Lalzuahliana hla kalhmang leh ziarang thlirna – F. Lalzuithanga

LALZUAHLIANA HLA KALHMANG LEH ZIARANG THLIRNA
(Critical  Analysis of  of Lalzuahliana Poetry)

-F. Lalzuithanga
Asst. Professor
Govt. Aizawl North College

1.1. A Kamkeuna:

Lalzuahliana poetry  phuah hrang hrangte a hlanga dahkhawmna bu Lungmawl Selin  tih lehkhabua thuhmahruai ziahsaktu P.L.Liandinga’n “Omar  Khayyam te, Kahili Gibran te, John Lennon te leh Pu Vawmphunga te angin he lehkhabu {Lalzuahliana poetry-ho a sawina}  hi mite thinlungah a dam rei lo mai thei,”(iii) tia a ziaktu hmaizah vanga a mitmei pawh veng buai duh chuang lo va a lo ‘thlasik mau puah pui’ phawng laiin chu lehkhabu chhunga Lalzuahliana hla chi hrang 60 zette ngun taka a zir a, a belh chian hnuah  Laltluangliana Khiangte thung chuan  “A hlutna hre tan chuan rangkachak ṭhi aiin a thlanawm zawk hial ang,” (Zalenpar. 352) tiin  a tlang a kawmsak ve thung a. Chuvangin, a tu sawi hi nge awih tur ni a dik zawk ang; pakhat a dik a, pakhat a thiam a ni mai em,  tihte chu hunin a la rawn hrilin a la tichiang chho zel  turah ngai ila.  Lalzuahliana hlate hi eng vanga mite thinlunga damrei lo tura thuhmahruai ziaktu hian ngai mai nge a nih tih leh eng lam hawi nge a nih reng reng a, Laltluangliana Khiangte hian eng vanga rangkachak ṭhi aiin thlanawm zawk ang ti ve leh thung si nge a ni tihte leh eng anga hlu nge ni reng a, engtin nge a hlutna chu kan hriat  theih tak ang tihte hi kan theih leh thiam tawkin keimahni ngeiin hmuh chhuah ngei tumin i  lo thlir ve dawn teh ang .

1.2  Poetry phuahtu Lalzuahliana:

Lalzuahliana hian Poetry 150 chuang (Thlifim. 23) phuah tawhin a poetry dahkhawmna bu hnih Lungmawl Selin (1992) leh Saruak Hlimthla (1997) bakah hian Thukna Pawnlang (2002) te, A Nikhatna Chu: Kawhterenga (2005) tihah poetry, thawnthu tawi leh lemchan (drama) kan hmu a. A kutchhuak bu hnuhnung ber, Putar leh Khuai: Mihring A Nui A (2013?) tihah phei chuan thutluang (prose) leh hlathu (poem) inkalthelh (parallel)-in a ziak nghe nghe a ni.

[adToAppearHere]

A kut chhuak dangte hi chu dah ṭhain tun ṭumah chuan Lalzuahliana ti-zuahlian-tu ber leh Zofaten kan hmelhriat ṭanna ni bawk, a poetry hlang dahkhawmna Lungmawl Selin tih bua a poetry 60 kan hmuh theih aṭang hian tu nge a nih tih leh a poetry-te hi eng ang nge a nih a, eng lam hawi nge ni a, eng sitail  nge a hman ṭhin tih leh eng huanga khung tur nge anih tihte hmuh chhuah kan tum mai dawn a ni.

1.3  Hriat Thiam Har Poetry:

P.L.Liandinga’n “He lehkhabu chhunga thute hi ka hre thiam vek bik awzawng lo. A phuahtu tan chauh lo chuan fiah ngai lo kumkhua tur a awm ṭeuh mai” (Lungmawl Selin, iii) tia Lalzuahliana poetry-te hriat thiam a harzia a sawi chu Lalremliana chuan a hla pakhat a thlirnaah a hmuh dan rawn sawi chhunzawmin “Hei hi a pawi hle a, hriat thiam awlsam deuh hlekin phuah sela, a hlu zawkin mi thinlung  a hneh hnem zawk ngei ang,”  ( Nawmchenna Hrehawm, 37) tiin.

Nimahsela, C.Lalawmpuia Vanchiau thung chuan, “Zuahliana hming chherna pakhat chu a kut chhuak ‘a har’ tihah a ni,” (Zolife. 44) tiin a ‘harna’ lai tak  chu a hming chherna a nih thu a rawn sawi ve thung.  A poetry  zirchiangtu Laltluangliana Khiangte pawhin “A tuipui chi tan pawh Lalzuahliana hlate hi  vawi khat chhiara hriat thiam mai har tak a ni…chhiar nawn fo pawha chiang zo chuang lo turte pawh a awm… chiang nghal kulh erawh duhthusam a ni e tihna a ni lo,” (Zalenpar, 348) a lo ti ve bawk. Ni e, a chhiartute tana hriatthiam awlsam ringawt turin ziak  sela Lalzuahliana hi ‘Zuahliana’ a ni ngai dawn si lo va.  “Mizo chhamhla a nih vanga minit tina hriat thiam nghal kuar kuar a ṭulna pawh kei chuan ka hre lo,” (349) tia Lalltluangliana Khiangte sawi hi a  pawmawm viau a ni. Chuvangin, Joseph L. Ralte chuan, “…vawi thum i chhiarna chiahah  i man thiam ṭan ang,”(Zolife, 44) tiin chhiar nawn chhiar nawn turin min chah reng  a ni.

