LEHKHA ZIR ṬHAT

-Lalrammuana Sailo.

Ngaihpawimawh zawng a inang lo a. Nuam tih zawng a dang a, Ngaihsan zawng lah chuti bawk. Thenkhatin lehkha zir thulh thak thaka khawtlang leh kohhran tan a inhman an huam laiin kei erawh chutiang ka ni hauh si lo. Thenkhatin inkhawm zawng zawnga tel kim an tum laiin kei erawh chuan ngaih dan hrang ka lo nei a. Ka thatchhiatna mila ka insiamrem a ngaih avang leh ka taimakna lai tangkai taka ka hman chhuah theih nan chutiang ngaih dan chu ka vawn nun tlat tul ve hian ka hre thin.

Lehkha zir tur a chhungte chawm ka ni:

Tunah chuan zirlai, ni tin a sikul kal a  chhuak thin ka ni a. Chumi ti thei tur chuan chhungten min chawm a. Zirna chu ka kuta a tlak miau avangin kei chu lehkha zir tur ka ni. Lehkah zir chu ka mawhphurhna a nih tawh avangin zir loa ka awm chuan mawhphurhna hlen zo lo ka lo ni ang. Kawng danga sawi chuan ‘mi rin tlak loh’ ka lo ni. Zirlai ka nih chuan lehkha zir chu ka dah pawimawh hle turah ka ngai a. Thenkhat chuan inkhawmte chu Pathian rawngbawlna a ni a, kan dah pawimawh tur alawm an ti ṭhin, mahse kei chuan an zirlai an tih thiam loh phahna khawpa zan chhuah leh inkhawm tam chu tha ka ti leh chuang miah lo. A zirlaiah mah thahnem ngaia taimak chhuah nachang a hriat loh chuan thil dang pawh ti se rah chhuah khawp a thawh chu atan a harsa ang. Chutih laiin inkhawm peih em em mai, an zirlai pawh thlahthlam chuang lo an awm, chung mi te chu chawimawi tlak an ni.

Naupang chu high school a zawh hma chu thalai inkhawm leh thiltih-ah a nazawngin a tel a tul rih loin ka hria. Ṭhalaiah chuan zan inkhawm a lo awm a, thil dang tih neuh neuh a lo tam a. Inkhawm peih leh fel deuh te chu mawhphurhna nei atan an lo itawm a. Tichuan lehkhazir hun a lo tlem tial tial a. Mi taima fal tan lo chuan zirlaiah hlawhtlin a lo har thin.

Ṭhenkhatin inkhawm ngai lote ai chuan kawng khatin Pathian kan hnaih zawk an ti thin. Lehkha zir thinte pawh kawng dangin Pathian an hnaih ni hian ka hre ve thin. Pakhatnaah chuan a mawhphurhna a hlen avangin mi rin tlak leh rinawm a ni a. Thil dang pawh ti se a taima tho ang. Pahnihnaah chuan khawtlang tan a thiamnna leh finnate a hmang thei ang a, mi dangte tana malsawmna zau zawkin a hawnsak thei ang. Pathumnaah chuan a zir thiamna chuan hnathawk tlakah a siam lian thin a. Eizawnna tha a pe a. Kohhran tan pawh chhawr nahawm tak a la ni zawk thei thin a, nasa zawk a tangkai thei mi a lo ni thin. Hetah hian ka sawi tum ber mi thenkhatten a kan ngaihtuah fuh thin loh ni a ka hriat chu a awm.

Tuna zir hian kan hmalam hun a hril tih hi kan ngaihtuah tel lo emaw ni chu aw ka ti fo thin. Tuna zir that hian eizawnna tha min siam  a, tuna  zir that hi hna tha hmuhna a ni a. Chhungkaw din turin kawngkhatin kan inpeih tihna a ni. Kutdawh zahawm an awm ngai lo. A hunlai a kan zir that peih loh avangin hna thawh mai tur a lo vang a. Chhungte leh hmel hriat thil tih theihna hmang a Sorkara dik lo taka inthun  a lo ngai a. A tling leh thiam zawkte khumin mi dangte rilru na leh beidawngin kan siam a, chu chu a Pathian thu lo hle a ni. Kei chuan chutiang thil ti chu ka ngai nep ang. Corruption nasa tak a ni si a.

Leave a Reply

Your email address will not be published. Required fields are marked *

error: Content is protected !!