Lalzuithanga Thlahrang thawnthu summary

Mizoram Images Production

Thlahrang’ thawnthu hi a setting chu British-in Mizoram an awp hneh dan leh Mizo lal ten thu an neih tawh loh dan ngaihtuahin Second World War aṭangin a hla lutuk lo ang. Aizawl khuaah a thawnthu a innghat ber a, Sairang leh Tlawng lui leh ram vel a lang zeuh zeuh bawk a. He thawnthu hian a inṭan aṭangin ni sawm leh paruk chhunga thil thleng a tarlang a. Thlahrang nia an hriat an buaipui thu a ni ber.

Thawhleh zan chuan Chawii, Lalpiangi leh Ralkapi te chuan mumang inang tlang tak neiin an mumangah chuan Tawia nen thil an lo ti dun ṭheuh a, harsatna eng emaw tak an tawk ṭheuh bawk a. Chumi zan vek zing lamah chuan Tawia chuan hmeichhe thlaphang leh thlabar au thawm a hre bawk a. Nilaini chuan khua chu a ṭhat loh avangin Tawia chuan feh ṭhulhin a thing kih hual kit turin a chhuak ta zawk a. A thing kih thluk a han en chiang vel chu a hnuaiah chuan hmeichhe pakhat hi a lo let reng mai a, Tawia chuan a thi ni ngeiin a hria a. Zualko turin khaw lamah a kal ta a. Mi tlawmngai leh khawtlang hruaitute, sawrkar lam hotu Dahrawk leh Police te, Doctor te leh Lushai Clerk te nen chuan Tawian thing a kihna lam chu an pan a. Mahse a hmun an thlen chuan hmeichhe ruang chu hmuh tur awm loin a lo bo daih mai a. An zawn chiam hnuah pawh an hmu zo ta mai lova. A tuk lama zawn ṭhat leh turin an rawt a.

Ningani a ni a, Tawia, Dara leh Thanchhunga te chuan a hran deuhin an han zawng a, Tawia chuan nula chu a hmu fuh a, a ṭhiante pahnih hnenah chuan nula chu a hmuh thu a han hrilh a. Mahse a ṭhiante pahnihin Tawia an va hmuh chuan Tawia chu a kut hnungkhirh leh a hmai chu nula scarft a tuamin an va hmu a. Nula erawh chu an hmu ta lo a.

Zirtawpni chuan Sairang suar thlangah nula tui thlahlum an chhar a, Tawia nula hmuh chu a nih ngei an rin avangin hemi nia nula zawn an tum pawh chu an ṭhulh a, mahse nula chu an han postmortem chuan tui tla ni loin reh hlum a ni a. A thihna a rei tawh deuh avangin Tawia nula hmuh kha chu ni theiin an hre lo deuh a. Zanah chuan Tawia chuan mumang a nei a, a mumangah chuan “Aw Tawia min chhan ta che, chhan ka ngai” (17) tia lo ko lawm lawm hian a hmu a.

Inrinni chuan Tawia chuan a mumang lama amah autu nula chu zawng turin luipui lam chu a pan a. Zan tlai tak thlengin Tawia chu a lo la haw lo a. Chhunga, Dara leh Ṭhiauva te chuan a rukin an zawng a. A tuk Chawlhni chuan Val Upa Zahlira hoin tlangvalho chu an thawkchhuak ve leh bawk a. Chhun lai velah chuan Tawia chuan ramhuai emaw phung tia zet tur putar chu a kap hlum ni ngeiin a inhria a, chu putarin a hruai nula Parmawii pawh chu a chhanchhuak ta bawk a. Tichuan, silai ri hriain amah zawngtu a ṭhiante pawh chuan an rawn pawh zui ve ta nghal a.

Thawhṭanni chuan Kawla chuan Tawia a sawm a, Parmawii chanchin chu an va ngaihven a. Parmawii chuan a nau nena an chanchin leh a nauin misual kut tuara a boral dan leh Tawian a va hmuh hnua misualin a kal bopui leh theih dan te chu a sawi a. Chutih laiin Parmawii ru botu Tawian a kah hlum tak ruang, inzaina pindana an dah chu a bo daih mai a.

Thawnṭan zan chuan thlahrang nia an hriat chu a che leh a, Ringi leh Thanchhunga nu ten thlahrang chu an hmu a. Nikhaw hre loin an awm phah ve ve a. Thawhlehni a lo nih chuan Sapte, Doctor leh Dahrawk te chuan Ringi leh Thanchhunga nu te thil tawn chu an ngaithla a, chumi ni vek chuan Bawngtawlailir pu Thawnga chu zan lamah thlahrang ni ngeia an hriat chuan a bawng khalh a tihbuai avangin a kut chu a tihliam a,  damdawiinah a lo kal ve leh a. Mite chuan thlahrang chet dan chu mak an tiin an hlau em em ṭheuh a.

Sunday a ni a, inkhawm ban vanglai chuan Tawia chu kawl bun chungin Police-in Thana lam panin an hruai a, chu chu mi tam takin an lo hmu a, a ngaihna an hre lo em em a. Tawia pa pawh chuan ‘Thlahrang a hmuh ṭhin vang’ niin a ngai a. Kawla chuan Dahrawk hnenah thil awmzia a zawtfiah a, Dahrawk chuan Tawia chu thlahrang nia an hriat kap hlumtu a nih avangin sawrkar dan ang chuan tualthat a nih thu leh chumi avanga man an nih thute a hrilh a. Kawla chuan Dahrawk hnenah chuan Tawia chu chhan tum viau mahse Dahrawk chuan Kawla thu chu a pawmsak ta lo a ni. Nilaini chuan Bawrhsap chuan Tawia chu tualthattu a nih avangin Syhlet Jail-ah kum 10 tang turin a chungthu a relsak ta a, chumi zan chuan Aizawl khaw lai dungah Thlahrang ni ngeia an hriat chu sakawr chunga chuangin a tlan kual a, Tawia pawh a va tih ṭhaih a.

Nilaini a lo nih chuan zan lama thlahrang chet leh tak dan leh Tawia pawh a rum ṭhaih dan chu Dahrawk chuan a hria a, thil awm dan sawipui turin Kawla chu va koh an tum a. Amaherawhchu Kawla chu a chenna inah chuan a lo inawkhlum a, lehkha a hnutchhiah bawk a. Thlahrang anga a chet dan leh a chet chhan te, a tum loh takah thil tihsual nei lo Tawian a tuar phah dante, miten ram leh hnam an hmangaih em em laia a niin midangte tibuai zawnga a lo khawsa chu a inthiam theih loh thute, khaihlum tlak leh khaihlum tur ni ngeiin amah leh amah ro a inrelsak thute a ziak a. Thil awmdan zawng zawng an hriatchian hnu chuan Tawia pawh chu an chhuah leh ta a ni.

Leave a Reply

Your email address will not be published. Required fields are marked *