Mizo literature-in a thlen chinah, poetry bikah ngat phei chuan Lalzuahliana poetry hi “a tawh khirh pawl” ber, hriatthiam harsa ber ni mah se, C.Lalawmpuia Vanchiau vek hian, “ A hla ‘har’ kan tih  zual hi Pathian thu leh Kristian nun nena hmer pawlhin hriat fiah a sam ang reng,” (44)  tiin a ‘har lohna’ lai leh ‘hriatthiam a awlsam dan’ min hrilh leh rauh si a. Ama ṭawngkam vek hawhin chu erawh a poetry kan chhiara kan zir laiin ‘min thununtu a hman chuan loh a ṭha’. A pawimawh ber chu ‘keimahni ṭheuha kan hriat fiah thiam dan’ kha anih avangin. A chhan pawh eng dang ni lovin hriatthiam a ‘harna’ lai tak zawk kha P.L.Liandinga sawi angin Lalzuahliana thu leh hla, a poetry  “lairil” (Lungmawl Selin, iii) lai tak chu a ni zawk si a.

[adToAppearHere]
2.Lalzuahliana leh ‘Modern Poetry’:

L.Keivom khan Lalzuahliana  chungchangah “ Mi ril leh ziaktu dangdai” a ni tiin a poetry chungchangah pawh “ Kan Mizo category pangngai piah lama ding a ni a, kan tehfunga teh chi pawh a ni lo,” (Zolife, 44) a lo ti daih tawh a. Chutiang deuh bawkin Laltluangliana Khiangte pawhin a hla chungchangah “Hnampui zawkte thu leh hla ang thovin Mizo hlahril pawhin zei dang eng emaw a nei ve tawh tih hriat nan pawh a ṭha,” (Zalenpar, 349) a lo ti ve leh chiah bawk.

Kan Mizo poetry ‘category’ pangngai leh a ‘tehfung’ chu eng nge ni tih lam chu kan sawi hman lovah innngai ila. Kan Mizo poetry huanga ‘zei dang eng emaw’ Zuahliana poetry avanga kan neih ve tak,  tun hma lama a hmelhmang leh a rim a ra pawh kan la hmelhriat ngai loh leh hmuh ngai loh, kan  thu leh hlaa hmun la chang ngai lo leh a ṭhen phei chuan awm ve turah pawh an ngaih loh hial, amah Lalzuahliana’n a rawn thlen/awmtir (introduce) hnuah pawh mi tam tak chuan “hetiang hi hla  pawh a ni lo ve” an lo la tihsak hial, kan thu hla huang chhunga a lo tel ve hnu pawha mi ṭhenkhatten khaw dang sial hmuha kan la hmuh (luih) tlat mai ‘thil’ chu a ni ‘Mizo poetry category pangngai piah lam’ leh ‘zei dang eng emaw kan neih ve tak’ chu ni.. Chu chu eng dang ni lovin ‘Modern Poetry’ hi a ni. Eng vang chuan maw?  E le, amah Lalzuahliana hi “Modern poet (a changin postmodern) ni miau hek,” (Zolife, 44). Amaherawhchu, C.Lalawmpuia Vanchiau  thukhawchang hi hre reng ila:

Modern Poetry kan sawi hi Zikpuii pa-in Zosapthara thlavang hauh a tum luattukna lama mawng sawh dawta a tawlhthlukna, ’Zosapthara  Hla’ thusepa ‘Modern poetry’ leh ‘modern literature’ a tih ve ngawt nen angkhata ngaih loh a ṭha…Zosapthara chanvo tivawng tura “Modern” a hmatheh hi zik bul tak, literary tradition-a ‘Modern’ nen inkungkaihna pakhat mah nei lo a ni. Zuahliana ‘modern poetry’ erawh T.S.Eliot teho boruaka lo irhchhuak ‘Modern’ nen a inthlunzawm chiat; an hun ṭhut a thuhmun lo tih chauh a ni.

Eliot-a “fragmented, modern poem” an tih, ‘The Waste Land’ thupui ken leh a hlimthla te Zuahliana hla ṭhenkhatah a inphum…‘The Waste Land’ kuahkhawmtu chu a thupui leh chang thlan, Zuahliana hla lailum luahtu ‘theme of despair’-ah a ni. Eliot nen kalphung inang kan hmuh chu-

            *Beisei tur awm lo beisei beidawnthlakzia

            *Mumal nei lo va thlarau chawlhna an zawn dan

            *Tawp-in-tai awm lo va ‘hmuh tur’ hmuh tuma an zawn dan.

                                                                                                (44-45).

3.Tehfung Thar Nen Zuahliana Poetry:

 ‘Tehfung thar’ han tih hian Mizo Poetry huang bika Lalzuahliana poetry chungchang kan thlir avangin ‘Thlirna thar’ tihna ang deuh a ni mai a. Hnampuite thu leh hlaah erawh ‘a thar’ ni tawh lovin a taka an hman leh an thu leh hlaa an kalpui daih tawh zawk a ni. Chu chu Mizo poetry-ah erawh ‘chin dan thar leh thlir dan thar, thil thar’ a nih miau avangin Modern poetry hi Lalzuahliana’n Mizo literature chhungah poetry-a bung thar, phek thar min rawn kaipuina chiah chu a ni. A hawi lam te, a ziah dan te,  a thupui leh a sawi chhuah dan hmangahte reng reng pawh ‘thil thar’ anih avangin kan ‘tehfung pangngai’ neih sa mai kha chuan Zuahliana poetry-te hi teh chhuah rual a ni tawh lo reng a ni.

