu an thleng ang a;
Chatuana lâwmna an lu chungah a awm tawh ang.
Hlimna leh lawmna an hmu ang a,
Lungngaihna leh rûmna chu a bo tawh ang.

Leave a Reply

Your email address will not be published. Required fields are marked *

error: Content is protected !!