Chuvangin, ‘Tehfung thar’ chi hrang hrang, a awm ang leh inhmeh ber nia langte hmangin Lalzuahliana poetry chungchang, a kalhmang leh ziarang te, a thukphum leh a ‘hawlphum’ thlengin  kan hriat chian lehzual theih nan tawi te tein a ‘khuhhawnna’ ang chauhvin i lo ‘teh’ dawn teh ang. (Heng ‘tehfung’ hmang leh ‘tehfung dang’ kan tarlan lem loh hmangte pawhin chipchiar zawk, zau zawk leh thuk zawka Lalzuahliana poetry hi zir chian a, luhchilh theih a ni a; mahse, tun ṭumah bik chuan ṭhet darh lutuk lovin a ‘fun funa’ thehthlak phawt hi kan tum chu a ni).

3.1. Modernism hmangin:

Indopui Pakhatna 1914 hnu aṭanga literature khawvelin a hmelhriat ṭan (A Glossary. 105), ‘Modernism’ kan tih tak hring chhuaktu ber pakhat  “traditional literary style pangngai pitpet duhkhawp lohna” (Zolife, July. 37) hi Lalzuahliana poetry hring chhuaktu ber a ni pawh ti ve ila kan sawi sual tam lo vang. Kan Mizo Poetry-a ‘traditional sitail’- hla thu luang no hlip hlep, ‘romei zam anga chiang lo riai leh lung tileng’ (kawng danga sawi chuan ‘Mizote romanticism’ rawngkai) lam chi chu  hmang  ve tho mah se, a poetry tam ber kan enin thu pangngai remkhawm (prosaic verse) hmanga poetry phuah hi a chin dan lar zawk chu a ni. Hla thu un pui pui ni si lo va hriatthiam har tak tak ni lawi si, thu inkawlkalh tak tak (paradox or contrated ideas) nunna leh thihna, eng leh thim, hlim leh ṭap, thluak leh tisa, adt. ang chi hi kan hmu tam hle bawk. A hla thu hman tlanglawn ve deuhte pawh thu pangngai a letlinga sawina (e.g. mihring-hringmi, nula-lanu, arsi-siar, adt.) ang chi a ni a. Ṭhenkhatah hla thu ṭawngkam chherchawp, mak sak tak tak leh awm ang lo tak, midangin an hmanpui ve tur pawh ni lem lo (dawntuai thluak,chhiarkhuan zai, tangka chum, Gehen chawnban, adt.) a hmang ṭeuh thung. A ṭhenah phei chuan hla thu pawh a ni em em tawh lo vang e tih tur khawp (uak tuar tuar, aw tham ṭiau, hru mial mial, bei fan fan, seh vawt vawt, adt) thlengin a hmang bawk.

[adToAppearHere]

Lalzuahliana hi Modernist poet niin a poetry pawh Modern poetry anih miau avangin a hla thu inremkhawm dan awmze nei emaw, tlar tawp ri inmil (rhyme) kan tihte emaw aiin “a ṭawngkam inremkhawm dan hi Modernist-te ngaih pawimawh zawk chu a ni” (Tapchhak Theory, 91) miau si a. Chuvangin, poetry phuah tura ziah loh dan awm sa pakhat- “Poetry ziak/phuah/siam turin eng inawpna leh khuahkhirh dan mahin poet duhdan leh khawtthlir a dang thei lo,” (91)- tih hi Lalzuahliana hian a takin a kalpui a, ‘tur a ni’ tih dan awm sa zawng zawng ṭhiatin ama duhdan leh ngaihdanin a phuah chhuak a, a remkhawm a, chu chu a poetry kalhmang leh ziarang langsar ber pawh a ni ta reng a ni.

Modernist-te chindan (style or characteristic) langsar tak pakhat chu thu kimchang lo/chhumbung deuh ruma hmanga thuziah leh hla phuah (‘fragmented form’) a ni a. Lalzuahliana poetry-ah pawh chu chu kan hmu thei a, ani kalpui dan langsar tak chu a hma thua a sawi leh a dawta a sawi inzawmna nei lo ang maia ngaihtheih tura thil hrang hrang a chawmpawlh emaw tih mai tura a ziak ṭhin hi a ni. Entir nan- “Lemchan a tawp, taknaah hlimna/ Leia, thlivira awm kan ni/Kan dinnate pheh a ni ta/ Boruakah tawrhna an phul/Hunah ṭanna” (Lungmawl Selin, 16, 70, 72)

Modernism-in a kalpui langsar tak ‘mahni tel vena’ leh mahni leh mahni inpuanchhuahna (subjectivity) kan tih ang chi hi Lalzuahliana  poetry zepui ber a ni a. A puan chhuah dan (expression) pawh a thil hmuh leh hriat, ama nun leh khawtlang nunah te, a hualveltu thil chi hrang avanga ‘lungawi lohna emaw duhkhawp lohna’ (lamented) lam hawi a ni. Modernist ṭhenkhat anga ‘thil hlui leh tihdan hlui, hun hlui kal liam’ tur uia auhna, ngaihna leh lunglenna lam ai mahin ‘nunhlui ngaihna, khawharna leh lunglenna (nostalgia) zawk niin a lang. C.Lalawmpuia Vanchiau pawhin, “Zuahliana hi nun hlui ngaihna leh lunglenna lamah pawh a kur ve zet mai,” (Zolife, 45) a lo ti ve chiah bawk.

3.2 Postmodernism Hmangin:

“Modernist thurin leh an thlir dan awmsa vaw  ṭhiat a, a ep zawng zela an thuthlung kalh a, a letling zawng ngata thlir dan thar lo chhuak chu Postmodernism a ni,” (Zolife, 56) tia C.Lalawmpuia Vanchiau hrilhfiahna hi  hmeichhe inchei thiam tak ang maia pawimawh lai fun kim si, tawi tek tawk tak si a ni hawt e!

Lalzuahliana poetry tam zawkah hian ngaihtuah zui rauh rauh ngaia tihtawp (open-ending) leh a sawi tum thup bo chiah si lo, fiah lo leh chiang lo riai si (obscure/uncertainty)-a thil tarlan a  thiam hle a. Hei hi Postmodernist-te thil kalpui dan chiah chu a ni a. Chu chu ‘theme of despair’ ti a, C.Lalawmpuia Vanchiau-in T.S.Eliot-a leh Lalzuahliana hla inanna  khaikhina a sawi- ‘beisei tur awm lo beisei, mumal nei lo leh tawp-in-tai awm lo va chawlhna zawng leh hmuh tur awm lo hmuh tum’ nen pawh khan chhulkhat kual an ni.

Lalzuahliana hian a poetry-ah hian “Postmodernist sukthlek dan zuiin rhyme scheme  leh traditional metre a uar lo hle a, ṭul a ti ber lo pawh a ni mahna,” (Tapchhak Theory. 89). Chuvangin, a hlate hi ‘rhyme scheme’ a mawi em, a  ‘metre’ a dikin eng nge a hman tih  ang zawnga chhuta teh ve theih a ni lo va; chutiang turin a phuahtu hian a siam lo hrim hrim zawk a ni. Chu mai ni lovin ‘Formless’ a ni bawk. A poetry hrang hrangah hian eng ‘stanza form’ mah zui a nei lo va; a ṭhen sei tak tak niin a ṭhente chu tlar li lekte a ni a. Chang khatta tlar awm zat te, a dawta chang leh tlar awm zatte pawh a in ang ngai lo va; a thumal hman zat pawh a inang ngai hek lo. Chuvangin, a poetry-te hi ‘hetiang zawnga teh’ ve chi a ni lo.

Postmodernism ‘tehfung’ hmanga Lalzuahliana poetry kan ‘teh’ hian thil pawimawh ber leh kan ngaih pawimawh ber tur tur nia lang chu- ‘author kut aṭanga authority chhuh sak a; miin text a hriattthiam (duh) dan te, chuta ṭanga a rilru puakchhuakte dah pawimawh em em zawk’ (Zolife, June. 40) hi a ni. |awngkam danga kan sawi chuan “Mahni hriat thiam dan a pawimawh ber” tih kha a ni mai.

A ziaktu/phuahtu Lalzuahliana chuan eng pawh ziakin eng lam hawi pawh ziak ang hmiang; thu biru tak tak leh kawlkalh tak tak te, chhumbung deuh leh kimchang lo tak te, thil hrang hrang hampawlha   chawmpawlh, ‘chawm bawka hawp bawk’ tih ang maiin a sawi tum chiang lo leh fiah lo tak te, biru tak leh khirhkhan tak takte pawhin a poetry chu ziak chhuak mah sela; vawi khat chhiar maia bo nghal ram ram theihna, chhiar nawn chhiar nawn hnu pawha ‘Eng nge a sawi ang aw?’ tia ngaihtuah zui vawng vawng la ngai pawhin ziak chhuak mah sela, a pawimawh ber zawk chu ‘Nangma hriatthiam dan’ leh ‘Nangma hrilhfiahna zawk’ kha a ni. Chu chu a ni, Lalzuahliana postmodernist nihtirtu leh a hlate pawh modern mai ni lo va, a changa  postmodern poetry hial nihtirtu zawk chu! A awm sa ṭhiah darh hmasak vek a, remkhawm leh (deconstruction) phalsak kan ni miau a lawm.

Chuvangin, ‘mahni hriat thiam dan a pawimawh ber’ tih hi Postmodern zepui anih angin chu chu amah (Lalzuahliana) ngei pawh hian a poetry phuahah hian langtlang takin lantir ve mai a ni. ‘Mite hriat thiampui loh poetry phuah’ pawh phalsak a ni tih a inhre chiang a, mi hriat thiam tur leh tuipui zawng chauhva phuah lovin ama hriatthiam tur chauh pawhin a phuah thei a. ‘Ama hriat thiam dan a dah pawimawh ve ber’ thei tho a ni (Tapchhak theory, 91). Miin an hlimpui leh an hriatthiam tur ngawt zawng ni se, a poetry tam tak hi hetiang hian a ziak chhuak bik hauh lo vang. Chuvangin, a ziaktu (Lalzuahliana) pawhin ‘ama hriatthiam tur’ ang zawng chauhvin a ziak thei a; a chhiartute pawhin ‘keimahni hriatthiam ve dan’ (own interpretation/re-reading/re-interpretation) kha a hla kan zira kan chhiarin  kan dah lal ve ber thei tho tih i hre reng ang u.

3.3 Objective Co-relative Hmangin:

T.S.Eliot-a theory pakhat ‘Objective Co-relative’ (Three Essays. 29) awmzia chu mawlmang taka kan sawi dawn chuan ‘thil kan sawi duh tihfiah nana thil dang hman’ tihna a ni a. Cleanth Brooke chuan “Thil hlawmkhat hmehbelna (organic metaphor)” a tihsak laiin Elises Vevas thung chuan “ Hla phuahtu thinlung chhungrila a vei thil puan chhuahna tura hmanrua/lirthei,” tiin a sawi thung (Literature Lamtluang. 315).

T.S. Eliot chuan he a theory hi “Hamlet leh a Buaina” (Hamlet and his Problems) chungchang sawifiah nan a hmang a (Three Essays, 29). Hamleta’n a rilru chhungrila a vei, amah hnawh ut uttu, sawi chhuah a chak, mahse, a ruh langa a sawi lan/chhuah ngam si loh avangin a chetziaah a lang chhuak a, a ṭhen tan chuan ‘Mi ^’ anga ngaihtheihin a khawsa ta anih kha!

Lalzuahliana poetry sawifiah nan pawh he ‘Objective Corelative’ kan hmanna chhan chu, amah Lalzuahliana hian a thinlung chhungrilah engemaw tak vei ruk a neiin chung thilte chu a ruh lang han sawi lan kilhkelh a duh lo emaw, a ngam lo emaw a ni thei a. A suangtuahna leh a thil vei zawng, a rilru luahtu- a chhe lam a ṭha lamin- leh mihring nun mai piah lamah a thil hmuh leh hriat aṭanga a thinlung dengtu leh kamtu awm thil chi hrang hrangte chu a poetry-ah hian pehhel tak leh a chang chuan miten a sawi tum an hriat mai theih loh nana biru tak, fiah lo leh chiang lo takin a puang chhuak a ni thei. Chuvangin, chutiang zawnga kan thlirsak chuan a poetry hrang hrangte hi a thinlung chhungrila a vei thil hrang hrang puan chhuahna leh sawi chhuahna atana thil dang sawi ang leh thil dang daih hman (metaphor/symbol anga ngaih theih ve tho) hi a hla phuah dan kalhmang leh ziarang chu a ni thei ang. ‘Nunna leh Thihna’ a sawi dan te, ‘Thim leh Eng’ a tarlan dan te, ‘Beiseina leh Beidawnna’ a tih te,  a ‘Suangtuahna khawvel leh a Tak ram’ a sawi chhuah dan zawng zawngte hi ‘Objective Correlative’ a hman dan chu a ni. Chuvangin, ‘objective corelative’ theory hmang hian a poetry hi zirin chik ila, en ta ila chu a sawi tum leh a sawi duh te, a thuchah leh a thufunte hi a fiahin a a ṭhenah phei chuan a chiang lehzual thei a ni. Hetiang zawnga han thlira fiah ta kuar leh a ni ni thei mai ang a, han tih tur hi a poetry hrang hrangah hmuh tur a awm nual reng a ni.

[adToAppearHere]

‘Objective Corelative’ kan sawi rual hian, Lalzuahliana poetry-a kan hmuh leh a poetry ‘kalhmang leh ziarang pakhat’ anga sawi ve theih tho bawk awm thei ‘Metaphysical conceit’ nen ngaihfin/ngaihpawlh loh erawh a ṭha. ‘Metaphysical Conceit’ chu thil in ang lo tak pahnih (dissimilar thing) hmanga khaikhinna leh thil sawi chhuahna a ni a. ‘The Pulley’ tih poem-ah pawh ‘Pulley’ leh Pathianin mihringte min hnuh hnaih nan a thil hman, inang lo tak chu a rawn khaikhin a nil eh TS.Eliot pawhin tlai lam (evening) leh damlo hnukchat tep dawhkana mu a rawn khaikhin daih ang chi te kha (A Glossary. 32).  Chutiang zia, ‘metaphysical conceit’ hi Lalzuahliana poetry-ah pawh hian hmuh tur a awm ve tho va, mahse, ‘objective corelative’ nen erawh a hrang daih si a ni. Chu laiah chuan kan hampawlh mai loh nan kan hriat chian ve ve a ngai. Lalzuahliana poetry-ah hian ‘metaphysical conceit’ anga ngaih theih leh sawi tur hi  hmuh tur a awm ve reng reng a ni. Chu mai ni lovin, a hlate hi mi thlir lohna lam kawng dang- ‘stream of consciousness’ emaw ‘psycho-analysis’ lam hawi  zawnga thlir duh leh  zir zau zel duh tan pawh  kawngka chu hawnsa rengin a awm zawk e.

3.4 Philosophical Point of View aṭangin:

Lalzuahliana hla kalhmang hi  mitin huapzo, ‘universal’ a ni a; a hla tam berah hian hringnun chungchanga a ngaihdan leh hmuh dan hi a thukphum ber chu a ni a, chu chu a hla ‘lairil’ leh a hla pumpui kheh kheh hnua kan kheh chhuah tur ‘a chhungril’ tak (a philosophy inphum ru) chu a ni. H.Laldinmawia chuan, “ Hlaa ‘a philosophy’ kan tih hian…hla phuahtuin thlir dan danglam tak leh ril taka a thil thlir dan a puanchhuahna hi a ni,” (Literature Lamtluang, 47) a ti. Kawng danga sawi chuan a thupui (theme) leh a hla thupui tee maw ni lovin a hla phena a ‘suangtuahna ril tak ‘thought/idea’ a hlaa a phumruk emaw a dah emaw kan tih kha a ni.

Banhla kung pawh han kheh han kheh ila a chhungah hian a no ṭha telh telh a, a tawpah phei chuan a laimu, no tak mai kheh chhuah tur a lo inphum reng ang mai hian Lalzuahliana hlate pawh hi kheh kheh a ngai a, a ‘chhungril’ tak, a thukphum tak hai chhuak turin a kawr ti deuh ṭihtauh leh mawina, hlutna nei lo ang deuhva langte hi pawisa duh lo va a chhungril thleng tur leh a ‘suangtuahna ril’ leh ‘thuk tak’ phawrh chhuak ngei tura kan kheh ve a ngai ṭhin a ni. Chu ‘a philosophy ropui tak’ mai chu a ni ngei ang Laltluangliana Khiangte-in ‘Rangkachak ṭhi aia hlu leh thlan zawk tur’ a lo tih chiah chu ni.

4.A Hmawrbawkna:

Lalzuahliana poetry kalhmang leh ziarangte hi ‘Indo-Anglo Indian Poets’ kan tihho nen hian a inang hle mai a. Chung miten ‘tih dan hlui an hnawl’ angin Zuahliana pawh hian kan ‘hla phuah dan hmang’ hnawlin ‘tunlai danin’ a rawn phuah chhuak a. ‘Romanticism’ rawngkai ‘lungnona’ leh ‘duhaisamna’ satliah hnawl vein a hlate hi a tak a, a chiang a, a fiah lo ruai si a, a sawi chhuah dan hmang pawh a dang daih a ni. Tin, ‘paradox’ an uar em em angin ani pawhin ahmang uar hle a. Society chhung leh mihring nuna a lungawi lohnate pawh ‘irony’ hmangin a puang a; a changin miin a sawi tum an ‘varpawh’ mai loh nan thildang daih hmangin a sawi tum a sawi chhuak bawk a. Nissim Ezekiel poetry-te hi a theme chu ‘thlarau lam thil’-ah a pawhluh theih ang bawkin Zuahliana hlate pawh hi a ‘rau’ zawnga ngaih duh chuan rau ruih mai a ni bawk. A.K.Ramanujan-te angin ‘naupan lai’ leh ‘nunhlui ngaih lunglen’ (nostalgia) hi a hlaah hmuh tur a tam ve mai a. Kamala Das poetry-te angin ‘mahni inpuan chhuahna (confessional tone) hi a hla phuah dan ziarang leh kalhmang a ni hrim bawk. Tin, heng Modern Indian Poets-te aia penkhata Lalzuahliana kal falna chu a hlaah hian a chang chuan ‘Thim leh Eng’ hi a awmze letlingin a hmang fo a; ‘Nunna leh Thihna’-te pawh a landan ang ngawta hman loh chang a nei thin. Hei hi Zuahliana ‘style’ a ni a; a ‘dangdaina’ leh a ‘hlate tihartu’ leh ‘zir chian ngai’ bik nihtirtu a ni a, C.Lalawmpuia Vanchiau ṭawngkam hawhin ‘Zuahliana trade-mark’  a ni.

Chuvangin, a pawimawh berah chuan a hla pakhat ‘Beiseina Thar Se’ tiha beisei tur awm lo ang maia hringnun a thlir a, a sawi a, a tawp thlenga ‘tawpna ngaia au’ leh a tawpah pawh ‘Tawpna, a tawp nan’ a tih chhan ang ngeia  chu ‘tawpna’ chu tawp se ‘Beiseina Thar se’ a duh ang ngei hian a hla kalhmang, a ziarang leh a thuchah emaw a sawi tum leh a philosophy thlenga kan zir chian dawn hian ‘har tak angon’ lang mah se, ‘a harna tak hi a awlna a ni ve thei’ a ni tih hre rengin Zuahliana hla chungchangah beidawng lovin tha thara zir zel thei turin kan ‘Beiseinate hi thar reng se’, amah Zuahliana hla ropuizia hai chhuak a, hetiang taka Mizo Poetry-a bung thar min kaipuitu leh Mizo Literature khawhawi tizautu ‘Chawimawina’ atan  leh ‘Kan Chenna’ khawvel hi a hla hmanga nuam ti taka kan ‘chen’ zel theih nan Lalzuahliana hla zawng zawngte  ṭawngkam khat leka khaikhawmna- Escapism chungchanga Zuahliana sangawi zawnpuite thu leh hla hi lo tarlang teh.

“Poetry is not the turning loose of emotion; it is an escape from emotion       and it is not the expression of personality, it is an escape from personality”  (T.S.Eliot)

“You may say, I’m a Dreamer
But I’m not the only One
I hope someday you will join us
And the world will be us One” (John Lenon ‘Imagine’).

Appendix.

LALZUAHLIANA HLA KALHMANG LEH ZIARANG KHAIKHAWMNA

(A hla pathum-‘Chawimawina’, ‘Beiseina Thar Se’ tih leh ‘Kan chenna’ tih aṭang)

*A hla tam ber hi Mihring nun thlirna a ni. Mihring rilru put hmang, mihring nuna beidawnna leh manganna, a thim zawnga mihring nun thlirna a tam zawk mah niin a lang .

‘Beiseina thar se’ tih hla pawh hian beiseina chu sawi ve bawk mahse a hla pumpui han thlir hian beiseina, chawlhna, a awm miah lo va; mihring nun hahthlaktak chawlhna awmlohna khawvel a tar lang a ni.

‘Chawimawina’  tih hla pawh Mihringte’n kan rilru kan hriatchian lohzia leh, kan rilru put hmang hi kan nun kaihruaitu a nih dan te, thihna leh lungngaihna kan tana ṭha zawk a nih theih dan te, Mihring inang veka siam, mahse, kan rilru puthmang a zira danglam kan nih dante, Siamtu’n mihring  a din ropuizia leh rilru chakzia te, kan hmalam hun kan hriatlawk theih lohna hi a ṭhat zawk dante a sawi a. Mihring nun chi hrang hrang a tarlanna hla a ni.

‘Kan chenna’ tih hlaah pawh khawvel chhe lam hawizawnga thlirna (pessimistic view)  kan hmu a, mihring rilru chhia leh sual hlimthla chiang takin kan hmu a ni.

*Lalzuahliana hlate hi Mihring nun tarlanna anih ang chiah hian huam chin bik a nei lem lo (universal), rambial khat chhung chauh emaw, hnamkhat huamchhung chauh emaw ni lovin, khawvel mihring zawng zawng tana dik thei leh inrem thei vek a  ni. ‘kan chenna’ tih hlaah pawh hian indo chungchang sawi mahse, kawh bik a nei hran lo va, indonain mihring nun a tihchhiatzia tarlan a tum mai a ni.

*Sakhaw kawh langsar bik tak nei lem lo mahse, chhui luh talh duh chuan, Kristian Zirtirna  a zui ve deuh tiin a chhui luh theih a, sakhaw dang Hindu, Muslim rin dan kulmut tak takho phei hi chu hmuhtur a awm miah lo a tihtheih ang.

*Poetical word a uar lemlova, tawngkam pangngai hmangin hla  a phuah mai thin niin a lang. ṭawngkauchheh harsa tak tak a hmang thin bawk. ‘Nunna nun nan, Nunnaa a nun nan’ tih ang chi te hi a hmang tam hle a ni.

*A hunlai khawvel a zira ngaihdan danglam thei chi a hla phuahah hian a lang ngai lo va, eng hun leh hmunpawh millin hla a phuah mai ṭhin.

*Form hman bik a nei lem lo.‘Beiseina tharse’  tih hlaah chang khat chhungah tlar riat a awm a, ‘Kan chenna’ tih hlaah erawh chang khatah tlar 4 a awm thung, End rhyme emaw rhyme scheme mumal leh fel tak a nei ngailo a ni tlangpui.

*Ngun taka bih chet chet hnua hai chhuah theih chi chauh thuruk a inphum thin a, Bihchian leh belhchian viau loh chuan a sawi tum a hriat loh. Chuvangin, Philosophical poem a ni tlangpui.

*A hla thupui vuah chungchangah a thupui hi a ngai pawimawh ber lem lo niin a lang. A chhungthu phawk chhuak  fuh leh awmze ril nei thupui a vuah kher ngai lem lo va, thupui hran nei miah lo hla pawh a phuah nual reng a ni.

*A hla thuahte hian tlar hnih thum lek paw’n awmze thui tak leh mihring nun zeril tak a phawk chhuak thei a ni.

*LaLzuahliana hlaah reng reng hian Conclusion mumal tak a awm meuh lo. Hla phuahtu tam zawkin hla khaikhawmtu atana a tawpa inhnemna (relief) an dah thin ang hi Lalzuahliana hlaah hian hmuh tur a awm ve ngai lo mang lo a ni.

                                                                        (Source: MA Mizo File Note hlui).

Works Cited:

Abrams, M.H. A Glossary of Literary Terms: Third Edition.  New Delhi: Rajiv Beri for      Macmillan Publishers Pvt. Ltd. rpt.2009. Print.

Joshi, Dr. K.N & Agarwal, S.C. T.S.Eliot’s Three Essays. Bareilly: Prakash Book Depot,   Bara Bazar, Bareilly. 11th edn.1998-99. Print.

Khiangte, Dr.Laltluanglian. Thli fim:|hangthar Nun (Hlahril/Poem). Aizawl: LTL             Publication, Mission veng.  2001. Print.

—; Zalenpar Bu 1-na. Aizawl:L.T.L. Publication and Mizoram Publication Board, Mission Veng, Aizawl. 2003. Print.

Laldinmawia, H. Literature Lamtluang: Introduction to Study of Literary Theory & Criticism             Pune:Creativentures, India. 2015. Print.

Lalremliana. Nawmchenna Hrehawm (Essays, Short Stories & Poems). Aizawl:Mizoram    Publication Board. 2009. Print.

Lalzuahliana.   Lungmawl Selin. Aizawl: Lalhruaitluanga Ralte, Mission Vengthlang, Aizawl.         1992. Print.

Mitra, Zinia. Indian Poetry in English: Critical Essays. New Delhi:PHI Learning Private     Limited. 2012. Print.

Nongsiej, Hopefulson. “ Postmodernism: Paper Presentation on Contemporary Trends in    Christian Theology”. Bachelor of Divinity paper. Unpublised. File last modified on           10th September, 2006.  Microsoft Word.  File.

Note on “Lalzuahliana Hla Kalhmang leh Ziarang”. Mizo Department, MZU note. Unpublished. File last modified on 14th August,2012.  Microsoft Word.  File

Vanchiau, C.Lalawmpuia. Tapchhak Theory:Essays & Criticism. Aizawl: Lalrinpuia Ralte @         Sabereka Khuangkaih Publication. 2011. Print.

Vanchiau, C.Lalawmpuia. “Zuahliana Khawvel”. Zolife  Magazine, (Vol 8 Issue IV). 2013:           44-46. Print.

—; “Postmodernism leh LUNGSAKAWL Lemchan Thawnthu”. Zolife Magazine, (Vol 8   Issue I). 2013: 55-57.  Print.

[adToAppearHere]

—; “Lo Piang Ta Che Lalpa Isu: Postmodernism leh Fawr Kohhran”. Zolife  Magazine, July. 2011: 37-39. Print.

—; “ Zikpuii Pa leh Dari Pasal”. Zolife Magazine, June. 2011: 40-42. Print

Bibliography:

  1. Abrams, M.H. A Glossary of Literary Terms: Third Edition. New Delhi: Rajiv Beri   for        Macmillan Publishers Pvt. Ltd. rpt.2009. Print.
  2. Barry, Peter. Beginning Theory: Introduction to Literary Theory and Cultural Theory. New     Delhi: Viva Books Private Limited. Third Edition. rpt. 2014. Print.
  3. Butler, Christopher. Modernism: A Very Short Introduction. New York: Oxford University        2010. Print
  4. Cahoone, Lawrence E. From Modernism to Postmodernism: An Anthology. Oxford: Blackwell Publishers, UK. 2010.  PDF File.
  5. Joshi, Dr. K.N & Agarwal, S.C. S.Eliot’s Three Essays. Bareilly: Prakash Book Depot, Bara Bazar, Bareilly. 11th edn.1998-99. Print.
  6. Khiangte, Dr.Laltluanglian. Thli fim:|hangthar Nun (Hlahril/Poem). Aizawl: LTL Publication, Mission veng.  Print.
  7. —; Zalenpar Bu 1-na. Aizawl:L.T.L. Publication and Mizoram Publication Board, Mission Veng, Aizawl. 2003. Print.
  8. Laldinmawia, H. Literature Lamtluang: Introduction to Study of Literary Theory & Criticism Pune:Creativentures, India. 2015. Print.
  9. Nawmchenna Hrehawm (Essays, Short Stories & Poems). Aizawl: Mizoram          Publication Board. 2009. Print.
  10. Lungmawl Selin. Aizawl: Lalhruaitluanga Ralte, Mission Vengthlang,             Aizawl.  1992. Print.
  11. Levension, Michael, ed. The Cambridge Companion to Modernism. Cambridge: The Press    Syndicate of the University of Cambridge. Sixth edn. 2003.Print.
  12. Mitra, Zinia. Indian Poetry in English: Critical Essays. New Delhi:PHI Learning Private             2012. Print.
  13. Nongsiej, Hopefulson. “ Postmodernism: Contemporary Trends in Christian Theology”.       Bachelor of Divinity paper. Unpublised. File last modified on 10th             September,        Microsoft Word.  File.
  14. Note on “Lalzuahliana Hla Kalhmang leh Ziarang”. Mizo Department, MZU note. File last modified on 14th August,2012.  Microsoft Word.  File
  15. Sim, Stuart, ed. The Routlege Companion to Postmodernism. London: Routlege Taylor &          Francis Group, London and New York.  Third edn. 2011. Print.
  16. Vanchiau, C.Lalawmpuia. Tapchhak Theory:Essays & Criticism. Aizawl: Lalrinpuia Ralte @ Sabereka Khuangkaih Publication. 2011. Print.
  17. Vanchiau, C.Lalawmpuia. “Zuahliana Khawvel”. Zolife Magazine, (Vol 8 Issue IV).            2013:   44-46. Print.
  18. —; “Postmodernism leh LUNGSAKAWL Lemchan Thawnthu”. Zolife Magazine, (Vol 8 Issue I). 2013: 55-57.
  19. —; “Lo Piang Ta Che Lalpa Isu: Postmodernism leh Fawr Kohhran”. Zolife           Magazine,        2011: 37-39. Print.
  20. —; “ Zikpuii Pa leh Dari Pasal”. Zolife Magazine, June. 2011: 40-42. Print
  21. Vannghaka, Dr.K.C. Literature Kawngpui:Theory of Literature. Aizawl:Vanhlupuii, 2010. Print
  22. Woods, Tim. Beginning Postmodernism. New Delhi: Viva Books Private Limited. Second Edition. rpt.2011. Print.
  23. [adToAppearHere]

Leave a Reply

Your email address will not be published. Required fields are marked *

error: Content is protected !!